Presiden Russell M. Nelson: God i Lidim Hem, Rere long Hem mo Hem i Komitim Hem
Afta we hem i bin spendem plante plante yia blong stap mekem gud hat blong ol man olsem wan dokta blong hat, mo afta blong tajem hat blong ol man olsem wan Aposol blong Lod Jisas Kraes, Presiden Russell M. Nelson i kam wetem wan han mo wan lav we i strong insaed long seves ia blong hem olsem Presiden blong Jos.
Taem wan Presiden blong Jos i ded, plante oli stap lukluk long rod ia we bae oli jusum huia i kam afta long hem. Be, rod ia, we Lod i putum i stap, i stat plante yia finis i kam. Russell M. Nelson, God i bin rere long hem long ful laef blong hem from tabu koling ia. Mi mi bin wan witnes blong taem ia we hem i bin stap rere.
Yumi save luk klia long wei we Presiden Russell M. Nelson i bin rere tru long ful eksperiens mo wok blong hem blong ful laef blong hem. Oli save gud long hem olsem wan paeonia blong wok blong dokta blong hat. Hem i wan man we i save raet gud mo i save toktok gud, i save toktok long plante lanwis. Hem i save mo lavem ol pipol, mo hem i andastanem gud wanem i kamaot long ol desisen blong olgeta long laef blong olgeta. Hem i save mo hem i lavem olgeta skripja mo tabu tempol. Hem i wan administreta we i gat eksperiens we i mekem desisen kwiktaem mo wetem strong tingting.
Presiden Nelson, oli save gud se long plante taem, 10 long olgeta 16 Presiden blong Jos bifo i bin tijim hem. Naoia, olsem namba 17 Presiden, hem i statem seves blong hem olsem presiden wetem wan toktok i go long ol Ol Lata-dei Sent se Jisas Kraes bambae i gohed blong lidim Jos blong Hem.
“Oltaem nomo Lod i bin, mo oltaem nomo bambae Hem i givim instraksen mo givim insperesen long ol profet blong Hem,” hemia toktok we hem i bin talem long anaonsmen brodkas long 16 Jenuware 2018. “Lod i stap long stia. Mifala, we oli odenem mifala blong stap ol witnes blong tabu nem blong Hem raon long wol, bambae mifala i gohed blong lukaotem blong save tingting blong Hem mo mekem folem tingting ia.”1
Wari blong Presiden Nelson long saed blong gudlaef we i no save finis blong ol pikinini blong God, i kamaot long wan laeftaem seves we hem i givim wetem hat blong hem. Olsem we hem i bin tajem plante hat olsem dokta, hem i tajem tu plante hat blong Ol Sent raon long wol wetem ol tijing blong hem we oli gat paoa, wetem seves blong hem we i givim wetem fasin blong no stap selfis mo wetem wan lav we i neva go daon. Olsem we hem i bin talem long histri brodkas ia long manis Jenuware, se lav ia, “i bin gro ova long plante yia we mi bin mit wetem yufala, we mi bin wosip wetem yufala, mo wok wetem yufala.”2
Wan Fasin blong Rere we I Nid
Yumi save plante abaot bigfala wok blong Dokta Nelson olsem wan paeonia studen, man blong saens, mo dokta blong katem hat blong man. Evri samting ia, wetem eksampol blong famli laef blong hem, i wan stamba pat blong mekem hem i rere.
Russell Marion Nelson i bin bon i kam long wol ia long 9 Septemba 1924; papa mo mama blong hem i Marion C. Mo Edna Anderson Nelson. Tufala ia, papa mo mama blong hem, tufala i lesaktiv memba blong Jos long ful taem we Russell i bin pikinini, be tufala i bin kavremap pikinini blong tufala wetem lav, mo wanwan taem, bae tufala i sendem olgeta i go long Sandei Skul. Long fas ples, yangfala Russell i no intres long jos, mo i laekem moa blong go plei futbol wetem ol fren blong hem. Be taem hem i kasem 16 yia, hat blong hem i stap blong lukluk long ol trutok blong gospel mo hem i bin kasem baptaes, semmak wetem ol brata mo sista blong hem. Sam yia afta, from eksampol mo strong tingting blong ol pikinini blong tufala, papa mo mama Nelson i kambak long jos.
Yangfala Russell i gohed blong folem promes blong gat wan edukesen. Hem i kam blong luksave, olsem we hem i bin tijim afta long laef blong hem, se blong gohed blong kasem wan edukesen, hem i wan responsabiliti long saed blong relijin.Hem i graduet long sekendri skul taem hem i gat 16 yia, mo hem i enrol long Yunivesiti blong Yuta taem wol raorao blong Wol Wo 2 i stopem hem blong go long wan fultaem misin.
