Mga Prinsipyo sa Ministering, Agosto 2018

Pagpasad sang Makahulugan nga mga Relasyon

Ang aton ikasarang sa pagtatap sa iban nagadugang kon may makahulugan kita nga relasyon sa ila.

Ang pangagda nga magtatap sa iban isa ka kahigayunan sa pagpasad sang mainulikdon nga relasyon sa ila—ang sahi sang relasyon sa diin mangin komportable sila sa pagpangayo ukon pagbaton sang bulig sa aton. Kon nagtinguha kita nga mapasanyog ina nga sahi sang relasyon, ang Dios sarang magbag-o sang mga kabuhi sa magtimbang nga bahin sinang relasyon.

“Nagapati gid ako nga wala sang makahulugan nga pagbag-o kon wala sang makahulugan nga mga relasyon,” siling ni Sharon Eubank, Unang Manuglaygay sa Pangkabilugan nga Panguluhan sang Relief Society. Kag agud ang aton mga buhat sang pag-alagad makadala sang pagbag-o sa kabuhi sang iban, siling niya, kinahanglan “manggamot ini sa sinsero nga kaluyag sa pagpang-ayo kag pagpamati kag pagkooperar kag pagtahod.”¹

Ang makahulugan nga mga relasyon indi mga taktika. Ginapasad ang mga ini sa kaluoy, sincero nga pagtinguha, kag “gugma nga matuod-tuod” (tan-awa sa D&C 121:41),²

Mga Paagi nga Mapasad kag Mapabakod ang mga Relasyon

”Nagapasad kita sang [mga relasyon] isa ka tawo sa tagsa ka tion,” siling ni Elder Dieter F. Uchtdorf sang Korum sang Dose ka mga Apostoles.³ Sa aton pagtinguha nga magpasad sang makahulugan nga mga relasyon sa aton mga ginatatap, ang Balaan nga Espiritu makagiya sa aton. Ang masunod nga mga panugyan nabase sa sulundan nga gintanyag ni Elder Uchtdorf.⁴

Kilalahon sila.

Si President Ezra Taft Benson (1899-1994) nagpanudlo, “Indi ninyo maalagaran sing maayo inang mga indi ninyo kilala sing husto.” Nagpanugyan sia nga kilalahon ang mga ngalan sang tagsa ka miyembro sang pamilya kag hibaluon ang importante nga mga kahiwatan pareho abi sang mga kaadlawan, mga pagbendisyon, mga bunyag, kag mga kasal. Nagahatag ini sang kahigayunan nga magsulat sang malip-ot nga mensahe ukon magtawag sa pagpanginbulahan sang isa ka miyembro sang pamilya sa isa ka pinasahi nga kadalag-an ukon hinimuan.⁵
Maghatag sang panahon sa pag-inupdanay.

Ang isa ka relasyon nagakinahanglan sang panahon nga magtubo. Magpangita sang mga kahigayunan nga mapadayon ang pagpakig-angot. Ang mga pagtuon nagapakita nga ang pagpahibalo sa mga tawo nga nagaulikid kamo importante sa maayo nga mga relasyon.⁶ Magbisita sing masami sa sinang mga gintugyan nga alagaran ninyo. Istoryaha sila sa simbahan. Maggamit sang nagakaigo nga iban pa nga dugang nga mga pamaagi—pareho abi sang email, Facebook, Instagram, Twitter, Skype, tawag sa telepono, ukon pagpadala sang kard. Si Elder Richard G. Scott (1928–2015) sang Korum sang Dose ka mga Apostoles naghambal parte sa gahum sang simple kag mapahituon nga mga pagpabutyag sang pagpalangga kag pagsuporta: “Sa masami ginabuksan ko ang akon balaan nga mga kasulatan, … kag masalapoan ko ang isa ka mapinalanggaon, mahinangpanon nga sulat nga gin-ipit sa mga pamihak sini sang [akon asawa] nga si Jeanene. … Yadtong bilidhon nga mga sulat … nagapadayon nga isa ka malahalon nga manggad sang kaumpawan kag inspirasyon.”⁷

Dumduma man nga ang isa ka relasyon nagakinahanglan sang duha ka tawo. Mahimo ka magtanyag sang pagpalangga kag pagpakig-abyan, pero ang relasyon indi magtubo kon indi pagbatunon kag pagbalusan ang ginatanyag. Kon ang isa ka tawo daw wala sang gana, indi pag-ipamilit ang relasyon. Hatagi sia sang panahon nga makita ang imo sinsero nga pagtinguha, kag kon kinahanglanon, makigsugilanon sa imo mga lider kon bala ang isa ka makahulugan nga relasyon daw posible pa.
Magkomunikar nga may pagkabalaka.

