Pagpahigayon og Misyonaryo nga Buhat

Atol sa katapusang unom ka bulan, ang Simbahan mihimo og pipila ka mga lakang sa pagpahigayon og misyonaryo nga Buhat.

Sumbanan nga mga pangutana. Ang Unang Kapangulohan mipaila-ila og hugpong sa sumbanan nga mga pangutana alang sa mga bishop ug mga presidente sa stake aron magamit samtang mag-interbyu og propective nga full-time nga mga misyonaryo. Ilang giawhag ang mga lider, mga ginikanan, ug mga kabatan-onan nga magpamilyar sa mga pangutana.

Ang mga sumbanan nga mabutang sa mga pangutana dili makausab o makadugang sa mga gikinahanglan alang sa pagserbisyo sa full-time nga misyonaryo, apan ang regular nga pagribyu niini makapahimo sa mga prospective nga mga misyonaryo ug mga ginikanan nga makat-on sa mga baruganan ug matino ang mga dapit diin ang kalamboan o dugang pagpangandam mahimong gikinahanglan.

Paggamit sa teknolohiya. Ang gidaghanon sa mga misyon nga naggamit og mobile devices nagkadaghan gikan sa 87 ngadto sa 162, ug ang mga tablet gipuli sa mga smartphone. Ang mga telepono makaabag sa mga misyonaryo sa pagtuon, pagpangita, ug pagtudlo.

Ang teknolohiya magamit usab sa paghatag og online content ngadto sa mga tawo nga nangita og mga tubag sa mga pangutana mahitungod sa relihiyon. Ang Simbahan nagsugod sa paggamit og mga online teaching center unom ka tuig na ang milabay ug karon nagpadagan og 20 ka mga online teaching center sa tibuok kalibutan.

Salamat sa teknolohiya, ang mga miyembro kinsa mo-refer og mga higala ngadto sa mga misyonaryo makahinabi na karon sa mga misyonaryo kinsa nagtudlo sa ilang mga higala. Mahimo na nilang mahisgutan ang mga panginahanglan sa mga misyonaryo ug makaapil sa mga leksyon gamit ang internet. Susiha kon unsaon diha sa lds.org/referrals.

Pagkab-ot sa kasamtangang panginahanglan. Sugod sa Hulyo 2018, ang Simbahan mousab sa mga utlanan sa 19 ka mga misyon, ug mamugna ang 5 ka bag-ong misyon. Kini mousab sa gidaghanon sa mga misyon gikan sa 421 ngadto sa 407. Ang bag-ong mga misyon mao ang Brazil Rio de Janeiro South, Cote d’Ivoire Yamoussoukro, Nigeria Ibadan, Philippines Cabanatuan, ug Zimbabwe Bulawayo. Ang mga detalye mahitungod sa paghiusa sa mga misyon umaabut pa nga ipahibalo gikan sa mga presidente sa misyon ngadto sa mga ginikanan sa mga misyonaryo sa apektadong mga misyon.

Gumikan kay ang kausaban sa edad sa mga moserbisyo nga misyonaryo gipahibalo niadtong 2012, ang Simbahan nakamugna og 76 ka bag-ong mga misyon aron maatiman ang pagsulbong sa pagtubo gikan sa 58,000 ngadto sa 88,000 ka mga misyonaryo. Ang inisyal nga bul-og sa mga misyonaryo sukad mios-os, sigun sa gilauman, ug sa kasamtangan mga 68,000 ang mga misyonaryo nga nagserbisyo. Nagpasabut kini nga, sa kasamtangan, mas gamay ang mga misyon ang gikinahanglan. Apan nagpasabut usab kini nga ang tukma nga pagbutang og mga misyonaryo sa mga dapit nga gikinahanglan sa tibuok kalibutan nakagarantiya sa partikular nga pagtagad.

Mga Missionary training center. Ang Provo Missionary Training Center sa Utah, USA, ug ang MTC sa Pilipinas napadak-an na ug gipahinungod, ug ang bag-ong missionary training center sa Ghana gipahinungod na usab. Ang mga training center sa Spain ug Chile mosira inig ka Enero 2019, ug ang mga misyonaryo kinsa manangbong unta niining mga center pagabansayon sa usa sa nahabilin nga 13 ka mga missionary training center sa tibuok kalibutan.