Usa Nalang ka Adlaw

Ni Elder Taylor G. Godoy

Sa Seventy

Kitang tanan adunay “karon” aron magpakabuhi, ug ang mga paagi nga mahimong malampuson ang atong adlaw mao ang kaandam sa pagsakripisyo.

Pipila ka tuig ang milabay, ang akong mga higala nakabaton og matahum nga bata nga gihinganlan og Brigham. Human siya natawo, si Brigham gi-diagnose nga dunay talagsaong kondisyon nga gitawag og Hunter syndrome, makaguol nga nagpasabut nga si Brigham adunay mubo lang nga kinabuhi. Usa ka adlaw samtang si Brigham ug ang iyang pamilya mibisita sa nataran sa templo, militok si Brigham og pihong mga pulong; kaduha siya miingon, “Usa nalang ka adlaw.” Pagkasunod adlaw, namatay si Brigham.

Miduaw ko sa lubnganan ni Brigham sa pipila ka higayon, ug sa matag higayon, mamalandong ko sa mga pulong “usa nalang ka adlaw.” Naghunahuna ko unsay kahulugan niini, unsa kahay epekto niini sa akong kinabuhi nga makahibalo nga naa koy usa nalang ka adlaw para mabuhi. Unsaon kaha nako pagtratar ang akong asawa, ang akong mga anak, ug ang uban? Unsa kaha ako ka mapailubon ug kabuotan? Unsaon kaha nako pag-atiman ang akong lawas? Unsa kaha ako katim-os mag-ampo ug mosiksik sa kasulatan? Naghunahuna ko nga, sa usa ka paagi o sa lain kitang tanan adunay panahon nga maamgohan ang “usa nalang ka adlaw”—usa ka pagkaamgo nga kinahanglan maalamon kitang mogamit sa atong panahon.

Sa Daang Tugon atong mabasa ang estorya ni Ezechias, hari sa Judah. Ang propetang si Isaias mipahibalo ni Ezechias nga ang iyang kinabuhi naghinapos na. Sa dihang nadungog niya ang mga pulong sa propeta, misugod si Ezechias sa pag-ampo, nangamuyo, ug mihilak og maayo. Nianang higayona, ang Dios midugang og 15 ka tuig sa kinabuhi ni Ezechias. (Tan-awa sa Isaias 38:1–5.)

Kon kitay sultihan nga hamubo nalang ang atong kinabuhi, mahimong mangamuyo usab kita nga dungagan ang mga adlaw sa kinabuhi tungod sa mga butang nga angayang nabuhat o gibuhat sa lahi nga paagi.

Bisan unsa pa kataas sa panahon nga ang Ginoo, sa Iyang kaalam, motino sa pagganti sa matag usa nato, sa usa ka butang kita makasiguro: kitang tanan adunay “karon” aron magpakabuhi, ug ang mga paagi nga mahimong malampuson ang atong adlaw mao ang kaandam sa pagsakripisyo.

Ang Ginoo miingon, “Tan-awa, karon kini gitawag karong adlawa hangtud sa pag-anhi sa Anak sa Tawo, ug sa pagkatinuod kini mao ang adlaw sa sakripisyo” (D&P 64:23; emphasis gidugang).

Ang pulong sakripisyo naggikan sa latin nga mga pulong sacer, nga nangahulogan og “sagrado,” ug facere, nga nangahulogan og “paghimo,”—sa laing pagkasulti maghimo og sagradong mga butang, sa pagpasidungog kanila.

“Ang pag-antus [sacrifice] magdala’g panalangin” (“Praise to the Man,” Hymns, nu. 27).

Sa unsang mga paagi ang pagsakripisyo mohimo sa atong mga adlaw nga makahuluganon ug bulahan?

Una, ang personal nga pagsakripisyo mopalig-on kanato ug mohatag og bili sa mga butang nga atong gisakripisyuhan.

Pipila ka tuig ang milabay sa puasa sa Dominggo, usa ka tigulang nga sister miduol sa pulpito aron mopaambit sa iyang pagpamatuod. Nagpuyo siya sa siyudad nga gitawag og Iquitos, nga anaa sa Peruvian Amazon. Misulti siya namo nga sukad sa iyang pagbunyag, kanunay siya nga dunay tumong nga makadawat og mga ordinansa sa templo didto sa Lima, Peru. Matinud-anon siyang mibayad og ikapulo ug nagtigum sa gamay niyang kinitaan sulod sa katuigan.

