ຂ່າວສານຈາກຝ່າຍປະທານສູງສຸດ, ເດືອນເມສາ 2018
ເມື່ອເຮົາດຳເນີນໄປໜ້າດ້ວຍກັນ
ໂດຍ ປະທານ ຣະໂຊ ເອັມ ແນວສັນ
ອ້າຍເອື້ອຍນ້ອງທີ່ຮັກແພງ, ຂ້າພະເຈົ້າຖ່ອມຕົວ ທີ່ໄດ້ມາຢູ່ນຳທ່ານໃນເຊົ້າມື້ນີ້. ສີ່ມື້ຜ່ານມາ ພວກເຮົາໄດ້ໄປຮ່ວມງານສົ່ງສະການຂອງວິລະຊົນຜູ້ຍິ່ງໃຫຍ່ຄົນໜຶ່ງ, ຊຶ່ງເປັນສາດສະດາຂອງພຣະເຈົ້າ—ປະທານ ທອມມັສ ແອັສ ມອນສັນ. ບໍ່ມີຄຳໃດທີ່ສາມາດເອົາມາບັນຍາຍໄດ້ເຖິງຊີວິດ ທີ່ໃຫຍ່ໂຕ ແລະ ດີເດັ່ນຂອງເພິ່ນ. ຂ້າພະເຈົ້າຈະຖະໜອມຄວາມເປັນເພື່ອນຂອງພວກເຮົາ ດ້ວຍຄວາມກະຕັນຍູ ສຳລັບສິ່ງທີ່ເພິ່ນໄດ້ສອນຂ້າພະເຈົ້າ. ບັດນີ້ ເຮົາຕ້ອງເບິ່ງອະນາຄົດ ດ້ວຍສັດທາອັນເຕັມປ່ຽມ ໃນອົງພຣະເຢຊູຄຣິດ, ຊຶ່ງສາດສະໜາຈັກນີ້ ເປັນຂອງພຣະອົງ.
ສອງມື້ຜ່ານມານີ້ ອັກຄະສາວົກທັງໝົດ ໄດ້ຊຸມນຸມກັນຢູ່ໃນຫ້ອງຊັ້ນເທິງຂອງພຣະວິຫານເຊົາເລັກ. ຢູ່ໃນນັ້ນ ພວກເພິ່ນໄດ້ຕັດສິນໃຈຢ່າງເປັນເອກະສັນ, ທຳອິດ, ໃຫ້ຈັດຕັ້ງຝ່າຍປະທານສູງສຸດຂຶ້ນໃໝ່ຕອນນີ້ ແລະ, ສອງ, ວ່າໃຫ້ຂ້າພະເຈົ້າຮັບໃຊ້ເປັນປະທານຂອງສາດສະໜາຈັກ. ບໍ່ມີຄຳໃດ ທີ່ເໝາະສົມພໍ ທີ່ຈະເອົາມາບອກທ່ານ ວ່າຂ້າພະເຈົ້າຮູ້ສຶກແນວໃດ ທີ່ບັນດານ້ອງໆຂອງຂ້າພະເຈົ້າ—ນ້ອງໆຜູ້ດຳລົງຂໍກະແຈທັງໝົດຂອງຖານະປະໂລຫິດ ຊຶ່ງໄດ້ຖືກຟື້ນຟູຄືນມາໃໝ່ ຜ່ານທາງສາດສະດາ ໂຈເຊັບ ສະມິດ ໃນຍຸກສະໄໝນີ້—ໄດ້ວາງມືໃສ່ເທິງຫົວຂອງຂ້າພະເຈົ້າ ແລະ ແຕ່ງຕັ້ງຂ້າພະເຈົ້າເປັນທາງການ ໃຫ້ເປັນປະທານຂອງສາດສະໜາຈັກ. ມັນເປັນປະສົບການທີ່ສັກສິດ ແລະ ຖ່ອມຕົວຫລາຍ.
