ຫລັກທຳຂອງການປະຕິບັດສາດສະໜາກິດ, ເດືອນສິງຫາ 2018
ການສ້າງຄວາມສຳພັນທີ່ມີຄວາມໝາຍ
ຄວາມສາມາດຂອງເຮົາທີ່ຈະດູແລຄົນອື່ນ ຈະເພີ່ມທະວີຂຶ້ນ ເມື່ອເຮົາມີຄວາມສຳພັນທີ່ມີຄວາມໝາຍ ກັບເຂົາເຈົ້າ.
ການເຊື້ອເຊີນໃຫ້ປະຕິບັດສາດສະໜາກິດຕໍ່ຄົນອື່ນ ແມ່ນໂອກາດທີ່ຈະສ້າງຄວາມສຳພັນແຫ່ງການດູແລກັບເຂົາເຈົ້າ—ເປັນຄວາມສຳພັນແບບທີ່ຈະເຮັດໃຫ້ເຂົາເຈົ້າຂໍ ຫລື ຮັບເອົາຄວາມຊ່ວຍເຫລືອໄດ້ຢ່າງສະບາຍ. ເມື່ອເຮົາໃຊ້ຄວາມພະຍາຍາມ ທີ່ຈະພັດທະນາຄວາມສຳພັນເຊັ່ນນັ້ນ, ພຣະເຈົ້າຈະສາມາດປ່ຽນຊີວິດ ໃນຄວາມສຳພັນຂອງທັງສອງຝ່າຍ.
“ຂ້າພະເຈົ້າເຊື່ອແທ້ໆວ່າ ຈະບໍ່ມີການປ່ຽນແປງທີ່ສຳຄັນ ປາດສະຈາກຄວາມສຳພັນທີ່ສຳຄັນ,” ແຊຣັນ ຢູແບ້ງ, ທີ່ປຶກສາທີໜຶ່ງ ໃນຝ່າຍປະທານອົງການສະມາຄົມສະຕີສົງເຄາະສາມັນ, ໄດ້ກ່າວ. ແລະ ກ່ອນທີ່ການປະຕິບັດຮັບໃຊ້ ຈະເກີດການປ່ຽນແປງໃນຊີວິດຂອງຄົນອື່ນ, ນາງໄດ້ກ່າວ, ເຂົາເຈົ້າຕ້ອງ “ມີຄວາມປາດຖະໜາຢ່າງເລິກຊຶ້ງ ທີ່ຈະປິ່ນປົວ ແລະ ໃຫ້ຄວາມຮ່ວມໄມ້ຮ່ວມມື ແລະ ມີຄວາມນັບຖື.”1
ຄວາມສຳພັນທີ່ມີຄວາມໝາຍ ບໍ່ແມ່ນຍຸດທະວິທີ. ມັນຖືກສ້າງຂຶ້ນເທິງຄວາມເຫັນອົກເຫັນໃຈ, ເທິງຄວາມພະຍາຍາມຢ່າງຈິງໃຈ, ແລະ ໂດຍຄວາມຮັກອັນບໍ່ແກ້ງເຮັດ (ເບິ່ງ D&C 121:41).2
ວິທີທີ່ຈະສ້າງ ແລະ ເພີ່ມຄວາມເຂັ້ມແຂງໃຫ້ແກ່ຄວາມສຳພັນ
“ເຮົາສ້າງ [ຄວາມສຳພັນ] ກັບເທື່ອລະຄົນ,” ແອວເດີ ດີເດີ ແອັຟ ອຸກດອບ ແຫ່ງກຸ່ມອັກຄະສາວົກສິບສອງ ໄດ້ກ່າວ.3 ເມື່ອເຮົາພະຍາຍາມທີ່ຈະສ້າງຄວາມສຳພັນຢ່າງມີຄວາມໝາຍ ກັບຜູ້ທີ່ເຮົາປະຕິບັດສາດສະໜາກິດຕໍ່, ພຣະວິນຍານບໍລິສຸດ ສາມາດຊີ້ນຳເຮົາໄດ້. ຄຳແນະນຳດັ່ງຕໍ່ໄປນີ້ ແມ່ນອີງຕາມແບບແຜນທີ່ແອວເດີ ອຸກດອບ ໄດ້ສະເໜີ.4
-
ຮຽນຮູ້ກ່ຽວກັບເຂົາເຈົ້າ.