Taem Russell i stap wok from digri blong hem, miusik talen blong hem i pusum hem blong joenem grup blong miusik long yunivesiti. Lid soprano, Dantzel White, i kasem sora mo ae blong hem. Tufala i bin mared i no longtaem afta we Russell i kasem digri blong hem long 1945. Taem hem i gat 22 yia, Hem i graduet long Yunivesiti blong Yuta wetem hae ona olsem wan medikol dokta. Hem i gohed long Yunivesiti blong Minesota blong kasem sam moa trening. Long ples ia nao hem i kam wan ki memba blong tim ia we i paeonia blong divelopmen blong wok blong save katem open hat blong man. Afta long hemia, hem i mekem sam wok long Minesota mo long Masajusets Jeneral Hospital long Boston, Masajusets, YSA.
Long taem we hem i bin stap skul yet, famli blong hem i stap kam bigwan, mo oli singaotem Dokta Nelson blong go long ami long taem blong Wo long Koria from se ami i bin nidim ol dokta bigwan long tetaem ia. From trening blong hem blong save katem man, oli bin sendem hem tu i go long Wasington D.K.; long ples ia hem i bin trenem wan yunit we i stap stadi long saed blong ol wei blong katem man, hemia long Wolta Rid Nasonal Ami Medikol Senta. Long 1953, afta we seves blong hem long ami i finis, hem i bin spendem wan yia long Havard Seves long Masajusets Jeneral Hospital long Boston. Afta, hem i finisim PHD blong hem long Yunivesiti blong Minesota long 1954.
Nomata long bisi medikol trening mo wok blong hem, Dokta Nelson, oltaem i putum famli blong hem i kam faswan long laef blong hem. Dantzel White Nelson i bin stanap long saed blong hem mo i bin sapotem hasban blong hem long evri aktiviti blong hem insaed long famli, Jos, wok mo ami. Rilesensip blong tufala, we i stap gohed oltaem, we tufala i sapsapotem tufala long hem mo tufala i gat lav long tufala, i bin stap olsem wan insperesen mo wan paoa blong lidim tingting blong wanwan blong ol 10 pikinini blong tufala—we i gat naen gel mo wan boe. Rilesensip blong tufala, “i swit, mo tufala i givgivim samting long tufala,” hemia folem tingting blong gel blong tufala, Sylvia Webster. Yangfala pikinini blong tufala, Russell Nelson Junia, i talem: “mifala i bin save luk klia nomo se papa mo mama, tufala i lavlavem tufala tumas.”3
Dantzel Nelson, oli sek nomo, hem i ded wan sot taem afta long namba 60 aniveseri blong mared blong tufala. Afta wan taem we hem i bin stap hemwan tumas, Elda Nelson i maredem Wendy Watson, we i wan woman we i no bin mared bifo; hem i gat wan digri blong dokta, mo stap tij long Brigham Yang Yunivesiti, mo hem i bin soem plante lav long bigfala Nelson famli; from hemia, hem i bin stap olsem wan gudfala kompanion blong Elda mo Presiden Nelson.
“Save stret se i had blong wokbaot insaed long wan famli we i gat ova long 200 pipol, mo filim se oli ol fren we oli kolkolosap,” Sylvia, we i wan long ol gel i talem. “Wendy i bin traehad mo hem i bin mekem gud.”4 Russell Junia i ademap: “Wendy i stap olsem wan gudfala kompanion long hem. … Mi save luk olsem wanem oli bin mekem hem i rere ova long ol yia from posisen ia mo koling ia, mo wan ki pat blong hemia, hem i Wendy we i stap insaed long laef blong hem.”5
Long taem we oli raetem atikol ia, Nelson famli i kaontem 10 pikinini, 57 apupikinini, mo 116 smol apupikinini, wetem 2 moa we i stap kam yet. Evriwan we oli save stap, oli kam tugeta long wan defren hom long evri manis blong selebretem ol betdei mo ol aniveseri.
“Evri Kingdom I Gat Wan Loa we God I Givim”
Taem Russell M. Nelson i bin stap long medikol skul, oli bin tijim hem se dokta i no mas tajem hat blong man, from se taem oli tajem hat blong man, bae i stop blong wok. Be sam yia afta nomo, Dokta Nelson mo ol nara fren blong hem blong stadi, oli ripotem se oli bin gat sakses blong yusum wan hat masin long wan dog. Hat masin ia i tekova blong mekem blad i ron, mekem se i posibol blong operetem wan hat we i nomo wok. Sakses ia we i kam long Dokta Nelson mo ol fren blong hem, oli stat blong yusum long ol man, mo naoia i mekem se i gat moa long 1.5 milian operesen we oli mekem long hat blong man evri yia raon long wol.
