Kon Dili Kapitoan Ka Pito

Ni Elder Lynn G. Robbins

Sa Kapangulohan sa Seventy

Taliwala sa kinabuhi nga puno sa mga babag ug pagkadili hingpit, mapasalamaton kitang tanan sa mga ikaduhang higayon.

Ang mga sayop kabahin gayud sa kinabuhi. Ang pagkat-on sa pagpatukar sa piano dili imposible nga makahimo og liboan ka mga sayop—tingali minilyon ka higayon. Sa pagkat-on og laing pinulongan, ang tawo kinahanglan moatubang sa kaulawan nga makahimo og liboan ka sayop—tingali minilyon. Bisan ang labing bantugang mga atleta sa kalibutan dili makahunong pagbuhat og sayop.

Ang “kalampusan,” ginaingon nga, “dili nga walay kapakyasan, apan gikan sa pagkapakyas ngadto sa pagkapakyas nga wala mawala ang kadasig.”¹

Sa iyang naimbento nga bombilya, si Thomas Edison miingon, “Wala ko mapakyas og 1,000 ka higayon. Ang bombilya usa ka naimbento nga dunay 1,000 ka mga lakang.”² Si Charles F. Kettering mitawag sa kapakyasan nga “mga poste ngadto sa dalan sa kalampusan.”³ Hinaut, nga sa matag sayop nga atong mahimo mahimong usa ka leksyon sa kaalam, himuon ang mga babag nga tikanganan ngadto sa kalampusan.

Ang walay pagduhaduha ni Nephi nakatabang niya nga mopadayon gikan sa mga kapakyasan ngadto sa pag-angkon sa tumbaga nga mga palid. Milungtad og 10 ka mga pagsulay sa wala pa magmalampuson si Moises sa paglayas gikan sa Ehipto uban sa mga Israelites.

Tingali kita matingala—kon sila si Nephi ug Moises gisugo sa Ginoo, ngano nga ang Ginoo wala man motabang kanila nga magmalampuson sa ilang unang pagsulay? Nganong mitugot Siya kanila—ug ngano nga mitugot siya kanato—nga dunay daghang mga kalisud ug mga problema ug pakyas sa atong pagsulay nga magmalampuson? Sa daghang importante nga mga tubag niana nga pangutana, ania ang pipila:

Una, ang Ginoo nasayud nga “kining tanan nga mga butang makahatag [kanato] og kasinatian, ug alang sa [atong] kaayohan.”⁴
Ikaduha, sa pagtugot kanato nga “motilaw sa kapait, aron [kita] masayud sa paghatag og bili sa maayo.”⁵
Ikatulo, sa pagmatuod nga “ang gubat iya sa Ginoo,”⁶ ug pinaagi lamang sa Iyang grasya nga kita makatuman sa Iyang buhat ug mahimong sama Kaniya.⁷
Ikaupat, sa pagtabang nato nga makapalambo ug makaangkon og Kristohanong mga hiyas nga dili maangkon gawas kon pinaagi sa katugbang⁸ ug “diha sa hudno sa kasakit.”⁹

Mao nga, taliwala sa daghang mga babag ug pagkadili hingpit, kitang tanan mapasalamaton sa ikaduhang kahigayunan.

Niadtong 1970, isip usa ka bag-ong freshman sa BYU, mi-enrol ko sa usa ka sinugdanan nga kurso sa kaimportante sa physics nga gitudlo ni Jae Ballif, usa ka bantugang propesor. Pagkahuman sa matag unit sa kurso, mohatag siya og eksam. Kon ang usa ka estudyante makadawat og C ug gusto og mas maayo nga grado, si Propesor Ballif motugot sa estudyante nga mokuha sa giusab nga eksam sa sama nga materyal. Kon ang estudyante makadawat og B sa ikaduhang pagsulay ug sa gihapon wala matagbaw, makakuha siya sa test sa ikatulong higayon ug sa ikaupat, ug sa sunod pa. Pinaagi sa pagtugot nako sa daghang mga higayon, gitabangan ko niya nga molampus ug sa katapusan makakuha og A sa iyang klase.

Siya talagsaon nga maalamon nga professor kinsa modasig iyang mga estudyante sa pagpadayon sa pagsulay—sa pagkonsiderar sa kapakyasan isip tigtudlo, dili usa ka trahedya, ug nga dili mahadlok sa kapakyasan apan sa pagkat-on gikan niini.

