iVakavuvuli ni Veiqaravi, June 2018

Lima na Ka Era Dau Cakava na Dauvakarorogo Vinaka

Na vakarorogo dina ena vukei iko mo kila na ivakarau mo veivuke kina me sotavi nodra gagadre vakayago kei na gagadre vakayalo na tani me vaka ena vakayacora na iVakabula.

E kaya o Elder Jeffrey R. Holland ena Kuoramu ni iApositolo Le Tinikarua: “E rairai ena bibi cake sara mai na vosa na vakarorogo. … Ke da vakarorogo ena loloma, eda na sega ni gadreva me da vakilakila na ka me tukuni. Ena soli vei keda—mai vua na Yalo.”¹

Na vakarorogo e dua na ivakarau ni bula e rawa ni da vulica. Na vakarorogo e vakaraitaka noda loloma vei ira na tani, vukea na tarai cake ni veiwekani qaqaco, ka sureta na Yalo me vakalougatataki keda ena isolisoli ni kila na duidui me vukea noda kila nodra gagadre na tani.² Oqo e lima na sala e rawa ni da vakavinakataka cake kina na ivakarau ni noda vakarorogo.

1. Solia Vei Ira na Gauna

Eso na tamata ena gadreva na gauna me ra sokumuna nodra vakasama ni se bera ni ra vosa. Solia vei ira na gauna ni se bera ni ra vosa vakakina ni ra sa tukuna oti e dua na ka (raica na Jemesa 1:19). Ni ra sa vosa oti e sega ni kena ibalebale ni ra sa tukuna kece sara na veika era via tukuna. Kua ni dau rerevaka na galu (raica na Jope 2:11–3:1 kei na Alama 18:14–16).

2. Vakarorogo

E totolo cake noda vakasama mai na nodra vosa eso. Vorata na veitemaki mo via kila na ka e vakasamataka se mo sa vakasamataka rawa na ka mo tukuna ni sa oti o ira (raica na Vosa Vakaibalebale 18:13). Ia, vakarorogo ena inaki mo kila. Ena vinaka cake nomu sauma baleta ni ko sa vakaiyaragitaki tu ena kila ka cecere cake.

3. Vakamatatataka

Kakua ni rere ena taro me matata kina e dua na ka o sega tiko ni kila vinaka (raica na Marika 9:32). Ni qarai na matata ena vakalailaitaka na veilecayaki ka vakaraitaka nomu kauwaitaka na ka e tukuni tiko.

4. Vakananuma

Vakalekataka na ka o rogoca kei na nomu nanuma baleta na ivakarau ni yalona e dua tale. Oqo ena vukea me ra kila kevaka sa kilai na ka era tukuna ka solia vei ira na madigi me ra vakamatatataki ira.

5. Vaqara na Vanua mo ni Tautauvata Kina

O na sega beka ni duavata ena veika kece e tukuni, ia vakadonuya na ka e rawa me kakua ni vakatanitaka na nomu nanuma. Na duavata e rawa ni vukea me kautani na nanamaki kei na veisaqasaqa (raica na Maciu 5:25).

E vakavulica o Peresitedi Russell M. Nelson ni dodonu me da “vulica me da vakarorogo, ka vakarororgo me da veivakavulici vakataki keda.”³ Ni o vakarorogo ena inaki mo kila na ka e baleti ira eso tale, o sa na toka kina ena dua na vanua vinaka cake mo kila na nodra gagadre ka rogoca na veivakauqeti ena ivakarau mo kauwaitaki ira kina era wavoliti iko tu me vaka ena vakayacora na iVakabula.

Na Vakarorogo sai Koya na Loloma

E dua na italanoa nei Elder Holland e vakaraitaka na mana ni vakarorogo:

“A draivataka mai vakamalua noqu itokani o Troy Russell nona lori mai nona qaraji. … A vakila ni kabata cake e dua na ka nona taya e muri. … A sobu mai ka raica ni sa davo vakatoboicu tu ena simede na luvena tagane yabaki ciwa vakamareqeti o Austen. … Sa takali o Austen.

