Mga Miting sa Ikaupat nga Dominggo

Sa ikaupat nga Dominggo sa matag bulan, ang mga elders quorum ug mga Relief Society maghisgot og hilisgutan nga gipili sa Unang Kapangulohan ug sa Korum sa Napulog Duha ka mga Apostoles. Ang hilisgutan sa ikaupat nga Dominggo bag-uhon kada human sa kinatibuk-ang komperensya. Gikan karon hangtud sa sunod nga kinatibuk-ang komperensya, ang hilisgutan mao ang “Pagpangalagad sa Uban.” Matag bulan, ang mga lider o magtutudlo mahimong mopili sa paggiya sa mga diskusyon bahin sa bisan asa sa mosunod nga mga baruganan nga may kalabutan sa pagpangalagad.

Alang sa dugang nga mga kapanguhaan aron sa pagsuporta sa mga diskusyon mahitungod sa pagpangalagad, tan-awa sa ministering.lds.org ug “Mga Baruganan sa Pagpangalagad” nga mga artikulo sa umaabut nga mga isyu sa Liahona.

Unsay buot ipasabut sa pagpangalagad?

Unsay gipasabut sa pagpangalagad ngadto sa mga miyembro sa inyong ward o branch? Aron sa pagsusi, mahimo ninyong isulat ang Pagpangalagad diha sa pisara ug dayon dapita ang mga miyembro sa pagsulat og mga pulong libut niini nga gikonektar nila sa pagpangalagad. Ang mga miyembro makakita og mga pulong o hugpong sa mga pulong nga madugang sa lista gikan sa mga kasulatan sama sa mosunod: Mateo 25:34–40; Lucas 10:25–37; 2 Nephi 25:26; Mosiah 18:8–9; 3 Nephi 18:25; ug Doktrina ug mga Pakigsaad 81:5. Unsa ang atong makat-unan gikan niini nga mga bersikulo mahitungod sa pagpangalagad? Mahimo kamong mohangyo sa mga miyembro sa pagpaambit og mga ehemplo sa pagpangalagad nga ilang nakit-an. Sa unsang paagi ang atong pagpangalagad makatabang sa pagtubag sa espiritwal ug temporal nga mga panginahanglan sa mga tawo? Sa unsang paagi kini makatabang sa mga tawo nga mas maduol kang Kristo?

Ang Manluluwas maoy atong hingpit nga ehemplo sa pagpangalagad.

Aron makat-on kon unsaon sa pagpangalagad sa epektibong paagi, ang mga miyembro mahimong mopaambit og mga istorya gikan sa mga kasulatan diin ang Manluluwas nangalagad sa uban—ang pipila ka mga ehemplo makita diha sa Juan 4–6 ug Marcos 2:1–12. Ang mga miyembro mahimong mopaambit sa unsay nakadani kanila mahitungod niining mga istorya ug unsa nga mga baruganan ang ilang nakat-unan mahitungod sa pagpangalagad. Sama pananglit, giunsa man sa Manluluwas sa paghimong personal sa Iyang pagserbisyo sa uban? Giunsa man Niya pagtubag ang espiritwal nga mga panginahanglan ingon man usab ang temporal nga mga panginahanglan sa mga tawo? Ang mga sakop sa klase mahimong mopaambit og mga higayon sa dihang nakakita sila og mga tawo nga migamit niini nga mga baruganan sa ilang pagpangalagad.

Ang pagpangalagad nadasig pinaagi sa Kristohanong gugma.

Aron masuhid ang gahum sa pagpangalagad nga nadasig sa Kristohanong gugma, mahimo ninyong isulat ang mosunod nga mga sentence diha sa pisara ug dapiton ang mga miyembro sa pagsugyot og mga paagi nga isulat diha sa mga blanko: Kon tinud-anay nakong gihigugma ang mga tawo nga akong serbisyuhan, ako . Kon moserbisyo ko alang sa ubang mga rason, ako . Unsay atong mabuhat aron sa pagsiguro nga ang atong pagpangalagad sa uban nadasig sa Kristohanong gugma? Unsaon nato sa pagpalambo og Kristohanong gugma alang niadtong gi-assign kita sa pagpangalagad? (tan-awa sa Moroni 7:45–48). Tingali ang mga miyembro makapaambit og mga ehemplo sa pagpangalagad nga nadasig sa Kristohanong gugma.

Gusto sa Dios nga bantayan ug atimanon ang tanan Niyang mga anak.

Si Presidente Russell M. Nelson miingon, “Ang timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug ilang mga pamilya” (“Ang Pagpangalagad uban sa Gahum ug Awtoridad sa Dios,” Liahona, Mayo 2018, 69.). Unsa ang gitudlo ni Presidente Nelson nga pipila sa “organisado, gidumala” nga mga paagi diin ang Simbahan nagtabang kanato nga mas maayong moatiman sa mga indibidwal? Nganong kini nga mga paningkamot usa ka “timailhan sa tinuod ug buhi nga Simbahan sa Ginoo”? (tan-awa sa Mosiah 18:21–22 ug Moroni 6:4–6 alang sa pipila ka mga ideya). Unsa nga mga panalangin ang miabut sa atong kinabuhi o sa kinabuhi sa uban tungod kay ang mga tawo nangalagad diha sa ilang mga calling o mga buluhaton sa Simbahan?

Ang bili sa kalag mahinungdanon sa panan-aw sa Dios.

