Te vāhi hāmanira’a tīa’a a Abuelo
Tē ora nei te ta’ata pāpa’i i Utaha, Marite.
« ’Ua ’ite ’oe, e ti’a ia tātou ’ia riro atu mai teie tīa’a te huru », parau mai ra o pāpā rū’au.
« ’Tē tātarahapa nei au’ e ’ere i te mea ’ōhie ’ia parau » (Buka Hīmene a te mau Tamari’i, 98).
’Ua ’iriti Miguel i te ’ōpani nō te fare hāmanira’a tīa’a ’a tōna ra pāpā rūa’u. ’Ua hau’a ’oia i te ’iri pua’a tā te pāpā rū’au e fa’a’ohipa ra. O te hō’ē o tāna mau hau’a au roa ’ino.
« Iaorana, e pāpā rūa’u ! »
Tē tūturi ra o pāpā rūa’u nō te nana’o i te ’āvae o te hō’ē hōani i ni’a i te hō’ē ’api parau. ’Aita ’oia i hi’o mai i ni’a. E ’ere te tari’a ’o pāpā rū’au i te mea maita’i roa.
’Ua pārahi atu ’o Miguel i ni’a i te pārahira’a ’ohipa. ’Ua hi’o atu ’oia i te tā o te mau ’iri pua’a tei tāpūpūhia. ’Ua mana’ona’o ’oia e aha ra ïa tā pāpā rū’au e rave i te ’iri pua’a tātai’tahi, ma te fa’a’ohipa i tāna hāmara ’e te raveravei.
’Ua fa’aha’amana’o te mau mauha’a ’ia Miguel i te tahi ’ē atu mea i auhia e āna. ’Ua hōro’a noa pāpā rū’au iāna i te hō’ē tufa’a monamona i te mau taime ato’a e tauturu Miguel iāna i te tāmā.
’Ua po’ia rā Miguel i teie nei ! ’Ua ’ite ’oia e’ita e ti’a iāna ’ia rave i te tahi mā’a ma te ’ore e ani, mai te mea ra ē e mea ’ohipa roa ’o pāpā rū’au i teie nei. « E’ita paha vau e tīa’i », feruri a’era ’o Miguel.
’Ua toro atura ’o Miguel i tōna rima i raro a’e i te ’iri ’amura’a mā’a nō te mōhina monamona. ’Ua ’ī te reira i tāna monamona i au roa—monamona ’e te ’ava’ava ’e te ’oporo puehu ! I tōna tātarara’a i te mōhina, ’ua huru ’ē ri’i ’o Miguel. E mea au maita’i rā te monamona. ’Ua ha’avitiviti ’oia ’e ’ua tu’u atu i roto i tōna ra vaha.
’Aita i maoro roa atu ’ua haere atu te hōani. ’Ua ’ohi mai o pāpā rū’au i te tahi tufa’a ’iri pua’a ’e ’ua taumi atu i roto i te pape. Nā te reira e ha’amarū i te ’iri pua’a e mea ’ōhie nō te fa’a’ohipa i te reira.
’Ua horomi’i vitiviti noa ’o Miguel i te toe’a o te monamona. I muri iho ’ua haere ti’a atu ’oia ia pāpā rū’au ra.
« Iaorana ! » ’Ua parau mai ra ’o pāpā rū’au ma te ’ata’ata. « Tē ’oa’oa nei au ’e ’ua haere mai ’oe e fārerei iā’u ».
’Ua tauahi atu Miguel ia pāpā rū’au. ’Ua ti’aturi ’oia ē e’ita e nehenehe ia pāpā rū’au ’ia parau ē ’ua ’amu ’oia i te hō’ē monamona. ’Ua tu’u atu ’o Miguel i te reira mana’o pe’ape’a i te hiti.
« E au ra e mea ’ohipa roa ’oe i teie mahana », parau atura ’o Miguel, ma te fa’atoro atu i te ha’apu’era’a ’iri pua’a. « Tē hina’aro ra ānei ’oe i te tahi tauturu ? »
« ’Oia mau ! E nehenehe ānei tā ’oe e hōro’a mai i taua taura ra ? »
’Ua rave mai ra ’o Miguel i te hō’ē taura huru roa. ’Ua huti ’oia i te reira i tōna nā rima. E mea huru pa’ari ’ia hi’ohia atu.