Ni sa sega ni rawa me moce se sega ni rawa me kunea na vakacegu, sa sega ni vakayalovinakataki rawa o Troy. Ia ena loma ni gauna mosimosi oqori a yaco mai o John Manning.

“Au sega dina ni kila se na ituvatuva cava erau dau sikova kina nodratou vale na Russell o John kei na nona itokani gone. … Na ka ga au kila ena vulaitubutubu sa oti a dolele sobu kina o Baraca Manning ka tomiki koya cake mai na vakacalaka ena icurucuru ni motoka oya me vaka ga ni sa tomiki Austen lailai cake tiko. Me vaka na … vakavuvale se tacina ena kosipeli sa dodonu me vakakina, a colata o John na veimaroroi kei na veikauwaitaki vakamatabete vei Troy Russell. A tekivu ena nona kaya, ‘Austen e vinakata o Troy, mo tucake tale e yavamu—okati kina na rara ni basketbol—au na dau tiko eke ena veimataka ena 5:15. Vakarau tu. …’

“‘Au a sega ni via lako,’ a qai tukuna vei au e muri o Troy, ‘baleta ena veigauna kece keirau dau lako vata kei Austen. … Ia a cike toka ga o John, au sa mani lako. Ena imatai ni siga oya ka lako yani, keitou veivosaki—au a vosa—ka vakarorogo o John. A dredre taumada, ia ni toso na gauna au qai kila niu sa kunea na noqu igu mai vei [John Manning], o koya a lomani au ka rogoci au me yacova ni sa qai cabe tale na matanisiga ena noqu bula.’”⁴

© 2018 mai na Intellectual Reserve, Inc. All rights reserved. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. iVakadewa ni Ministering Principles, June 2018. Fijian. 15055 858

iDusidusi

1. Jeffrey R. Holland, “Witnesses unto Me,” Liahona, July 2001, 16.

2. Raica na David A. Bednar, ena “Panel Discussion” (veituberi ni veiliutaki ni vuravura raraba, Nove. 2010), broadcasts.lds.org.

3. Russell M. Nelson, “Listen to Learn,” Ensign, Me 1991, 23.

4. Jeffrey R. Holland, “Mata ki na Lotu,” Liaona, Nove. 2016, 62, 67.

Veiqaravi me Vakataka nai Vakabula

Ni biubiu mai Jeriko o Jisu, erau a kaci yani Vua e rua na tamata mataboko ka kaya, “Mo ni lomani keirau mai na Turaga. …

“Sa qai tu vakadua ko Jisu, ka kacivi rau, ka kaya, A cava drau sa vinakata meu cakava vei kemudrau?

“Erau sa kaya vua, Na Turaga, me rai rawa na matai keirau.

“Sa qai yalololoma ko Jisu, a sa tara na matadrau: a sa rai vinaka vakasauri na matadrau, a rau sa muri Koya” (Maciu 20:30, 32–34).

Na cava e rawa ni da vulica mai na ivakarau ni nona vakarorogo na iVakabula?

Tomani tiko na Kena Cakacaka

Vakasamataka mo vakayagataka vakacava na ivakavuvuli eso oqo ena nomu veiqaravi. Tarogi ira o veiqaravi kina na cava era gadreva. Vakarorogo ki na ka era tukuna kei na veivakauqeti ni Yalo Tabu. Cakacaka ena ka o rogoca.

Na inaki ni ivakavuvuli ni veiqaravi me vukea noda vulica me da veikauwaitaki—e sega ni wasei me itukutuku. Ni yaco me da kilai ira eda qarava, ena uqeti keda na Yalo Tabu me da kila na itukutuku cava era na gadreva me ikuri ni noda kauwai kei na yalololoma.