ແລ້ວມັນໄດ້ກາຍເປັນໜ້າທີ່ຮັບຜິດຊອບຂອງຂ້າພະເຈົ້າ ທີ່ຈະຮູ້ວ່າ ພຣະຜູ້ເປັນເຈົ້າໄດ້ຕຽມຜູ້ໃດໄວ້ ໃຫ້ມາເປັນທີ່ປຶກສາຂອງຂ້າພະເຈົ້າ. ຂ້າພະເຈົ້າຈະເລືອກພຽງແຕ່ສອງຄົນ ໃນບັນດາອັກຄະສາວົກສິບສອງໄດ້ແນວໃດ, ເພາະຂ້າພະເຈົ້າກໍຮັກທຸກຄົນຫລາຍທີ່ສຸດ? ຂ້າພະເຈົ້າມີຄວາມກະຕັນຍູຢ່າງເລິກຊຶ້ງ ທີ່ພຣະຜູ້ເປັນເຈົ້າໄດ້ຕອບຄຳອະທິຖານອັນແຮງກ້າຂອງຂ້າພະເຈົ້າ. ຂ້າພະເຈົ້າຂໍຂອບພຣະໄທ ທີ່ປະທານ ດາລິນ ແຮຣິສ ໂອກສ໌ ແລະ ປະທານ ເຮັນຣີ ເບັນນຽນ ໄອຣິງ ເຕັມໃຈ ທີ່ຈະຮັບໃຊ້ກັບຂ້າພະເຈົ້າ ເປັນທີ່ປຶກສາທີໜຶ່ງ ແລະ ທີສອງ, ຕາມລຳດັບ. ປະທານດີເດີ ແອັຟ ອຸກດອບ ກໍໄດ້ກັບຄືນໄປຫາທີ່ເດີມຂອງເພິ່ນ ໃນກຸ່ມອັກຄະສາວົກສິບສອງ. ເພິ່ນກໍໄດ້ຮັບໜ້າທີ່ມອບໝາຍທີ່ໃຫຍ່ໂຕໄປແລ້ວ ອັນທີ່ເໝາະສົມເປັນພິເສດ ສຳລັບເພິ່ນ.
ຂ້າພະເຈົ້າຂໍສັນລະເສີນເພິ່ນ ແລະ ປະທານໄອຣິງ ສຳລັບການຮັບໃຊ້ທີ່ດີເລີດຂອງພວກເພິ່ນ ໃນການເປັນທີ່ປຶກສາຂອງປະທານມອນສັນ. ພວກເພິ່ນມີຄວາມສາມາດ, ອຸທິດຕົນ, ແລະ ໃຫ້ການດົນໃຈຫລາຍ. ພວກເຮົາມີຄວາມກະຕັນຍູເປັນຢ່າງຍິ່ງຕໍ່ພວກເພິ່ນ. ໃນເວລານີ້ ແຕ່ລະຄົນກໍເຕັມໃຈທີ່ຈະຮັບໃຊ້ ຢູ່ໃນບ່ອນທີ່ຕ້ອງການພວກເພິ່ນຫລາຍທີ່ສຸດ.
ໂດຍທີ່ເປັນອັກຄະສາວົກຜູ້ມີຄວາມອາວຸໂສກວ່າຕໍ່ລົງມາ ຄົນທີສອງ, ປະທານໂອກສ໌ ຈຶ່ງກາຍເປັນປະທານກຸ່ມອັກຄະສາວົກສິບສອງ. ເຖິງຢ່າງໃດກໍຕາມ, ເມື່ອເພິ່ນຖືກເອີ້ນໃຫ້ມາເປັນຝ່າຍປະທານສູງສຸດ ແລະ ຕາມລະບຽບຂອງສາດສະໜາຈັກ, ປະທານ ເອັມ ຣະໂຊ ບາເລີດ, ຜູ້ມີຄວາມອາວຸໂສກວ່າຕໍ່ລົງມາ ຄົນທີສາມ, ຈະຮັບໃຊ້ເປັນປະທານກຸ່ມແທນຊົ່ວຄາວ. ຝ່າຍປະທານສູງສຸດ ຈະທຳງານຢ່າງຂະຫຍັນ ຄຽງບ່າຄຽງໄລ່ກັບອັກຄະສາວົກສິບສອງ ເພື່ອຈະໄດ້ຮູ້ຈັກເຖິງພຣະປະສົງຂອງພຣະຜູ້ເປັນເຈົ້າ ແລະ ນຳພາວຽກງານທີ່ສັກສິດຂອງພຣະອົງໄປໜ້າ.
