Ip Yohk ke Karihngihnyuck, Ohkohs 2018
Muhsahi Kuhpahsr Yohk Kalmeyac
Kuh lasr in luhngse mwet sahyac uh yohkwelihk pacl oasr kuhpahsr yohk kalmeyac lasr nuh selos uh.
Solsol in karihngihn mwet sahyac uh pa sie pacl wowo in muhsahi kuhpahsr luhn luhngse yohrohlos—pa kain in kuhpahsr se ma ac oruh elos in puhla wo in siyuck kuh insese nuh ke kahsruh lasr nuh selos uh. Ke kuht oraclah srihke lasr in ahkyohkye kain in kuhpahsr sacn, God El kuh in ekuhllah moul luhn kwewana lwacyacn luo ke kuhpahsr sacn.
“Nga luhlahlfongi na pwacye muh wacngihn eklac yohk fin wacngihn kuhpahsr yohk se,” Sharon Eubank el fahk, Mwet Kahsruh Se Mwet ke Prestuhnsi Luhlahp luhn Rilif Sosaiti. Ac ke oruh lasr ke kuhlwacnsap in kahsruh oraclah eklac ke moul luhn mwet sahyac, el fahk, elos enenuh in “sruokyac kuh sie kena na pwacye ah in unwelah ac porongo ac insese ac suhnak.”1
Kuhpahsr yohk kalmeyac uh tiac ma ke ohiyac suhmaht. Elos muhsahiyucklac ke pahkomuhta, srihke na pwacye, ac “luhngse na pwacye” (D&C 121:41).2
Ohiyac in Muhsahi ac Ahkfokokoye Kuhpahsr uh
“Kuht muhsahi [kuhpahsr uh] mwet se ke pacl se,” Elder Dieter F. Uchtdorf ke U luhn Mwet Sap Singucul Luo el fahk.3 Ke kuht kwacfweacng in muhsahi kuhpahsr yohk kalmeyac yohrohlos ma kuht luti, Nguhn Muhtahl kuh in kol kuht. Nguhsr tahklac inge ukwe na pactuhn se ma Elder Uchtdorf el use uh.4
-
Lotwelah kwaclos.
Prestuhn Ezra Taft Benson (1899–1994) el luti, “Kowos tiac kuh in kuhlwacnsuhpuh wo elos ma kowos tiac etuh na pwacye uh.” El ngihsre in etuh inen mwet ke kais sie sucu ac in akihlen mukwikwi yohk srihpac oacna puhtte, lwen ahkinsewowoyeyuck, lwen pacptaislac, ac lwen macruhtlac. Ma se inge ac use pacl wowo in suhmuhslah sie fahk kuh oraclah sie pahng in kaksyakihn sie mwet ke sucu ke sie ma el oraclah wo kuh ahksahfyelah.5
-
Sislah pacl in tuhkweni.
Sie kuhpahsr enenuh pacl yohk in muhsahyak. Suk pacl wo in ahkwoye ohsun an. Sukok uh ahkkahlwemye lah in oruh mwet uh in etuh lah kom nuhnkuh kwaclos el enenuh se nuh ke kuhpahsr fokoko uh.6 Muhtwacta na yohrohlos ma kom pahng in kuhlwacnsuhpuh. Sramsram nuh selos lohm alu ac. Orekmakihn kuhtuh pac ohiyac sahyac ma ac oraclah puhla wo—oacna email, Facebook, Instagram, Twitter, Skype, pahng ke tacluhfon, kuh suhpweyuck kart. Elder Richard G. Scott (1928–2015) ke U luhn Mwet Sap Singucul Luo sramsramkihn kuh ke luhngse ac taptap fihsrwacsr ac kuh in ahkkahlwemyeyuck uh: “Pacl puhspuhs ke nga ikacslah ma suhmuhslah nuhtihk, … ac nga ac konwacack sihm na ahkkweye ac taptap se [muhtwacn kiyuck] Jeanene el ac isohngwacng nuh lun pwepuh kac ah. … Ma sihmlac sacohk inge … fahfahlac na in sie mwe kahsruhp luhn puhla wowo ac pihrihkyuck ma wacngihn molo.” 7
Oacyacpac, esam lah kuhpahsr se ac oruh ma luo. Kom kuh in sang luhngse ac akawucki uh, tuhsruhk kuhpahsr ac tiac kapwack nekena sang sacn eisyuck ac fohlohkihnyuck. Fin mwet se sahyac an tiacna ke eis, nimet pahtok akuhpahsri an. Sang pacl lal in liye srihke na pwacye lom an, ac fin enenuh, pwacpa yurin mwet kol lom an lah akuhpahsri yohk kalmeyac uh luhman srack ma kuh in fahlac se kuh tiac.
-
Sramsram ke luhngse.
