Na iVakavuvuli ni Veiqaravi, Okosita 2018

Tarai cake na iSema e Vakaibalebale

Ena vakalevutaki cake na noda rawa ni kauwaitaki ira na tani ni da sema e dua na isema e vakaibalebale vata kei ira.

Na veisureti me da veiqaravi vei ira na tani sa madigi me tarai cake kina na isema ni veikauwaitaki vei ira—na mataqali isema ka na rawarawa kina me ra kerea se ciqoma noda veivuke. Ni da sa tovolea me da tara cake na isema ni veiwekani vakaoqori, ena rawa vua na Kalou me veisautaka na bula ena yasa ruarua ni veiwekani oqori.

“Au vakabauta dina sara ni sega ni rawa ni dua na veisau vinaka kevaka e sega ni dua na isema ni veiwekani vinaka,” e kaya o Sharon Eubank, na iMatai ni Daunivakasala ena Mataveiliutaki Raraba ni iSoqosoqo ni Veivukei. Me vakayaco veisau ena nodra bula na tani na noda cakacaka ni veiqaravi, e kaya o koya, sa dodonu me ra “yavutaki ena gagadre dina sara me ia na veivakabulai kei na vakarorogo, na veitokoni kei na veirokorokovi.”¹

Na isema vakaveiwekani vakaibalebale e sega ni iwalewale. Era tara cake ena yalololoma, sasaga yalodina, kei na “loloma e sega ni veivakaisini” (V&V 121:41).²

Na iVakarau me Taracake ka Vaqaqacotaki kina na iSema Vakaveiwekani

“Eda tara na [isema ni veiwekani] yadudua ena dua na gauna,” e kaya o Elder Dieter F. Uchtdorf ena Kuoramu ni Le Tinikarua.³ Ni da segata me da tara cake na isema vakaveiwekani e vakaibalebale kei ira eda veiqaravi kina, e rawa ni dusimaki keda na Yalo Tabu. Na vakatutu eso oqo era yavutaki ena dua na ivakarau e solia o Elder Uchtdorf.⁴

Vulica na veika oqo.

E vakavuvulitaka o Peresitedi Ezra Taft Benson (1899–1994), “E sega ni rawa ni o qarava vakavinaka na tamata o sega ni kila vinaka.” E vakatura o koya me da kila na yacadra yadua na lewe ni matavuvale ka kila tiko na veigauna bibi me vaka na siganisucu, veivakalougatataki, papitaiso, kei na vakamau. Oqo ena solia na madigi me da vola e dua na ivola se qiri mo vakacaucautaka kina e dua na lewe ni matavuvale ena gauna e rawata kina e dua na ka vinaka se yacova e dua na gauna bibi.⁵
Solia eso na guana mo dou tiko vata

Na isema ni veikilai e dau taura na gauna me tarai cake kina. Vaqara na madigi mo rawa ni veitaratara tikoga kina. Sa kunei ena vakadidike e caka ka vakatara me ra kila na tamata ni o kauwai e yaga sara ena isema vakaveiwekani bulabula.⁶ Dau sikovi ira wasoma o ira o kacivi mo qarava. Veivosaki vata kei ira mai valenilotu. Vakayagataka na iwalewale cava ga e vakaibalebale—me vaka na imeli, Facebook, Instagram, Twitter, Skype, qiri ena talevoni, se vakauta e dua na kadi. A tukuna o Elder Richard G. Scott (1928–2015) ena Kuoramu ni iApositolo Le Tinikarua me baleta na mana ni veivakaraitaki rawarawa vakaisaluwaki ni loloma kei na veitokoni: “E vakavuqa niu dau cega noqu ivolanikalou, … kau na kunea e dua na ivola taleitaki, ni veitokoni a vakaciqira tu [na watiqu] o Jeanene ena loma ni veidrauna. … Na ivola vakamareqeti eso oqori … sa yaco me ra iyau talei ni vakacegu kei na veivakauqeti.”⁷

Vakakina, me da nanuma tiko ni isema ni veiwekani e taura e lewe rua. E rawa ni o cauraka yani na loloma kei na veitokani, ia ena sega ni tubu na isema ni veiwekani vakavo ni sa ciqomi ka vakalesui mai na veika o cauraka. Kevaka e sega ni veiciqomi na kena ikarua, kua ni vakasaurarataka. Solia vua na gauna me raica nomu sasaga vagumatua, ia kevaka e ganita, taro ivakasala vei ira nomu iliuliu kevaka se rawa ni yaga tikoga na isema ni veiwekani vakaibalebale.
Veitaratara ena yalokauwai.