Insperesen we i lidim Dokta Nelson blong faenem hemia, i taem we hem i bin stap tingting hevi long olgeta ves ia insaed long Doktrin mo Ol Kavenan:
“Evri kingdom, i gat wan loa we God i givim. …
“Mo long evri kingdom i gat wan loa we God i givim; mo long evri loa ia, i gat sam limit tu, mo sam kondisen” (luk long D&C 88:36, 38).6
Dokta Nelson i tingting se, sapos hem i wok, i stadi, mo i askem raet kwestin, hem mo tim blong hem bae i save lanem ol loa we oli rulum fasin blong hat blong man i wok. “Hem i from we mi bin andastanem ol skripja mo taem mi “putum olgeta” long eria ia blong intres,” hem i talem, “we i mekem se bigfala save ia long saed blong fasin blong katem openem hat blong man, olsem we yumi save long hem tedei, i bin kam long mi.”7
Truaot long laef blong hem, paoa blong hem blong save yusum ol prinsipol blong gospel, i bin blesem Presiden Nelson, famli blong hem, Jos mo wol. Hem i bin wan ki pat blong wok blong mekem hem i rere from koling ia blong hem olsem wan Aposol, mo naoia olsem wan Presiden blong Jos.
Long wok blong hem, Dokta Nelson, oli kam blong save nem blong hem olsem wan dokta blong katem man, mo tu, olsem wan medikol man blong stadi long helt. Long 1995, hem i bin akseptem wan posisen olsem wan profesa blong stadi long fasin blong operetem man long Yunivesiti blong Yuta. Long ples ia, hem i bin bildim wan hat masin we hem i bin yusum blong mekem fas open hat operesen long Yuta—fas kaen operesen ia, we i hapen long Wes saed blong Misisipi Reva. Hem i bin tijim mo raetem plante japta blong ol medikol skul buk, mo ova long 70 fren oli bin luklukbak long ol pepa we hem i bin raetem long ol narafala buk. Bifo oli bin singaotem hem olsem wan aposol, Hem i bin mekem kolosap 7,000 operesen.8
Antap long medikol skil blong hem, Dokta Nelson i bin wan tija we i givim insperesen, mo i wan gudfala administreta; olgeta samting ia oli ol kwaliti we i mekem se hem i impoten tumas long medikol ples, mo afta long hemia, bae i mekem se oli save gud hem insaed long ol koling blong hem long Jos.
“Fasfala wok blong wan dokta, hem i blong tij,” Dokta Nelson i talem. Hem i ademap: “Wan dokta i stap mekem ful wok blong hem long hae level taem hem i stap tijim sikman blong hem wanem i rong mo wanem i save hapen blong stretem sik.”9
Dokta Nelson i bin soem se hem i glad blong tij mo givim edukesen taem hem i bin travel i go long ol nara kantri blong soemaot mo tijim ol medikol fasin blong wok. Blong helpem hem long tijing blong hem, hem i bin stadi long plante lanwis, olsem lanwis blong Franis, Potugal, Jemani, Rasia mo Spen, blong mekem se hem i save storian mo tijim ol dokta mo ol man blong stadi long ol narafala kantri. Hem i bin go long wan miting, mo long miting ia Presiden Spencer W. Kimball (1895-1985), i bin talem long kongregesen blong lanem lanwis blong Jaena. Kwiktaem nomo, Dokta Nelson mo waef blong hem, Dantzel i stat blong stadi long lanwis ia, Mandarin. From se hem i bin toktok gud long lanwis ia, hemia i bin mekem se hem i bin save wok kolosap wetem ol medikol wokman long Jaena; longwe, hem i bin tij mo i bin mekem ol operesen long man, mo i bin sevem laef blong wan bigfala hiro blong Jaena.10
Stap Lukaotem Kingdom blong God Faswan
