Parau tumu nō te aupurura’a, tiunu 2018

E pae ’ohipa e rave te hō’ē ta’ata e fa’aro’o mai ra i tā ’oe parau

Nā te fa’aro’o-mau-ra’a i tei parauhia mai e tauturu ia ’outou ’ia ’ite nāhea i te pāhono i te mau hina’aro pae vārua ’e pae tino o vetahi ’ē, mai tā te Fa’aora e rave ’āhani tei reira ’oia.

’Ua parau ’o Elder Jeffrey R. Holland nō te pupu nō te Tino ’Ahuru Ma Piti ’āpōsetolo ē : « Penei a’e e mea faufa’a a’e ’ia fa’aro’o i tei parauhia mai, i ’ia parau atu… Mai te mea e fa’aro’o tātou ma te here, e’ita tātou e feruri e aha te parau atu. E hōro’ahia mai ia tātou—nā roto i te Vārua ».¹

Te ’aravihi e fa’aro’o i tei parauhia mai, e nehenehe ïa e ha’api’i. ’Ia fa’aro’o tātou i tei parauhia mai, tē fa’a’ite ra ïa tātou i tō tātou here i te ta’ata, e tauturu te reira i te ha’apūai i te mau aura’a ’e e tītau manihini te reira i te Vārua nō te ha’amaita’i ia tātou i te hōro’a nō te hāro’aro’ara’a ’ia ta’a ia tātou i te hina’aro o te ta’ata.² Teie e pae rāve’a nō te ha’amaita’i i te huru tātou e fa’aro’o ai i tei parauhia mai.

1.Vaiiho i te tahi taime

Nō te mau ta’ata e rave rahi, tītauhia te tahi taime nō te feruri ’a parau ai. E vaiiho i te tahi taime ia rātou nō te feruri hou rātou ’a fa’ahiti mai ai i te parau ’e i muri iho ato’a i te fa’ahitira’a i te parau (hi’o Iakobo 1:19). E ’ere nō te mea ’ua oti rātou i te fa’ahiti i te parau, ’ua oti pauroa ïa i te fa’ahitihia mai. ’Eiaha e mata’u i te vai-mū-noa-ra’a te ta’ata (hi’o Ioba 2:11–3:1 ’e Alama 18:14–16).

2.Tāu’a

Mea vitiviti tātou i te feruri, e mea taere ri’i te ta’ata ’ia parau mai. E ha’avī i terā ’ohipa fa’aoti ’oi’oi i te mana’o ’aore rā e fa’aineine ātea i tā ’oe e parau atu ’ia oti mai tā rātou (hi’o Maseli 18:13). E fa’aro’o rā i tei parauhia mai ma te hina’aro ’ia māramarama. E maita’i mai tā ’oe pāhonora’a nō te mea ’ua rahi a’e te māramarama.

3.Ha’apāpū

’Eiaha e mata’u i te ui i te uira’a nō te ha’apāpū mai i te mea ’aita ’oe i māramarama (hi’o Mareko 9:32). ’Ia ha’apāpūhia te parau, e iti mai te ta’a ’ore ’e e ’itehia te ’ana’anatae i te mea e parauhia ra.

4.Fa’ahiti fa’ahou ā

E fa’ahiti atu i ta ’oe i fa’aro’o mai ’e i te mea tā ’oe i māramarama nō ni’a i te mana’o o tōna ’ā’au. E tauturu te reira i te ta’ata ’ia ’ite ē, ’ua māramaramahia ānei tāna parau, ’e ’aita rā, e ha’apāpū mai ïa ’oia.

5.’Imi i te vāhi tū’ati

E’ita paha ’oe e fāri’i i te mau mea ato’a e parauhia mai, e fāri’i rā i te nehenehe e fāri’i ma te ’ore e huna i tō ’oe mau mana’o. Nā te mana’o au e fāri’i e tauturu i te tāmarū i te hepohepo ’e te mārō (hi’o Mataio 5:25).

’Ua ha’api’i te peresideni Russell M. Nelson ’ia « ha’api’i tātou i te fa’aro’o i tei parauhia mai, ’e ’ia fa’aro’o tātou i tei parauhia mai nō te ha’api’i mai te tahi ’e te tahi ».³ ’Ia fa’aro’o ’outou i tei parauhia mai, ma te hina’aro e ’apo mai i tā te ta’ata e parau nei, e ti’a ïa ia ’outou ’ia māramarama i tō rātou mau hina’aro ’e ’ia fa’aro’o i te mau muhumuhu nō ni’a i te huru e ha’apa’o i te ta’ata ’ati a’e ia ’outou mai tā te Fa’aora e rave ’āhani tei reira ’oia.

’Ia fa’aro’o ’oe i tei parauhia mai, tē here ra ïa ’oe

E ’ā’amu nā Elder Holland e fa’ahōho’a ra i te mana nō te fa’aro’ora’a i tei parauhia mai :

« Tē faʼahoro mārū ra tōʼu hoa ʼo Troy Russel i tōna pere’o’o uta tauihaʼa mai roto mai i te fare vairaʼa pere’o’o… ’E mai te huru ra ’ua nā ni’a tōna huira pere’o’o i te hōʼē puʼu… ’Ua pou ʼoia ʼe ’ua ʼite atu ïa i tāna tamaiti iti here e iva matahiti, ʼo Austen, i te tāravaraʼa i niʼa i te tima… ’Ua faʼaruʼe mai ʼo Austen.

