iVakavuvuli ni Veiqaravi, Jiulai 2018

Dolele Yani ena Yalololoma

Ni o vakamuria na ivakaraitaki ni yalololoma ni iVakabula, o na kunea ni rawa ni o kauta mai na veisau ena nodra bula o ira na tani.

Na yalololoma sai koya na noda kila tiko na dredre era sotava tiko na tani kei na gagadre mo vakamamadataka se veivuke kina. Na veiyalayalati meda vakamuria na iVakabula e veiyalayalati ni yalololoma me “colata vata na nomudou icolacola” (Mosaia 18:8). Nai lesilesi me vakaraici ira na tani sa madigi me veiqaravi vei ira na tani me vakataka na Turaga: ena “lomani ira eso, ni ra sa lomalomarua” (Juta 1:22). E vakarota na Turaga, “Dou dui ia nai valavala vakayalovinaka ka loloma vua na kai nona” (Sakaraia 7:9).

Na Nona Yalololoma na iVakabula

Na yalololoma e dua na tiki bibi ni nona veiqaravi na iVakabula (raica na: “A Compassionate Savior”). Na Nona yalololoma vei ira na Wekana e vakavuna me dolele yani o Koya vei ira na tiko wavoliti Koya ena vuqa na gauna. Ni veidutaitaka tu na nodra gagadre na tamata, e rawa kina Vua me vakalougatataki ira ka vakavulici ira ena sala e bibi ka vakatabakidua ga vei ira. Na gagadre ni iVakabula me laveti keda cake mai ena veika dredre e veimuataki ki na cakacaka uasivi ni yalololoma: Na Nona Veisorovaki me baleta noda ivalavala ca kei na rarawa ni kawatamata.

Na levu ni Nona rawa ni rogoca na nodra veigagadre na tamata e dodonu meda sasaga kina meda rawata ni da veiqaravi tiko. Ni da bula dodonu ka vakarogoca na veivakauqeti ni Yalo, eda na vakauqeti meda dodole yani ena sala e vakaibalebale sara vakalevu.

Na Noda Veiyalayalati ni Yalololoma

E vinakata na Tamada Vakalomalagi me ra dau yalololoma na luvena (raica na 1 Korinica 12:25–27). Meda yaco me tisaipeli dina, e dodonu meda tauyavutaka ka vakaraitaka na yalololoma vei ira na tani, vakabibi vei ira na gadreva (V&V 52:40).

Na noda taura vei keda na yacai Jisu Karisito ena noda veiyalayalati ni papitaiso, eda vakadinadinataka ni da sa lomasoli meda na vakayacora ena yalololoma. E vakatavulica o Peresitedi Henry B. Eyring, na iKarua ni Daunivakasala ena Mataveiliutaki Taumada, ni solisoli ni Yalo Tabu e vukei keda meda vakayacora vakakina: “O sa dua na lewe ni veiyalayalati ni Lotu i Jisu Karisito. …

Sa ikoya oya na vuna o gadreva kina mo vukea e dua na tamata sa segata tiko me toso ki liu ena nona vakaogai tu ena ivua ni lolosi kei na dredre. O a yalataka ni o na vukea na Turaga me vakamamadataki na nodra ivua ka mera vakacegui. A soli vei iko na kaukauwa mo vukea na kena vakamamadataki na ivua oqori ena nomu a ciqoma na isolisoli ni Yalo Tabu.”¹

Me ivakaraitaki, e dua na marama e Rusia e sotava e dua na gauna dredre ena nona matavuvale ka tarovi koya mai na tiko ena soqoni ni lotu me rauta e dua na yabaki. E dua tale na marama ena tabana e dolele yani ena yalololoma ena vei Sigatabu ni dau qiriti koya me tukuna vua me baleta na vosa, lesoni, veikacivi ni kaulotu, na gone era sucu, kei na itukutuku tale eso ni tabana. Ena gauna esa vinaka tale mai kina na veika e sotava tiko ena nona matavuvale na marama ka tiko ga e vale, e vakila o koya ni tiki tiko ga ni tabana baleta na qiri e dau vakayacora tiko yani vua na nona itokani ena veimacawa.

© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. iVakadewa ni Ministering Principles, July 2018. Fijian. 15050 858

iDusidusi

1. Henry B. Eyring, “Na Dauveivakacegui,” Liaona, Me 2015, 18.

E Va na Vakatutu me Tauyavutaki Kina na Yalololoma

E dina ni dau vakalevutaki na yalololoma ni da sotava oti na noda veivakatovolei, e tiko eso na ka eda rawa ni cakava nikua me tauyavutaki kina na yalololoma. Vakasamataka eso na sala ena rawa ni o vakayacora na va nai vakavuvuli oqo:

• Masulaka. Ni o vakatakekere vua na Tamada Vakalomalagi, ena dolava o Koya na yalomu, ka “o na yaco mo lomaleqataka na nodra bula tawamudu kei na marau eso tale na tamata” (Vunautaka Noqu Kosipeli: E Dua na iDusidusi ni Veiqaravi Vakaulotu [2004], 118; raica talega na Moronai 7:48).

• Bulataka. Ena rawa ni o vakaraitaka na yalololoma ni o vakarorogo ka kila vakavinaka. Biuti iko saraga ena ituvaki era sotava tiko ka qai vakasamataka na cava beka era vakila tiko. Kevaka e veidonui ki na nodra ituvaki kei na gauna, ena rawa ni o veivuke ena kena vakamamadataki na mosi, rarawa, se lomaleqa.

• Vakamuria na veivakauqeti. Ena rawa ni vakaraitaka vei keda na sala ena rawa ni vakaraitaka na yalololoma eda na sega beka ni rawa ni da raica ga vakataki keda. Ni o vakila e dua na veivakayarayarataki mai na Yalo Tabu me vukei ira na tani, kakua ni vakaberaberataka na kena cakacakataki.

• Mo nona itokani sara. Na vakaraitaki ni yalololoma ena rawa saraga ni rawarawa me vakataka na nomu vakaraitaka na kauwai dina me baleta nodra bula na tamata. Vulica mo dau vakarorogo vinaka (raica na “Ministering Principles: Five Things Good Listeners Do,” Liahona, June 2018, 6–9). Na loloma baleti ira ena levu cake, ka na rawarawa sara ni o raica na sala me vakaraitaka kina na loloma oqori.

Nai Vakabula Yalololoma

Navuca mo vulica eso na ivolanikalou oqo mo raica na kena yavalati Jisu Karisito na Nona yalololoma me veivakabulai, veivakalougatataki, ka vakavulici ira na tu wavoliti Koya ena gauna ni Nona veiqaravi: Maciu 9:35–38; 14:14; 18:27, 33; 20:30–34; Marika 1:40–42; 5:19; 6:30–42; 9:22; Luke 7:13; 10:33; 15:20.

Na inaki ni ivakavuvuli ni veiqaravi me vukea noda vulica me da veikauwaitaki—e sega ni wasei me itukutuku. Ni yaco me da kilai ira eda qarava, ena uqeti keda na Yalo Tabu me da kila na itukutuku cava era na gadreva me ikuri ni noda kauwai kei na yalololoma.