Karong bag-o gitawgan nako kining bantugang tawo 47 ka tuig human sa pagkuha sa iyang kurso sa physics. Gipangutana nako siya ngano nga andam siya nga motugot sa mga estudyante og walay kinutuban nga pagsulay aron motaas ang ilang grado. Ang iyang tubag: “Gusto ko nga anaa sa samang dapit sa mga estudyante.”

Samtang kita nagpasalamat sa ikaduhang higayon human sa mga sayop, o mga kapakyasan sa hunahuna, matingala kita sa grasya sa Manluluwas sa paghatag nato og ikaduhang higayon sa pagbuntog sa sala, o kapakyasan sa kasingkasing.

Walay usa nga mas nagtinguha sa atong kalampusan kay sa Manluluwas. Mitugot Siya nato sa pagkuha ug pagbalik-balik og kuha sa Iyang mga eksamin. Aron mahimong sama Kaniya magkinahanglan og dili maihap nga ikaduhang kahigayunan sa atong inadlaw-adlaw nga mga pakigbisog sa kinaiyanhon nga tawo, sama sa pagkontrol sa mga gana, pagkat-on og pailub ug pagpasaylo, pagbuntog sa pagkatapulan, ug paglikay sa mga sala sa wala pagbuhat, sa paghingalan lang og pipila. Kon ang pagkasayop tawhanon, pila pa ka mga pagkapakyas ang atong mahimo hangtud ang atong pagkakinaiyanhon dili na tawhanon apan balaan? Liboan? Siguro minilyon.

Ang pagkahibalo nga ang higpit ug pig-ot nga dalan adunay daghang mga pagsulay ug nga ang mga kapakyasan inadlaw nga panghitabo alang nato, Manluluwas walay katapusang presyo aron sa paghatag nato og daghang kahigayunan kutob sa mahimo aron malampusong kitang makapasar sa atong mortal nga pagsulay. Ang oposisyon nga Iyang gitugot sa kasagaran ingon og dili mabuntog ug ingon og dili madala, apan wala kita Niya biyai nga walay paglaum.

Aron sa paghimo sa atong paglaum nga makanunayon samtang mag-atubang kita og mga pagsulay sa kinabuhi, ang grasya sa Manluluwas andam ug anaa kanunay. Ang iyang grasya usa ka “balaan nga paagi sa tabang o kalig-on, … usa ka makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa ilang labing maayo nga kaugalingong mga paningkamot.”¹⁰ Ang Iyang grasya ug ang Iyang mahigugmaong mata ania kanato sa atong tibuok panaw samtang Siya modasig, mopagaan sa mga salagubangon, molig-on, moluwas, manalipod, moayo, ug “motabang sa iyang katawhan,” bisan og sila og madagma diha sa higpit ug pig-ot nga dalan.¹¹

Ang paghinulsol anaa kanunay nga gasa sa Dios ug makahimo nato sa pag-agi gikan sa kapakyasan ngadto sa kapakyasan nga dili mawala ang bisan unsa nga kadasig. Ang paghinulsol dili Iyang alternatibo nga plano sa higayon nga kita mapakyas. Ang paghinulsol mao ang Iyang plano, nakahibalo nga kita makasala. Mao kini ang ebanghelyo sa paghinulsol, ug sama sa naobserbahan ni Presidente Russell M. Nelson, kini mao ang “tibuok kinabuhi nga kurikulum.”¹²

Niining tibuok kinabuhi nga kurikulum sa paghinulsol, ang sakrament mao ang gitudlo nga paagi sa Ginoo sa paghatag og padayon nga paggamit sa Iyang kapasayloan. Kon kita moambit uban sa masulub-on nga kasingkasing ug usa ka mahinulsulon nga espiritu, motanyag Siya kanato og senimana nga kapasayloan samtang mouswag kita gikan sa kapakyasan ngadto sa laing kapakyasan subay sa dalan sa pakigsaad. Kay “bisan pa sa ilang mga sala, ang akong kasingkasing napuno sa kapuangod ngadto kanila.”¹³

Apan makapila kaha Siya mopasaylo kanato? Unsa ka taas ang Iyang pagkamainantuson? Sa usa ka okasyon si Pedro nangutana sa Manluluwas “Ginoo, hangtud ba makapila makasala ang akong igsoon batok kanako, ug pasayloon ko siya? Makapito ba?”¹⁴

Sa walay duha-duha, si Pedro nagtuo nga ang pito dako na kaayo nga numero sa paghatag og gibug-aton sa kabuang sa pagpasaylo og daghang higayon ug nga ang pagkamabination kinahanglang adunay kinutuban. Agig tubag, ang Manluluwas misulti gayud ni Pedro nga dili mag-ihap—sa dili pag-establisar og kinutuban sa pagpasaylo.