Muhsahi akuhpahsri yohk kalmeyac uh enenuh kuht in som ahluhkwelah ma kuht oruh in muh akihlenyuc kuht uh. Asramsrami in mwe na liyeyuck sin mwet uh el sesseslah ke sramsram wacngihn srihpac ke schedule, ke puhlan pacl, ac ke kuhtuh pac elyah srihsrihk, tuhsruhk wacngihn akacsruhi ke puhla, luhlahlfongi, finsrak, ac elyah kac ma enenweyuck in oraclah kuhpahsr ma yohk kuhtuh kalmeyac uh. Pahpah Inkuhsrao El oraclah aten asramsrami yohk kuhtuh kalmeyac se inge ke el akacsruhi puhla ac plwacn Lal nuh sin Wen Nahtuhl (liye John 5:20) ac nuh sesr ke mwet pahluh Lal (liye Amos 3:7). In tuhkweni ke mukwikwi ke lwen nuh ke lwen ac ke ma upac ke moul uh yurin sie sin sie ke kolyuck luhn Nguhn, kuht puhla srui yurin sie sin sie ke kuht konwacack ma kuht tuhkweni pwacr kac ac akacsruhi ma kuht puhlkihn uh.
Porongo uh sie ip na wowo ke sramsram uh ma fahkwack lah oasr luhngse lom.8 Ke kom lohng in wo, pacl wowo lom in kahsruh mwet sahyac tuhkuh nuh yurin Kraist uh yohkwelihk ke kom eis kahlwem ac kuh in liye enenuh lalos ac ke elos puhla luhngse, kahlwem, ac karihngihnyuck uh.
-
Srui ke ma tiac oacna sie oacyacpac ma oacna sie uh.
“Kuhtuh … luhlahlfongi muh Alu uh ke oraclah mempucr nuh kwewa ke atac sefanna—muh kais sie enenuh in oacna, puhla, nuhnkuh, ac mukwikwi oacna mwet sahyac se,” Elder Uchtdorf el fahk. “Ma se inge lain suhmaht luhn God uh, suc oraclah mwet nuh kwewa sie likina tamuhlwel lal. …
“Alu uh kwacfweacng pacl kuht eis woiyacn tiac oacna sie se inge ac ahkkweye sie sin sie in ahkyohkye ac orekmakihn talan lasr in sruhk ac ahkkweye mwet fahsr tukun Kraist wiyacsr.”9
In luhngse mwet sahyac ke ohiyacn luhngse luhn God enenuh tuh kuht in srihke in liye mwet sahyac oacna God El liyaclos uh. Prestuhn Thomas S. Monson (1927–2018) el luti, “Kuht enenuh in ahkyohkye luhpah in liye [mwet sahyac uh] tiac ke ohiyaclos ke pacl se inge tuhsruhk ma elos ac kuh in eklac nuh kac uh.”10 Kuht kuh in pruhe siyuck ke kahsruh in liye mwet sahyac oacna God El liye uh. Ke kuht oruh ma nuh sin mwet sahyac fal nuh ke ma elos kuh in kapkapwack nuh kac uh, elos ac kuh in sun luhpah sacn.11
-
Kuhlwacnsuhpwaclos.
Lohacng nuh ke enenuh luhn mwet kom luti ac in oasr kena lom in sang pacl ac talan lom, oacna sie pacl oasr enenuh kuh ke na srihpen kom luhngse. Kom kuh in oasr we in sang puhla wo, taptap, ac kahsruh enenweyuck pacl oasr sie ma silahklahk, mas, kuh elyah silahklahk. Tuhsruhk ke akuhpahsri na puhs kuht som kahsruh tukun ma se sikyak. God El use sukohsohk in sulwaclah nuh sesr kuht in muh orekma likina in orekmakihnyuck (liye 2 Nephi 2:14). Oacna ke Mwet Sap Paul el luti lah kuht luhngse God mweyen El luhngse kuht met (liye 1 John 4:19), ke mwet sahyac puhlakihn luhngse pwacye lasr ke kuhlwacnsap lasr, kuh in ahkfihsrwacsrye nuhnak ac ahkyohkye luhngse ac luhlahlfongi uh. 12 Ma se inge pa spiral soko ma som nuh lucng ke mukwikwi kuhlwacng ma kuh in muhsahi akuhpahsri uh.
In Karihngihn Oacna Mwet Lahngo El Oruh
Jisus Kraist El muhsahelah akuhpahsri yohk kalmeyac yurin mwet fahsr Tohkohl (liye John 11:5). El etwaclos (liye John 1:47–48). El sislah pacl yohrohlos (liye Luke 24:13–31). Sramsram Lal som ahluhkwelah mwe akihlenyuck muhkwena uh (liye John 15:15). El srui tiac oacna sie lalos uh (liye Matthew 9:10) ac tuh liye kuh in eklac lalos uh (liye John 17:23). El kuhlwacnsuhpuh mwet nuh kwewa, finne El Leum luhn ma nuh kwewa, fahk muh El tiac tuhkuh in kuhlwacnsuhpweyuck tuhsruhk in kuhlwacnsap (liye Mark 10:42–45).
Meac kom ac oruh in muhsahi akuhpahsri fokoko nuh selos ma kom pahng in kuhlwacnsuhpuh uh?
© 2018 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn Ministering Principles, August 2018. Kosraean. 15051 868