Nomata we sakses blong Presiden Nelson long saed blong helt i bin bigwan, hem i bin gohed blong lukluk nomo long Lod mo wok blong Lod. Plante long ol memba blong Jos oli no save se hem i bin wan misinari long Tempol Skwea stat long 1955 i go kasem 1965, i stap lidim ol visita stat long 4 klok kasem 5 klok aftenun evri Tosdei. Hemia i bin wan taem we hem i bin bisi tumas olsem wan dokta blong katem man. Samtaem afta, hem i bin raetem se “long 1964, mifala i jes stat, long saed blong medikol, blong wok long jalenj ia blong riplesem aotik valv (wan pat insaed long hat we i kontrolem rod blong blad). Namba blong man i ded long tetaem ia i hae, mo taem we wan dokta bae i spendem wetem wanwan sikman, i bigwan tu—plante i spendem plante mo plante aoa wetem wanwan sikman, samtaem oli spendem plante dei.”11
Long plante man, bae hemia i minim se bae i no gat taem nating blong mekem wok blong wan moa bigfala koling. Be i no long Dokta Nelson. Long 1964, afta we oli bin intaviu hem mo sam moa brata blong kam olsem stek presiden, Elda Spencer W. Kimball, long tetaem ia, we i kam wetem Elda LeGrand Richards (1886–1983) blong Kworom blong Olgeta Twelef Aposol, i talem long hem: “Mifala i filim se Lod i wantem yu blong prisaed ova long stek ia. Long taem blong ol fulap intaviu we mifala i gat, taem oli talem nem blong yu, bae ol narawan oli talem se: ‘O, bae hem i wan gudfala man,” o ‘Hem i no gat taem,” o tugeta. Be, nomata long hemia, mifala i filim se Lod i wantem yu. Naoia, sapos yu ting se yu bisi tumas, mo yu no save akseptem koling ia, naoia i spesel taem blong yu.’ …
“Mi ansa nomo se, desisen ia, mi bin mekem finis long 31 Ogis 1945 taem Sista Nelson mo mi i bin mared insaed long tempol. Mitufala i bin mekem wan komitmen long tetaem ia, blong ‘lukaotem kingdom blong God faswan, mo stret mo gud fasin blong Hem,’ mo mitufala i bin save gud se evri nara samting, bambae God i ademap long mitufala, olsem we Lod i bin promesem. (Luk long Mat 6:33.)”12
Fasin ia, we Dokta Nelson i akseptem koling ia, i soem wanem we Elda Jeffrey R. Holland blong Kworom blong Olgeta Twelef Aposol i bin talem se hem i “hambol tingting blong wan pikinini mo simpol fet blong Russell Nelson.” Hem i gat tingting we i stap daon olsem ia nao, hem i olsem wan pikinini long wei ia nao, long evri level, mo long kolosap evri rilesensip wetem man we mi bin luk se hem i gat.”13
Elda Kimball i givim wan blesing long Dokta Nelson, we i promesem se ret blong man we bae i ded from problem blong operesen blong hat bae i go daon, mo kaen wok ia bambae i nomo save tekem tumas taem mo paoa blong hem.
“Long yia afta, taem blong stap operetem man olsem i bin godaon, mo mi bin gat taem we mi bin nidim blong wok long koling ia mo ol narafala koling,” Dokta Nelson i talem. “Wanem i tru, i we, ret blong namba blong ol ded i bin godaon … wan smol namba, we i inaf. Wanem we i intresting, i we, mi bin mekem operesen ia long Presiden Kimball, eit yia i pas.”14
Ol taem we hem i stap spendem long wok mo ol koling blong Jos, i minim tu se Dokta Nelson i no gat taem tumas blong spendem long hom. Be, hem i bin mekem evri samting we hem i save mekem blong mekem se waef blong hem mo ol tenfala pikinini blong hem oli kam faswan oltaem. Taem hem i bin stap long hom, bae hem i givim ful taem blong hem long famli blong hem. Long fulap travel blong hem raon long wol, plante taem, hem i tekem waef o wan long ol pikinini blong hem i go wetem hem. Nomata we Dantzel i lukaotgud long ol pikinini blong tufala taem Dokta i no bin stap, Dantzel i glad se hasban blong hem i stap givim taem blong hem long famli taem hem i spel long wok mo ol koling. “Taem hem i stap long haos, !hem i stap long hom nao!” hem i talem long Presiden Harold B. Lee (1899-1973), we long tetaem ia i bin Presiden blong Kworom blong Olgeta Twelef Aposol.15 Presiden Lee, plante taem bae i ripitim toktok ia taem bae hem i givim advaes long ol bisi prishud lida blong oli mas luklukgud long ol famli blong olgeta.