Ang mga kasinatian sa mga anak ni Mosiah nagpakita nga ang paagi sa atong pagtan-aw sa mga tawo makaapekto kon unsaon nato sa pagpangalagad kanila. Mahimo ninyong isulat sa pisara ang Giunsa pagtan-aw sa mga Nephite ang mga Lamanite ug Giunsa pagtan-aw sa mga anak ni Mosiah ang mga Lamanite. Dayon dapita ang mga miyembro sa pagsiksik sa Mosiah 28:1–3 ug Alma 26:23–26 aron mangita og mga pulong nga masulat sa ubos sa matag usa niining mga pamahayag. Unsa ang gitudlo kanato niini nga pagkumpara kon sa unsang paagi ang atong pagtan-aw sa mga tawo makaapekto sa paagi sa atong pagpangalagad kanila? Unsaon nato sa pagkat-on nga mas motan-aw sa mga tawo sama sa pagtan-aw sa Dios kanila? (tan-awa sa D&P 18:10–16).

Ang tinuod nga mga tigpangalagad motutok sa mga panginahanglan sa uban.

Aron matabangan ang mga miyembro nga mas makasabut sa bili sa pagtutok sa mga panginahanglan sa uban samtang mangalagad kita, mahimo ninyong itandi ang pagpangalagad ngadto sa paghatag ug pagdawat og mga gasa. Nakadawat ba kita og makahuluganon nga gasa gikan sa usa ka tawo nga klaro nga nahibalo unsay atong gikinahanglan o gusto? Sa unsang paagi ang pagpangalagad sama sa paghatag og maayong pagkahunahuna nga gasa? Ikonsiderar ang paghisgot og mga istorya gikan sa pinakabag-o nga kinatibuk-ang komperensya nga nagpakita kon sa unsang paagi ang mga tawo nangalagad sumala sa mga panginahanglan sa uban (tan-awa, sama pananglit, ang Jean B. Bingham, “Pagpangalagad sama sa Gibuhat sa Manluluwas,” Liahona, Mayo 2018). Ang mga miyembro mahimo usab nga mopaambit og ubang mga istorya nga nagpakita niini nga baruganan.

Unsaon nato pagkahibalo kon unsa ang mga panginahanglan sa uban? Dapita ang matag miyembro sa paghimo og lista sa pipila sa mga tawo nga ilang alagaran. Tupad sa kada ngalan mahimo silang mosulat og tubag sa pangutana “Unsay gikinahanglan niining tawhana aron mas mapaduol ngadto ni Kristo?” Kon mahimo, awhaga ang mga miyembro sa paglakip sa mga ordinansa nga tingali kinahanglang madawat sa matag tawo. Dapita ang mga miyembro nga magpadayon sa paghunahuna niini nga pangutana ug magtinguha og inspirasyon sa pagtabang kanila nga matubag ang mga panginahanglan sa uban.

Gusto sa Ginoo nga modawat kita og pagpangalagad gikan sa uban.

Si Elder Robert D. Hales miingon: “Ang plano sa ebanghelyo nagkinahanglan og paghatag ug pagdawat. … Ang mga indibidwal nga anaa sa kalisud kanunay nga moingon: ‘Ako ra ang mobuhat niini,’ … ‘Makahimo ko sa pag-atiman sa akong kaugalingon.’ Ginaingon nga walay usa nga sobra ka adunahan nga wala siya magkinahanglan sa tabang sa uban, walay usa nga sobra ka kabus nga dili mapuslan sa ubang paagi sa iyang isigkatawo. Ang gawi sa pagpangayo og tabang gikan sa ubang tawo uban sa pagsalig, ug ang paghatag niini uban sa pagkamabination, kinahanglang parte gayud sa atong kinaiya” (“We Can’t Do It Alone,” Ensign, Nob. 1975, 91, 93). Nganong magpanagana man kita usahay sa pagdawat og tabang gikan sa uban? Sa unsang paagi ang atong kaandam sa pagdawat og tabang mopanalangin niadtong moserbisyo kanato? Hatagi ang mga miyembro og pipila ka gutlo sa pagpamalandong sa mga paagi nga mahimo silang mas bukas sa pagdawat sa pagpangalagad sa uban. Unsa ang gisugyot sa 1 Mga Taga-Corinto 12:13–21 kon nganong nagkinahanglan kita sa usag usa?

Adunay daghang paagi nga makahimo kita sa pagpangalagad sa uban.

Aron matabangan ang mga miyembro sa pagkonsiderar sa daghang mga paagi nga makahimo kita sa pagpangalagad sa usag usa, mahimo ninyo silang dapiton sa pagribyu sa mensahe ni Elder Jeffrey R. Holland nga “Magpaduol ug Maglig-on Kanila” (Liahona, Mayo 2018, 101–3; tan-awa usab ang “Mga Baruganan sa Pagpangalagad” sa umaabut nga mga isyu sa Liahona). Mahimong bahinon ngadto sa gagmayng mga grupo ang mga miyembro, ug ang matag grupo maghunahuna og pipila ka mga sitwasyon diin ang usa ka tawo mahimong nagkinahanglan og tabang. Mahimo dayon silang maghunahuna og lain-laing mga paagi diin ang mga tawo makapangalagad sa espiritwal ug temporal nga mga panginahanglan sa mga indibidwal diha sa mga sitwasyon. Hangyoa ang mga grupo sa pagpaambit sa ilang mga ideya ug sa pagpamalandong kon aduna bay mga ideya nga gihisgutan nga makapanalangin sa mga tawo nga ilang alagaran.