Ekkewe Nongonongen Iamwir, October 2018

Sia Angei Aninis ach sipwe Anisi Ekkoch

Ifa ussun ach sipwe apachanong ekkoch nupwen sia mochen aninis non ach angang ne iamwiri ekkoch? Fiti angangen interfiu me mwichen anepung non aewin Raninifen.

Nupwen an Kathy we semwenin unun a efisata an epwene chok nom won wincher, neminewe a kuna pwe a nawmot emon epwe anisi ne totiw seni ewe seia o tota won an we pet. Ewe angang a kon watte seni tufichin emon chok chon ewe Mwichefen. Iwe ewe mwichen ekkewe elter ra awora kapasen aurour ren an neminewe we osukosuk me ra ekieki ar repwe fori ew kokot an epwe wor aninis ngeni iteitan nekunion.¹

Nupwen sia sinei ekkewe osupwang me pochokun ren ekkana sia angang ngenir, meni sipwe kuna pwe sia pwan mochen aninis ne anisi an epwe tour ar kewe mochen. Forian interfiun iamwir me mwichen sou emwen non aewin Raninifen ir ruu sokkun tufichin poporous won ifa ussun napanapochun ach sipwe apachanong ekkoch.

Interfiun Iamwir

Ekkei fansoun interfiu iteiten mwirin unungat maram nefinen ekkewe fin iamwir me ewe presetensi ren Mwichen Fin Anisi ika re iamwir me ewe mwichen presetensi ren ewe mwichen elter ikana chok ekkewe auchean repot sia fori anongonong won ekkewe sia iamwirir. Ewe interfiu ew tufich ren ukkun unungat maram ne (1) porous ussun ekkewe apochokun, me osupwangen, me osukosuken ekkewe famini me aramas ra fin ngenikich; (2) ekieki met mi namot ewe mwichen pristut, Mwichen Fin Anisi, ika mwichen soupungun wart repwe aea ne anisi kewe osukosuk; me (3) kaeo seni ekkewe sou emwen me pesepes non pochokunen iamwiri.

Ewe presetenin ewe mwichen elter me ewe presetenin Mwichen Fin Anisi repwe porous ussun auchean met mi namot ngeni ewe pisop me angei kapasen aurour me emwen seni i.

Ka tongeni kuna chommong porous ussun angangen interfiu me wonministering.lds.org.

Fori Interfiun Iamwiri pwe Epwe Weweoch

Non aninisin an Preseten Russell M. Nelson ewe porous pwe ewe angangen iamwiri epwe nonnopok won minne fetanin ewe Mwichefen epwe amokut won, Elter Gary E. Stevenson seni ewe Mwichen ekkewe Engon me Ruemon Aposel ra aitikich, “Ewe weweoch ren an ewe nemesepwi … epwe anongonong won ifa ukukun murunon osukunen me angangen mwan me fefin ir chon iamwir a wor osukun won me pachenong non ewe interfiu ren iamwiri.” ²

Nimu kapasen aninis ren angangen mwan me fefin ir chon iamwiri:

• Feino ngeni ewe interfiu ren om kutta kapasen aninis. Moneta ngeni ami oupwe kaeo.

• Moneta ngeni ami oupwe porous won ekkewe osupwang mi auchea aninis won an epwe ponueta.

• Nenengenochu an emon me emon pochokun me tongeni, esap chok ar osupwang.

• Awora kapasen aurour ussun met ekkewe ra pwano epwe wewen om ewe angangen iamwiri ekkoch a fokkun fetanoch.

• Churi ewe mwichen presetensi ar repwe awora kapasen aurour nefinen interfiu ren unungat maram ussun mi auchea.

Nimu kapasen aninis ren sou emwen:

• Interfiu ese pwan namot an epwe kon tam, nge ota kotun fansoun an epwe naf fansoun ne chufengen non neni epwe weweoch porous.

• Angei ewe tufich ne iamwiri ngeni ekkewe mwan ika fefin ir chon iamwir.

• Kosap kapas eis ren met epwe ngonuk memefin pwe ka chok aneani ar angangen churi ika chekieno emon (“En mi awesano om angangen iamwir?”). Kopwe kapas eis won met epwe apochokuna om mokutukutun mochen (“Met sokkun mongoungu ka mefi nupwen ka iotek fan iten ewe famini? Met a fis nupwen ka mokutukut won ekei mongungu?”).

• Ennetin rongorong me makei kapasen esinesin.

• Kapasen ourour fengen. Chiechi ne fori angangen iamwiri ra mumuta ngeni pwarata ren ekkana mi finita repwe iamwiri.

Kapas eis me Ponuwan ussun Angangen Interfiun Iamwir

Met interfiun iamwir?