« Wow, ’e mea pa’ari mau ».
’Ua ’ata a’era ’o pāpā rū’au. « E ti’a ’ia vai pa’ari noa, ’ia maoro roa i te fa’aohipara’a ». ’Ua huti ihora pāpā rū’au i te taura nā roto i te ’iri pua’a. I muri iho ’ua hi’o mai ra ’oia mai tā māmā rū’au i pi’i te hōho’a mata ’o « pāpā rū’au te ta’ata pa’ari »
« ’Ua ’ite ’oe, e ti’a ia tātou ’ia riro atu mai teie tīa’a te huru », parau mai ra ’o pāpā rū’au ma te ta’iri’iri i tōna upo’o.
’Ua hi’o tā’ao’ao a’e ra ’o Miguel i te ’iri pua’a. « Um. Nā reira ihoa tātou ? »
« ’Ē, ’oia mau. E ti’a ia tātou ’ia fa’aea pa’ari noa. E’ita ïa te mau fa’ahemara’a a Sātane e ha’amarua ia tātou ».
’Ua pura a’era te monamona ’ute’ute i roto i te ferurira’a ’o Miguel. ’Ua ’ite ’oia ē e ti’a iāna ’ia parau atu ia pāpā rū’au i te mea tei tupu.
’Ua rave mai ra ’o pāpū rū’au i te hō’ē tīa’a tahiti i ni’a i te pa’epa’e. « Te ’ite ra ’oe i teie ’āpo’o iti rahi ? »
’Ua nehenehe ia Miguel e tu’u i tōna rima nā roto atu i te ’āpo’o. « ’Ē ».
« E ’āpo’o na’ina’i teie nā mua a’e e nehenehe i te tātā’i-’ōhie-hia. ’Ua tīa’i rā rātou ’e e mea fifi roa i teie nei i te tātā’i. Mai taua ’āpo’o ato’a ra te huru te mau peu ’ino ’e te mau mā’itira’a ’ino. E mea maita’i a’e ’ia tātā’i ’oi’oi ia rātou ».
’Ua tā’iri’iri fa’ahou ’o pāpā rū’au i te upo’o, ’e ’ua riro mai te hōho’a mata ’o pāpā rū’au te ta’ata pa’ari ’ei mata ’ata’ata. ’Ua tāmau noa rāua i te paraparau ’a rave noa ai pāpā rū’au i te ’ohipa. ’Ua tāmau noa ’o Miguel i te feruri i te roara’a o te taime i te monamona ’ute’ute.
’Ia oti pāpā rū’au i tāna ’ohipa, ’ua tauturu Miguel iāna i te tāmā. I muri iho ’ua ti’i atu pāpā rū’au i tāna mōhina monamona.
I te pae hope’a ’aita i nehenehe fa’ahou ia Miguel i te tāpe’a. ’Ua parau a’era ’oia, « ’ua rave au i te hō’ē o tā ’oe mau monamona ! »
’Ua tu’u pāpā rū’au i te mōhina i raro. « E aha te reira mea ? »
’Ua fa’ati’a atu Miguel iāna ’ē ’ua rave ’oia i te monamona ma te ’ore i ani atu iāna. « Tē tātarahapa nei au e pāpā rū’au ! E’ita vau e nā reira fa’ahou, tē fafau atu nei au ! »
’Ua ’apa maita’i atura ’o papā rū’au iāna. ’Ua maita’i roa ’o Miguel i teie nei.
« Māuruuru nō tō ’oe fa’a’itera’a i te parau mau. E mea faufa’a rahi te reira nō’u hau atu i te tahi ’ē atu mea ».
I tōna ho’ira’a atu i te fare, ’ua mana’o ’o Miguel ē ’ua riro ’oia mai te hō’ē o te mau pea tīa’a ’āpī a pāpā rū’au. Pūai ’e ’ia ’ineine nō te orara’a !