2018
Meleketek a meklou a beklul el deluill
August 2018
Ministering

Osisecheklel a Omesiou, August 2018

Meleketek a meklou a BELKUL el deluill

Sel duch er kid el omkerreu er a rebebil a mo obdois sel ngar ngii a klou a belkul el deluill el lobengterir.

Tial ongit el mo olsisechakl el mora rebebil er a rechad a techall el mo meleketek a ungil deluill el obengterir— el deluill el ngii a rulterir el mo sebecherir el olengit me a lechub e te kongei el ngmai a ngeseu. Me sel bla dolasem el meruul aikal deluill, e a Rubak a sebechel ngodechii a klengar er tirka el ngara deluill.

“Ak kmal loumgerang el kmo ng diak a kmal mo mengodech sel lak el klou a belkul a deluill,” ng dilu a Sharon Eubank, Kot el Counselor er a General Presidency er a Relief Society. Me aikal doruul el ngeseu el mo ngodechii a klengar er a bebil er a rechad, ng millekoi, e ng kirel “delalem er a rengud el soal el mo omkungil e orrenges e obengterir e oba omengull.”1

A meklou a beklul el deluill a diak de dung kouad. Ng mokdubech er a klengareou el reng, blak el reng, me a “meral beltik el reng” (D&C 121:41).2

Teletael el mo Meleketek e Melisiich a Deluill

“Ke de meleketek a [deluill] el ta el chad er a ta el taem,” ng dilu Elder Dieter F. Uchtdorf er a Chelechad er a Teruich me a terung el Apostol.3 Me sel doureor el meleketek aikal ungil a belkul el deluill el mo er tirke el dolsisechakl er tir, e a Chedaol Reng a sebechel lomekrael er kid. Aikal beldukl el tekoi a ultuil er a teletael el Elder Uchtdorft a mla meskid.4

  • Bo modengelterir.

    A President Ezra Taft Benson (1899 1994) a ulsisechakl, “ Ng diak el sebechem el moungil mesiou er tirkel diak mungil medengelterir.” Ng uluchais el kmo bo modengei a ngklir a rebek el chad er tial telungalek e bo modengelii aikel meklou a ultutelel sils el uaia tansiobi, klengeltengat, techolb el chelid, me a chebechiil. Tiang a meskid a techall el mo meluches el mo er tir malechub e ke de omekedong el chemat er a chad er a telungalek el mla nguu malechub eng kudmeklii a chetengakl lomeruul.5

  • Mchoit a taem el obengterir.

    A omekdubech a deluill a meod. Mosiik a techall el di melemolem el mengedecheduch er tir. A omesuub a mla ochotii el kmo sel mouchais er tir el kmo ke omekerreu er tir sei e a klou a ultutelel mo er a ungil deluill.6 Bo blechoel el oldingel er tirkel kau a mla mokedong el mo mesiou er tir. Mongedecheduch er tir er a Ikelesia. Mousbech a ngii dil teletael el ngar ngii a belkul—uaia email, Facebook, Instagram, Twitter, Skype, oudengua, malechub e moluches el mo er tir. A Elder Richard G. Scott(1928–2015) er a Chelechad er a Teruich me a terung el Apostol a milsaod el kirel a klisichel a beot e ungil olechotel a beltik el reng me a omesiou: “Ak blechoel el mekengii a babilengek er a chedaol llechukl, …e mo metik er a ungil, tekoi el llechukl ra babier el kirek el [bechik] er a Jeanene a mla otungii er a delongelel a llel a babier. …A ikal mekreos el babilengel … a melemolem el klou a bekul el mengelaod e omekellomes.”7

    Dirrek, modengei el kmo te teru el chad a rulii a deluill. Ng sebechem lodars a beltik el reng me a klsechelei, eng di tial deluill a diak le mukeroul dilmerko lenguu e lodersii. Alsekum ngkal tang a kora diak el lokerang el kirel, eng diak muri er tial deluill. Bsang a team el tir a mesa meral teletelem, malechub, mongedecheduch lobengkel a merreder el kmo tial klou a belkul el deluill ng sebechel mo tekoi me a lechub eng diak.

  • Bom kaukerreu sel omchadecheduch.

    Meleketek a meklou a belkul el deluill a olengit er kid me kede rulii el mor sel tkul rebab el sebeched. A diak el meral cheldecheduch a mui er a mekekerei e diak a belkul tekoi el kirel a reua taem, eanged, me a bebil er a mekekerei el tekoi, engdi tia diak luldimukl er a olechotel a reng, klaumerang, moktek, me aikel bekikl er ngii el tekoi el rulii meng mo klou a beklul el om kabetech. A Chedam el ngara Babeluades a mla ochotii tial klou a belkul el omengedecheduch lokiu a olechotel a Rengul me a Telbilel lokiu a Ngelkel (mesa Johanes 5:20) e obengeked lokiu a reprofet er ngii (mesa Amos 3:7). Sel douchais a dilubech er a bek el sils me a ringelel a klengar el mo ra ta ma tang el oiak a Reng, e ke de mo oureng a saul el kirel a tang me a tang sel deues a osisiu el tekoi el soad malechub a osisiu el omeruul el bla desiseb er ngii.

    A orrenges a klou el telengtengil a omengedecheduch leng kau el omekerreu.8 Sel bo mungil lorrenges, e a techellem el mo olngeseu er a rebebil el mei er a Kristo a mo klou sel bocha modengei e mues aikel lousbech me lomelchesuar a beltik el reng, dodenge sorir, el selbechakl.