Stap Folem Profet
Mi bin wan witnes mo mi bin tekpat smol long wan impoten taem long wok laef blong Dokta Russell M. Nelson mo waef blong hem Dantzel. Hemia i bin hapen olsem pat blong fas miting blong mi wetem famli Nelson long 1965, we i kolosap 52 yia i pas nao. Long stori blong laef blong hem, we hemwan i bin raetem, Dokta Nelson i stap tokbaot olsem wanem nao oli bin askem hem blong tekem wok olsem profesa blong tijim wok blong katem man, mo semtaem stap olsem jeaman blong Kadiovaskula mo Torasik Operesen Dipatmen long Yunivesiti blong Jikago. Hem i raetem se wok ia, “bae i mekem se bae mi gat fulap risos i stap we mi save yusum long saed blong faenens sapot, stadi long laborotri, mo gat ol wokman sapot we bae i mekem drim blong eni man blong stadi i kamtru. Moa long hemia, blong winim tingting, wok ia i kam wetem fo yia blong skulfi blong evriwan long ol naen pikinini blong mitufala long wan skul we oli save jusum, wetem evri bil blong mitufala, se bae Yunivesiti blong Jikago i pem.” Din blong yunivesiti i talem long Dokta Nelson: “Wan long ol risen we mifala i wantem yu, i we, mifala mi save se yu yu wan gudfala Momon. Mifala i wantem yu insaed long yunivesiti blong mifala. Mifala i nidim yu long ples ia, blong yu tekem insaed long Yunivesiti ia, paoa blong lidim tingting ia we wan Momon i save karem i kam.”16
Olsem pat blong strong toktok ia i go long gudfala dokta ia, Din ia i ringim mi, i askem help blong mi blong winim tingting blong famli Nelson blong muv i go long Jikago. Long tetaem ia, mi bin wan profesa blong loa long Yunivesiti blong Jikago mo mi bin save Din blong Meresin ia from se mitufala i bin wok tugeta long senet blong yunivesiti ia. Din i askem mi blong gat wan dina wetem famli Nelson long hom blong mitufala. Hem i askem strong long mi blong talem abaot Jos long Jikago from se hem i bin save se hemia i wan impoten pat blong oli lukluk long hem.
Long taem ia nao, waef blong mi we i ded finis, June, i bin mitim Dantzel mo Russell Nelson, mo invaetem tufala blong kam dina mo gat wan gudfala storian long hom blong mifala long Jikago long Sandei 21 Novemba 1965. Mifala i traem bes blong winim tingting blong olgeta blong muv i kam long Jikago. Afta long hemia, aot long stori blong laef blong hem, mi bin lanem se “tufala i bin laekem tumas wok ia mo tufala i bin jusum wan haos long wan ples aotsaed long taon blong Jikago, we bae tufala i save lukaotem famli blong tufala.”17
Wanem i hapen afta i wan pikja long olsem wanem insperesen blong Lod i lidim ol desisen mo olsem wanem i mekem Russell M. Nelson i rere. Long Sol Lek Siti, Dokta Nelson i askem advaes long Presiden David O. McKay (1873–1970) blong helpem famli Nelson long impoten desisen blong olgeta. Profet i bin prea, mo ansa i kam: “No.”
Presiden McKay i talem: “Yu stap laef finis long bes siti blong ful wol. Yu gat wan wei blong laef we yu no save faenem bakegen long eni nara ples long wol. Long ples ia, ol gel blong yu bambae oli gat bes ples we oli save stap long hem. Oli moa impoten long yu bitim eni gud nem o fiuja we bae yu save gat long eni yunivesiti. No. Brata Nelson, ples blong yu i stap long ples ia long Sol Lek Siti. Ol pipol bambae oli aot raon long wol, oli kam long yu from se yu yu stap long ples ia. Mi no ting se i gud blong yu go long Jikago.”18
From se hem i fulap long fet, Dokta Nelson i no akseptem wok ia long Jikago mo i stap long Sol Lek Siti. Long ples ia, long ol yia we oli kam afta, hem i bin mekem open hat operesen mo i bin mekem laef blong plante sikman i go longwan moa, wetem hemia blong Presiden Kimball, Elda Richards L. Evans (1906-71), Presiden Boyd K. Packer (1924-2015), mo plante moa lida blong Jos, mo ol memba, mo ol famli blong olgeta.
Long June mo mi, Jikago miting ia i bin stat blong wan longfala frensip we mi holemtaet gud wetem Russell mo Dantzel Nelson. Sikis yia afta, hem i bin rilis olsem wan stek presiden, mo oli singaotem hem olsem Jeneral Presiden blong Sandei Skul. Long semfala yia ia, oli bin putum mi i kam presiden blong Brigham Yang Yunivesiti. Blong plante yia, mifala i bin wok tugeta insaed long Kworom blong Olgeta Twelef Aposol, mo naoia, bambae mitufala i givim seves tugeta long Fas Presidensi wetem wan frensip we i bin stat long Jikago, bitwin tu man blong stadi mo waef blong tufala, 52 yia i pas finis.
