Pannakiuman maipapan kadagiti Kasapulanda

Diyo nasken nga aramiden daytoy nga agmaymaysa. Ti pannakiuman ket maikaipaay iti tulong a kasapulanyo a mangtulong iti dadduma.

Inawisnakayo ti Dios nga agminister iti maysa nga indibidual wenno pamilia iti ward wenno branchyo a mayannurot kadagiti kasapulanda. Kasano a maammuanyo no ania dagita a kasapulan? Ti pagbatayan ti pannakiuman, a nagbalinen a pokus iti Simbaan, isu ti tulbek.

Kalpasan ti panangilawlawag no ania ti mabalin nga ibilang iti pannakiuman, sukisokentayonto:

Pannakiuman iti Nailangitan nga Ama.
Pannakiuman iti naidutok nga indibidual ken pamilia.
Pannakiuman iti kompaniontayo.
Ken pannakiuman kadagiti dadduma a naidutok iti isu met laeng nga indibidual wenno pamilia.

Napateg pay ti pannakiuman kadagiti lidertayo. Ti masakbayan a Dagiti Pagbatayan iti Ministering Principles iti Liahona ket magsukisokto iti pannakiuman kadagiti lidertayo kasta met ti akem dagiti interbyu iti ministering iti dayta a proseso.

Ania ti Maipapan iti Panaggiinnumantayo

Napateg iti ministering iti tunggal maysa ti pannakaawat kadagiti kasapulan. Ngem ania dagiti kita a mabalin a gun-oden dagita a kasapulan, ken adda kadi maysa a banag nga ad-adda pay ngem dagiti kasapulan a nasken nga ammuentayo?

Mabalin a dumteng dagiti kasapulan iti adu a porma. Mabalin a maipasango dagiti pagserbiantayo iti pannubok a mainaig iti rikna, kuarta, bagi, edukasion, ken adu pay. Nangatngato a prioridad ti sumagmamano a kasapulan ngem iti dadduma. Sumagmamano a kasapulan nga addaantayo tapno pangtulong; mabalin a mangidawat kadatayo ti dadduma pay a kasapulan a mangiraman iti tulong ti sabali pay a tao kadatayo. Kadagiti panagkagumaantayo a makatulong a mangipaay kadagiti temporal a kasapulan, saantayo a liplipatan a ti awagtayo nga agminister ket mangiraman iti panangtulong kadagiti dadduma nga agaramid kenn agtungpal kadagiti katulagan, nga agsagsagana ken umaw-awat kadagiti ordinansa ti priesthood a kasapulan unay iti pannakaitan-ok.

Kas nayon iti pannakiuman maipapan kadagiti kasapulan ti indibidual ken pamilia, nasken nga adalentayo dagiti pagpigsaanda. Ania dagiti saanda a kasapulan a tulong? Ania dagiti kabaelan ken talento nga adda kadakuada a mabalin a mangparabur kadagiti dadduma? Kasano a naidumduma a mayannatup dagitoy tapno makatulong a mangbangon iti pagarian ti Dios? Dagiti pagpigsaan ti maysa nga indibidual ket kas kapateg iti pannakaawat kadagiti kasapulanna.

Pannakiuman iti Nailangitan nga Ama

Maysa kadagiti kangrunaan a pagbatayan ti pammatitayo ket ti pannakisao ti Nailangitan nga Ama kadagiti annakna (kitaen iti Pagannurotan ti Pammati 1:9). No umawattayo iti baro a naidutok nga aramiden nga agserbi wenno agminister iti maysa a tao, nasken a makiumantayo iti Nailangitan nga Ama iti kararag, nga agkalkalikagum a manggun-od kadagiti nauneg a pannakaammo [insights] ken pannakaawat maipapan kadagiti kasapulan ken pagpigsaanda. Ti proseso ti pannakiuman babaen ti kararag ket agtultuloy koma iti naidutok nga aramidentayo iti ministering.

Pannakiuman kadagiti Indibidual ken Pamilia

No kasano ken no kaano nga asitgantayo dagiti indibidual ken pamilia a nakaawagantayo a pagserbian ket mabalin nga agduma depende kadagiti kasasaad, ngem ti direkta a pannakiuman iti indibidual wenno pamilia ket kasapulan unay para iti panangparnuay kadagiti panaglalangen ken pannakaawat kadagiti kasapulanda, agraman no kasano ti kayatda a pakatulongan. Nalabit nga itantanmo pay ti panagdamag kadagiti sumagmamano a saludsod agingga a saan a mapadur-as dagiti napapateg a pannakilangen. Idinto nga awan ti maysa a wagas a mangaramid iti dayta, ibilangyo dagiti sumaganad:

Ammuen no kasano ken kaano ti kaykayatda a panangkontak kadakuada.
Adalen ti maipapan kadagiti paggugusto ken nagtaudanda.
Inkayo nga addaan kadagiti singasing iti no kasano a makatulongkayo, ket agkiddaw kadagiti singasingda.