  • Oureng a saul er a klakekerous ma ikel ngii a osisiu.

    “Bebil …oumgerang el kmo a Ikeleisa a soal el mo mebii a bek el chad er a ikelesia er a osisiu el teletael—meng bek el chad a kirel el omes, omelchesuar, omdasou, e meruul a tekoi el diua bek el chad, ” ng dilu a Elder Uchtdorf. “Tiang a omtok er a llemesel a Rubak, el ngii a milebii a rebek el chad el kakerous er tang… …

    “Tial Ikelesia a mo ungil sel denguu tial techall er a klekakerous e oldubech er ta me a tang el mo meruul e ousbech aikal keldachelbai el mo melkakl e melisiich er rebebil er kid el oltirakl. ”9

    Sel mo oubeltik el reng el mo ra rebebil el diua beltkil a rengul a Dios el merkid a olengit er kid el mo melasem el omes er a rechad el diua Dios a lomes er tir. A President Thomas S Monson (1927–2018) a ulsisechakl, “ Ng kired el rullid el mo sebeched el mesterir a [rebebil] el diak el uai sel desterir er a chelechal taem ng bai sel kirir el mo uaingii.”10 Ng sebeched el meluluuch el kirel a ngeseu el mo omes er a rebebil el di uai a Dios. Sel bo deruul a tekoi el mo er chad el ultuil er a moungil ulekerulir, e tir a mo sebecherir el mo meruul a ungil.11

  • Mosiou er tir.

    Bo momtab a lousbech er ngii tirkal molsisechakl er tir e bol blak a rengum el mesterir a temem me a keldachelbai, ra diak el dil sel taem el tir a ousebech er ngii leng kau el omekerreu. Ng sebechem el ngar sei el lomesterir a ongelaod, melkakl, me a lousbech el ngeseu sel ngar ngii a bkais chemrungel, secher, me a orechudel el teletael. Eng di a chelsel a betok el deluill e kid a omtab aikel mla dubech. A Rubak a mileskid a techelled el melilt meng mo sebeched el meruul er a bai loruul el mer kid. (mesa 2 Nephi 2:14). Di ua Apostol Johanes lolsisechakl el kmo ke de betik a rengud er a Rubak e le ngii el mle kot el betik a rengul er kid (mesa 1 Johanes 4:19), sel bebil a rechad a melechesuar a beltkil a rengud el mor tir lokiu a teleteled er a omesiou, ng sebechel rulii a rengrir el mo medemdemk e smisichii a beltik el reng me a klaumerang.12 Tiang a mekdebechii a melemolem e ungil el teletael el ngii a sebechel toketekii a deluill.

Olsisechakl el di Uai a Osobel

A Jesus Kristo milleketek a meklou a belkul el deleuill lobengekel a re oltirakl er ngii (mesa Johanes 11:5). Ng mle medengeterir (mesa Johanes 1:47–48). Ng chiloit a taem el obengterir (mesa Lukas 24:13–31). Ng milengedecheduch er til er a meklou a ultutelel el tekoi (mesa Johanes 15:15). Ng ulureng a saul er a ikel lengodech er ngii (mesa Mateus 9:10) e milsa mo klungiolir. (mesa Johanes 17:23). Ng milesiou er a rebek el chad, ngii Rubak er a rokui, ng dilu el kmo ng mlei el diak olsisechakl er ngii ng bai mo olsisechakl (mesa Mark 10:42–45).

Ngara sebechem el rulii el mo meleketek a mesisiich el deluill lobengkel tirkel tir a bla mokedong el mo mesiou er tir?

© 2018 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/17. Kengei er a oidel: 6/17. Oidel a Ministering Principles, August 2018. Palauan. 15051 881

Uleklatk

  1. Sharon Eubank, chelsel “Humanitarian Acts Must Be Rooted in Relationship, Sharon Eubank Says,” mormonnewsroom.org.

  2. Mesa “Ministering Principles: Reach Out in Compassion,” Liahona, July 2018, 6–9.

  3. Dieter F. Uchtdorf, “Of Things That Matter Most,” Liahona, Nov. 2010, 22.

  4. Mesa Dieter F. Uchtdorf, “Of Things That Matter Most,” 22.

  5. Mesa Ezra Taft Benson, “To the Home Teachers of the Church,” Ensign, May 1987, 50.

  6. Mesa Charles A. Wilkinson and Lauren H. Grill, “Expressing Affection: A Vocabulary of Loving Messages,” chelsel Making Connections: Readings in Relational Communication, ed. Kathleen M. Galvin, 5th ed. (2011), 164–73.

  7. Richard G. Scott, “The Eternal Blessings of Marriage,” Liahona, May 2011, 96.

  8. Mesa “Ministering Principles: Five Things Good Listeners Do,” Liahona, June 2018, 6–9.

  9. Dieter F. Uchtdorf, “Four Titles, ” Liahona, May 2013, 59.

  10. Thomas S. Monson, “See Others as They May Become,” Liahona, Nov. 2012, 69.

  11. Mesa Terence R. Mitchell and Denise Daniels, “Motivation,” chelsel Handbook of Psychology, vol. 12, ed. Walter C. Borman and others (2003), 229.

  12. Mesa Edward J. Lawler, Rebecca Ford, and Michael D. Large, “Unilateral Initiatives as a Conflict Resolution Strategy,” Social Psychology Quarterly, vol. 62, no. 3 (Sept. 1999), 240–56.