Ang Kasingkasing sa usa ka Propeta
Ni Elder Gary E. Stevenson
Sa Korum sa Napulog Duha ka mga Apostoles
Mahimo kitang maglipay nga ang propeta sa Ginoo nahimutang na ug nga ang buhat sa Ginoo gihimo sa paagi nga balaanon Niyang gisugo.
Kinasingkasing akong nag-ampo nga ang Espiritu Santo magauban sa matag usa kanato karon niining langitnong higayon. Ang nasaksihan natong tanan hilabihan ka impresibo samtang ang ika-17 nga propeta niining dispensasyon gipaluyohan sa maligdong nga katiguman.
Samtang nagtinguha ko og giya aron masayud kon unsay pahisgutan sa Ginoo kanako karon, nakahunahuna ko sa bag-o lang nga pakig-istorya uban sa bag-ong gitawag nga Unang Kapangulohan. Niini nga diskusyon, usa sa mga magtatambag mipaambit og mga pulong nga sama niini: “Manghinaut ko nga ang mga miyembro sa Simbahan makasabut sa gibug-aton sa nahitabo uban sa pagkatawag sa atong bag-ong propeta, si Presidente Russell M. Nelson, ug sa kamahinungdanon ug kasagrado sa maligdong nga katiguman nga mahitabo sa kinatibuk-ang komperensya.” Dugang siya nga miobserbar, “10 na ka tuig, ug daghang tawo, ilabi na ang kabatan-onan sa Simbahan, dili makahinumdom o wala pa makasinati niini.”
Nakapahimo kini nako sa pagpamalandong sa akong mga kasinatian. Ang unang propeta nga akong mahinumduman mao si Presidente David O. McKay. 14 anyos ko sa dihang namatay siya. Nakahinumdom ko sa pagbati sa kamingaw nga resulta sa iyang pagkamatay, sa mga luha sa mga mata sa akong inahan, ug sa kasubo nga gibati sa among tibuok pamilya. Nahinumdom ko kon sa unsang paagi ang mga pulong nga “Palihug panalangini si Presidente David O. McKay” natural nakong nasulti sa akong mga pag-ampo nga kon wala ko magbantay, bisan human sa iyang pagkamatay, mogamit gihapon ko niadto nga mga pulong. Nagduda ko kon ang akong kasingkasing ug hunahuna makabaton ba og samang pagbati ug kombiksyon alang sa mga propeta nga mosunod kaniya. Apan hapit sama sa mga ginikanan nga nagpangga sa matag usa sa ilang mga anak, nakakaplag ko og gugma, koneksyon, ug pagpamatuod ni Presidente Joseph Fielding Smith, kinsa misunod ni Presidente McKay, ug sa matag propeta human niana: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, ug karon si Presidente Russell M. Nelson. Hingpit nakong gipaluyohan ang matag propeta uban sa pagpataas sa kamot—ug nabayaw nga kasingkasing.
Sa pagtaliwan sa matag usa sa atong gimahal nga mga propeta, natural lang nga mobati og kasubo ug kamingaw. Apan ang atong kaguol mapagaan sa kalipay ug paglaum nga moabut samtang mosinati kita sa usa sa dagkong mga panalangin sa Pagpahiuli: ang pagtawag ug pagpaluyo sa buhi nga propeta dinhi sa yuta.
Niana nga katuyoan, mamulong ko kalabut niining balaang proseso sama sa naobserbahan sa milabay nga 90 ka adlaw. Ako kining ihulagway sa upat ka bahin: una, ang pagkamatay sa atong propeta ug ang pagkawagtang sa Unang Kapangulohan; ikaduha, ang yugto sa panahon nga nagpaabut sa pag-organisar pag-usab sa bag-ong Unang Kapangulohan; ikatulo, ang pagtawag og bag-ong propeta; ug ikaupat, ang pagpaluyo sa bag-ong propeta ug sa Unang Kapangulohan sa maligdong nga katiguman.
Ang Pagkamatay sa Propeta
Niadtong Enero 2, 2018, namatay ang atong pinalanggang propeta nga si Thomas S. Monson. Kanunay siya nga adunay luna sa atong kasingkasing. Mihalad si Presidente Henry B. Eyring og mga sentimento sa pagkamatay ni Presidente Monson nga hingpit nga naghulagway sa atong mga pagbati: “Ang timaan sa iyang kinabuhi, sama sa Manluluwas, mao ang iyang indibidwal nga pagpakabana nga motabang sa mga kabus, sa masakiton—gani sa tanang indibidwal—sa tibuok kalibutan.”1
Si Presidente Spencer W. Kimball mipasabut:
“Samtang mosalup ang usa ka bitoon sa kapunaw-punawan, dunay laing bitoon nga makita, ug ang kamatayon momugna og kinabuhi.