ປະທານເອສະຣາ ແທັບ ເບັນສັນ (1899–1994) ໄດ້ສອນວ່າ, “ທ່ານບໍ່ສາມາດຮັບໃຊ້ໄດ້ດີ ຕໍ່ຜູ້ທີ່ທ່ານບໍ່ຮູ້ຈັກດີ.” ເພິ່ນໄດ້ແນະນຳໃຫ້ຮູ້ຈັກຊື່ຂອງແຕ່ລະຄົນໃນຄອບຄົວ ແລະ ຮູ້ຈັກວາລະໂອກາດທີ່ສຳຄັນ ດັ່ງເຊັ່ນ ວັນເກີດ, ການໃຫ້ພອນ, ການບັບຕິສະມາ, ແລະ ການແຕ່ງງານ. ສິ່ງນີ້ຈະໃຫ້ໂອກາດແກ່ເຮົາ ເພື່ອຂຽນຈົດໝາຍນ້ອຍ ຫລື ໂທໄປຫາ ເພື່ອສະແດງຄວາມຍິນດີນຳຄົນໃນຄອບຄົວ ກັບຄວາມສຳເລັດ ພິເສດນັ້ນ.5
-
ໃຊ້ເວລານຳກັນ.
ຄວາມສຳພັນຕ້ອງໃຊ້ເວລາພັດທະນາ. ຊອກຫາໂອກາດທີ່ຈະຮັກສາການຕິດຕໍ່ໄວ້. ຈາກການຄົ້ນຄວ້າ ເຫັນໄດ້ວ່າ ການບອກໃຫ້ຄົນອື່ນຮູ້ວ່າ ທ່ານເປັນຫ່ວງເປັນໃຍ ເປັນສິ່ງສຳຄັນຫລາຍຕໍ່ຄວາມສຳພັນທີ່ໝັ້ນແກ່ນ.6 ຢ້ຽມຢາມຜູ້ທີ່ທ່ານຖືກເອີ້ນໃຫ້ຮັບໃຊ້ເລື້ອຍໆ. ເວົ້າລົມກັບເຂົາເຈົ້າຢູ່ໂບດ. ໃຫ້ໃຊ້ວິທີອື່ນອີກ ແບບໃດກໍຕາມທີ່ເໝາະສົມ—ດັ່ງເຊັ່ນ ອີເມວ, Facebook, Instagram, Twitter, Skype, ໂທໄປຫາ, ຫລື ສົ່ງໂປສະຄາດ. ແອວເດີ ຣິເຈີດ ຈີ ສະກາດ (1928–2015) ແຫ່ງກຸ່ມອັກຄະສາວົກສິບສອງໄດ້ກ່າວກ່ຽວກັບພະລັງຂອງການສະແດງຄວາມຮັກ ແລະ ຄວາມສະໜັບສະໜູນຢ່າງລຽບງ່າຍ ແລະ ຊ່າງປະດິດຄິດສ້າງ: “ເມື່ອຂ້າພະເຈົ້າເປີດພຣະຄຳພີອ່ານ, … ຂ້າພະເຈົ້າມັກຈະເຫັນເຈ້ຍນ້ອຍດ້ວຍຖ້ອຍຄຳທີ່ອ່ອນຫວານ ແລະ ໃຫ້ກຳລັງໃຈ ທີ່ນາງຈານີນ [ພັນລະຍາຂອງຂ້າພະເຈົ້າ] ໄດ້ສອດໃສ່ໄວ້. … ຖ້ອຍຄຳທີ່ມີຄ່າເຫລົ່ານັ້ນ … ໄດ້ກາຍເປັນຊັບສົມບັດອັນລ້ຳຄ່າ ທີ່ໃຫ້ການປອບໂຍນ ແລະ ການດົນໃຈ.”7
ພ້ອມນີ້, ຈົ່ງຈື່ຈຳໄວ້ວ່າ ຄວາມສຳພັນແມ່ນຕ້ອງມີສອງຝ່າຍ. ທ່ານສາມາດສະເໜີທີ່ຈະໃຫ້ຄວາມຮັກ ແລະ ຄວາມສຳພັນໄດ້, ແຕ່ຄວາມສຳພັນຈະບໍ່ເຕີບໂຕ ຍົກເວັ້ນແຕ່ການສະເໜີນັ້ນ ຖືກຮັບໄວ້ ແລະ ຖືກຕອບສະໜອງ. ຖ້າຫາກບຸກຄົນອີກຝ່າຍໜຶ່ງເບິ່ງຄືວ່າ ບໍ່ຍອມຮັບເອົາ, ກໍຢ່າບັງຄັບໃຫ້ມີຄວາມສຳພັນ. ໃຫ້ເວລາເຂົາເຈົ້າ ເພື່ອເບິ່ງຄວາມພະຍາຍາມທີ່ຈິງໃຈຂອງທ່ານ, ແລະ ຖ້າຈຳເປັນ, ໃຫ້ປຶກສາຫາລືກັບຜູ້ນຳຂອງທ່ານ ວ່າເປັນໄປໄດ້ຢູ່ບໍ ທີ່ຈະມີຄວາມສຳພັນຢ່າງມີຄວາມໝາຍ.
