Ang Molahutay Hangtud sa Katapusan Maluwas

Ni Elder Claudio D. Zivic

Sa Seventy

Magmatinud-anon kita sa unsay atong gituohan ug nahibaloan.

Mga kaigsoonan, nagpasalamat ko og maayo sa oportunidad nga makapadayag diha kaninyo sa pipila sa akong mga pagbati.

Pipila ka tuig ang milabay, ang akong asawa ug ako nanambong sa unang seremonya sa pag-abli sa interactive children’s exhibit sa Church History Museum sa Siyudad sa Salt Lake. Pagkahuman sa seremonya, si Presidente Thomas S. Monson mipadulong kanamo, ug dihang milamano siya sa among mga kamot, miingon siya, “Lahutay, ug kamo magmadaugon”—usa ka lawom nga pagtulun-an ug usa kansang kamatuoran, sa tinuod lang, mapanghimatud-an natong tanan.

Si Jesukristo mipasalig kanato nga “Ang molahutay hangtud sa katapusan maluwas.”¹

Ang paglahutay nagpasabut “sa pagpabilin nga lig-on diha sa usa ka pasalig nga magmatinud-anon ngadto sa mga sugo sa Dios bisan pa sa pagtintal, pagbatok, ug kalisdanan.”²

Bisan kadtong nakaangkon og gamhanang espirituhanong kasinatian ug matinud-anong nakaserbisyo usa ka adlaw mahisalaag o mahimong dili aktibo kon sila dili molahutay hangtud sa katapusan. Hinaut kanunay ug kusganon natong ibutang sa atong mga hunahuna ug kasingkasing ang mga pulong nga “Kini dili mahitabo ngari kanako.”

Sa dihang nagtudlo si Jesukristo didto sa Capernaum, “daghan sa iyang mga tinun-an mitalikod ug wala na managpanglakaw uban kaniya.

“Ug si Jesus nangutana sa Napulog Duha, Buot ba usab kamong mobiya kanako?”³

Nagtuo ko nga karon, si Jesukristo mangutana kanatong tanan kinsa mihimo og sagradong mga pakigsaad uban Kaniya, “Buot ba usab kamong mobiya kanako?”

Ako nag-ampo nga kitang tanan, uban sa lawom nga pagpamalandong kabahin sa unsay nagpaabut kanato sa kahangturan, motubag sama sa gibuhat ni Simon Pedro: “Ginoo, kang kinsa man kami moadto? ikaw mao ang may mga pulong mahitungod sa kinabuhing dayon.”⁴

Magmatinud-anon kita sa unsay atong gituohan ug nahibaloan. Kon kita wala magpakabuhi sumala sa atong nahibaloan, mag-usab kita. Ang mga makasasala kinsa nagpadayon sa ilang mga sala, ug dili maghinulsol, mas magka-unlod pa gayud ngadto sa kahugaw, hangtud nga si Satanas mismo ang moangkon, girisgo og maayo ang ilang oportunidad nga makahinulsol, mapasaylo, ug mapanalanginan sa tanan nga mga panalangin sa kahangturan.

Nakadungog ko og daghang pangatarungan gikan niadtong mga mihunong sa aktibong pag-apil sa Simbahan ug nawad-an sa husto nga panglantaw sa katuyoan sa atong panaw dinhi sa yuta. Ako moawhag kanila sa pagpamalandong ug sa pagbalik, tungod kay nagtuo ko nga walay usa nga makapangatarungan diha sa atubangan sa atong Ginoo, si Jesukristo.

Sa dihang gibunyagan kita, mihimo kita og mga pakigsaad—dili ni bisan kinsang tawo apan sa Manluluwas, miuyon sa “pagdala [sa atong kaugalingon] sa ngalan ni Jesukristo, nga adunay hugot nga tinguha sa pag-alagad kaniya ngadto sa katapusan.”⁵

Ang pagtambong sa mga miting sa sakrament mao ang usa sa importanting paagi nga kita motimbang-timbang sa atong determinasyon sa pagserbisyo Kaniya, sa atong espirituhanong kalig-on, ug sa pagtubo sa atong hugot nga pagtuo diha ni Jesukristo.

Ang pag-ambit sa sakrament mao ang labing importanting butang nga atong buhaton sa adlaw nga Igpapahulay. Ang Ginoo mipasabut niini nga ordinansa sa Iyang mga Apostoles sa wala pa Siya namatay. Gihimo usab Niya kini didto sa kontinente sa Amerika. Nagsulti Siya kanato nga kon kita moapil niining ordinansa, mahimo kining pagpamatuod ngadto sa Amahan nga kita kanunay mohinumdom Kaniya, ug Siya misaad nga, sa samang paagi, kita makaangkon sa Iyang Espiritu uban kanato.⁶

Sa mga pagtulun-an ni Alma nga batan-on ngadto sa iyang anak nga lalaki si Shiblon, makakita kita og maalamon nga tambag ug pasidaan nga makatabang nato nga magpabiling matinud-anon sa atong mga pakigsaad:

“Pagmatngon nga ikaw dili madala ngadto sa garbo; oo, pagmatngon nga ikaw dili manghambog sa imong kaugalingon nga kaalam, ni sa imong gahum.

