Ol Givhan Prinsipol, Julae 2018

Go Help Wetem Lav mo Sore

Taem yu stap folem eksampol blong Sevya blong gat lav mo sore, bambae yu faenem se yu save mekem samting i defren long laef blong ol narawan.

Lav mo sore i blong save gud long hadtaem blong narawan, mo semtaem, wantem blong helpem olgeta long hadtaem ia o mekem hadtaem ia nomo hevi. Kavenan blong stap folem Sevya i wan kavenan blong lav mo sore blong “karem ol hevi samting blong wanwan long yufala, blong mekem se oli nomo hevi” (Mosaea 18:8). Wok blong lukaot long ol narawan, i wan janis blong givhan olsem we Lod bae i mekem: “[wetem lav] mo sore, [we i mekem jenis long laef]” (luk long Jud 1:22). Lod i givim komanmen: “Yufala i mas soemaot stret fasin blong jajem man, mo yufala i mas kaen, yufala i mas gat sore long ol narafala man” (Sekaraea 7:9).

Lav mo Sore blong Sevya

Lav mo sore i bin wan fos we i lidim Sevya long seves blong Hem (luk long saedtok: “Wan Sevya we I Gat Lav mo Sore”). Lav mo sore we Hem i gat long ol narafala man i mekem se Hem i go long olgeta raon long Hem long plante plante taem. From se Hem i luksave ol nid mo ol samting we ol pipol oli wantem, nao Hem i bin save blesem olgeta mo tijim olgeta long ol wei we i moa impoten long olgeta. Hat blong Sevya blong leftemap yumi i go bitim hadtaem blong yumi i lidim Hem i go kasem bigfala aksen blong lav mo sore: Atonmen blong Hem from ol sin blong yumi mo safaring blong famli blong man.

Paoa blong Hem blong save lukluk long ol nid blong ol pipol, i wan samting we yumi save traehad from taem yumi givim seves. Taem yumi stap laef long stret mo gud fasin, mo stap lisin long ol toktok blong Spirit, bae yumi kasem insperesen blong go help long sam wei we i gat mining.

Kavenan blong Yumi blong Lav mo Sore

Papa long Heven i wantem ol pikinini blong Hem blong gat lav mo sore (luk long 1 Korin 12:25–27). Blong kam ol tru disaepol, yumi mas developem mo soem lav mo sore long ol narawan, speseli olgeta we oli stap long nid (D&C 52:40).

Taem yumi tekem nem blong Jisas Kraes long yumi tru long kavenan blong baptaes blong yumi, yumi stap witnesem se yumi stap wantem blong praktisim lav mo sore. Presiden Henry B. Eyring, Seken Kaonsela long Fas Presidensi, i tijim se presen we i Tabu Spirit i helpem yumi blong mekem hemia: “Yu yu wan kavenan memba blong Jos blong Jisas Kraes. …

“Taswe, yu yu gat wan filing blong yu wantem helpem wan man o woman we i traehad blong muv fored we hem i karem wan bigfala hevi trabol mo hadtaem. Yu bin promes se bae yu helpem Lod blong mekem ol hevi samting blong ol narafala man i nomo hevi mo givim kamfot long olgeta. Yu bin kasem paoa blong help blong mekem ol hevi samting ia oli nomo hevi taem yu kasem presen ia we i Tabu Spirit.”¹

Eksampol. Wan sista long Rasia i gat wan situesen we i bin had long famli, mekem se hem i no save kam long Jos blong moa long wan yia. Wan nara sista long branj i go helpem hem wetem lav mo sore, mo evri Sandei, i ringim hem, i tokbaot ol toktok, ol lesen, ol misin kol, ol bebi we oli bon, mo ol nara nius blong branj. Taem we oli stretem famli situesen blong sista ia we i no save kam long Jos, nao hem i filim se hem i stil pat blong branj ia nomo from se fren blong hem i bin stap ringim hem evri wik.

© 2018 i kam long Intellectual Reserve, Inc. All rights reserved. Oli printim long YSA. Oli letem long Inglis lanwis: 6/17. Oli letem translesen: 6/17. Translesen blong Ministering Principles, July 2018. Bislama. 15050 852

Not

1. Henry B. Eyring, “The Comforter,” Liahona, Mei 2015, 18.

Fo Tingting blong Developem Fasin blong Gat Lav mo Sore

Nomata we yumi stap gat moa lav mo sore afta we yumi stap gotru long ol tes blong yumiwan, i gat samfala samting we yumi save mekem tedei blong developem fasin blong gat lav mo sore. Tingting long samfala wei we yu save yusum olgeta fofala prinsipol ia:

• Prea from. Taem yu stap singaot long Papa long Heven, bambae Hem i openem hat blong yu, mo “bae yu kam blong filim wan tru wari from gudlaef we i no save finis, mo hapines blong ol nara pipol” (Prijim Gospel blong Mi: Wan Gaed long Misinari Seves [2004], 118; luk tu long Moronae 7:48).

• Praktisim. Yu save soem lav mo sore taem yu lisin, mo taem yu andastanem ol narafala man. Putum yuwan long situesen blong olgeta, mo tingting se olgeta oli filim olsem wanem. Sapos i stret folem situesen mo taem, yu save givhan blong karemaot smol sobodi, safaring o hadtaem blong tingting blong olgeta.

• Folem ol toktok blong Spirit. Lod i save talemaot long yumi ol wei blong soem lav mo sore, we, yumiwan, yumi no bin luk. Taem yu filim Spirit i pusum yu blong helpem ol narawan, yu no wet, yu mekem folem.

• Kam wan gud fren blong hem. Blong soem lav mo sore i simpol nomo olsem we taem yu soem se yu intres long laef blong ol pipol. Lanem blong save lisin gud (luk “Givhan Prinsipol: Faef Samting we Olgeta we Oli Save Lisin Gud Oli Mekem,” Liahona, Jun 2018.) Lav blong yu long olgeta bae i kam moa bigwan, mo bae i isi moa blong luksave ol wei blong soem lav ia.

Wan Sevya we I Gat Lav mo Sore

Tingting blong stadi long sam long ol skripja ia blong luk olsem wanem nao lav mo sore blong Jisas Kraes i pusum Hem blong hilim, blesem, mo tijim olgeta raon long Hem long taem blong seves blong Hem: Matiu 9:35–38; 14:14; 18:27, 33; 20:30–34; Mak 1:40–42; 5:19; 6:30–42; 9:22; Luk 7:13; 10:33; 15:20.

Olgeta prinsipol blong givhan oli stap blong helpem yumi blong lan blong kea long wanwan long yumi—i no blong serem olsem wan mesej nomo. Taem yumi kam blong save olsem wanem blong yumi givim seves, Tabu Spirit bae i pusum yumi blong save wanem mesej oli nidim blong harem antap long kea, lav mo sore we yumi givim long olgeta.