ພວກເຮົາຂໍຂອບໃຈສຳລັບຄຳອະທິຖານຂອງທ່ານ. ຜູ້ຄົນຕະຫລອດທົ່ວໂລກໄດ້ອະທິຖານເພື່ອພວກເຮົາ. ໃນເຊົ້າຂອງວັນຕໍ່ຈາກມື້ທີ່ປະທານມອນສັນໄດ້ເສຍຊີວິດໄປ, ເດັກນ້ອຍຜູ້ຊາຍຄົນໜຶ່ງ ອາຍຸສີ່ປີ ຊື່ ເບັນສັນ ໄດ້ອະທິຖານເພື່ອພວກເຮົາ. ຂ້າພະເຈົ້າຂໍກ່າວຖ້ອຍຄຳທີ່ຍົກເອົາມາຈາກຈົດໝາຍຂອງແມ່ລາວ ທີ່ໄດ້ສົ່ງມາໃຫ້ ເວັນດີ ພັນລະຍາຂອງຂ້າພະເຈົ້າ. ທ້າວເບັນສັນ ໄດ້ອະທິຖານວ່າ, “ໂອ້ ພຣະບິດາເທິງສະຫວັນ, ຂໍຂອບພຣະໄທພຣະອົງ ທີ່ປະທານ ທອມມັສ ແອັສ ມອນສັນ ສາມາດເຫັນເມຍຂອງເພິ່ນອີກ. ຂໍຂອບພຣະໄທພຣະອົງສຳລັບສາດສະດາຄົນໃໝ່. ຂໍຈົ່ງຊ່ວຍເພິ່ນໃຫ້ມີຄວາມກ້າຫານ ແລະ ບໍ່ຢ້ານກົວ ໃນຕຳແໜ່ງໃໝ່ຂອງເພິ່ນ. ຂໍຈົ່ງຊ່ວຍເພິ່ນໃຫ້ເຕີບໂຕ, ມີສຸຂະພາບແຂງແຮງ, ແລະ ເຂັ້ມແຂງ. ຂໍຈົ່ງຊ່ວຍເພິ່ນໃຫ້ມີພະລັງ ເພາະເພິ່ນມີຖານະປະໂລຫິດ. ແລະ ຂໍຈົ່ງຊ່ວຍພວກຂ້ານ້ອຍໃຫ້ເປັນຄົນອ່ອນຫວານສະເໝີ.”
ຂ້າພະເຈົ້າຂອບພຣະໄທພຣະເຈົ້າສຳລັບເດັກນ້ອຍເຊັ່ນນີ້ ແລະ ສຳລັບພໍ່ແມ່ຜູ້ຕັ້ງໃຈ ທີ່ຈະເປັນຄົນຊອບທຳ, ເອົາໃຈໃສ່ໃນການເປັນພໍ່ແມ່—ສຳລັບພໍ່ແມ່ທຸກຄົນ, ຄູສອນ, ແລະ ສະມາຊິກ ຜູ້ທີ່ແບກຫາບພາລະໜັກໜ່ວງ ແລະ ຍັງຮັບໃຊ້ດ້ວຍຄວາມເຕັມໃຈ. ໃນອີກຄຳໜຶ່ງ, ສຳລັບທ່ານທຸກຄົນ, ຂ້າພະເຈົ້າມີຄວາມກະຕັນຍູດ້ວຍຄວາມຖ່ອມຕົວ.
