Na iVakavuvuli ni Veiqaravi, Sepiteba 2018

Na Veivakasalataki me baleta na Nodra Gagadre.

E sega ni o cakava duadua na ka oqo. Na veivakasalataki e rawa ni vakarautaka na veivuke o gadreva mo vukei ira kina na tani.

Na Kalou e sa sureti iko mo veiqaravi vua e dua se dua na matavuvale ena nomu tabanalevu se tabana me vaka na nodra gagadre. O na kila vakacava beka na vei gagadre oya? Na ivakavuvuli ni veiqaravi, okoya e rui vakanamata kina na Lotu, e kena idola.

Ni oti na noda veivosakitaka na veika eda rawa ni vakasamataka baleta na veivakasalataki, eda na vakadikeva na:

1. Veivakasalataki kei na Tamada Vakalomalagi.

2. Veivakasalataki kei na le dua kei na matavuvale o lesi kina.

3. Veivakasalataki kei na noda itokani.

4. Veivakasalataki kei ira eso tale ka lesi ki na le dua kei na matavuvale vata ga oya.

Na veivakasalataki kei ira na noda iliuliu e sa bibi talega. E dua na itukutuku ni iVakavuvuli ni Veiqaravi mai muri ena Liaona ena vakadikeva na veivakasalataki kei ira na iliuliu vakakina na inaki ni veivakatarogi ni veiqaravi ena cakacaka oqori.

Na Veika Eda Veivakasalataki kina

Na kilai vinaka ni veigagadre e bibi ki na veiqaravi vua edua ki na dua tale. Ia ena rawa ni vakavotukana vakacava na vei gagadre oqori, ka e tiko beka edua na ka e levu cake mai na vei gagadre ka dodonu meda kila?

E levu tu na ituvaki ni vei gagadre. O ira eda qarava era rawa ni sotava na vei bolebole vaka yalo, vakailavo, vakayago, vakavuli, kei na vuqa tale. Eso na gagadre era bibi cake mai na kena tale eso. Eso e rawa ni da veivuke kina ena veika e tu vei keda; eso eda na gadreva kina na veivuke. Ena noda sasaga me vukea me sotavi na vei gagadre vakayago, kua ni guilecava ni noda ilesilesi ni veiqaravi e oka kina na nodra vukei mera toso yani ena sala ni veiyalayalati, ka vakavakarau ki na ciqomi ni cakacaka vakalotu ni matabete okoya e bibi ki na bula vakalou.

Me ikuri ni veivakasalataki baleta na gagadre yadua se vaka matavuvale, e dodonu meda vakasaqara ka vulica na veika era kaukauwa kina. Na veika cava so era sega ni gadreva kina na veivuke? Na vei rawaka kei na isolisoli cava so e tu vei ira ka rawa ni vakalougatataki ira na tani? Ena rawa ni veivuke vakacava na isolisoli oqo me tarai cake kina na matanitu ni Kalou? Na veika e kaukauwa kina edua e bibi sara me kilai me vaka ga na kilai ni nona vei gagadre.

Veivakasalataki kei na Tamada Vakalomalagi.

E dua na ivakavuvuli dei ni noda vakabauta o ya ni Tamada Vakalomalagi e dau vosa vei ira na Luvena (raica na Yavu ni Vakabauta 1:9). Ni da ciqoma e dua na ilesilesi vou me veiqaravi vua edua, e dodonu meda veivakasalataki kei na Tamada Vakalomalagi ena masumasu, ka vakasaqara na rai kei na kila titobu ki na nodra gagadre kei na veika era kaukauwa kina. Na cakacaka ni veivakasalataki ena masu oqori e dodonu me tomani tiko ena gauna taucoko ni noda veiqaravi.

Veivakasalataki kei na le dua kei na matavuvale.

Na ivakarau kei na gauna meda torovi ira yadudua kei na matavuvale eda sa kacivi meda qarava ena rawa ni vakatau ena ituvaki eso, ia na veivakasalataki vakadodonu vakayadua se matavuvale e bibi ena kena taraicake na veimaliwai kei na kilai vinaka ni nodra gagadre, oka kina na ivakarau era vinakata mera vukei kina. Eso na taro ena gadrevi me wawa yacova ni sa taraicake e dua na veimaliwai ni veikilai vinaka. Dina ga ni sega ni dua na sala dodonu me caka kina oqori, taurivaka na kena e veitaravi oqo:

• Mo kila na ivakarau kei na gauna era gadreva me sikovi kina.

• Vulica na nodra veika maleleti kei na ituvaki eliu.

• Lako kei na vakatutu eso ena ivakarau o rawa ni veivuke kina, ka taroga na nodra vakatutu.

Ni da taracake na veivakabauti, vakasamataka me veivosakitaki na vei gagadre ni tamata yadua se matavuvale. Taroga na vei taro ena veivakauqeti ni Yalo Tabu.¹ Me kena ivakaraitaki:

• Na cava so na bolebole era sotava?

• Na cava so na nodra ilalawa vakamatavuvale se yadudua? Me ivakaraitaki, era vinakata li me vinaka cake ka wasoma na qaravi ni lotu vakamatavuvale, se me ra bula rawati-ira vakavinaka cake?

• E rawa ni da vukei ira vakacava ena nodra inaki kei na bolebole eso?

• Na vei cakacaka vakalotu ni kosipeli cava e basika tiko mai ena nodra bula? E rawa vakacava meda vukei ira me ra vakavakarau?

Nanuma mo soli veivuke vakamatata, me vaka, “Na bogi cava ena macawa oqo keirau rawa ni kauta mai kina e dua na kemu ivakayakavi?” Na soli veivuke buawa, me vaka, “Qai tukuna mai kevaka e gadrevi me keirau cakava edua na ka,” e sega ni veivukei sara.