No nabangontayo ti panagtalek, ibilang ti panangilawlawag kadagiti kasapulan ti indibidual ken pamilia. Agdamag kadagiti saludsod no tignayennakayo ti Espiritu Santo.¹ Kas pagarigan:

Ania dagiti karit a pakaipaspasanguanda?
Ania dagiti panggep a tun-oyen [goal] ti pamiliada wenno ti indibidual? Kas pagarigan, kayatda kadi ti agbalin a nasaysayaat iti panangangay iti family home evening, wenno agbalin nga ad-adda nga agpannuray iti bagi [self-reliant]?
Kasano a makatulongtayo kadakuada kadagiti panggep a tun-oen [goal] ken karitda?
Ania dagiti ordinansa iti ebanghelio a sumangbay iti biagda? Kasano a makatulongtayo kadakuada nga agsagana?

Laglagipenyo ti mangidiaya iti masinunuo a tulong, kas iti, Ania a sardam a mabalin nga itugotandaka iti pangmalen a taraon iti daytoy a lawas? Ti pangidiaya a kas iti, “Ammuenmi no adda maaramidmi,” ket saan unay a makatulong.

Pannakiuman iti Kompaniontayo

Gapu ta mabalin a saankayo nga agkadua a kanayon no makapulapolyo ti indibidual wenno pamilia, napateg nga agtinnulong ken aginnumankayo no agkiddawkayo iti inspirasion kas agkompanion. Dagitoy ti sumagmamano a saludsod nga ibilang:

Kasano ken kasano ti kasansan nga agsaritakayto kas agkompanion?
Kasano a mausar ti tunggal maysa kadakayo dagiti pagpigsaanyo nga agminister kadagiti kasapulan ti pamilia wenno indibidual?
Ania dagiti banag a nasursurom, ania dagiti padas a napasaram, ken ania dagiti parikna [promtings] a naawatmo manipud iti naudi nga insaritam maipapan iti indibidual wenno pamilia?

Pannakiuman kadagiti Dadduma a Nadutokan iti Aramid

Mabalin a nasayaat a masansan a makasarita dagiti dadduma a nadutokan nga agminister iti isu met laeng nga indibidual wenno pamilia a naidutok kadakayo.

Makisarita tapno Mangrisut kadagiti Karit

Inaramat ni Elder Chi Hong (Sam) Wong ti Pitupulo ti maysa a pakasaritaan manipud iti Marcos 2 iti panawentayo a mangipakita no kasano a ti panaggiinnuman a sangkamaysa ket mangaramid a posible a mapattapata ti uppat a tao no kasano a makapan ti maysa a lalaki a di makagunay iti imatang ni Jesus.

“Mabalin a mapasamak a kas iti daytoy,” kinuna ni Elder Wong. “Uppat a tao ti mangipatpatungpal iti naidutok nga aramiden manipud iti bishopda tapno sumarungkar, iti pagtaenganna, lalaki nga addaan iti sakit a saan a makagunay. … Iti kallabes unay a ward council, kalpasan ti panaggiinnuman a sangkamaysa maipapan kadagiti kasapulan iti ward, nangted ti bishop kadagiti naidutok nga aramiden a ‘panangispal.’ Nadutokan dagitoy nga uppat a tumulong iti daytoy a lalaki. …

“[Idi nakadanonda iti pasdek a yan ni Jesus,] napno ti siled iti adu a tattao. Saanda a makastrek iti ridaw. Siguradoak a pinadasda ti amin a banag a mapanunotda, ngem saanda latta a nakastrek. … Naggiinnumanda a sangkamaysa maipapan iti sumaruno nga aramidenda—no kasano a mayegda ti lalaki ken ni Jesucristo tapno maagasan. … Napagnunumuanda ti maysa a plano—saan a nalaka, ngem inaramidda daytoy.

“… ‘Inikkatda ti atep a batog ti masakit a lalaki: ket idi maikkatda daytoy, imbabada ti katre iti yan ti nakaidda a masakit a tao a di makagunay’ (Marcos 2:4). …

“… ‘Idi makita ni Jesus ti pammatida, kinunana iti masakit a di makagunay, Anak, napakawankan kadagiti basbasolmo’ (Marcos 2:5).”²

Awis nga Agtignay

Inggutugot ni Elder Dieter F. Uchtdorf ti Korum dagiti Sangapulo-ket-dua nga Apostol, “Aggiinnumankayo, usarenyo ti amin a resources a sidadaan a mangun-od, ikarigatanyo a gun-oden ti inspirasion ti Espiritu Santo, agdawatkayo iti Apo iti pammatalged, ket kalpasanna ileslesyo ti manggas ti badoyo ket agbannogkayo.

“Ikarik kadakayo: ia no surotenyo daytoy a pagtuladan, umawatkayonto iti masinunuo a pannarabay no maipanggep iti no asino, no ania, no kaano, ken no sadino ti pangipaayan iti tulong iti wagas ti Apo.”³

© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, September 2018. Ilokano. 15052 864