ພຣະຜູ້ເປັນເຈົ້າເປັນຜູ້ນຳ
ເມື່ອເຮົາດຳເນີນໄປໜ້າດ້ວຍກັນ, ຂ້າພະເຈົ້າຂໍເຊື້ອເຊີນທ່ານໃຫ້ຄິດກ່ຽວກັບຄຸນສົມບັດທີ່ສະຫງ່າງາມ ຊຶ່ງໂດຍແບບນັ້ນ ທີ່ພຣະຜູ້ເປັນເຈົ້າປົກຄອງສາດສະໜາຈັກຂອງພຣະອົງ. ເມື່ອປະທານຂອງສາດສະໜາຈັກເສຍຊີວິດໄປ, ມັນບໍ່ໄດ້ເປັນເລື່ອງລຶບລັບກ່ຽວກັບຄົນຕໍ່ໄປທີ່ຈະຖືກເອີ້ນໃຫ້ຮັບໃຊ້ໃນຕຳແໜ່ງນັ້ນ. ມັນຈະບໍ່ມີການອອກຄະແນນເລືອກຕັ້ງ, ຫລື ການໂຄສະນາຫາສຽງ, ມີແຕ່ດຳເນີນການ ຕາມວຽກງານທີ່ງຽບໆ ຂອງແຜນແຫ່ງສະຫວັນຂອງການຮັບຕຳແໜ່ງຕໍ່ເທົ່ານັ້ນ, ຊຶ່ງພຣະຜູ້ເປັນເຈົ້າເອງ ໄດ້ຈັດຕັ້ງໄວ້.
ການຮັບໃຊ້ໃນແຕ່ລະວັນຂອງອັກຄະສາວົກ ເປັນວັນແຫ່ງການຮຽນຮູ້ ແລະ ຕຽມສຳລັບໜ້າທີ່ຮັບຜິດຊອບຢ່າງອື່ນໆ ໃນອະນາຄົດ. ມັນຈະໃຊ້ເວລາເປັນສິບໆປີ ສຳລັບອັກຄະສາວົກຄົນໜຶ່ງ ທີ່ຈະເລື່ອນຈາກການເປັນລຸ້ນນ້ອງ ເຖິງ ການເປັນລຸ້ນອ້າຍ ຢູ່ໃນກຸ່ມ. ໃນໄລຍະເວລານັ້ນ, ເພິ່ນຈະໄດ້ຮັບປະສົບການໂດຍກົງ ໃນວຽກງານແຕ່ລະດ້ານຂອງສາດສະໜາຈັກ. ເພິ່ນກໍຍັງຮູ້ຈັກກັບຜູ້ຄົນຢູ່ໃນໂລກນີ້ຢ່າງຫລວງຫລາຍ, ຮ່ວມທັງປະຫວັດ, ວັດທະນະທຳ, ພາສາຂອງເຂົາເຈົ້າ ເມື່ອພວກເພິ່ນໄດ້ຖືກມອບໝາຍຫລາຍໆເທື່ອ ໃຫ້ໄປຫາທົ່ວໂລກ. ຂັ້ນຕອນຂອງການຮັບຕຳແໜ່ງຕໍ່ ໃນການເປັນຜູ້ນຳຂອງສາດສະໜາຈັກນີ້ ແມ່ນພິເສດຫລາຍ. ຂ້າພະເຈົ້າບໍ່ຮູ້ຈັກສິ່ງອື່ນໃດ ທີ່ເປັນແບບນີ້. ບໍ່ຄວນເປັນສິ່ງແປກສຳລັບເຮົາ, ເພາະນີ້ແມ່ນສາດສະໜາຈັກຂອງພຣະຜູ້ເປັນເຈົ້າ. ພຣະອົງບໍ່ໄດ້ທຳງານຕາມລະບຽບຂອງມະນຸດ.
ຂ້າພະເຈົ້າໄດ້ຮັບໃຊ້ຢູ່ໃນກຸ່ມອັກຄະສາວົກສິບສອງ ພາຍໃຕ້ປະທານຂອງສາດສະໜາຈັກທີ່ຜ່ານມາ ຫ້າທ່ານ. ຂ້າພະເຈົ້າໄດ້ເຫັນປະທານແຕ່ລະທ່ານ ໄດ້ຮັບການເປີດເຜີຍ ແລະ ຕອບສະໜອງຕໍ່ການເປີດເຜີຍນັ້ນ. ພຣະຜູ້ເປັນເຈົ້າເຄີຍ ແລະ ຈະແນະນຳ ແລະ ດົນໃຈສາດສະດາຂອງພຣະອົງສະເໝີໄປ. ພຣະຜູ້ເປັນເຈົ້າເປັນຜູ້ນຳ. ພວກເຮົາຜູ້ໄດ້ຮັບການແຕ່ງຕັ້ງໃຫ້ເປັນພະຍານເຖິງພຣະນາມທີ່ສັກສິດຂອງພຣະອົງ ຕະຫລອດທົ່ວໂລກ ຈະສືບຕໍ່ສະແຫວງຫາທີ່ຈະຮູ້ຈັກພຣະປະສົງຂອງພຣະອົງ ແລະ ເຮັດຕາມນັ້ນ.