Veivakasalataki kei na Noda Itokani

Baleta ni drau na sega ni dau sala vata e veigauna kei na nomu itokani ni drau veitaratara kei na le dua se matavuvale, e ka bibi mo drau cakacaka ka veivakasalataki vata ni drau vakasaqara na veivakauqeti vakaveitokani. Oqo eso na taro me vakasamataki:

• Ena vakacava beka na ivakarau kei na wasoma ni nomudrau veivosaki vata vakaveitokani?

• Drau na vakayagataka vakacava na veika drau kaukauwa kina vakayadua mo drau veiqaravi kina ki na gagadre ni matavuvale se le dua?

• Na cava so drau sa vulica, na veika vakilai cava drau sa sotava, kei na veivakauqeti cava drau sa ciqoma mai nai otioti ni gauna drau veivosakitaka kina na le dua se matavuvale?

Veivakasalataki kei na So Tale era sa Lesi

Ena vinaka na veivosaki vagauna kei ira eso tale ka ra lesi me veiqaravi ki na le dua se matavuvale vataga drau qarava tiko.

Veivosaki me Walia na Bolebole

O Elder Chi Hong (Sam) Wong ena Vitusagavulu e vakatautauvatataka edua na itukutuku mai na Marika 2 kina noda siga nikua me vakaraitaka na yaga ni veivakasalataki ka rawa kina vei iratou e le va na tamata me kauta mai edua sa tauvi paralasi ki vei Jisu.

“Ena rawa ni yaco vaka oqo,” e kaya o Elder Wong. “E va na tamata e ratou sa cakava tiko na nodratou itavi a solia o nodratou bisopi me ratou sikova, ena nona vale, e dua na tagane ka tauvi paralasi tu. … Ena matabose ni tabanalevu se qai oti toka, ni oti na veivakasalataki baleta na gagadre eso ena tabanalevu, a veisoliyaka kina o bisopi na ilesilesi ni ‘veivueti’. E ratou a lesi kina na lewe va oqo me ratou laki vukea na tagane oqo. …

“[Ni rautou yaco yani ki na vale ka tiko kina ko Jisu,] esa oso drigi na rumu. E ratou sega ni curu rawa e katuba. Au vakabauta ni ratou saga na veika taucoko eratou vakasamataka rawa, ia e ratou se sega ga ni curu rawa. …. Ratou a veivosakitaka na cava me sa na caka—me rawa ni kau na tagane oqo vei Jisu Karisito me vakabulai. … Ratou a qai tuvana e dua na ituvatuva—e sega ni rawarawa, ia e ratou a cakacakataka.

“… ‘E ratou sa basuka na dela ni vale sa tiko kina ko koya: ia ni ratou sa basuka rawa, e ratou sa tukuca sobu nai mocemoce sa davo kina ko koya sa tauvi paralasi’ (Marika 2:4). …

“… ‘Ia ni sa raica ko Jisu na nodratou vakabauta, sa kaya vua sa tauvi paralasi, Na luvequ, sa bokoci na nomu ivalavala ca’ (Marika 2:5).”²

Veisureti meda Cakava

O Elder Dieter F. Uchtdorf ena Kuoramu ni Apositolo Le Tinikarua e a uqeta, “Veivakasalataki vata, vakayagataka na ivurevure kece sara sa tu, vakasaqara na veivakauqeti ni Yalo Tabu, kerea na veivakadeitaki ni Turaga, ka cokia na liga ni nomu sote ka laki cakacaka yani.

“Au sa solia vei kemuni e dua na yalayala: kevaka mo ni muria na ivakarau oqo, ko ni na ciqoma na veidusimaki digitaki me baleti cei, na cava, gauna cava, kei na vanua cava mo veivuke ena sala ni Turaga.”³

© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. iVakadewa ni Ministering Principles, September 2018. Fijian. 15052 858

iDusidusi

1. Raica na Vunautaka na Noqu Kosipeli: E Dua na iDusidusi ni Veiqaravi ni Daukaulotu (2004), 129.

2. Chi Hong (Sam) Wong, “Veivueti ena Duavata,” Liaona, Nove. 2014, 14–15.

3. Dieter F. Uchtdorf, “Veivukei ena Sala ni Turaga,” Liaona, Nove. 2011, 55.

Na itukutuku ni “iVakavuvuli ni Veiqaravi” e nakiti me vukea noda vulica me da dau veikauwaitaki—e sega ni wasei me itukutuku ena veisiko ni veiqaravi. Ni yaco me da kilai ira eda qarava, ena uqeti keda na Yalo Tabu me da kila na itukutuku cava era na gadreva me ikuri ni noda kauwai kei na yalololoma.

Na Kaukauwa ni Veivakasalataki

“Ke o via vakavinakataka edua na ka, ia mo veivakasalataki ena veika e baleta,” e kaya o Peresitedi M. Russell Ballard, na Peresitedi Vakatawa ni Kuoramu ni iApositolo Le Tinikarua. “Ni da [cakava], eda na bulia e dua na lomavata vakayalo, oya na torocake ni gugumatua se rawa-ka ni da sa cakacaka vata se duavata, sa na yaco kina me cecere sara mai na noda sasaga yadua” (in R. Scott Lloyd, “Counseling with Councils Is Lord’s System, Elder Ballard Declares,” Jan. 11, 2017, news.lds.org; “Strength in Counsel,” Ensign, Nov. 1993, 77).

Na taraicake ni veimaliwai esa dua talega na tiki bibi ni veivakasalataki vata. Raica talega na itukutuku ni iVakavuvuli ni Veiqaravi “Taraicake ni Veimaliwai e Vakaibalebale,” ena ilavelave tabaki ni Okosita 2018 ni Liaona, ena tabana e 6.