Iuwe ilo Bajkōl ko Waer

Jān Elder Carl Maurer

Jet iien jej kōņaan jipan̄ ro jet bōtaab jab lukkuun in bwe meļeļe ta eo ej waļo̧k ilo mour ko aer n̄an kōm̧m̧ane juon oktak. N̄e jej kea kake, iakwe im meļeļe kōn juon, im tōl jān jetōb eo, emaron̄ ļapļo̧k ad wājepedik ilo kappukōt im jipan̄ kōn aikuj ko aer kajjojo.

Ta jet iaan wāween ko jemaron̄ jerbal in karejar n̄an armej ro jej kea kake er eļapļo̧k an wājepedik?

Būreejtōn Russell M. Nelson (Kweilo̧k an Ritōl ilo Kweilo̧k eo Eļap, M̧aaj 2018) ej katakin kōj bwe jej jerbal in karejar ilo wāween eo an Rilo̧mo̧or “. . . kōjām ko renaaj peļļo̧k, im armej renaaj jeraam̧m̧an. Bōro ko renaaj mour, im eddo ko nej kōmeraikļo̧k”.

Ij keememej juon en̄jake me juon leddik mijenede eaar kwaļo̧k ilo juon leta eaar je tok n̄an eō. Ekar juon im̧we n̄an eō jān tōre eo.

Sister in eaar jerbal ippān eo m̧ōttan ium̧win emān im jimettan allōn̄ ko. Sister Madsen eaar juon leddik mijenede eo ekijejeto, pokake im itok limoin. Liin eaar jerbal kōn kajoor im lem̧ōņōņō ilo an kaiiūm̧ baajkōļļo̧k n̄an iien katak ko an.

Eo m̧ōttan Sister Madsen eaar jouj, eppejo̧rjor im itok jān juon āne edik ilo Pacific.

M̧okta jān mijen eo an, mour eaar raļo̧k im eļap wōt jab ekajirir. Kōn menin, an erom m̧ōttā ippān Sister Madsen; kōn m̧akūtkūt ko aer ilo jibbon̄ tata, mour in mijenede ko aer repoub im aer bajkōļ ilo juon eria ekilep eaar bōk iien n̄an aer iminene kake.

Juon raan ke rej bajkōļ n̄an juon iien katak, eo m̧ōttan eaar raļo̧kļo̧k jān m̧okta im Sister Madsen eaar jino en̄jake jidik jab kijenmej. Ke eaar jino ļapļo̧k an ebbweer liin eaar jino al ke eaar bajkōļ-kōttar eo m̧ōttan n̄an an tōpar e. “Ij kajjieon̄ āinwōt Jisōs, inaaj ļoor wāween ko An, ij kajjieon̄ n̄an iakwe eo m̧ōtta ilo aolep men ko ij kōm̧m̧ani im ba”.

Ālkin ron̄ elōn̄ļo̧k jekpen ņae ko kōn bajkōļ, Sister Madsen eaar ļōmņak ippān make, liin ejjab kōņaan kōm̧m̧ane jerbal eo ilo wāween eo aō. Ālkin aer ilo̧k enan̄in juon kilomita, eo m̧ōttan eaar āliktata bōjrak im ikkūrļo̧k, “Sister Madsen . . . EJABJAB MENWA!”

Ālkin an Sister Madsen oktakļo̧k im kōn eļap ebbweer in̄ūrn̄ūr, “Ekwe, letok bajkōļ ņe waam̧, im bajkōļ kōn wa e waaō ium̧win jidik iien!” Enan̄in ilo jidimkij liin eaar lukkuun in ettā. Būreek eo itulik eaar ļak n̄an nee eo itulik im eaar jab rōļo̧k. “Ijjab kar maron̄ bajkōļ 100 mita ilo bajkōļ eo waan!”, liin eaar kwaļo̧k, “im iaar kōm̧m̧an bwe itok enan̄in juon dipio in juon kilomita. Ij nōbare bwe liin eaar itok aitokan in āinwōt an kar kōm̧m̧ane”.

