Klumech er a First Presidency, Ongeua el Buil 2018

Chelecha el Dedak Lomakes el Bedul Uchei

Mla er a President Russell M. Nelson

Rodam me a rodos er ngak, a kumelchesiu er a klengariou el reng el kteloi er kemiu er chelechal tutau. Eua el klebesei er a memong e kede mlo doklii a smiich el chad, el profet er a Dios—President Thomas S. Monson. Ng diak a tekoi el smodii a blekerdelel me a klungiolel a klengar ngii. Ak di mereko el urrekodel er a klausechelei er kemam loba omereng el saul er a osisechakl le bilskak. Chelecha eng kired lomes el bedul a ngarmedad loba cherrungel el klaumerang er a Rubak el Jesus Kristo, el tial Ikelesia a kloklel.

Eru el klebesei er a memong e a rokui el Apostol a mlo kebetech er sel ngarbab el delmerab er a chelsel a Salt Lake Temple. Seikid e te tilbir el diak lokiu a sengkyo, el kot, a lemuut el toketekii a First Presidency, e a, ongerung, e ngak a mo Merredel er a Ikelesia. Ng diak a tekoi el smodii sel ngii a kulmelchesiu er ngii el Rodam—er ngak—Rodam el tir a urrekdoel aikel rokui el kiis er a priesthood el mloluut el mo er a Profet Joseph Smith er chelechal taem a ngilai chimorir locha er a bebul a bdeluk e chemedolak e oterkeklak el Merredel er a Ikelesia. Ng meral mle chedaol e omotech a reng el teletael.

Meng mocha ngerchelek el melilt el kmo te ngerang a soal a Rubak a le bo el counselors er ngak. Ak mekerang e melilt er a delongelir tirkal Teruich me a teru el Apostol, el kmal betik a renguk er tir? A kuba dmolech lomereng el saul el mo er a Rubak el ulenger er a ongtik. A kmal mereng a saul el President Dallin Harris Oaks me a President Henry Bennion Eyring a semeriar el mo mesiou lobengkek, el Kot me a Ongeru el Counselor. A President Dieter F. Uchtdorf a mla lemuut el nguu a basio er ngii er a chelsel a Chelechad er a Teruich me a teru el Apostol. Ng mla ngmai a tela el meklou el ngerachel el kmal sebechel kudmokl.

Ak chotengii me a President Eyring er a chetengakl lomesiungir el counselor er a President Monson. Te kmal meduch, e blak a rengrir, e oba llomes. Aki kmal mui er a omereng el saul el kirir. A dersta er tir a kongei el mo mesiou er a ikel ngii a kot el usbechall.

Me ngii el uaia longeru el klou el chad er a Reapostol, e a President Oaks a mo Merredel er a Chelechad er a Teruich me a teru el Apostol. E ng di, tial okedongel el mo er a First Presidency e a doltirakl a teletael er a chelsel a Ikelesia, e a President M. Russell Ballard, el ngii a tara klou el chad, a mo mesiou Lomtechei el Merredel er tial chelechad. A First Presidency a mo dmak loureor lobengterir a Reteruich me a teru losiik er sel soal a Rubak e meruul a chedaol Urerel.

Aki mereng a suliu er a nglunguchiu. Aikal nglunguuch a mla medung er a beluulechad el rokir el kiram. Sel tutau er a bol secher a President Monson, e a tara ikaikid el nglunguuch a ledilii a eua rekil buik el ngklel a Benson. Ak mo choiuii a telkib er a nglunguchel el delal a lilchesii el mo er a bechik, er a Wendy. A Benson a miluluuch el kmo, “Chedam er a Babeluades, ke mesulang el President Thomas S. Monson a sebechel lemuut el mesa bechil. Ke mesulang er a beches el profet er kemam. Mngeseuir el mo mesisiich a rengul e lak bol medakt el kmo ng beches. Mngeseuir el mukeroul el mo mesisiich a bedengel. Mngeseuir el mo er ngii a klisichel le ngii loba priesthood. E mngesukemam el mo blechoel meruul a ungil.”

Ak mereng a sulel a Dios er a uai tirkal ngalek me a rechedam me a rechedil el tir a blak a rengrir el kirel a melemalt, e klou a belkul ulekeroul er a rengalek— er a rebek el oungalek el chad, resensei, me a rchedal er a ikelesia el chellungel a berraod e ng di te melemolem el mesiou. Ng belkul a kmo, a kmal mereng a sulir, a dersta er kemiu.

A Rubak Oba Ongeu

Chelechal domekesa el bedul uchei, e ak siotai er kemiu el mo melbedebek el kirel a mesisiich el teletael el Rubak obang e omtebechel er a Ikelesia er Ngii. Sel le mad a merredelel a Ikelesia, eng diak a rraureng el kmo ng techa kuk mo mokedong el mo er tial deruchall. Ng diak a teletael er a sengkyo, diak a campaign, ng kmal di ultuil er a chedaol moktek, el Rubak a Ngii a mla kudmeklii.

