Ip Yohk ke In Karihngihn, Jun 2018

Limekohsr Ma Mwet Porongo Wo uh Oruh

Porongo na pwacye fah kahsrwe kom in etuh ohiyac in kahsruh sang enenuh nuh ke ma luhn nguhn ac mahno luhn mwet sahyac oacna Mwet Lahngo El oruh.

Elder Jeffrey R. Holland ke U luhn Mwet Sap Singucul Luo an el fahk: “Sahp finne yohk srihpac likina sramsram uh in porongweyuck. … Kuht fin porongo ke luhngse, kuht ac tiac enenuh in nuhnkuh ma kuht ac fahk uh. Ac fah utuckuh nuh sesr—ke Nguhn.”¹

Porongo el sie mukwikwi kuht kuh in lotwelah. In porongo ahkkahlwemye luhngse lasr nuh sin mwet sahyac uh, kahsruh muhsaheack kuhpahsr fokoko, ac suli Nguhn in ahkinsewowoye kuht ke mwe sang ke in etuh in kahsrwe kuht kahlwem ke enenuh luhn mwet sahyac uh.² Pa inge limekohsr inkacnek ma kuht kuh in ahkwoye ohiyacn porongo lasr uh.

1. Sang Nuh Selos Pacl Uh

Puhs mwet enenuh pacl in ahkolah nuhnak lalos met liki in sramsram. Sang nuh selos pacl in nuhnkuh kwewana met liki ac tukun elos fahk ma se uh (liye James 1:19). Tiac kalmeyacn sahflah sramsram lalos uh pa elos fahklah nohfohn ma elos enenuh uh. Nimet sahngweng ke mihslac (liye Job 2:11–3:1 ac Alma 18:14–16).

2. Lohacng Ahkwoyac

Kuht nuhnkuh muhi liki mwet sahyac uh sramsram. Kutong srihfeyuck in sacrmae kuh in sana motkwelah nuh ke ma kom ac fahk ke elos tari uh (liye Soakas 18:13). Sahyacna, porongo ke in srihke in kahlwem. Top lom an ac wo ke srihpen ac oreklac ke kahlwem yohk.

3. Ahkpwacyei

Nimet sahngweng in siyuck kihsen siyuck ma ac ahkpwacyei ma kom tiac kahlwem kac (liye Mark 9:32). Ahkpwacyei el ahksrihkyelah tahfonglac ac ahkkahlwemye kena lom ke ma fwacklac uh.

4. Nuhnkwaclah

Ahkfototoye ma kom lohng an ac ohiyacn kahlwem lom ke ma mwet sahyac uh puhla. Ma inge kahsrwelos in etuh fin kahlwem ma elos fahk uh ac sang nuh selos pacl wo in ahkpwacyei.

5. Sokwack Ma Fal

Kom kuh tiac insese ke ma nuh kwewa fwack uh, tuh insese ke ma kom kuh sahyacn tiac kahlwem ke puhla lom sifacna uh. In kuh in insese kuh in kahsruh ahkfihsrwacsrye elyah ac lain (liye Matthew 5:25).

Prestuhn Russell M. Nelson el luti lah kuht enenuh in “lotwelah in porongo, ac porongo in lotwelah sin sie sin sie.”³ Ke kom porongo ke srihke in lotwelah ke mwet sahyac uh, kom fah oasr ke acn wowo se in kahlwem ke enenuh laltahl ac lohng moklweyuck ke ohiyac kom kuh in karihngihn mwet raunikomlac oacna ke Mwet Lahngo Elac oruh.

Porongo Pa Luhngse

Sie sramsram sel Elder Holland ahkuhtweyac kuh ke in porongo:

“Kawuck se luhk Troy Russell el fohlohkihnyac stosah soko ukwacl ah kahkahsrihk liki garage lal ah. … El puhla lah wil se nahtuhl tok ah fanuhkyac kihtin tohktohk. … El srolah ac sokwack muhkwena tuhlihk mukul yac yuc sacohk se nahtuhl ah, Austen, oan ohnkiyucki fin pef ah. … Austen el misac.

