Ol Givhan Prinsipol, Septemba 2018

Toktok raon long Ol Nid blong Olgeta

Yu no nid blong mekem hemia yuwan. Blong kaonsel tugeta i save givim yu help we yu nidim blong helpem ol narawan.

God i invaetem yu blong givhan long man, woman o famli long wod o branj blong yu folem ol nid blong olgeta. ?Olsem wanem nao yu save faenemaot ol nid ia? Prinsipol blong kaonsel tugeta, we hem i wan impoten prinsipol insaed long jos, hem i ki blong wok ia.

Afta we yumi tokbaot wanem nao bae yumi kaonsel tugeta from, bae yumi lukluk tu blong :

Askem advaes long Papa long Heven.
Kaonsel tugeta wetem man, woman mo famli we oli putum yu blong givhan long olgeta.
Kaonsel tugeta wetem kompanion blong yumi.
Mo kaonsel tugeta wetem ol narawan we oli givim wok long olgeta blong givhan long ol semfala man, woman o famli.

Blong kaonsel tugeta wetem ol lida blong yumi i impoten tu. Wan fiuja atikol blong Ol Givhan Prinsipol long Liahona bae i lukluk moa long fasin blong kaonsel tugeta wetem ol lida, mo tu, wetem ol rol blong givhan intaviu linsaed long wok ia.

Wanem Yumi Kaonsel Tugeta From

Blong kam blong save ol nid, hem i impoten blong givhan long wanwan long yumi. ?Be wanem nao ol defren wei we ol nid ia oli kamkamot long olgeta, mo i gat wan samting moa bitim ol nid ia we yumi mas faenemaot?

Ol nid i kam long ol defren wei. Olgeta we yumi givim seves long olgeta oli fesem ol jalenj we oli long saed blong ol filing blong olgeta, mane, long saed blong bodi, skil, mo fulap moa. Sam long ol nid oli mas lukluk long olgeta faswan long ol narafala nid. Sam nid, bae yumi gat evri samting blong save givim help wetem, ol narafala nid oli nidim blong yumi askem ol nara pipol blong oli kam help wetem. Long ol hadwok blong yumi blong help long ol nid long saed blong laef ia, no fogetem se koling blong yumi blong givhan i blong helpem ol narawan blong oli kam andap long rod blong kavenan, we oli rere from mo stap kasem ol prishud odinens we oli impoten blong fsave kam olsem wan god.

Antap long fasin blong stap kaonsel tugeta abaot ol nid blong wanwan man, woman o wan famli, yumi mas lanem abaot ol samting we oli gud long hem. ?Wanem nao oli no nidim help wetem? ?Wanem nao ol talen mo ol save we oli gat, blong save blesem ol naraman? ?Hao nao oli spesel blong save help blong bildim kingdom blong God? Ol samting we man, woman oli gud long hem, maet bae i mo impoten blong andastanem, semmak olsem yumi andastanemol nid blong hem.

Askem advaes long Papa long Heven

Wan long ol stamba doktrin blong bilif blong yumi i we, Papa long Heven i stap toktok long ol pikinini blong Hem (luk long Ol Toktok blong Bilif 1:9). Taem yumi kasem wan niu wok blong givhan long wan, yumi mas askem advaes long Papa long Heven wetem prea, askem moa save mo kam blong andastanem ol nid mo ol samting we oli gud long hem. Wei blong askem advaes tru long prea i mas gogohed tru long ol givhan wok blong yumi.

Kaonsel Tugeta wetem Man, Woman mo Ol Famli

Olsem wanem mo wetaem yumi go luk man, woman mo ol famli we oli singaotem yumi blong givim seves long olgeta bae i defren, bae i dipen long ol situesen, be blong kaonsel tugeta stret wetem man,woman o famli i wan mas blong bildim ol rilesensip mo andastanem ol nid blong olgeta, wetem hao nao oli wantem blong oli helpem olgeta. Sam long ol kwestin bae i mas wet kasem taem we yufala i bildimap wan gudfala rilesensip. I no gat wan raet wei blong mekem hemia, be i gud blong mekem olgeta samting ia:

Faenemaot olsem wanem mo wetaem oli wantem se yumi go luk olgeta.
Lanem abaot ol samting we oli laekem blong mekem mo laef blong olgeta.
Kam wetem sam tingting blong hao nao bae yu save help, mo askem ol tingting blong olgeta.