Stap Jenisim Ol Hat
Long 7 Epril 1984, oli bin odenem Dokta Nelson olsem wan Aposol mo oli setem hem apat olsem wan memba blong Kworom blong Olgeta Twelef Aposol. Hem i talem: “Long wan sot taem nomo, laef blong mi blong ol las foti yia long meresin mo operesen, i jenis; bae mi givim ful laef blong mi we i stap long fultaem seves long Lod mo Sevya blong mi, Jisas Kraes.”19
Taem oli singaotem hem i kam aposol, Elda Nelson i talem: “Wok ia we mi joenem naoia, i wan wok we i moa impoten long wol. Hem i kavremap evri samting, i mekem samting i hapen, mo i gat jalenj. Mo mi mas mekem bes, from se mi mas ansa from wok ia we oli givim long mi.”20
Stat long taem ia we hem i kam wan Aposol, mo olsem Presiden blong Kworom blong Olgeta Twelef Aposol stat long 2015, Presiden Nelson i bin gohed blong travel raon long wol— i serem ol toktok blong laef we i no save finis, mo i stap jenisim hat blong ol man. Wan long ol fas wok blong hem, i blong hem i openem ol doa blong gospel long ol nesen long Is Yurop. “Long faef yia taem, mi bin mekem 27 trip i go long 31 nesen long Yurop,” Presiden Nelson i talem. “Bifo Presiden Ezra Taft Benson i ded, mi bin save givim ripot long hem se mifala i bin finisim wok blong mifala: naoia, Jos i stanap long evri kantri blong Is Yurop.”21
Presiden Nelson i bin dediketem tu, 27 kantri blong oli go prijim gospel long olgeta, mo sam long ol kantri ia, i gat Bulgaria, Kroesia, El Salvado, Etiopia, Franis Polinesia, Kasakstan, mo Rasia. Long wan taem, long wan spes blong fo dei nomo, hem i bin dediketem sikis defren nesen.22 Long seves blong hem olsem wan aposol, hem i nao visitim 133 kantri.23
Olsem wan memba blong Kworom blong Olgeta Twelef Aposol, Elda Russell M. Nelson i stap blong plante longfala yia olsem jeaman blong olgeta trifala kaonsel ia: Misinari, Tempol mo Famli Histri, mo Prishud Eksekutiv (naoia i Prishud mo Famli Eksekutiv).
Josef Smit i bin gotru long plante jenis long taem we Elda Nelson i bin stap insaed long Kworom blong Olgeta Twelef, mo hem i bin wok anda long faef Presiden blong Jos. Stat long 1984, Jos i kam bigwan moa long saes, we i iven dabol i go moa, aot long 6 milian memba i go kasem ova long 16 milian. Kworom blong Olgeta Twelef Aposol mo Fas Presidensi oli bin putumaot tufala ofisol toktok: “Famli: Wan Ofisol Toktok I Go long Wol” long 1995, mo “Kraes we I Stap Laef” long yia 2000. Namba blong ol tempol we oli open i go antap, stat long 30 long 1984 i go kasem 159 long 2017. Long 2010, taem oli singaotem Elda Nelson olsem jeaman blong Misinari Eksekutiv Kaonsel, Jos i bin gat 58,000 misinari. Naoia, afta long bigfala namba we i go antap afta long anaonsmen we oli jenisim yia blong givim seves, namba i stap gud naoia long samples 67,000 misinari.
Kwaliti blong Hemwan
Plante long wanem we yumi bin lukluk long hem abaot Dokta, Elda mo naoia Presiden Nelson, i wan pablik rekod. Bae mi givim tingting blong mi long saed blong sam blong ol bigfala kwaliti blong hem we mi bin luk ova long ol yia.
Faswan, Russell M. Nelson i wan man we i gudfala evriwan, mo hem i wan gudfala fren mo man blong wok wetem. Hem i kaen oltaem mo i gat lav mo sore long evri rilesensip we hem i gat. Hem i wan eksampol blong folem, i wok wetem strong tingting, i luklukgud blong mekem ol responsabiliti blong hem—long famli, long Jos mo long wok blong hem. Mo hem i wan man we i gud tumas blong stap raon long hem.
Long lidasip stael blong hem, oltaem hem i kaen mo i isi blong toktok wetem. Hemia i wan kwaliti we pipol i laekem blong luk long ol senia lida. Wetem hem, mifala i neva fraet blong tokbaot wan topik, o mifala i neva filim se wan topik bae i spolem hem. Mifala i neva fraet blong toktok long hem long eni kaen samting. Presiden Nelson i wan man we i gat open tingting, we yumi save go kolosap long hem mo i isi blong storian wetem.
Long fasin blong hem blong tekem desisen, Presiden Nelson i wari oltaem long wei we wan samting bae i tajem laef blong evriwan. Hem i gud blong save tingting se wan desisen, o wan polisi, o fasin blong yusum doktrin bae i go olsem wanem long ol defren grup blong ol memba—olgeta olfala, ol yangfala, ol lesaktiv, ol lida blong Jos, mo ol narawan. Mi bin luk kwaliti ia long ol nara lida, be visen blong Presiden Nelson long saed ia, i spesel tumas. Maet i kamaot long eksperiens blong hem olsem wan dokta we i no save raetem pepa blong meresin blong wan pat blong bodi mo i no lukluk olsem wanem bae i tajem ol nara pat blong bodi.