Ang iyang kalipay sa pag-adto sa templo ug sa pagdawat sa sagradong mga ordinansa didto gipadayag sa ingon niining pagkasulti: “Karon makaingon ko nga andam na gayud ako nga molabang sa tabil. Ako na ang pinakamalipayon nga babaye sa kalibutan; nakatigum ko og kwarta, wala lang mo masayud kon unsa kadugay, aron makabisita sa templo, ug human sa pito ka adlaw diha sa suba ug 18 ka oras sa bus, sa katapusan didto na ako sa balay sa Ginoo. Sa pagbiya nianang balaan nga dapit, miingon ko sa akong kaugalingon, human sa tanang pagsakripisyo nga gikinahanglan aron ako makaadto sa templo, dili nako itugot ang bisan unsang butang nga mopasipala sa matag pakigsaad nga akong gihimo; mausik lang kini. Usa kini ka seryuso kaayo nga pasalig!”

Nakat-on ko gikan niining pinangga nga sister nga ang personal nga pagsakripisyo usa ka bililhon kaayo nga pwersa nga makapadasig sa atong mga desisyon ug sa atong mga determinasyon. Ang personal nga pagsakripisyo makapadasig sa atong mga lihok, atong mga pasalig ug atong mga pakigsaad ug mohatag og kahulogan sa sagradong mga butang.

Ikaduha, ang mga sakripisyo nga atong gihimo para sa uban, ug ang gihimo sa uban para nato, moresulta sa mga panalangin para sa tanan.

Sa estudyante pa ako sa dental school, dili makapadasig ang dagan sa ekonomiya. Ang pagsaka sa presyo sa pamaliton mipaus-os sa bili sa kwarta kada adlaw.

Nakahinumdom ko sa tuig sa dihang nagpa-enroll na unta ko sa klase nga magtudlo sa pag-opera; gikinahanglan nga hitsas ko sa tanang ekipo sa pag-opera sa dili pa mo-enroll niana nga semester. Ang akong mga ginikanan nagtigum sa gikinahanglan nga pundo. Apan usa ka gabii adunay dakong panghitabo. Nanglakaw kami aron sa pagpamalit og ekipo, nahibaloan na lang nga ang kantidad sa kwarta nga natigum sa akong mga ginikanan sa pagpamalit sa tanang ekipo karon igo nalang ikapalit og usa ka parisan sa mga surgical tweezer—ug wala nay lain. Namauli mi nga walay nadala ug inubanan sa kaguol nga naghunahuna nga wala na ang usa ka semester sa kolehiyo. Sa kalit lang, hinoon, ang akong mama miingon, “Taylor, ubani ko manggawas kita.”

Miadto mi sa downtown, diin dunay daghang dapit nga makapalit ug makabaligya og alahas. Pag-abut namo sa usa ka tindahan, mikuha ang akong mama sa iyang pitaka nga usa ka gamayng blue velvet nga bag nga dunay sulod nga bulawan nga pulseras nga dunay inskripsyon nga mabasa, “Sa akong pinangga nga anak gikan sa imong amahan.” Pulseras kadto nga gihatag sa akong lolo ngadto niya sa usa sa iyang mga adlawng natawhan. Dayon, akong nakita, nga iya kining gibaligya.

Sa pagdawat niya sa kwarta, miingon siya nako, “kon dunay usa ka butang nga masiguro nako, mao kini nga ikaw mahimong usa ka dentista. Lakaw ug palita ang tanang ekipo nga imong gikinahanglan.” Karon, mahunahuna ba ninyo kon unsa ko nga matang sa estudyante sukad niadtong higayuna? Gusto kong mahimong kinamaayohan ug motapos sa akong mga pagtuon sa dili madugay tungod kay nakahibalo ko sa kataas sa kantidad sa sakripisyo nga iyang gihimo.

Nakat-onan nako nga ang mga sakripisyo sa atong mga minahal alang kanato mohupay kanato sama sa bugnaw nga tubig taliwala sa desyerto. Ang maong sakripisyo makahatag og paglaum ug kadasig.

Ikatulo, ang bisan unsang sakripisyo nga atong gihimo gamay ra kon itandi sa sakripisyo sa Anak sa Dios.