“Walay katapusan ang buhat sa Ginoo. Bisan og ang pinakaimpluwensyal nga lider mamatay, walay bisan usa ka higayon nga ang Simbahan walay pangulo, salamat sa mabinationg Tighatag kinsa mihimo nga magpadayon ug makanunayon ang iyang gingharian. Sama nga nahitabo na kini … kaniadto niini nga dispensasyon, ang katawhan matinahurong mosira og lubnganan, mopahid sa ilang mga luha, ug moatubang sa umaabut.”2
Ang Apostolic Interregnum
Ang yugto sa panahon tali sa pagkamatay sa usa ka propeta ug sa pag-organisar pag-usab sa Unang Kapangulohan maoy gitawag nga “apostolic interregnum.” Niining panahona, ang Korum sa Napulog Duha, ubos sa pagpangulo sa presidente sa korum, naghiusa sa paghupot sa mga yawe aron mapahigayon ang pagpangulo sa Simbahan. Si Presidente Joseph F. Smith mitudlo, “Sa kanunay adunay usa ka pangulo sa Simbahan, ug kon ang Kapangulohan sa Simbahan matangtang tungod sa kamatayon o sa laing hinungdan, nan ang sunod nga pangulo sa Simbahan mao ang Napulog Duha ka mga Apostoles, hangtud nga ang usa ka kapangulohan ma-organisar pag-usab.”3
Ang labing bag-o nga panahon sa interregnum nagsugod sa dihang si Presidente Monson namatay niadtong Enero 2 ug natapos human sa 12 ka adlaw nianang pagka-Dominggo, Enero 14. Nianang buntag sa Igpapahulay, nag-abut ang Korum sa Napulog Duha diha sa ibabaw nga lawak sa Templo sa Salt Lake sa diwa sa pagpuasa ug pag-ampo, ubos sa direksyon sa pagdumala ni Presidente Russell M. Nelson, ang senior nga Apostol ug Presidente sa Korum sa Napulog Duha.
Pagtawag og Bag-o nga Propeta
Niini nga sagrado ug halandumon nga miting, nagsunod sa maayong pagka-establisar nga sundanan sa panaghiusa ug panag-uyon, ang mga Kaigsoonan naglingkod base sa seniority diha sa semicircle nga 13 ka lingkuranan ug miisa sa ilang mga kamot una aron sa pagpaluyo sa pag-organisar sa Unang Kapangulohan ug dayon aron sa pagpaluyo ni Presidente Russell Marion Nelson isip Presidente sa Ang Simbahan ni Jesukristo sa mga Santos sa Ulahing mga Adlaw. Kini nga pagpaluyo gisundan sa pagtapok sa Korum sa Napulog Duha diha sa usa ka sirkulo ug sa pagbutang sa mga kamot ibabaw sa ulo ni Presidente Nelson aron sa pag-orden ug pag-set apart kaniya, diin ang sunod nga labing senior nga Apostol maoy namulong.
Si Presidente Nelson dayon mihingalan sa iyang mga magtatambag, si Presidente Dallin Harris Oaks, si Presidente Henry Bennion Eyring, uban ni Presidente Oaks isip Presidente sa Korum sa Napulog Duha ka mga Apostoles ug si Presidente Melvin Russell Ballard isip ang Akting nga Presidente sa Korum sa Napulog Duha ka mga Apostoles. Human sa susama nga mga boto sa pagpaluyo, ang matag usa niini nga mga Kaigsoonan gi-set apart ni Presidente Nelson ngadto sa ilang tagsa-tagsa ka katungdanan. Usa kini ka sagrado kaayo nga kasinatian, nga adunay pagbu-bu sa Espiritu. Mohatag ko ninyo sa akong hingpit nga pagsaksi nga ang kabubut-on sa Ginoo, nga maoy kinasingkasing natong giampo, gipakita sa gamhanang paagi sa mga kalihokan ug mga panghitabo nianang adlawa.
Tungod sa pagka-orden ni Presidente Nelson ug pag-organisar pag-usab sa Unang Kapangulohan, ang apostolic interregnum natapos, ug ang bag-ong naestablisar nga Unang Kapangulohan misugod sa paglihok nga, sa talagsaong paagi, walay bisan usa ka segundo nga pagkabalda sa pagdumala sa gingharian sa Ginoo dinhi sa yuta.