Ang pagpasad sang makahulugan nga mga relasyon nagapangayo nga lampasan naton ang kahapaw. Ang hapaw nga komunikasyon puno sang labaylabay nga mga istorya parte sa mga skedyul, tiempo, kag iban pa nga indi importante nga mga butang, pero wala nagalakip sang pagpaambit sang mga balatyagon, mga ginapatihan, mga lalab-uton, kag pagkabalaka nga kinahanglanon agud maghimo sang makahulugan nga mga kaangtanan. Ginapakita sang Amay nga Langitnon ining mas makahulugan nga sahi sang komunikasyon paagi sa pagpaambit sang Iya mga balatyagon kag mga plano sa Iya Anak (tan-awa sa Juan 5:20) kag sa aton paagi sa Iya mga propeta (tan-awa sa Amos 3:7). Paagi sa pagpaambit sang kinaandan nga mga hitabo kag mga hangkat sang kabuhi suno sa paggiya sang Espiritu, maapresyar naton ang isa kag isa sa aton pagpangita sang magkapareho nga mga huyog kag magkapareho nga mga eksperiyensya.

Ang pagpamati importante nga bahin sang pagpahibalo nga nagaulikid kamo.⁸ Kon magpamati kamo sing maayo, ang inyo kahigayonan nga magbulig sa iban nga magkari kay Cristo nagadugang sa inyo pag-angkon sang paghangop kag ihibalo parte sa ila mga panginahanglan kag sa ila pagbatyag nga ginapalangga, nahangpan kag luwas sila.
Tahaon ang mga kinalain kag ang mga pagkaanggid.

“Ang pila … nagapati nga ang Simbahan gusto nga pormahon ang tagsa ka miyembro sa isa lang ka hormahan—nga ang kada isa dapat mangin pareho ang dagway, balatyagon, pamensaron kag pagginawi sa tanan nga iban,” siling ni Elder Uchtdorf. “Magasupak ini sa kaalam sang Dios, nga naghimo sang tagsa ka tawo nga lain sangsa iya utod. …

“Ang Simbahan nagatin-ad kon ginapanginpuslan naton ining mga kinalain kag ginapaisog ang isa kag isa nga pauswagon kag gamiton ang aton mga talento agud alsahon kag pabakuron ang aton kasubong nga mga disipulo.”⁹

Ang magpalangga sa iban sa paagi nga ginapalangga kita sang Dios nagapangayo nga tinguhaan naton nga makita ang iban pareho sang pagtan-aw sa ila sang Dios. Si Pangulong Thomas S. Monson (1927–2018) nagpanudlo nga, “Kinahanglan naton nga patubuon ang ikasarang nga makita [ang iban] indi sa kon ano sila subong kundi kon sa kon mangin ano sila sa palaabuton.”¹⁰ Makapangamuyo kita para sa bulig nga makita ang iban pareho sa pagtan-aw sa ila sang Dios. Kon ginatrato naton ang iban suno sa ila ikasarang nga magtubo, laban gid nga magatinguha sila nga mangin kaangay-angay.¹¹
Mag-alagad sa ila.

Mangin sensitibo sa mga panginahanglan sang inyo mga ginatatap kag mangin handa sa paghatag sang inyo oras kag mga talento, sa tion man sang ila pagpanginahanglan ukon tungod lang kay nagakabalaka ka. Mahimo nga mangin yara ka agud maghatag sang kaumpawan, suporta, kag kinahanglanon nga bulig kon may emerhensiya, balatian, ukon hilingagawon nga mga sirkumstanya. Pero sa madamo kaayo nga mga relasyon, nagahulag lang kita bilang reaksyon sa isa ka hitabo. Ang Ginuo naghatag sa aton sang pagpili agud nga makahulag kita kag indi kay pahulagon (tan-awa sa 2 Nefi 2:14). Pareho sa ginpanudlo ni Apostoles Juan nga ginahigugma naton ang Dios kay una Sia nga naghigugma sa aton (tan-awa sa 1 Juan 4:19, kon mabatyagan sang iban ang aton tunay nga gugma paagi sa aton mga buhat sang pag-alagad, makapahumok ini sang ila mga tagipusuon kag makapadugang sang pagpalangga kag pagsalig.¹² Nagatuga ini sang pagtimbuok sang maluluy-on nga mga buhat nga makapabakod sang mga relasyon.

Pagtatap Pareho sa Manluluwas

Si Jesucristo nagpasad sang makahulugan nga mga relasyon sa Iya mga disipulo (tan-awa sa Juan 11:5). Kilala Niya sila (tan-awa sa Juan 1:47–48). Naghinguyang Sia sang panahon upod sa ila (tan-awa sa Lucas 24:13-31). Ang Iya pagpakig-angot indi hapaw (tan-awa sa Juan 15:15). Gintaha Niya ang ila mga kinalain (tan-awa sa Mateo 9:10) kag nakita ang ila ikasarang (tan-awa sa Juan 17:23). Nag-alagad Sia sa tanan, bisan pa nga Ginuo Sia sang tanan, nga nagasiling, wala Sia nagkari agud alagaran kundi mag-alagad (tan-awa sa Marcos 10:42-45).

Ano ang inyo himuon agud mas mapabakod ang inyo mga relasyon sa sinang mga gintugyan sa inyo nga inyo alagaran?

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Pagtugot sa Ingles: 6/17 Petsa sang pagtugot sa paglubad: 6/17. Paglubad sang Ministering Principles, August 2018. Hiligaynon. 15051 861