A bek el sils er a chelsel a klengar er a Apostol a sils er a omesuub me a omengedmokl el kirel a lemuut el bebil er a ngerachel er a ngarmedal taem. Ngultuil er a klemengetel a taem me a rak er a omesiungel a Apostol e ngii a ngoriakl el mo er a ngarbab el deruchall. Chelsel tiaikid el taem, e ngii a ngmai aikel rokui el telengtengil a urerel a Ikelesia. Ng dirrek el merael mo medengelii a teletael er a rechad er a beluulechad, luldimukl a reksi er tir, siukang, omelekoi lultuil er a urerel el di liueklii a beluulechad el rokir. Tiaikid el teletael er a omerredel er a chelsel a Ikelesia a kmal tokubets. Ng diak a ngodech el teletael el kudengelii el uai ngii. E diak el kirel mechas a rengud er ngii el teletael, le tiang a Ikelesia er a Rubak. Ngii a diak loureor el uaia teletelel a chad.

Ak mla mesiou er a chelsel a Chelechad er a Teruich me a terung er cheungir a reteim el mle Merredel er a Ikelesia. Ak mla mesterir a dersta er tirkal Merredel el ngmai chedaol ocholt e otirakl el remuul. A Rubak a di blechoel e melemolem el uaisei lolisechakl e omekrael er a reprofet er Ngii. A Rubak oba ongeu. Kemam el mla mechedaol el mo sioning er a chedaol Ngklel el mo er a beluulechad a mo melemolem losiik el mo medengelii a Soal e oltirakl er ngii.

Molemolem el ngara Rael

Chelecha, e a tekingek el mo er a bek el chedal a Ikelesia a kmo, molemolem el ngara rael er a telbiil. Sel blak el reng er kemiu loltirakl er a Osobel lokiu a telbiil Lobengkel e oltirakl aikal telbiil a mo mekengii a chesimer el kirel chedaol klengeltengat me a techall el kirir a rokui el sechal, redil, me a rengalek er a ngii di el ker.

Me kemam el beches el Presidency, a somam lomuchel loba tekoi er a ulebongel er a uldesuam. Tiaikid a uchul, e a ki ngara templo e mengedecheduch er kemiu er chelechal sils. A ulebongel el dersta er kid osiik er ngii a mo ngmai a klengeltengat er a chelsel a blil a Rubak, mo moak el telungalek, e blak a rengud loltirakl a telbiil el mekedmokl er a chelsel a templo el ngii a mo uchul e kede mo nguu sel ngarbab el sengk er a Dios— er a diak a ulebengelel klengar. A chedaol ruoll er a chelsel a templo me a telbiil el mruul er a chelsel a ngii a mo smisichii a klengar kau, chebechiielem me a telungalek er kau, me a techellem el mo odngakl odechelakl er a cherarou. A omengull er kau er a chelsel a templo me a omesiungem el kirir a rebeldekem a mo klengeltengat leko er kau e mo smisiiich chedaol ocholt me a budech e smisichii a blak el reng er kau el melemolem el ngara rolel a telbiil.

Chelechang, e a lsekum e ke mla touchakl er a rael, e ak siotai er kau loba rokir el urungulel a renguk el kmo mluut el mei. Ngii di el mondai er kau, ngii di lolibesongel el teletael, e ngarngii a basio el kirem, er a chelsel a Ikelesia er a Rubak. Kau me a merael mei el telcheroll a mo mukngeltengat lokiu omerellem er chelechang el lemuut el mei er a rael er a telbiil. A Demad er a Babeluades a mengeluolu er a Rengelekel, e soal a lluut el mo remei el mo er Ngii. Tiaikid a ngaruchei el moktek er a Ikelesia er a Jesus Kristo er a Uriul klebesei el Santo— el ngoseuir a dersta er kid el lemuut el mo remei.

A kudersii a dmolech el beltkil a renguk el kiriru el ngii a mla mukeroul el beltik el reng er a chelsel aika el mereko el tela el rak, el bla dedak el ngara omengull, e kusiou el kiriu. A chedaol ngercheled a mo er a bek el beluu, kebliil, omelekoi, me a rechad, lolngeseu el mengedmokl er a Ongeru Lemei a Rubak. Tiang a bo doruul er ngii lultuil er a klaumerang er kid er a Rubak el Jesus Kristo, e medengei el kmo Ngii a oungerachel. Tiang a Urerel e Ikelesia er Ngii. Kid a mesiungel.

Ak mchisii a blak el reng er ngak el mo er a Dios el Diak a Ulebengelel el Demad me a Ngelekel, er a Jesus Kristo. Ak Medengelterir, e betik a renguk er Tir, e tongetengii a klengar ngak el mesiou erTir— me kemiu— er chelechal dirk ngar. El ngara chedaol ngklel a Jesus Kristo, amen.