Maligdong nga Katiguman
Karong buntaga, kining balaang proseso gitapos sumala sa mando sa kasulatan nga gilatid diha sa Doktrina ug mga Pakigsaad: “Kay ang tanan nga mga butang kinahanglan gayud himoon sa kahusay, ug pinaagi sa pag-uyon sa tanan diha sa simbahan, pinaagi sa pag-ampo sa hugot nga pagtuo,”4 ug ang “tulo ka Tigdumala nga Halangdon nga mga Pari, … gituboy pinaagi sa pagsalig, hugot nga pagtuo, ug pag-ampo sa simbahan, nahimo nga usa ka korum sa Kapangulohan sa Simbahan.”5
Si Elder David B. Haight mihulagway og usa ka kanhi panghitabo sa unsay atong giapilan karon:
“Mga saksi kita ug partisipante sa pinakasagradong okasyon—usa ka maligdong nga katiguman nga aksyunan ang langitnong mga butang. Sama sa karaang kapanahunan, dunay gihimong daghan nga pagpuasa ug pag-ampo nga gihalad sa mga Santos sa tibuok kalibutan aron madawat nila ang pagbu-bu sa Espiritu sa Ginoo, nga makita kaayo … niini nga okasyon karong buntaga.
“Ang maligdong nga katiguman, sigun sa gipasabut sa ngalan, nagpasabut og usa ka sagrado, mabuot, ug talahuron nga okasyon diin ang mga Santos magkatigum ubos sa direksyon sa Unang Kapangulohan.”6
Mga kaigsoonan, mahimo kitang maglipay— gani mosinggit og “Hosanna!”—nga ang tigpama-ba sa Ginoo, usa ka propeta sa Dios, nahimutang na ug nga ang Ginoo nalipay nga ang Iyang buhat gihimo sa paagi nga balaanon Niyang gisugo.
Presidente Russell M. Nelson
Kining balaanong gi-orden nga proseso moresulta ngadto sa laing balaanong gitawag nga propeta. Sama nga si Presidente Monson usa sa labing talagsaon nga mga lumulupyo nga nabuhi dinhi sa yuta, mao usab si Presidente Nelson. Hilabihan siya nga giandam ug piho nga gitudloan sa Ginoo aron mogiya kanato niini nga panahon. Dako nga panalangin nga ang pinalangga nga si Presidente Russell M. Nelson nahimo karon nga atong mahigugmaon ug mapahinungurong propeta—ang ika-17 nga Presidente sa Simbahan niining katapusan nga dispensasyon.
Si Presidente Nelson tinuod gayud nga talagsaon nga tawo. Akong pribilehiyo nga makaalagad diha sa Korum sa Napulog Duha uban kaniya isip akong presidente sa korum sa sobra lang og duha ka tuig. Nakabiyahe ako uban kaniya ug nahingangha sa iyang kalagsik, tungod kay kinahanglang abtik ka nga molihok aron makagukod sa iyang kapaspas! Sa kinatibuk-an nakabisita siya og 133 ka mga nasud sa iyang tibuok kinabuhi.
Ang iyang tabang alang sa tanan, bata ug tigulang. Morag nakaila siya sa tanan ug dunay gasa nga makahinumdom sa mga ngalan. Ang tanan nga nakaila niya mibati nga sila maoy iyang paborito. Ug mao usab kini sa matag usa kanato—tungod sa iyang tiunay nga gugma ug pagpakabana alang sa tanan.
Ang akong dakong pakig-uban ni Presidente Nelson anaa sa eklesyastikal nga mga tahas, apan napamilyar usab ako sa propesyonal nga kinabuhi ni Presidente Nelson sa wala pa siya tawaga isip General Authority. Sama sa nahibaloan sa daghan ninyo, si Presidente Nelson usa ka surgeon [doktor nga moopera] sa kasingkasing nga inila sa tibuok kalibutan ug, sayo sa iyang medikal nga propesyon, usa ka pioneer developer sa heart-lung machine. Apil siya sa research team nga misuporta sa pinakaunang open-heart surgery sa usa ka tawo, niadtong 1951, gamit ang heart-lung bypass. Si Presidente Nelson miopera sa kasingkasing ni Presidente Spencer W. Kimball sa wala pa mahimong propeta si Presidente Kimball.
Makapainteres, sama nga ang tawag ni Presidente Nelson ngadto sa Napulog Duha 34 ka tuig na ang milabay mitapos og propesyonal nga medikal nga panrabaho sa paglig-on ug pag-ayo og mga kasingkasing, misugod kini sa pagpangalagad isip usa ka Apostol nga gipahinungod sa paglig-on ug pag-ayo sa mga kasingkasing sa dili maihap nga katawhan sa tibuok kalibutan, diin ang matag usa nabayaw ug naayo pinaagi sa iyang mga pulong ug mga buhat sa kaalam, serbisyo, ug gugma.
Usa ka Kristohanong Kasingkasing
Kon maghunahuna ko og Kristohanong kasingkasing diha sa inadlaw-adlaw nga buhat, si Presidente Nelson ang akong makita. Wala pa ko makasugat og tawo nga nagpakita niini nga kinaiya sa mas taas nga lebel kay sa iyang gibuhat. Talagsaon nga pagtudlo kanako nga maanaa sa posisyon nga personal nga makaobserbar sa mga pagpakita sa Kristohanong kasingkasing ni Presidente Nelson.