Presiden Nelson i wan man we i save gud olsem wanem blong serem wok, mo hem i gud long hemia i bitim plante lida we mi bin lukluk olgeta long saed blong wok, o ol wok blong Jos. Hemia tu, ating i go wetem wok blong wan dokta blong katem man, we hem i mekem wan spesel wok nomo afta (mo bifo) ol narawan oli mekem wok blong olgeta.
Wan nara kwaliti blong Presiden Nelson, i fasin blong hem blong save wet longtaem. Hem i stap longwe long raorao taem hem i stap stretem problem, o stap mekem samting i hapen. Hem i no stap folem rod ia: “Bae yumi stretem hemia naoia nomo,” be hem i laekem moa blong givim taem blong luk sapos ol samting oli save stretem olgetawan nomo. Kwaliti ia, bae i impoten tumas long lidasip blong hem, semmak olsem we i bin stap long tu mo haf yia we hem i bin givim seves olsem Presiden blong Kworom blong Olgeta Twelef Aposol.
Naoia we mi presem fasin blong hem blong save wet longtaem, mi mas presem wan kwaliti blong Presiden Nelson we i narawan. Hem i no fraet blong tekem desisen. Taem we taem i stret, mo taem we wan samting i rere blong oli tekem desisen long hem, hem i mekem desisen kwiktaem mo i no jenisim tingting blong hem. Hem i save filim gud taem we i nidim moa taem blong tokbaot wan samting, o taem i stret nomo blong jusum wan long ol defren ansa we i stap long fored, mo gohed wetem wok blong Lod. Olgeta we oli wok wetem hem long lidasip, oli laekem tumas hemia.
Presiden Nelson i wan we i mekem man i wok tugeta. Hem i save tekem ol defren wei blong tingting oli kam wanples, mo i save tekem ol defren pipol oli kam wan. Hemia i wan gudfala kwaliti blong wan lida blong ol memba we oli gat komitmen blong folem semfala tabu doktrin be oli kam long ol defren kalja mo kastom.
Russell M. Nelson i gat ol presen ia insaed long hem blong toktok wetem ol man blong ol gavman, mo miwan mi bin luk hemia. Hem i bin yusum ol presen ia insaed long wok blong hem, iven long Jaena. Stat long taem blong koling blong hem insaed long Olgeta Twelef, hem i bin openem ol doa long Is Yurop blong Jos i stanap, mo ol samting ia, hem i mekem olgeta we oli folfolem olgeta nomo folem ol situesen. Antap long hemia, hem i bin visitim 133 defren nesen olsem wan wokman blong Lod. !Hemia i wan gudfala wei blong rere from hae posisen ia we God i bin singaotem hem long hem!
Wan nara kwaliti blong Presiden Nelson—we sam oli sapraes long hem—i skil blong hem blong save raet. Fasin blong hem, blong raet, oli eksampol blong raet long klia fasin, mo fasin blong hem blong save stretem ol toktok, i help oltaem. Ol memba blong Olgeta Twelef oli raetem ol raf atikol mo oli askem tingting blong mekem ol impoten toktok blong olgeta i kam gud moa. Long kaen wei ia, mi bin lanem se i no gat man i save givim tingting blong mekem toktok blong mi i kam gud moa bitim ol tingting we Presiden Nelson i givim. Olsem wan we i bin spendem laef blong hem long wok blong yusum ol toktok, mi bin sapraes tumas blong hem i stretem ol toktok blong mi i stret gud, be hem i wan man we long wok blong hem, hem i stap stretem bodi blong ol man. Mi bin glad tumas blong lanem se gudfala raeting blong hem, i risal blong hadwok. Long wan taem, taem mi bin luklukgud wan long ol samting we hem i bin raetem, mi luk se hem i bin namba 8 raf raeting blong hem. Sapos mi bin save bigfala namba blong ol atikol we Dokta Nelson i bin raetem mo pablisim, bae mi no sapraes se i gat wan gudfala man blong raet insaed long Kworom blong Olgeta Twelef Aposol.
Plante oli wari se yia blong niufala presiden blong yumi, i bigwan smol—!93 yia! Olgeta long mifala we i stap wok kolosap wetem hem, mifala i wari nomo se bae mifala i save wok i spid semmak olsem spid blong hem o no. Hem i aktiv gud, long bodi mo tingting blong hem. Memori blong hem i gud tumas. Hem i stap ski oltaem long sno, mo i no stap spel tumas. Hem i stap holem yet masin blong blo long sno, mo i stap kliarem rod blong trak long yad blong hem mo ol neiba blong hem.24 Mi gat eksperiens blong bigfala paoa blong hem long evri Tosdei. Taem mifala i finisim miting blong mifala long Sol Lek Tempol, sam oli tekem eleveta i go daon long floa we i stap daon, mo sam oli wokbaot i kam daon long step, stat long rum antap i kam daon. Presiden Nelson, oltaem i wokbaot long ol step i kamdaon. Oltaem mi traem folem spid blong hem, be mi no save mekem.