ຈົ່ງຢູ່ໃນເສັ້ນທາງແຫ່ງພັນທະສັນຍາ
ບັດນີ້, ຕໍ່ສະມາຊິກແຕ່ລະຄົນຂອງສາດສະໜາຈັກ, ຂ້າພະເຈົ້າກ່າວວ່າ, ຈົ່ງຢູ່ໃນເສັ້ນທາງແຫ່ງພັນທະສັນຍາ. ຄວາມຕັ້ງໃຈຂອງທ່ານທີ່ຈະຕິດຕາມພຣະຜູ້ຊ່ວຍໃຫ້ລອດ ໂດຍການເຮັດພັນທະສັນຍານຳພຣະອົງ ແລະ ແລ້ວຮັກສາພັນທະສັນຍາເຫລົ່ານັ້ນ ຈະເປີດປະຕູຂອງພອນທາງວິນຍານທຸກປະການ ໃຫ້ສຳລັບຊາຍ, ຍິງ, ແລະ ເດັກນ້ອຍ ໃນທຸກແຫ່ງຫົນ.
ໂດຍທີ່ເປັນຝ່າຍປະທານສູງສຸດກຸ່ມໃໝ່, ພວກເຮົາຢາກເລີ່ມຕົ້ນ ໂດຍມີທີ່ສຸດຢູ່ໃນໃຈ. ເພາະດ້ວຍເຫດນີ້, ພວກເຮົາຈຶ່ງກ່າວກັບທ່ານໃນມື້ນີ້ ຈາກພຣະວິຫານ. ທີ່ສຸດດັ່ງກ່າວ ທີ່ເຮົາແຕ່ລະຄົນພະຍາຍາມໄປເຖິງ ແມ່ນການຮັບເອົາຂອງປະທານສັກສິດ ພ້ອມດ້ວຍພະລັງ ຢູ່ໃນບ້ານຂອງພຣະຜູ້ເປັນເຈົ້າ, ໄດ້ຜະນຶກເຂົ້າກັບຄອບຄົວ, ຊື່ສັດຕໍ່ພັນທະສັນຍາ ທີ່ໄດ້ເຮັດຢູ່ໃນພຣະວິຫານ ຊຶ່ງຊ່ວຍເຮົາໃຫ້ເໝາະສົມກັບຂອງປະທານທີ່ຍິ່ງໃຫຍ່ທີ່ສຸດຂອງພຣະເຈົ້າ—ຄືຊີວິດນິລັນດອນ. ພິທີການຂອງພຣະວິຫານ ແລະ ພັນທະສັນຍາທີ່ທ່ານເຮັດຢູ່ໃນນັ້ນ ຄືສິ່ງສຳຄັນທີ່ຈະເພີ່ມຄວາມເຂັ້ມແຂງໃຫ້ແກ່ຊີວິດ, ການແຕ່ງງານ ແລະ ຄອບຄົວ, ແລະ ຄວາມສາມາດຂອງທ່ານ ໃນການຕໍ່ຕ້ານກັບການໂຈມຕີຂອງຜູ້ປໍລະປັກ. ການນະມັດສະການຢູ່ໃນພຣະວິຫານ ແລະ ການຮັບໃຊ້ສຳລັບບັນພະບຸລຸດຂອງທ່ານ ຈະເປັນພອນໃຫ້ແກ່ທ່ານ ໂດຍການເພີ່ມການເປີດເຜີຍສ່ວນຕົວ ແລະ ຄວາມສະຫງົບສຸກໃຫ້ທ່ານ ແລະ ຈະປົກປ້ອງຄວາມຕັ້ງໃຈຂອງທ່ານ ເພື່ອໃຫ້ຢູ່ໃນເສັ້ນທາງແຫ່ງພັນທະສັນຍາ.