“Si Jesus mitubag kaniya, Wala ako mag-ingon kanimo nga makapito, kondili kapitoan ka pito.”¹⁵

Klaro kaayo nga, ang Manluluwas wala mag-establisar og pinakataas nga kinutuban nga 490. Kana matandi sa pag-ingon nga ang pag-ambit sa sakrament adunay kinutuban nga 490, ug dayon sa ika-491 nga higayon ang langitnong awditor motabang sa paghusay ug moingon, “Pasayloa ko ang imong kard sa paghinulsol na-expire na—gikan karon ug sa unahan, mag-inusara ka na.”

Ang Ginoo migamit sa math nga kapitoan pil-on og kapito isip usa ka simbolo sa Iyang walay kinutuban nga Pag-ula, ang Iyang walay utlanan nga gugma, ug ang Iyang walay katapusan nga grasya. Oo, ug ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako.”¹⁶

Kana wala magpasabut nga ang sakrament nahimong lisensya sa pagpakasala. Mao kana ang usa sa rason nga gilakip sa Ginoo nga kini nga mga pulong sa basahon ni Moroni: “Apan ingon sa kanunay nga sila maghinulsol ug mangayo og kapasayloan, uban sa tinuod nga katuyoan, sila pasayloon.”¹⁷

Ang tinuod nga katuyoan nagpasabut uban sa tinuod nga paningkamot ug tinuod nga kausaban. Ang “kausaban” mao ang importante nga pulong nga gigamit sa Giya ngadto sa mga Kasulatan sa paghatag og kahulugan sa paghinulsol: “Usa ka pag-usab sa hunahuna ug sa kasingkasing nga magdala og lab-as kinaiya ngadto sa Dios, sa kaugalingon, ug sa kinabuhi sa kinatibuk-an.”¹⁸ Kanang matanga sa kausaban moresulta sa espirituhanong pagtubo. Ang atong kalampusan, dili mopadulong gikan sa kapakyasan ngadto sa kapakyasan, apan magtubo gikan sa kapakyasan ngadto sa kapakyasan nga walay pagkawala sa bisan unsa nga kadasig.

Kabahin sa kausaban, ikonsiderar kining yano nga panabut: “Ang mga butang nga dili mausab magpabilin nga pareha ra.” Kining dayag nga kamatuoran wala magpasabut sa pag-insulto sa inyong salabutan apan mao ang talagsaon nga kaalam ni Presidente Boyd K. Packer, kinsa midugang, “Ug kon kita mahuman sa pag-usab—human na kita.”¹⁹

Tungod kay kita dili gusto nga mahuman hangtud nga kita mahimong sama sa atong Manluluwas,²⁰ kinahanglan kitang mopadayon nga mobarug matag higayon nga kita madagma, uban sa tinguha nga magpadayon sa pagtubo ug pag-uswag bisan pa sa atong mga kahuyang. Sa atong kahuyang, Siya mihatag og kasiguroan kanato, “Ang akong grasya igo alang kanimo, kay ang akong gahum ginahingpit diha sa kahuyang.”²¹

Ang pagtan-aw lamang sa kinatibuk-an o tsart sa kalamboan nga kita makakita sa atong pisikal nga paglambo. Sa samang paagi, ang atong espirituhanong pagtubo sa kasagaran dili mamatikdan gawas sa paagi sa paghinumdom sa unsay nahitabo sa nangaging panahon. Maalamon ang regular nga paghunahuna sa atong kaugalingon sa nangagi kay nianang paagiha sa atong mahibaloan ang kauswagan ug makadasig nato nga kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum.”²²

Mapasalamaton ko sa mahigugmaong kaayo, pailub, ug pagkamainantuson sa Langitnong mga Ginikanan ug sa Manluluwas, kinsa mihatag nato og dili maihap nga ikaduhang kahigayunan sa atong panaw balik ngadto sa Ilang presensya. Sa ngalan ni Jesukristo, amen.