“Koflah in mutul, koflah sokwack mihs, koflah ahkwoyeyuck Troy. … Tuhsruhk tuhkuh nuh ke pacl upac se ingacn pa … John Manning. …

“Nga tiacna etuh lah ngac John ac junior companion se lal ah muhtwacta nuh lohm sel Russell ah. … Ma nga etuh uh pa lah ke spring tari ah Tamuhlwel Manning el saplaklac ac sraklalwack Troy Russell liki ongaiyac ke inkacnek soko ah oacna fin el sruhkuhlwack Austen srihsrihk sifacna. Oacna … tahmtahel ke wosasuc uh ma el enenuh in oruh, John el oruh karihngihnyuck ke pristut uh ac liyaclwacng Troy Russell. El muhtwacwacack ke fahk, ‘Troy, Austen el kena kom in kalweni in moul—weacng ke acn in pahsket uh—na nga fah oasr inge lututacng nuh kwewa ke ao 5:15 a.m. Ahkolah. …’

“‘Nga tiacna ke wi,’ Troy el fahk nuh sihk tok, ‘ke srihpen nga kwacna usacl Austen el wiyuc. … Tuhsruhk John el ngihsre, oruh nga wi. Ke lwen se emet ke fohlohk ah, kuht sramsramkihn—kuh nga sramsram ac John el porongo. … Muhtwacwacackiyac ah arlac upac, tuhsruhk ke kuhtuh pacl nga akihlen lah nga sokwack kuh luhk ke ohiyac lal [John Manning], suc luhngse nga ac porongweyuc nuh ke el kuh in sahflahiyac ah sokwack engan in moul.’”⁴

© 2018 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn Ministering Principles, June 2018. Kosraean. 15055 868

Mwe Kahsruh

1. Jeffrey R. Holland, “Witnesses unto Me,” Liahona, Julahe 2001, 16.

2. Liye David A. Bednar, in “Panel Discussion” (worldwide leadership training meeting, Nov. 2010), broadcasts.lds.org.

3. Russell M. Nelson, “Listen to Learn,” Ensign, May 1991, 23.

4. Jeffrey R. Holland, “Emissaries to the Church,” Liahona, Nov. 2016, 62, 67.

In Karihngihn oacna Mwet Lahngo El Oruh

Ke Jisus el som liki acn Jericho ah, luo mwet kun wowoyak nuh Sel, ac fahk, “O Leum, Wen nutin David! Pakomutasr! …

“Jesus el tui, ac pangnoltal ac siyuk, ‘Mea komtal lungse ngan oru nu sumtal?’

“Ac eltal fahk, ‘Leum, oru tuh kut in ku in liye.’

“Jesus el pakomutaltal ac kahlye mutaltal. In pacl sacna eltal ku in liye, ac eltal fahsr tokol” (Matthew 20:30, 32–34).

Meac kuht kuh in lotwelah ke ohiyen porongo luhn Mwet Lahngo ah?

Solsol nuh ke Mukwikwi

Nuhnkuh lah kom ac kapsruh fuhkah ip yohk inge nuh ke ohiyacn luti lom an. Siyuck sin mwet kom luti an ma elos enenuh uh. Porongo nuh ke top lalos ac moklweyuck luhn Nguhn Muhtahl. Mukwikwi nuh ke ma kom lohng uh.

Ip yohk ke in karihngihn ma oreklac in kahsruh luti kuht nuh ke karihngihnyen sie sin sie—in tiac akacsruhiyuck oacna sie pweng na. Ke kuht ac etwaclah mwet suc kuht kuhlwacnsapuh uh, Nguhn Muhtahl fah moklwe kuht in etuh lah pweng fuhkah elos ac enenuh in weacng nuh ke karihngihnyuck ac luhngse lasr.