-
ສື່ສານດ້ວຍຄວາມເປັນຫ່ວງເປັນໃຍ.
ການສ້າງຄວາມສຳພັນທີ່ມີຄວາມໝາຍ ຮຽກຮ້ອງເຮົາໃຫ້ເຮັດຫລາຍກວ່າທຳມະດາ. ການສື່ສານແບບທຳມະດາ ແມ່ນເຕັມໄປດ້ວຍ ການເວົ້າລົມກັນກ່ຽວກັບຕາຕະລາງ, ອາກາດ, ແລະ ເລື່ອງເລັກນ້ອຍຢ່າງອື່ນໆ, ແຕ່ມັນບໍ່ຮ່ວມດ້ວຍການແບ່ງປັນຄວາມຮູ້ສຶກ, ຄວາມເຊື່ອຖື, ເປົ້າໝາຍ, ແລະ ຄວາມເປັນຫ່ວງເປັນໃຍ ຊຶ່ງຈຳເປັນສຳລັບຄວາມກ່ຽວພັນທີ່ມີຄວາມໝາຍ. ພຣະບິດາເທິງສະຫວັນ ໄດ້ເປັນແບບຢ່າງເຖິງການສື່ສານທີ່ມີຄວາມໝາຍເຊັ່ນນີ້ ໂດຍການແບ່ງປັນຄວາມຮູ້ສຶກຂອງພຣະອົງ ແລະ ແຜນຂອງພຣະອົງ ກັບພຣະບຸດຂອງພຣະອົງ (ເບິ່ງ ໂຢຮັນ 5:20) ແລະ ກັບເຮົາ ຜ່ານທາງສາດສະດາຂອງພຣະອົງ (ເບິ່ງ ອາໂມດ 3:7). ໂດຍການບອກກ່າວເຖິງເລື່ອງກິດຈະກຳປະຈຳວັນ ແລະ ການທ້າທາຍຂອງຊີວິດ ໃຫ້ກັນຟັງ ຕາມທີ່ຖືກຊົງນຳໂດຍພຣະວິນຍານ, ເຮົາຈະຮູ້ຄຸນຄ່າຂອງກັນແລະກັນຫລາຍຂຶ້ນ ເມື່ອເຮົາເຫັນວ່າ ມີຄວາມສົນໃຈທີ່ຄ້າຍຄືກັນ ແລະ ໄດ້ແບ່ງປັນປະສົບການໃຫ້ກັນແລະກັນ.
ການຮັບຟັງເປັນພາກສ່ວນສຳຄັນ ທີ່ສື່ສານວ່າ ທ່ານເປັນຫ່ວງເປັນໃຍ.8 ເມື່ອທ່ານຮັບຟັງຢ່າງຮອບຄອບ, ໂອກາດຂອງທ່ານທີ່ຈະຊ່ວຍຄົນອື່ນ ໃຫ້ມາສູ່ພຣະຄຣິດ ຈະເພີ່ມທະວີຂຶ້ນ ເມື່ອທ່ານມີຄວາມເຂົ້າໃຈ ແລະ ຮູ້ຈັກເຖິງຄວາມຕ້ອງການຂອງເຂົາເຈົ້າ ແລະ ເມື່ອເຂົາເຈົ້າຮູ້ສຶກວ່າ ມີຄົນຮັກແພງ, ມີຄົນເຂົ້າໃຈ, ແລະ ປອດໄພ.