ບັດນີ້, ຖ້າຫາກທ່ານໄດ້ຍ່າງອອກໄປຈາກເສັ້ນທາງ, ຂ້າພະເຈົ້າຂໍເຊື້ອເຊີນທ່ານ ດ້ວຍຄວາມຫວັງທັງໝົດຂອງໃຈ ເພື່ອຂໍໃຫ້ທ່ານກັບມາ. ບໍ່ວ່າຄວາມເປັນຫ່ວງເປັນໃຍຂອງທ່ານ, ການທ້າທາຍຂອງທ່ານຈະເປັນແນວໃດກໍຕາມ, ແຕ່ຍັງມີບ່ອນສຳລັບທ່ານຢູ່, ຢູ່ໃນສາດສະໜາຈັກຂອງພຣະຜູ້ເປັນເຈົ້ານີ້. ທ່ານ ແລະ ເຊື້ອສາຍຂອງທ່ານທີ່ຍັງບໍ່ໄດ້ເກີດເທື່ອ ຈະໄດ້ຮັບພອນ ໂດຍການກະທຳຂອງທ່ານ ທີ່ຈະກັບຄືນມາຫາເສັ້ນທາງແຫ່ງພັນທະສັນຍາໃນເວລານີ້. ພຣະບິດາຂອງເຮົາຜູ້ສະຖິດຢູ່ໃນສະຫວັນ ຈະທະນຸຖະໜອມລູກໆຂອງພຣະອົງ, ແລະ ພຣະອົງຢາກໃຫ້ເຮົາແຕ່ລະຄົນກັບຄືນໄປບ້ານ ຫາພຣະອົງ. ນີ້ຄືເປົ້າໝາຍທີ່ສຳຄັນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ—ທີ່ຈະຊ່ວຍເຮົາແຕ່ລະຄົນໃຫ້ກັບຄືນບ້ານ.
ຂ້າພະເຈົ້າຂໍສະແດງຄວາມຮັກອັນເລິກຊຶ້ງຕໍ່ທ່ານ—ຄວາມຮັກທີ່ເຕີບໂຕມາເປັນເວລາຫລາຍສິບປີແລ້ວ ຈາກການໄດ້ພົບເຫັນທ່ານ, ນະມັດສະການກັບທ່ານ, ແລະ ຮັບໃຊ້ຮ່ວມກັບທ່ານ. ໜ້າທີ່ມອບໝາຍ ທີ່ສູງສົ່ງຂອງເຮົາ ຄືທີ່ຈະໄປຫາທຸກປະຊາຊາດ, ທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ, ໃນການຊ່ວຍຕຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ. ພວກເຮົາຈະເຮັດສິ່ງນີ້ດ້ວຍສັດທາໃນອົງພຣະເຢຊູຄຣິດເຈົ້າ, ໂດຍທີ່ຮູ້ວ່າ ພຣະອົງເປັນຜູ້ນຳພາ. ນີ້ແມ່ນວຽກງານຂອງພຣະອົງ ແລະ ສາດສະໜາຈັກຂອງພຣະອົງ. ພວກເຮົາແມ່ນຜູ້ຮັບໃຊ້ຂອງພຣະອົງ.
ຂ້າພະເຈົ້າຂໍປະກາດຄວາມອຸທິດຕົນຂອງຂ້າພະເຈົ້າຕໍ່ພຣະເຈົ້າ ອົງເປັນພຣະບິດານິລັນດອນຂອງເຮົາ ແລະ ຕໍ່ພຣະບຸດຂອງພຣະອົງ, ພຣະເຢຊູຄຣິດ. ຂ້າພະເຈົ້າຮູ້ຈັກພວກພຣະອົງ, ຮັກພວກພຣະອົງ, ແລະ ປະຕິຍານທີ່ຈະຮັບໃຊ້ພວກພຣະອົງ—ແລະ ທ່ານ—ດ້ວຍທຸກລົມຫາຍໃຈ ຂອງຊີວິດຂ້າພະເຈົ້າ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.
© 2018 ໂດຍ Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, April 2018. Laotian. 15048 331