Mga Miting sa Council sa Unang Dominggo

Sa unang Dominggo sa matag bulan, ang mga miting sa elders quorum ug Relief Society dili maglakip og leksyon nga itudlo sa usa ka magtutudlo. Imbis niana, ang mga kapangulohan sa elders quorum ug Relief Society modumala og mga miting sa council. Niini nga mga miting sa council sa unang Dominggo, ang matag elders quorum ug Relief Society magtinambagay mahitungod sa lokal nga mga responsibilidad, mga oportunidad, ug mga hagit; magkat-on gikan sa mga ideya ug mga kasinatian sa usag usa; ug magplano og mga paagi sa pagsunod sa mga impresyon nga nadawat gikan sa Espiritu. Kini nga mga diskusyon kinahanglang i-base sa may kalabutan nga mga kasulatan ug sa mga pagtulun-an sa buhing mga propeta.

Dili tanang mga miting sa council magkapareha. Ania ang pipila ka mga giya aron sa pagtabang sa mga kapangulohan sa pagdumala og malampuson nga council.

Sa wala pa ang miting sa council

Buhaton:

I-determinar ang lokal nga mga panginahanglan, mga oportunidad, ug mga hagit.
Pagpili sa mainampoong paagi og usa ka hilisgutan nga hisgutan.
Dapita ang mga sakop sa korum o mga sister sa Relief Society nga motambong nga andam sa pagpaambit sa ilang mga hunahuna ug mga kasinatian.

Dili buhaton:

Moandam og leksyon.
Moabut nga aduna nay gihunahuna nga pihong solusyon o action plan.

Panahon sa miting sa council

Buhaton:

Modapit sa mga miyembro sa pagpaambit og mga kasinatian sa ilang pagsunod sa mga impresyon ug mga plano gikan sa miaging mga miting.
Mopahibalo sa hilisgutan sa miting ug moawhag sa mga miyembro nga magtinambagay mahitungod niini, nga mangita og mga solusyon ug giya gikan sa mga kasulatan, sa mga pulong sa mga propeta, ug sa Espiritu Santo.
Moplano sa pagbuhat sa unsay gihisgutan. Mahimong maglakip kini og mga plano sa grupo o mga plano nga gihimo sa mga indibidwal sa ilang kaugalingon.

Dili buhaton:

Modominar sa pag-istoryahanay.
Maningkamot sa pagkombinsir sa uban sa inyong mga ideya.
Mohisgot og sensitibo o kompidensyal nga mga isyu.
Motudlo og leksyon.
Mopugos ni bisan kinsa sa pag-apil.

Human sa miting sa council

Buhaton:

Mo-follow up sa mga plano ug mga buluhaton nga gihimo panahon sa miting sa council.
Mangita og mga paagi sa paglakip niadtong dili makatambong sa miting tungod sa mga calling o ubang mga rason. Mopahibalo kanila sa mga plano nga gihimo.
Mohatag sa mga miyembro og mga oportunidad sa pagpaambit og mga kasinatian sa umaabut nga mga miting.

Mga Hilisgutan alang sa mga Miting sa Council sa Unang Dominggo

Ang mga ideya alang sa mga hilisgutan sa diskusyon sa mga miting sa council mahimong maggikan sa mga miting sa kapangulohan, mga miting sa ward council, sa plano sa area, mga impresyon nga madawat sa mga lider samtang mangalagad sila sa mga miyembro, ug mga pag-aghat sa Espiritu Santo. Ang mga hilisgutan sa ubos mga sugyot lamang. Ang mga lider mahimong nahibalo og ubang mga panginahanglan nga gibati nila nga angayng hisgutan.

Unsay atong mahimo aron mangalagad niadtong naglibut kanato? (tan-awa sa Mosiah 23:18).
Unsaon nato sa paghatag og prayoridad ang atong lain-laing mga responsibilidad?
Unsaon nato sa pagpaambit sa ebanghelyo sa atong mga higala ug mga silingan? (tan-awa sa Alma 17).
Unsaon nato sa pagpanalipod sa atong kaugalingon ug sa atong mga pamilya gikan sa dili angay nga media ug pornograpiya?
Unsay atong buhaton sa pagtudlo ug pagpalig-on sa atong mga bata ug kabatan-onan sa atong ward?
Unsaon nato nga mas makaapil sa buhat sa family history ug pagsimba sa templo?
Unsaon nato sa pagdapit sa tabang sa Ginoo samtang magtinguha kita og mga tubag sa atong mga pangutana sa ebanghelyo ug maningkamot og mas lawom nga pagsabut sa ebanghelyo?
Unsaon nato sa pagpalig-on sa atong mga pagpamatuod sa Ginoo ug sa Iyang ebanghelyo ug sa pagtabang sa atong mga pamilya nga mahimong mapaningkamuton sa kaugalingon sa espiritwal nga paagi?