-
ຮູ້ຄຸນຄ່າຂອງຄວາມແຕກຕ່າງ ເທົ່າໆກັບຄວາມຄ້າຍຄືກັນ.
“ບາງຄົນ … ເຊື່ອວ່າ ສາດສະໜາຈັກຢາກຈະເຮັດໃຫ້ສະມາຊິກທຸກຄົນ ກາຍເປັນເໝືອນກັນທັງໝົດ—ວ່າແຕ່ລະຄົນຄວນມີຮູບລັກສະນະ, ຮູ້ສຶກ, ຄິດ, ແລະ ປະພຶດ ຄືກັບສະມາຊິກຄົນອື່ນໆ,” ແອວເດີ ອຸກດອບ ໄດ້ກ່າວ. “ສິ່ງນີ້ຈະກົງກັນຂ້າມກັບປັນຍາຂອງພຣະເຈົ້າ, ອົງທີ່ໄດ້ສ້າງມະນຸດທຸກຄົນ ໃຫ້ແຕກຕ່າງຈາກອ້າຍເອື້ອຍນ້ອງຂອງເຂົາ. …
“ສາດສະໜາຈັກເຂັ້ມແຂງຂຶ້ນເມື່ອເຮົາສວຍໂອກາດເອົາຄວາມແຕກຕ່າງນີ້ ແລະ ຊຸກຍູ້ກັນແລະກັນ ໃຫ້ພັດທະນາ ແລະ ໃຊ້ພອນສະຫວັນຂອງເຮົາ ທີ່ຈະໃຫ້ກຳລັງໃຈ ແລະ ເສີມກຳລັງໃຫ້ແກ່ເພື່ອນສານຸສິດຂອງເຮົາ.”9
ການທີ່ຈະຮັກຄົນອື່ນ ໃນວິທີທີ່ພຣະເຈົ້າຮັກເຮົາ, ເຮົາຕ້ອງພະຍາຍາມເບິ່ງຄົນອື່ນ ໃນວິທີທີ່ພຣະເຈົ້າເບິ່ງເຂົາເຈົ້າ. ປະທານທອມມັສ ແອັສ ມອນສັນ (1927–2018) ໄດ້ສອນວ່າ, “ເຮົາຕ້ອງພັດທະນາຄວາມສາມາດ ທີ່ຈະເບິ່ງ [ຄົນອື່ນ] ບໍ່ແມ່ນດັ່ງທີ່ເຂົາເຈົ້າເປັນຢູ່ໃນເວລານີ້ ແຕ່ດັ່ງທີ່ເຂົາເຈົ້າຈະກາຍເປັນ.”10 ເຮົາສາມາດອະທິຖານ ເພື່ອຂໍຄວາມຊ່ວຍເຫລືອໃຫ້ເຮົາເບິ່ງຄົນອື່ນ ໃນວິທີທີ່ພຣະເຈົ້າເບິ່ງເຂົາເຈົ້າ. ເມື່ອເຮົາປະຕິບັດຕໍ່ຄົນອື່ນ ອີງຕາມສັກກະຍະພາບຂອງເຂົາເຈົ້າ ທີ່ຈະເຕີບໂຕ, ສ່ວນຫລາຍແລ້ວ ເຂົາເຈົ້າຈະກາຍເປັນຄົນເຊັ່ນນັ້ນ.11
-
ຮັບໃຊ້ເຂົາເຈົ້າ.