Ew poporous nefinen ekkewe mwan me fefin chon iamwir me emon monun ewe mwichen presetensi ren ewe mwichen elter ika nefinen ekkewe fefin a wor angangen iamwir ngenir me emon monun ewe presetensi ren ewe Mwichen Fin Anisi non ew napanap epwe mut ngenir ar repwe kutta me angei pesepes seni ewe Ngun mi Fel. Ussun met a pwano, mwan me fefin ir chon iamwir ra tongeni amwasanga ne nenengeni, tongei, aiti, me oururu me non napanapen ewe Chon Amanau.

Mi namwot sipwe fori ekkei interfiu iteiten mwirin 3 maram nge epwe non foufoun aramas?

Napengeni ra fori non foufoun aramas, nge ra tongeni fori ren fon ika won internet ika rese tufichin chufengen ne nenefengen. Napengeni, ir me ruemon won ar chiechi repwe pachenong non ewe interfiu nupwen mi tufich.

Met auchean popun ew interfiun iamwir?

Ekkewe interfiun iamwir ra ew tufich ren mwan me fefin ir chon iamwir an epwe wor nenengen sefani nonomur, fori kokotun fansoun mwach, me awora aninis mi namot ngeni ekkewe aramas ika famini ra iamwiri. Ew tufichin porous ussun met aninis ewe mwich me Mwichen Fin Anisi ra tongeni awora.

Ifa ussun ai upwe atawei och mettoch mi monomon ika echichin?

Mwan me fefin ir chon iamwir ra aporousa porous mi monomon ngeni chok ewe mwichen ekkewe elter ika presetenin Mwichen Fin Anisi—ika awenewen ngeni ewe pisop. Porous mi mwonomwon me echichin esap wor porous won non mwichen souemwen non iteitan aewin Raninifen.

Ouwa tongeni katon kacheton pekin kaeo mi pwarano interfiun iamwrir won ministering.lds.org .

Mwichen Anepung non Iteitan Aewin Raninifen

Pwan kapacheta ngeni interfiun iamwir, mwichen anepung non iteitan aewin Raninifen ir pwan ew an sia tongeni kapachenongen ekkoch non angangen iamwir. Non Mwichen Fin Anisi me mwichen ekkewe elter, mwasangasang a tongeni wor ngeni ekkana ra fiti seni ewe Ngun me seni ekkoch non ewe mwicheich.

Ewe popun ew mwichen anepung an epwe:

• “Auroura fengeni ussun wisach non pusin neniach, tufich, me osukosuk;

• “Kaeo seni an emon me emon pusin nenengeni me sinei; me

• “Ota anen mokutukut won memef sia angei seni ewe Ngun.”³

Mwichen anepung mi nap seni chok poporous: ekkewe mwich ra emweni kich ach sipwe mokutukut ussun emon me emon kich ika ew mwich ren emwenien ewe Ngun. Chon fiti ewe mwich ra tongeni mefi ew mochenin awesano an ewe Samon angang fan itan ekkei mwich.

Kokko ngeni Foffor

“Am iotek ikenai,” Jeffrey R. Holland seni ewe Mwichen ekkewe Engon me Ruemon Aposel, a apasa, “pwe meinisin mwan me fefin—me nouch kewe onuon me fopun ra mukono—repwe [ne anapano] memefin netip ami oupwe mochen eteneki fengenikemi, mwasangasang ren ewe nimenimochun tong an Kraist…”⁴

© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon chiakun: 6/17. Chiakun Ministering Principles, October 2018. Chuukese. 15053 901

Esinesin

• Nengeni Porousen Mormon kacheto “Lift,” lds.org/media-library.

• Gary E. Stevenson, non “Ministering Interviews” (kacheto), ministering,lds.org.

• Come, Follow Me—For Melchizedek Priesthood and Relief Society, non Ensign ika Liahona,2017, 140; a pwan wor ren comefollowme.lds.org.

• Jeffrey R. Holland, “Kopwe Nonnom Rer me Apochokunereta,” Ensign ika Liahona, May 2018, 103.

Jises a Apachanong Ekkoch

Jises a amongoni ew mwicheichen aramas ukukun 5,000 seni niffou foun pinewa me ruemon kukkun ik. Anneani John 6:5–14 om kopwe esinna fan fitu ewe Chon Amanau a apachanong ekkoch non ei foforun iamwiri ekkoch.

“Ekkewe Nongonongen Iamwiri” ekkoch popun ar repwe anisikich ne kaeo ach sipwe etenekifengenikich—nge esap ren ach sipwe aporousa ussun ew porous nupwen ach churir. Nupwen sia feino ngeni ach sipwe sinei ekkana sia anisir, ewe Ngun mi Fel epwe pesekich ach sipwe sinei met porous repwe mochen sinei kapach ngeni ach etenekir me umoumoch.

Kapasen ourour ren ekkewe osupwangen ekkoch a nom netipen ekkewe chon interfiun iamwir. Pwan nenengeni ewe Nongonongun Iamwiri ekkoch, “Aurour usun Met mi Auchea Ngenir,” non ewe porous mi katou September 2018.