Unsa may bili sa gibahandi nga bulawang pulseras kon itandi ngadto sa sakripisyo sa pinaka Anak sa Dios? Unsaon nato nga makapasidungog nianang walay kinutuban nga pagsakripisyo? Matag adlaw makahinumdom kita nga kita adunay usa nalang ka adlaw nga mabuhi ug magmatinud-anon. Si Amulek mitudlo, “Oo, ako buot nga kamo moduol ug dili magpatig-a sa inyong mga kasingkasing; kay tan-awa, karon mao ang takna ug adlaw sa inyong kaluwasan; ug busa, kon kamo maghinulsol ug dili na magpatig-a sa inyong mga kasingkasing, diha-diha ang mahinungdanon nga laraw sa katubsanan mapadangat nganha kaninyo” (Alma 34:31). Sa laing pagkasulti, kon kita mohalad og sakripisyo ngadto sa Ginoo nga usa ka masulub-on nga kasingkasing ug usa ka mahinulsulon nga espiritu, diha-diha dayon ang mga panalangin sa dakong plano sa kalipay makita diha sa atong mga kinabuhi.

Ang plano sa katubsanan posible salamat sa pagsakripisyo ni Jesukristo. Sa Iyang paghulagway Mismo, ang pagsakripisyo “nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya” (D&P 19:18).

Ug tungod kini niining sakripisyo, human sa mosunod nga proseso sa sinsero nga paghinulsol, nga mobati kita nga ang kabug-at sa palas-anon sa atong mga kasaypanan ug kasal-anan makuha. Sa pagkatinuod, ang kahasol, kaulaw, kasakit, kaguol, ug ang ubos nga pagtan-aw sa atong kaugalingon mapulihan og tin-aw nga konsensya, kamaya, kalipay ug paglaum.

Sa samang higayon, samtang kita mopasidungog ug mopasalamat sa Iyang sakripisyo, makadawat kita og dako kaayong tinguha nga mahimong mas maayong mga anak sa Dios, aron magpalayo sa sala, ug motuman sa pakigsaad sa paagi nga wala pa mabuhat sukad.

Dayon, sama ni Enos human nadawat ang kapasayloan sa iyang mga sala, mabati nato ang tinguha sa pagsakripisyo sa atong kaugalingon ug magtinguha sa kaayuhan sa atong mga kaigsoonan (tan-awa sa Enos 1:9). Ug mahimo kitang mas andam sa matag “usa nalang ka adlaw” sa pagsunod sa imbitasyon nga gihatag ni Presidente Howard W. Hunter ngari kanato sa iyang pag-ingon: “Husaya ang panagbangi. Pangitaa ang nakalimtan nga higala. Isalikway ang pagduda ug hulipi kini og pagsalig. … Hatag og malumo nga tubag. Awhaga ang kabatan-onan. Ipakita ang inyong kamatinud-anon pinaagi sa pulong ug sa buhat. Tumana ang gisaad. Ayaw paghambin og pagdumot. Pasayloa ang kaaway. Pangayo og pasaylo. Paningkamot nga makasabut. Susiha ang inyong gipangayo sa uban. Hunahunaa una ang laing tawo. Magmabination. Magmalumo. Katawa pa og gamay. Ipahayag ang inyong pasalamat. Timbayaha ang usa ka estranghero. Lipaya ang kasingkasing sa usa ka bata. … Isulti ang inyong gugma ug dayon balika kini pagsulti” (Mga Pagtulun-an sa mga Presidente sa Simbahan: Howard W. Hunter [2015], 37; gipahiangay gikan sa “What We Think Christmas Is,” McCall’s, Dis. 1959, 82–83).

Hinaut atong pun-on ang atong mga adlaw nianang pagbati ug kalig-on nga gihatag kanato nianang personal nga sakripisyo ug sa sakripisyo nga atong gihimo o nadawat gikan sa nahatag sa uban ngari kanato. Ug sa espesyal nga paagi, hinaut atong matagamtam ang kalinaw ug pagmaya nga gitanyag ngari kanato sa sakripisyo sa Bugtong Anak; oo, kanang kalinaw nga nahisgutan sa dihang atong gibasa nga si Adan napukan aron ang mga tawo mahimo, ug ang mga tawo naingon—kamo naingon—nga kamo makabaton og hingpit nga kalipay (tan-awa sa 2 Nephi 2:25). Kana nga kalipay mao ang tinuod nga kalipay nga bugtong ang pagsakripisyo lang ug ang Pag-ula sa Manluluwas nga si Jesukristo ang makahatag.

Mao kini akong pag-ampo nga kita mosunod Kaniya, nga kita motuo Kaniya, nga kita mohigugma Kaniya, ug nga kita mobati sa gugma nga gipakita pinaagi sa Iyang pagsakripisyo sa matag higayon nga makaangkon kita og oportunidad nga mabuhi sa usa nalang ka adlaw. Sa ngalan ni Jesukristo, amen.