“Gamita ang imong kaisug, apan dili ang pagpalabi-labi; ug pagmatngon usab nga ikaw makapugong sa tanan nimo nga mga mainit nga pagbati, nga ikaw mapuno uban sa paghigugma; pagmatngon nga ikaw makapugong gikan sa pagtinapulan.”⁷

Pipila ka tuig ang milabay, samtang nagbakasyon, gusto kong mosakay og kayak sa unang higayon. Miabang ko og kayak, ug sa tumang kadasig, misugod dayon ko sa pagpalutaw ngadto sa dagat.

Paglabay sa pipila ka minutos, gilimbuwad sa balod ang kayak. Sa dakong paningkamot, naggunit sa bugsay ang usa ka kamot ug ang pikas sa kayak, nahimutang na ko pag-usab.

Naningkamot ko pag-usab sa pagbugsay sa kayak, apan human lang sa pipila ka minutos, ang kayak natuwad na usab. Padayon kong naningkamot og maayo, nga kawang lang, hangtud dunay tawo kinsa nakasabut sa pagpanakay og kayak misulti nako nga basin niliki ang kasko ug basin nasudlan ang kayak og tubig, nga maoy hinungdan nga dili kini mabalanse ug dili makontrol. Akong gibitad ang kayak sa baybayon ug gitangtang ang song-song [plug], ug sigurado gayud, nanggawas ang daghang tubig.

Usahay maghunahuna ko nga nagpadayon kita sa kinabuhi nga dunay mga sala nga, sama sa liki diha sa akong kayak, makabalda sa atong espiritwal nga pag-uswag.

Kon kita magpadayon diha sa atong mga sala, makalimtan nato ang atong gihimong mga pakigsaad sa Ginoo, bisan og magsige ta og kalimbuwad tungod sa ka walay balanse nga namugna niadtong mga sala diha sa atong mga kinabuhi.

Sama sa mga liki sa akong kayak, ang mga liki sa atong kinabuhi kinahanglan atimanon. Pipila ka sala magkinahanglan og dugang nga mga paningkamot kay sa uban aron mahinulsolan.

Kinahanglan atong pangutan-on ang atong kaugalingon: Hain man kita dapit kalabut sa atong kinaiya ngadto sa Manluluwas ug sa Iyang buhat? Anaa ba kita sa sitwasyon ni Pedro sa dihang siya milimud ni Jesukristo? O miabante ba kita ngadto sa punto nga kita nakaangkon og kinaiya ug determinasyon nga naa niya human sa dakong katungod nga iyang nadawat gikan sa Manluluwas?⁸

Kinahanglan kitang maningkamot sa pagsunod sa tanang mga sugo ug mohatag og pagtagad niadtong lisud kaayo natong masunod. Anaa ang Ginoo sa atong kiliran, nagtabang nato sa panahon sa panginahanglan ug kahuyang, ug kon kita magpakita og sinserong tinguha ug molihok sumala niana, Siya mohimo sa “mahuyang nga mga butang nga mahimo nga malig-on.”⁹

Ang pagkamasulundon makahatag nato og kalig-on sa pagbuntog sa sala. Kinahanglan usab natong masabtan nga ang pagsulay sa atong hugot nga pagtuo nagkinahanglan nga kita mosunod, sa kanunay wala masayud sa mga resulta.

Mosugyot ko og usa ka pormula nga makatabang nato nga makalahutay hangtud sa katapusan:

Sa kada adlaw, pag-ampo ug pagbasa sa mga kasulatan.
Sa kada semana, pag-ambit sa sakrament uban sa usa ka mapainubsanon nga kasingkasing ug mahinulsulon nga espiritu.
Bayad sa atong ikapulo ug mga halad.
Matag duha ka tuig—kada tuig alang sa kabatan-onan—bag-uhon ang atong mga temple recommend.
Sa tibuok natong kinabuhi, pagserbisyo diha sa buluhaton sa Ginoo.

Hinaut ang talagsaong mga kamatuoran sa ebanghelyo magpermi sa atong hunahuna, ug hinaut nga atong himoon ang atong kinabuhi nga walay mga liki nga makapugong sa atong luwas nga biyahe sa dagat sa kinabuhi.

Ang kalampusan diha sa pamaagi sa Ginoo adunay kantidad, ug ang bugtong paagi nga makab-ot kini mao ang pagbuhat kon unsay gikinahanglan.

Mapasalamaton kaayo ko nga ang atong Manluluwas milahutay hangtud sa katapusan, mikompleto sa Iyang talagsaon nga maulaong sakripisyo.

Miantus Siya alang sa atong mga sala, kasakit, depresyon, kaguol, balatian, ug kahadlok, ug busa Siya nasayud unsaon sa pagtabang kanato, unsaon sa pagdasig kanato, unsaon sa paghupay kanato, ug unsaon sa paglig-on kanato aron kita makalahutay ug makabaton og korona nga gitagana alang niadtong kinsa wala nabuntog.

Managlahi ang atong mga kinabuhi. Kitang tanan adunay panahon sa pagsulay, sa kalipay, sa pagdesisyon, sa pagbuntog sa mga babag, ug pagpahimulos sa mga oportunidad.

Kon unsa may atong personal nga mga sitwasyon, ako mopamatuod nga ang atong Langitnong Amahan kanunay nag-ingon, “Gihigugma ko kamo. Gipaluyohan ko kamo. Giubanan ko kamo. Ayaw og hunong. Paghinulsol ug lahutay diha sa dalan nga Akong gipakita kaninyo. Ug Ako mopasalig kaninyo nga kita magkita pag-usab sa atong celestial nga panimalay.” Sa ngalan ni Jesukristo, amen.