« ʼAita e topa te ta’oto, ’aita e topa te hau, ’ua heva noa Troy… I roto rā i taua taime ʼoto rahi ra ’ua tae mai… ’o John Manning…

« ’Aita vau i ʼite e aha te tālena a John rāua tōna hoa taure’are’a nō te hāhaerera’a i te ʼutuāfare Russell… Te mea rā tāʼu i ʼite, ’oia ho’i, i te tau tupuraʼa rāʼau i maʼiri aʼenei ’ua haere atu te taeaʼe Manning nō te rave ia Troy Russell mai roto i teie ʼati purūmu ra, mai te huru ra tē rave ra ʼoia iho ia Austen naʼinaʼi. Mai… te taeaʼe i roto i te ’evanelia tītauhia iāna ’ia riro, ’ua rave noa ʼo John i te hōpoʼia autahuʼaraʼa e aupuru ʼe e tīaʼi ia Troy Russell. ’Ua haʼamata ʼoia ma te parau ē, ‘E Troy, tē hinaʼaro nei Austen ’ia ti’a mai ’oe i ni’a—’ia ho’i ato’a mai i niʼa i te tahua tāoraraʼa pōpō—nō reira e haere mai au i te mau poʼipoʼi atoʼa i te hora 5:15. Fa’aineine mai…’

« ‘ʼAita vau i hinaʼaro ’ia haere nō te mea ’o māua noa Austen tē haere i taua mau poʼipoʼi ra ʼe ’ua ʼite au ē e māuiui au… ’Ua onoono rā John, nō reira ’ua haere atu vau. Mai taua mahana mātāmua ra, ’ua paraparau māua—ʼo vau iho ā rā te paraparau, ’o John te fa’aro’o… ʼE mea fifi roa i te haʼamataraʼa, i muri mai rā ’ua ʼite au ē, ’ua ’iteahia iāʼu tōʼu pūai i roto [ia John Manning], ’o tei here… iā’u ʼe tei faʼaroʼo iāʼu ē tae noa atu ’ua hiti fa’ahou mai te mahana i roto i tō’u oraraʼa.’ »⁴

© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Ministering Principles, June 2018. Tahitian. 15055 895

Fa’ata’ara’a

1. Jeffrey R. Holland, « Witnesses unto Me », Liahona, Tiurai 2001, 16.

2. Hi’o David A. Bednar, i roto « Panel Discussion » (ha’api’ipi’ira’a nā te feiā fa’atere nā te ao tā’āto’a nei, Nov. 2010), broadcasts.lds.org.

3. Russell M. Nelson, « Listen to Learn », Ensign, Mē 1991, 23.

4. Jeffrey R. Holland, « Mau ti’a tonohia i te ’Ēkālesia », Liahona, Novema 2016 , 2016, 62, 67.

Aupuru mai tā te Fatu i rave

I te taime ’a fa’aru’e ai Iesu ia Ieriko, e piti ta’ata mata pō tei tuō iāna, ma te parau ē : « E te Fatu… e aroha mai ia māua…

« Ti’a noa ihora Iesu, ’ua parau atura ia rāua e haere mai, nā ’ō atura, e aha tō ’ōrua hina’aro iā’u ?

« ’Ua nā ’ō maira rāua iāna, e te Fatu, ’ia ara tō māua mata.

« Aroha atura Iesu ia rāua, fa’ati’a’ia atura i tō rāua mata ; ’ara’ara a’era tō rāua mata i reira ra, ’e ’ua pe’e maira rāua iāna » (Mataio 20:30, 32–34).

E aha te ti’a ’ia ’apo nō ni’a i te huru te Fa’aora i fa’aro’o i tei parauhia mai ?

Anira’a ’ia ’ohipa

E feruri i te huru ’outou e fa’a’ohipa ai i teie mau parau tumu i roto i tā ’outou aupurura’a. E ui ia rātou tā ’outou e aupuru nei e aha tō rātou hina’aro. E fa’aro’o i tā rātou pāhonora’a ’e i te mau muhumuhu o te Vārua Maita’i. E ’ohipa i ni’a i te mea tā ’outou i fa’aro’o.

’Ua fa’aineinehia te mau parau tumu nō te aupurura’a nō te tauturu ia tātou ’ia ha’api’i nāhea i te ha’apa’o te tahi i te tahi—’eiaha rā nō te vauvau atu ’ei parau poro’i. ’Ia noa’a ia tātou i te mātau i te feiā tā tātou e tāvini nei, e fa’auru mai te Vārua Maita’i ia tātou e aha te poro’i nō rātou, nō te ’āpiti i tā tātou ha’apa’ora’a ’e tō tātou arohara’a ia rātou.