Laajrak in Tōmak ko
Michael Isaac
Bydgoszcz, Poland
Michael eaar ba, “nan̄inmej emaron̄ kōm̧m̧an elōn̄ men ko rem̧m̧an,” eo eaar wōr an nan̄inmej in kidney. Eaar ba, Kōn an ļapļo̧k an nan̄inmej an kam̧m̧oolol kōn gospel eo eaar ļapļo̧k, “ej juon mālijjon̄ em̧m̧an.”
Lesley Nilsson, Ripija
Iaar lo̧tak ilo Ethiopia ilo 1942 eo im kar etal n̄an Poland n̄an jikuuļ ilo 1965. Ilo 1991, iaar ioon mijenede ro im kar kobatok ilo Kabun̄ in. Iaar jerbal āinwōt juon branch būreejtōn jilu im jimettan iiō ko. Iaar jerbal āinwōt juon rikakpilōklōk ilo mijen būreejtōnji eo ium̧win 12 iiō. Iaar bar juon alen branch būreejtōn innām juon district būreejtōn. Innām iaar jino nan̄inmej kōn jorrāān in kidney.
Kiiō imaron̄ kōm̧m̧an jejjo̧ men ilo Kabun̄ in. Ij kajjieon̄ etal ilo Jabōt ko.
Ilo jinoin iaar illu.
“Etke n̄a?” Iaar jar. “Iaar jerbal n̄an eok, Irooj.” Ālkin jidik iien, iaar meļeļe. Jeje ko rekwojarjar rej ba, “E eo ewōr an tōmak ilo n̄a n̄an kōmour e, im ej jab m̧ōj kar jitōn̄e n̄an mej” (K&B 42:48).
Eoon in ej ba bwe jenaaj mour eļan̄n̄e kar jab bwe jen itakin mej.
Ro uwaan Kabun̄ in rej jar wōt kōn n̄a, ak nan̄inmej eo aō ej nanaļo̧k. Rej ļōmņak jar ko aer rejjab uwaak, ak rej uwaak kōnke rej erom̧ armej ro rem̧m̧anļo̧k im kōnke ij en̄jake iakwe eo rej kwaļo̧k n̄an eō.
Men̄e ikar ājmour, ewi jon̄an an bwe iien n̄an rūtto e aō? Ijoke, ej wōr wōt iien rem̧m̧an repād im̧aaō.
Em̧m̧an ippa riiti jeje ko rekwojarjar im pukot ro rebun̄bun̄ ko me rej jipan̄ n̄a. Ke iaar ājmour im jerbal, iaar kōņaan ļoor Nipai, ak kiiō elōn̄ iien ij ļōmņak kōn Job. Eaar juon em̧m̧aan em̧m̧an, im eaar bar en̄taan. Iien otemjej ewōr kōjatdikdik ilo gospel eo.
Ilo juon jikin kweilo̧k āinwōt Bydgoszcz, eļan̄n̄e ikōņaan loļo̧k mayor eo, ejjamin naaj kar wōr aō iien kōnke ijjab aorōk. Bōtaab kōn gospel eo, kōjām eo ej aolep iien peļļo̧k n̄an kūr ioon Anij. En̄in unin an em̧m̧an kabun̄ in ippa.
Elōn̄ aō Kabun̄. Ewōr juon aō wāween kōnono ippān Anij kōn jar, kōn jitlo̧k, kōn aolep men ko otemjeļo̧k jej kōm̧m̧ani. Bar ta ij aikuji?
Jet iien ij ba ippa make, “Bōlen unin aō nan̄inmej—bwe in maron̄ meļeļe ta em̧m̧an eo ipād ie, menin ej juon jerbal em̧m̧an.”
Ij lo kōrā eo ippa, Renata, ej jino būrom̧ōj kōnke inan̄inmej. Ikar jab kōņaan bwe en kar waļo̧k, ak būrom̧ōj ej kwaļo̧k iakwe. Eļan̄n̄e liin ekar jab iakwe, liin eban kar būrom̧ōj. Iakwe ej jipan̄ eok en̄jake bwe kwojjab make iaam̧ im bwe ewōr armej ro rej kea.
Mej ejjeļo̧k tokjeņ. Aolep renaaj mej. Ej pedped ioon ekōjkan ad ļōmņak kōn mej. Ijeļā bwe Anij emour. Ej iakwe kōj aolep—bar n̄a. En̄in ej ta eo imaron̄ ba.
Nan̄inmej eo an Michael eaar pen n̄an kōrā eo ippān, Renata. Eaar ba, “Ij lo kōrā eo ippa ej jino būrom̧ōj kōnke inan̄inmej.” “Ak būrom̧ōj ej kwaļo̧k iakwe. Iakwe ej jipan̄ eok en̄jake bwe kwojjab make iaam̧ im bwe ewōr armej ro rej kea.”
Kōjekdo̧o̧n aolep men ko rejelet nan̄inmej eo an, Michael ej pukot wōt wāween ko n̄an jerbal im ļōn̄aj ro ipeļaakin.
Michael ej lo kōjatdikdik im tōl ilo jeje ko rekwojarjar. Ke eaar ājmour im jerbal, eaar nōbar Nipai. Eaar ba, “Ak kiiō elōn̄ iien ij ļōmņak kōn Job.” “Eaar juon em̧m̧aan em̧m̧an, im eaar bar en̄taan.”