Elder Steven R. Bangerter

General Authority Seventy

Atol sa usa ka camping trip sa bata pa, si Elder Steven R. Bangerter ug iyang pamilya nanakay og mga dirt bike paingon sa ibabaw sa bukid. Sa ilang pagpanganaog, nasaag siya ug nahibulag sa uban.

Samtang miluhod siya nianang hapona ug nangamuyo og tabang sa iyang Amahan sa Langit, nakita niya sa iyang hunahuna ang agianan diin siya nasaag. Sa dihang misugod na siya sa pagdulhog, “ang akong igsoong lalaki naabut sa tumoy sa agianan diha sa iyang motorsiklo, migakos nako, ug migiya nako sa pagbalik diha sa kangitngit ngadto sa kampo, nga pila ka oras ang gilay-on.”

Ang panghitabo usa lang sa daghan nga nakapahimo niya nga mobati nga gihigugma atol sa iyang pagkabata. “Wala gayuy higayon sa akong kinabuhi nga naghunahuna ko kon gihigugma ba ko o giamumahan,” miingon si Elder Bangerter.

Si Elder Bangerter natawo sa Siyudad sa Salt Lake, Utah, ngadto ni Max E. ug Thelma R Bangerter niadtong Hulyo 29, 1961. Nagdako siya sa Granger, Utah.

Sulod sa mga semana nga nauli gikan sa pagserbisyo sa Canada Vancouver Mission, si Elder Bangerter nakaila ni Susann Alexis Hughes. Sa ilang unang panag-date, nakabantay siya sa mapaubsanon nga tinguha sa pagserbisyo ni Susann nga nakaaghat kaniya sa pag-propose ngadto kaniya sa ikaduhang panagdate. Na-seal sila sa Templo sa Salt Lake niadtong Marso 17, 1983. Mga ginikanan sila sa unom ka anak nga mga lalaki.

Si Elder Bangerter nakahuman og kurso sa bachelor of arts gikan sa Arizona State University sa relihiyuso nga mga pagtuon ug usa ka degree sa juris doctor gikan sa Western State University College of Law. Sulod sa milabay nga 25 ka tuig, si Elder Bangerter mipresentar sa mga simbahan ug sa faith-based nga mga organisasyon sa pagpraktis og balaod didto sa Southern California ug sa southern Utah. Usa siya ka kanhi kauban sa Cooksey, Toolen, Gage, Duffy, ug Woog gikan sa 1993 hangtud 2003 ug nahimong tigdumalang kauban sa Bangerter, Frazier, ug Graff niadtong 2004.

Si Elder Bangerter nakaserbisyo isip usa ka Area Seventy, presidente sa stake, counselor sa stake presidency, bishop, presidente sa elders korum, ug presidente sa Young Men sa ward.