Sister Madsen eaar to eaar kejōkļo̧kjeņ, “Ijjan̄in de kar weppān ilo iiō ko 10 rej jem̧ļo̧kļo̧k (jān ke kar ro̧o̧l jān jikin mijen) bōtaab jān iien jab eo iaar kajjieon̄ in kōm̧m̧ane en juon m̧ōttan wōn n̄a n̄an ‘iuwe ilo bajkōļ eo waan bar juon armej’ n̄e ij lale n̄an meļeļe aikuj ko an ro jet”.

Ta eo en̄jake in ej kalikkar n̄an kōj im ekōjkan ad maron̄ jerbal in karejar ilo wāween eo an Rilo̧mo̧or eo?

Kappukōt wāween ko n̄an kōļapļo̧k kea eo ad āinwōt an Kraist n̄an ro jet. Meļeļe in jeļā im meļeļe aikuj ko aer jim̧or ilo jetōb im ilo kanniōk. Ilo ad jar n̄an m̧wil ko an āinwōt an Kraist im kōļapļo̧k tōmak, niknik, kijenmej im kōmmanwa (Alma 32:41–43), eļapļo̧k ad maron̄ jerbal in karejar āinwōt n̄e Rilo̧mo̧or eo enaaj kar.
Jemaron̄ jar kōn im̧we. Kajjieon̄ n̄an meļeļe im lo aikuj ko an ro me kwoj jerbal in karejar n̄an er. Jar kōn wāween ko n̄an kōjeraam̧m̧an ajri ro Nejin n̄an jipan̄ er mour kōn gospel eo im erom eļapļo̧k un̄are-pein make. Im̧we kein remaron̄ jab itok ilo juon wōt iien bōtaab naaj itok ilo ad wōnm̧aanļo̧k n̄an jar, kejōkļo̧kjeņ im ļoor ļōmņak ko im kōļmenļo̧kjeņ ko me rej itok n̄an kōj.
Jemaron̄ kajjitōk, lale im ron̄jake. Kea kake ebwe n̄an kajjitōk kajjitōk ko reim̧we, kajjitōk ekōjkan aer en̄jake im bōjrak n̄an mije, lale im ron̄jake emaron̄ kōtļo̧k bwe jen em̧m̧ōkaj ad tōpar lukkuun in aikuj ko. Jej aikuj in “. . . m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an” (Mosaia 18:9).
M̧akūtkūt n̄an tōpar aikuj ko. Ilo ad jerbal in karejar, jej “kije kōn ekōnono im im̧we emakijkij in im jekjek in tōpar eo [ippād] ippān ro me [jej] kōjparok er” (Jerbal in Karejar, Kajjitōk ko Emakijkij Kajjitōk Kaki).

Ilo ad wōnm̧aanļo̧k wōt ilo kajjieon̄ erom āinwōt ad Rilo̧mo̧o̧r Jisōs Kraist ilo kea kōn doon Enaaj jipan̄ kōj. Ej karuwaineneik kōj n̄an erom āinwōt E ej (Matu 5:48). E ej letok mije ilo kea eo ejjab m̧ujkōk ioon aolep ajri in bujen ro Nejin, emakijkij kōn kōj. Pinm̧uur eo an Jisōs Kraist ej letok kajoor eo jej aikuji n̄an kōjeraam̧m̧an kōj ilo ad pukōtļo̧k n̄an kōjeraam̧m̧an ro jet. Rilo̧mo̧o̧r eo ekōņaan bwe jen jeļā ekōjkan n̄an m̧ool in iakwe doon.

Ij jar bwe jenaaj kōm̧m̧an eļapļo̧k n̄an lukkuun in meļeļe aolep ajri ro nejin Anij, n̄an Iuwe ioon Bajkōļ eo waaer ilo ad jerbal in karejar n̄an tōpark aikuj ko. Ilo ad kōm̧m̧ane menin jenaaj lo ļapļo̧k in tōmak ilo Jemedwōj Ilan̄ im Jisōs Kraist im Pinm̧uur eo An, ijo kajjojo armej im baam̧le ko rej kōkajoorļo̧k kōn kain̄i ko im bujen ko. (K&B 20:47,53; Bok in Bōk Meļeļe 2, 9.1.1.).