Melawana ya go Direla, Phukwi 2018

Go Otlologela mo Bopelonoming

Jaaka fa o sala morago sekai sa Mmoloki sa bopelonomi, o tlaa bona gore o ka dira pharologanyo mo matshelong a ba bangwe.

Bopelonomi ke go itse ka tlalelo tsa ba bangwe ka keletso ya go tlhofofatsa kgotsa go thusa. Kgolagano ya go sala Mmoloki morago ke kgolagano ya bopelonomi go “belega mekgweleo ya ba bangwe” (Mosia 18:8). Thomo ya go tlhokomela ba bangwe ke tshono ya go direla jaaka Morena a ka dira: ka “bopelonomi, o dira pharologanyo” (Jute 1:22). Morena o laotse, “Supa mautlwelobotlhoko le bopelonomi motho mongwe le mongwe go mokaulengwe wa gagwe” (Sakaria 7:9).

Bopelonomi jwa Mmoloki

Bopelonomi e ne e le thata e e dirang mo bodireding jwa Mmoloki (bona fa thoko ga mophakarego. “Mmoloki yo o Bopelonomi”). Bopelonomi jwa gagwe go beng ka Ene go mo dirile go otlologela go ba ba mo dikologileng makgetlho a le mmalwa. A lemoga matlhoko le dikeletso tsa batho, O ne a ba segofatsa le go ba ruta ka ditsela tse di botlhokwa mo go bone. Keletso ya Mmoloki go re tsholetsa godimo go tlalelo tsa rona ga gogela mo tirong e kgolo ya bopelonomi: Tetlanyo ya gagwe go dibe le go boga ga sika la motho.

Nonofo ya gagwe go fetola go matlhoko a batho ke sengwe se re ka se itshokelang jaaka re direla. Jaaka re tshela ka tshiamo le go reetsa thotloetso ya Mowa, re tlaa tlhotlhelediwa go otlologela mo ditseleng tse di nang le bokao.

Kgolagano ya Rona ya Bopelonomi

Rara wa Legodimo o batla bana ba Gagwe ba nna le bopelonomi (bona 1 Bakorintha 12:25–27). Go nna barutwana ba boammaaruri, re tshwanetse go tlhabolola le go supa bopelonomi go ba bangwe, bogolo jang go ba ba tlhokang (D&C 52:40).

Re itseela leina la ga Jeso Keresete ka kgolagano ya kolobetso, re supa gore re rata go diragatsa bopelonomi. Moporesidente Henry B. Eyring, Mogakolodi wa Bobedi mo Boporesidenteng jwa Ntlha, o rutile gore neo ya Mowa o o Boitshepo e re thusa go dira jalo: “O leloko la kgolagano la Kereke ya ga Jeso Keresete. …

Ke sone seo o nang le maikutlo a go batla go thusa motho yo o sokolang go tswelela ka fa tlase ga morwalo wa bohutsana le bothata. O solofeditse gore o tlaa thusa Morena go dira mekgweleo ya bone motlhofo le go gomodiwa. O neetswe thata go thusa go tlhofofatsa merwalo eo fa o amogela neo ya Mowa o o Boitshepo.’’¹

Ka sekai, kgaitsadi kwa Russia o ne a na le seemo se se thata sa lelwapa se se mo iditseng go tsena kereke go feta ngwaga. Kgaitsadi mongwe mo lekaleng a mo otlologela mo bopelonoming Sontaga mongwe le mongwe ka go mo leletsa go mmolelela ka dipuiso, dithuto, dipitso tsa thomo ya efangele, bana ba ba tshotsweng, le tse dingwe dikgang tsa lekala. Fa kgaitsadi yo a neng a tshwaregile seemo sa lelwapa se rarabologa, o ne a ikutlwa jaaka karolo ya lekala ka ntlha ya go letsa ga tsala ya gagwe beke le beke.

Megopolo e Mene ya go Tlhabolola Bopelonomi

Fa bopelonomi ka gale bo oketsega morago ga go itemogela diteko tsa rona, go na le dilo dingwe tse re ka di dirang gompieno go tlhabolola bopelonomi. Akanya ka ditsela tse o ka diragatsang melawana e mene e:

E rapelele. Jaaka o ikuela go Rara wa Legodimo, O tlaa bula pelo ya gago, mme “o tlaa utlwa tlhwaafalo ka ga letlhogonolofalo la bosakhutleng le boitumelo jwa batho ba bangwe” (Preach My Gospel: A Guide to Missionary Service [2004], 118; bona le gone Moroni 7:48).
Bo ithutontshe O ka supa bopelonomi ka go reetsa le go tlhaloganya. Itsenye mo seemong sa bone mme o akanye ka fa ba ikutlwang ka teng. Fa go siame mo seemong le nako, o ka ithaopa go thusa go fokotsa botlhoko jwa bone, go boga, kgotsa tlalelo.
Sala morago thotloetso. Morena o ka re senolela ditsela go supa bopelonomi jo re iseng re bo lemoge ka bo rona. Fa o utlwa kgarametso go tswa go Mowa go thusa ba bangwe, o seka wa diega go dira mo go yone.
Nna tsala tota. Go supa bopelonomi go ka nna motlhofo jaaka go supa kgatlhego e e tlhoafetseng mo matshelong a batho. Ithute go reetsa sentle (bona “ Melawana ya go Direla: Dilo tse Tlhano Moreetso yo Molemo a di Dirang,” Liahona, June 2018, 6–9). Lorato la gago go bone le tlaa oketsega, mme go tlaa nna motlhofo go lemoga ditsela tsa go supa lorato loo.