Elder Terence M. Vinson

Kapangulohan sa Seventy

Si Elder Terence M. Vinson mituo nga ang Manluluwas dili gayud layo. “Kanunay Siya nga duol, ilabi na sa sagradong mga dapit ug sa mga panahon sa panginahanglan,” mipamatuod siya niadtong Oktubre 2013 nga kinatibuk-ang komperensya. “Usahay, nga wala gyud nako damha, mobati ko sa Iyang pagpikpik sa akong abaga aron pagpahibalo nga Iya kong gihigugma.”

Kausa, samtang sa Elder Vinson kaubang naglakaw ni Elder Jeffrey R. Holland sa Korum sa Napulog Duha ka mga Apostoles, giagbayan ni Elder Holland si Elder Vinson ug gisultihan siya nga iya siyang gihigugma. Miingon si Elder Vinson, “Nagtuo ko nga kon kita dunay kahigayunan nga maglakaw uban sa Manluluwas, kita mobati sa Iyang pag-agbay kanato sama niadto.”

Si Elder Vinson, nga gipaluyohan isip sakop sa Kapangulohan sa Seventy niadtong Marso 31, 2018, miingon nga ang gugma sa Dios “pinakatam-is nga pagbati.”

Si Elder Vinson, kinsa moasumir na sa iyang bag-o nga calling karong Agosto 1, 2018, gipaluyohan isip General Authority Seventy sa Simbahan niadtong Abril 6, 2013. Sa maong panahon, nagserbisyo siya nga sakop sa Ikawalo nga Korum sa Seventy. Nagserbisyo siya karon isip Presidente sa Africa West Area.

Nakaangkon si Elder Vinson og bachelor’s degree sa mathematics ug statistics, diploma sa edukasyon ug pagkamaestro, ug sa master’s degree sa applied finance. Ang iyang panarbaho naglakip sa pagpanudlo, pag-training, ug pag-lektyur sa mga unibersidad. Ang dako gyud niyang trabaho mao ang pagka-financial adviser ug funds manager.

Samtang nagsusi sa Simbahan isip usa ka young adult, nakadawat si Elder Vinson og lig-on nga espritwal nga impresyon. Klaro niyang gibati nga kinahanglan siyang magpasakop sa Simbahan aron mouswag ug makadawat og mga tubag sa nagpabiling mga pangutana. Nabunyagan siya ug nakumpirmahan sa misunod nga semana.

Dayon sugod niana, “Nasayud ko kon unsay gustong ipabuhat sa Ginoo kanako, ug nadiskubrihan nga ang tanan nakong pangutana duna gyud diay mga tubag.”

Sukad sa iyang bunyag niadtong 1974, nakaserbisyo si Elder Vinson isip counselor sa bishopric, bishop, high councilor, counselor sa stake presidency, regional representative, counselor sa mission presidency, ordinance worker sa templo, ug Area Seventy.

Natawo siya sa Sydney, Australia, niadtong Marso 12, 1951. Naminyo siya ni Kay Anne Carden niadtong Mayo 1974. Mga ginikanan sila sa unom ka anak.