Wan Komitmen we I Stap long Sevya
Presiden Nelson i talem: “Evri dei, seves blong wan Aposol i wan dei blong lanem samting, mo blong stap rere blong karem moa responsabiliti long fiuja.”25 Long hem, taem blong rere blong lidim Jos i finis nao, mo hem i kasem tabu wok ia blong stap olsem Presiden blong Jos blong Jisas Kraes blong Ol Lata-dei Sent. Taem ia we hem i bin gat blong rere, ?hem i lidim yumi blong wet blong luk wanem samting long taem blong lidasip blong hem?
Ova long evri samting, i gat komitmen blong hem long Lod Jisas Kraes, we i hed blong Jos ia. Olsem we Presiden Nelson i talem long mesej blong hem long manis Jenuware, we mi bin kwotem fastaem finis, “Bambae mifala i gohed blong lukaotem blong save tingting blong Lod mo folem tingting ia.”26 Be, ol tijing blong Presiden Nelson we oli kam tru long insperesen, oli tokbaot plante samting we yumi mas tokbaot moa.
Long Oktoba 2017 jeneral konfrens, Presiden Nelson i mekem ol memba blong Jos oli tingbaot olsem wanem Buk blong Momon i impoten. Hem i bin serem ol risal blong stadi blong hemwan long saed blong Buk blong Momon, mo ol risal ia oli soem wanem nao hem i Buk blong Momon, wanem hem i konfemem, wanem i sakemaot, wanem i mekem i kamtru mo wanem i stap talemaot we i bin haed. Hem i bin askem strong long ol memba blong stadi mo tingting hevi long wanem i stap insaed long buk, evri dei.27
Long namba 16 Jenuware 2018, tu dei afta we oli bin setem Presiden Nelson olsem Presiden blong Jos, hem i bin anaonsem se niufala Fas Presidensi bae i statem seves blong olgeta wetem “en i stap long maen.” “En” ia, hem i blong sevem ol man, ol woman, mo blong silim ol famli insaed long haos blong Lod. “From risen ia, mifala i stap long wan tempol mo stap toktok long yufala tedei. Presiden Nelson i stap toktok ia long wan rum insaed Sol Lek Tempol.
En, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis. Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.”28
Presiden Nelson i askem tu long olgeta Sent blong stap long rod ia blong kavenan: “Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.” Long olgeta we oli aot long rod ia finis, hem i talem: “mi stap invaetem yu, wetem evri hop insaed long hat blong mi, blong yu kambak, plis. Nomata wanem wari blong yu, nomata wanem jalenj blong yu, i gat wan ples blong yu insaed long ples ia, insaed long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia blong kambak long rod ia blong kavenan.”29
Hemia i wan nara tru samting: “Skripja, we i kam wan laef stori long mi, i stap long seksen 88 blong Doktrin mo Ol Kavenan, long ples ia we Lod i talem: ‘Bambae mi mekem wok blong mi i muv hariap moa long stret taem,’” Presiden Nelson i talem. “Mo mi bin stap laef blong luk wok ia i muv hariap.”30 Naoia, bae hem i lidim wok ia.
Presiden Nelson, oltaem i bin testifae se Jisas Kraes i hae tumas, mo plan blong fasin blong sevem man, Papa long Heven mo Pikinini we Hem i Lavem Tumas i givim plan ia blong tijim yumi mo lidim yumi. Taem Presiden Nelson i stap lidim Jos i go long fiuja, ol Ol Lata-dei Sent oli harem gud blong save se bambae hem i lidim olgeta i folem tingting blong heven. “Mi talemaot we ful hat mo tingting blong mi i blong God, Papa blong yumi We I No Save Finis, mo i blong Pikinini blong Hem, Jisas Kraes,” hem i talem. “Mi save Tufala, lavem Tufala, mo talem promes se bae mi wok blong Tufala—mo yufala—wetem evri win we i stap blong laef blong mi.”31
Mi lavem wokman ia blong Lod, longtaem fren blong mi mo man we mi stap wok wetem, we i Presiden Russell M. Nelson. Wetem ol nara memba blong Jos blong Jisas Kraes blong Ol Lata-dei Sent, mi tekemgud ol tijing blong hem, mo mi luk fored blong folem lidasip blong hem we i kam tru long insperesen, olsem profet blong yumi. Mi testifae se God i bin singaotem hem blong lidim Jos long taem blong yumi tedei.