Taem yumi stap bildim tras, tingting long nid blong wanwan man, woman o famli. Askem ol kwestin we Tabu Spirit i talem long yu blong askem.¹ Eksampol:

?Wanem nao ol jalenj we oli fesem?
?Wanem nao ol famli gol o ol gol blong olgetawan? ?Eksampol, olgeta oli wantem blong kam gud blong mekem famli haos naet evri wik, o blong save kam blong dipen moa long olgetawan.
?Olsem wanem nao yumi helpem ol memba blong famli wetem ol gol mo ol jalenj blong olgeta?
?Wanem nao sam long ol odinens blong gospel we i stap kam antap long laef blong olgeta? ?Olsem wanem nao yumi helpem olgeta blong rere?

Tingbaot blong givim stret help, olsem, “?Long wik ia, wij naet nao bae mifala i save karem kaekae blong yu i kam?” Wan simpol ofa, olsem, “Letem mifala i save sapos i gat eni samting we mifala i save mekem,” i no wan gudfala wei blong givim help.

Kaonsel Tugeta wetem Kompanion blong Yumi

From se yu mo kompanion blong yu bae i no oltaem we yutufala i stap tugeta taem yutufala i go mo storian wetem man, woman o famli, hem i impoten blong yutufala i wok tugeta mo kaonsel tugeta taem yutufala i lukaotem insperesen olsem wan kompanionsip. Hemia samfala kwestin blong tingting long hem:

?Olsem wanem mo hamas taembae yutufala olsem wan kompanionsip bae yutufala i toktok bitwin yutufala?
?Hao nao bae yutufala i yusum wanem we yutufala i gud long hem blong givhan long famli, wanwanman, woman long saed blong ol nid blong olgeta.
?Wanem nao samfala samting we yu bin lanem, wanem nao samfala eksperiens we yu gat, mo wanem nao samfala revelesen we yu kasem long taem we yu bin toktok long man, woman o famli?

Kaonsel Tugeta wetem Ol Narawan we Oli Kasem Wok blong Givhan long Ol Semfala Pipol

I gud blong samtaem storian wetem olgeta narawan we oli kasem wok blong givhan long semfala man, woman o famli.

Toktok Tugeta blong Stretem Ol Jalenj

Elda Chi Hong (Sam) Wong blong Olgeta Seventi i yusum wan storian long Mak 2 long dei blong yumi blong soem olsem wanem, fasin blong stap kaonsel tugeta i mekem se fo man i faenemaot hao nao blong letem wan man i we i kasem sik blong bodi i seksek blong go luk Jisas.

“Hem i maet hapen olsem,” Elda Wong i talem. Fo man oli mekem wok we bisop i givim blong visit, long haos blong hem, wan man we i kasem sik blong bodi i seksek. Long wan wod kaonsel we i jes pas, afta we oli toktok raon tugeta abaot ol nid insaed long wod, bisop i givim wok blong olgeta “blong sevem man”. Olgeta fo ia, bisop i askem olgeta blong helpem man ia we i kasem sik blong bodi i seksek.

“[Taem we oli kasem haos we Jisas i stap lo hem,] rum ia i fulap gud long ol man. Oli no save karem hem i go tru long doa. Mi save se oli rili traehad, be oli no save go insaed nomo. Be oli toktok raon long nekis samting we bae oli mekem—olsem wanem bae oli karem hem i go long Jisas Kraes blong i hilim hem. Oli mekem wan plan— i no wan isiwan, be oli mekem folem.

“… ‘Oli tekemaot smol haf blong ruf stret antap long ples ia we Jisas i stap long hem: oli karem sikman ia wetem bed blong hem we i stap slip long hem’ (Mak 2:4). …

“…‘Taem Jisas i luk bilif blong olgeta, hem i talem long sikman ia, ‘Pikinini blong mi. Ol sin blong yu mi mi tekemaot finis’ (Mak 2:5).”²

Invitesen blong Tekem Aksen

Elda Dieter F. Uchtdorf blong Kworom blong Olgeta Twelef Aposol i talem se, “Toktok tugeta, yusum evri risos we i stap, lukaotem insperesen blong Tabu Spirit, askem Lod blong i konfemem, mo afta, pulum han blong sot i go antap mo go wok.

“Mi promesem yufala: sapos yufala i folem paten ia, bae yufala i kasem stret weikam long Lod long saed blong hu, wanem, wetaem, mo weaples blong mekem samting long wei blong Lod.”³.