Na tarai cake ni veiwekani vakaibalebale ena gadrevi kina me da uabaleta na veika wale. Na veivosaki wale e sinai ga ena veivosaki lalai me baleta na ituvatuva, na draki, kei na veika lalai tale eso, ia e sega ni okati kina na wasei ni nanuma, na vakabauta, na takete, kei na kauwai e ganita me yaco kina na veisemati vakaibalebale. Sa matanataka na Tamada Vakalomalagi na veitaratara vakaibalebale vakalevu cake oqo ena Nona wasea Nona nanuma kei na Nona ituvatuva vua na Luvena (raica na Joni 5:20) vakakina vei keda mai vei ira Nona parofita (raica Emosi 3:7). Ni da veiwaseitaka na veika dau yaco e veisiga kei na dredre ni bula ni dusimaki keda na Yalo, eda na veitaleitaki ni da raica na tautauvata ni veika eda taleitaka ka wasea vata na veika eda sotava.

Na vakarorogo e dua na sala bibi mo tukuna kina ni o kauwai.⁸ Ni o vakarorogo vakavinaka, ena levu cake nomu madigi mo vukei ira na tani me ra lako mai vei Karisito ni o rawata na kila ka raica rawa na nodra leqa kei na nodra sa vakila ni ra lomani, ciqomi, ka taqomaki.
Vakavinavinakataka na duidui vakakina na tautauvata.

“Eso …era vakabauta ni vinakata na Lotu me vakatautauvatataka kece na lewena—me tautauvata na keda irairai, noda nanuma, ivakarau ni vakasama, kei na itovo,” e a kaya o Elder Uchtdorf. “Oqo ena veisaqasaqa kei na vuku ni Kalou, ka bulia na tamata yadua me duidui mai vua na tacina. …

“Ena vaqaqacotaki na Lotu ni da vakayagataka na duidui oqo ka veivakayaloqaqataki me da vakatorocaketaka ka vakayagataka na noda taledi me da laveta ka vaqaqacotaki ira kina na noda itokani vakatisaipeli.”⁹

Me da lomani ira na tani ena ivakarau e lomani keda kina na Kalou ena gadrevi kina me da raici ira me vaka na nona raici ira na Kalou. E vakavuvulitaka o Peresitedi Thomas S. Monson (1927–2018), “Sa dodonu me da tara cake na taledi me da kua ni raici ira [na tani] ena kedra ituvaki ena gauna oqo ia na kedra ituvaki ena vanua e rawa ni ra yacova yani.”¹⁰ E rawa ni da masuta na veivuke me da raici ira na tani ena ivakarau e raici ira kina na Kalou. Ni yavutaki noda ivalavala vei ira na tani ena veika e rawa ni ra yacova, era na sasaga me ra sotava na gagadre oqori.¹¹
Qaravi ira.

Dau kidava nodra gagadre o ira o qarava ka tuvakarau mo solia nomu gauna kei na taledi, se ena gauna e gadrevi kina se baleta ga ni o kauwai. E rawa ni o tu mo veivakacegui, veitokoni, ka solia na veivuke e gadrevi ni yaco na leqa tubukoso, tauvimate, se na veivuke vakatotolotaki. Ia ena vuqa na isema ni veiwekani eda dau veisaqa. Sa solia vei keda na Kalou na galala me da cakava ka sega ni caka vei keda (raica 2 Nifai 2:14). Me vaka e vakavuvulitaka vei keda na iApositolo o Joni me da lomana na Kalou ni sa taumada Nona lomani keda (raica na 1 Joni 4:19), ni ra vakila na tani na noda loloma dina mai na noda veiqaravi, e rawa ni vakamalumalumutaka na yalo ka vakalevutaka na loloma kei na veivakabauti.¹² Oqori ena vakavuna na kena tubu cake na ivalavala ni yalovinaka ka rawa ni tara cake na isema vakaveiwekani.

Veiqaravi me Vakataka nai Vakabula

A tara o Jisu Karisito na isema vakaveiwekani vakaibalebale kei ira Nona tisaipeli (raica Joni 11:5). E kilai ira (see John 1:47–48). A dau tiko vata kei ira (raica na Luke 24:13–31). Nona veivosaki e sega kina na ka wale ga (raica Joni 15:15). A marautaka nodra duidui (raica na Maciu 9:10) ka raica na vanua e rawa ni ra yacova (raica na Joni 17:23). A qaravi ira na tamata kecega, dina sara ni nodra Turaga na tamata kecega, ka kaya ni sa sega ni lako mai me mai qaravi ia me veiqaravi (raica na Marika 10:42–45).

Na cava mo na cakava mo tara cake kina na isema vakaveiwekani kaukauwa cake kei ira o kacivi mo qarava?

© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. iVakadewa ni Ministering Principles, August 2018. Fijian. 15051 858