ໃຫ້ມີຄວາມຮູ້ສຶກໄວຕໍ່ຄວາມຕ້ອງການຂອງຜູ້ທີ່ທ່ານປະຕິບັດສາດສະໜາກິດຕໍ່ ແລະ ເຕັມໃຈທີ່ຈະໃຫ້ເວລາ ແລະ ພອນສະຫວັນ, ບໍ່ວ່າຈະເປັນໃນເວລາທີ່ຕ້ອງການ ຫລື ພຽງແຕ່ເພາະວ່າທ່ານເປັນຫ່ວງເປັນໃຍເທົ່ານັ້ນ. ທ່ານສາມາດຢູ່ກັບເຂົາເຈົ້າ ເພື່ອໃຫ້ຄວາມປອບໂຍນ, ໃຫ້ກຳລັງໃຈ, ແລະ ໃຫ້ຄວາມຊ່ວຍເຫລືອ ທີ່ຕ້ອງການ ໃນຍາມສຸກເສີນ, ເຈັບປ່ວຍ, ຫລື ໃນສະຖານະການທີ່ຮີບດ່ວນ. ແຕ່ໃນຄວາມສຳພັນກັບຫລາຍໆຄົນ ເຮົາເປັນພຽງແຕ່ຜູ້ຕອບຮັບຊື່ໆ. ພຣະເຈົ້າໄດ້ມອບອຳເພີໃຈໃຫ້ເຮົາ ເພື່ອວ່າເຮົາຈະໄດ້ກະທຳ ບໍ່ແມ່ນໃຫ້ຖືກກະທຳຕໍ່ (ເບິ່ງ 2 ນີໄຟ 2:14). ດັ່ງທີ່ອັກຄະສາວົກໂຢຮັນ ໄດ້ສອນວ່າ ພວກເຮົາຮັກພຣະເຈົ້າ ເພາະວ່າພຣະອົງຮັກພວກເຮົາກ່ອນ (ເບິ່ງ 1 ໂຢຮັນ 4:19), ເມື່ອຄົນອື່ນຮູ້ສຶກເຖິງຄວາມຮັກທີ່ແທ້ຈິງຂອງເຮົາ ຜ່ານທາງການຮັບໃຊ້ຂອງເຮົາ, ແລ້ວມັນຈະເຮັດໃຫ້ໃຈຂອງເຂົາເຈົ້າອ່ອນລົງ ແລະ ມີຄວາມຮັກ ແລະ ຄວາມໄວ້ວາງໃຈຫລາຍຂຶ້ນ.12 ສິ່ງນີ້ຈະສ້າງການກະທຳທີ່ມີຄວາມເມດຕາກະລຸນາ ທີ່ດີຂຶ້ນເລື້ອຍໆ ຊຶ່ງສາມາດສ້າງຄວາມສຳພັນໄດ້.
ການປະຕິບັດສາດສະໜາກິດ ດັ່ງທີ່ພຣະຜູ້ຊ່ວຍໃຫ້ລອດໄດ້ກະທຳ
ພຣະເຢຊູຄຣິດ ສ້າງຄວາມສຳພັນທີ່ມີຄວາມໝາຍ ກັບສານຸສິດຂອງພຣະອົງ (ເບິ່ງ ໂຢຮັນ 11:5). ພຣະອົງຮູ້ຈັກພວກເຂົາ (ເບິ່ງ ໂຢຮັນ 1:47–48). ພຣະອົງໄດ້ໃຊ້ເວລາຢູ່ກັບພວກເຂົາ (ເບິ່ງ ລູກາ 24:13–31). ການສື່ສານຂອງພຣະອົງແມ່ນເກີນກວ່າແບບທຳມະດາ (ເບິ່ງ ໂຢຮັນ 15:15). ພຣະອົງຮູ້ຄຸນຄ່າຂອງຄວາມແຕກຕ່າງຂອງພວກເຂົາ (ເບິ່ງ ມັດທາຍ 9:10) ແລະ ໄດ້ເຫັນສັກກະຍະພາບຂອງພວກເຂົາ (ເບິ່ງ ໂຢຮັນ 17:23). ພຣະອົງໄດ້ຮັບໃຊ້ທຸກຄົນ, ເຖິງແມ່ນວ່າພຣະອົງເປັນພຣະຜູ້ເປັນເຈົ້າຂອງທຸກຄົນກໍຕາມ, ໂດຍໄດ້ກ່າວວ່າ ພຣະອົງບໍ່ໄດ້ມາເພື່ອໃຫ້ຄົນອື່ນຮັບໃຊ້ຕົນ ແຕ່ມາເພື່ອຮັບໃຊ້ເຂົາ (ເບິ່ງ ມາຣະໂກ 10:42–45).
ທ່ານຈະເຮັດສິ່ງໃດແດ່ ເພື່ອສ້າງຄວາມສຳພັນທີ່ເຂັ້ມແຂງ ກັບຜູ້ທີ່ທ່ານໄດ້ຖືກເອີ້ນໃຫ້ຮັບໃຊ້?
© 2018 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Ministering Principles, August 2018. Laotian. 15051 331