Mga semana human sa akong tawag ngadto sa Napulog Duha niadtong Oktubre 2015, duna koy oportunidad nga makadawat og direktang kasayuran mahitungod sa propesyonal nga kinabuhi ni Presidente Nelson kainadto. Gidapit ko sa pagtambong sa usa ka kalihokan diin gipasidunggan siya isip pioneer sa pag-opera og kasingkasing. Sa dihang misulod ko sa dapit, nahingangha ko sa kadaghan sa mga propesyonal nga mitahud ug mipasidungog sa buhat nga nahimo ni Presidente Nelson daghang tuig na ang milabay isip medikal nga doktor ug surgeon.
Nianang gabhiona daghan nga mga propesyonal ang mibarug ug mipahayag sa ilang pagtahud ug pagdayeg sa nabantug nga kontribusyon ni Presidente Nelson diha sa iyang medikal nga buhat. Bisan pa sa kaimpresibo sa matag usa sa mga tigpresenta sa paghulagway sa nagkalain-laing kalampusan ni Presidente Nelson, mas nadani ako sa akong pakig-istorya sa tawo nga naglingkod sa akong tupad. Wala siya makaila kon kinsa ko, apan nailhan niya si Presidente Nelson isip Dr. Nelson, direktor sa thoracic surgery residency program sa usa ka medikal nga eskwelahan niadtong 1955.
Kini nga tawo kanhi estudyante ni Presidente Nelson. Mipaambit siya og daghang panumduman. Labing makapainteres ang iyang paghulagway sa estilo sa pagtudlo ni Presidente Nelson, diin, miingon siya, naila pag-ayo si Presidente Nelson. Mipasabut siya nga kadaghanan sa mga pagtudlo sa mga heart surgery resident gipahigayon sa operahanan. Didto, ang mga resident [doktor nga nagbansay] miobserbar ug mipahigayon sa pag-opera ubos sa pagdumala sa magtutudlo, isip laboratoryo nga klasehanan. Mipaambit siya nga ang kahimtang sa operahanan ubos sa ubang magtutudlo nga surgeon samok, magkompetinsyahay, puno sa tensyon, ug gani paunhanay sa kaugalingon. Kining tawhana mihulagway niini nga lisud nga kahimtang, usahay gani makapaubos. Isip resulta, ang mga resident surgeon mibati pa gani nga ang ilang pagpanrabaho kanunay nga nameligro.
Iya dayong gipasabut ang talagsaon nga kahimtang sa operahanan ni Presidente Nelson. Malinawon, kalma, ug halangdon kini. Ang mga resident gitahud og maayo. Hinoon, human sa demonstrasyon sa usa ka pamaagi, si Dr. Nelson nagkinahanglan sa labing taas nga sumbanan sa panrabaho gikan sa matag usa sa mga resident. Dugang nga mihulagway kining tawhana kon sa unsang paagi ang labing maayo nga mga resulta sa pasyente ug ang labing maayo nga mga surgeon nagagikan sa operahanan ni Dr. Nelson.
Wala kini makasurprisa kanako. Kini ang akong personal nga naobserbahan ug mipanalangin gayud kanako diha sa Korum sa Napulog Duha. Gibati nako nga daw, sa usa ka pagsabut, usa ako sa iyang “mga resident nga gibansay.”
Si Presidente Nelson adunay talagsaong paagi sa pagtudlo sa uban ug sa paghatag og koreksyon sa usa ka positibo, matinahuron, ug makapadasig nga paagi. Siya ang representasyon sa Kristohanon nga kasingkasing ug usa ka ehemplo kanatong tanan. Gikan kaniya atong makat-unan nga sa bisan unsang kahimtang nga maanaa kita, ang atong pamatasan ug kasingkasing mahimong mahisubay sa mga baruganan sa ebanghelyo ni Jesukristo.
Dako karon natong panalangin nga mopaluyo sa atong propeta, si Presidente Russell M. Nelson. Sa tibuok niyang kinabuhi, gipalambo niya ang iyang daghan nga mga tahas isip estudyante, amahan, propesor, bana, doktor, lider sa priesthood, apohan, ug Apostol. Gituman niya kini nga mga tahas kaniadto—ug padayong nagbuhat niini—uban sa kasingkasing sa usa ka propeta.
Mga kaigsoonan, ang atong nasaksihan ug naapilan karon, usa ka maligdong nga katiguman, mosangput sa akong pagsaksi nga si Presidente Russell M. Nelson mao ang buhi nga tigpama-ba sa Ginoo alang sa tanang katawhan. Idugang usab nako ang akong pagpamatuod mahitungod sa Dios nga Amahan, ni Jesukristo, ug sa Iyang tahas isip atong Manluluwas ug Manunubos. Sa pangalan ni Jesukristo, amen.