Mga Prinsipyo sang Ministering, Oktobre 2018

Pagpangita sang Bulig para Mabuligan ang Iban

Paano bala naton ilakip ang iban kon kinahanglan naton sang bulig sa aton pagtinguha nga mag-alagad? Magpasakop sa mga interbyu sa ministering kag sa una-nga-Domingo nga mga miting sang konseho.

Sang nahunong si Kathy sa wheelchair bangod sang multiple sclerosis, natun-an niya nga kinahanglan niya sang bulig kada gab-i sa pagsaylo halin sa iya pulungkuan pakadto sa hiligdaan. Masyado kadako sang buluhaton para sa bisan sin-o nga miyembro. Ginsugilanonan sang elders quorum ang iya sitwasyon kag nagdesisyon nga maghimo sang iskedyul agud mabuligan sia kada gab-i.¹

Kon hibaluon naton ang panginahanglan kag kusog sang aton mga ginaalagaran, masalapuan naton nga kinahanglan naton sang bulig agud masabat ang ila mga panginahanglan. Ang mga interbyu sa ministering kag una-nga-Domingo nga mga miting sang konseho duha ka oportunidad agud hambalan kon paano ilakip ang iban sing nagakaigo.

Interbyu sa Ministering

Ining mga interbyu kada tatlo ka bulan sa tunga sang ministering sisters kag sang panguluhan sang Relief Society ukon ministering brothers kag sang panguluhan sang elders quorum amo lang ang pormal nga report nga ginahimo naton nahanungod sang aton mga ginaalagaran. Ang interbyu isa ka oportunidad agud kis-a kada tatlo ka bulan (1) sugilanonan ang mga kusog, panginahanglan, kag mga kabudlayan sang gintoka nga mga pamilya kag indibidwal; (2) hibaluon kon ano nga panginahanglan ang mahimo bululigan sang korum, Relief Society, ukon konseho sang ward; kag (3) magtuon halin sa mga lider kag mapapagsik sa mga pagpaninguha sa ministering.

Ang pangulo sang elders quorum kag pangulo sang Relief Society magapaalinton sang importante nga mga panginahanglan direkta sa bishop kag magabaton sang laygay kag direksyon halin sa iya.

Makita ninyo ang dugang nga impormasyon parte sa mga interbyu sa ministering sa ministering.lds.org.

Paghimo sang mga Interbyu sa Ministering nga Makahuluganon

Bilang suporta sa pahayag ni Pangulong Russell M. Nelson nga ang programa sa ministering mangin bisagra kon sa diin magahabyog ang Simbahan, si Elder Gary E. Stevenson sang Korum sang Dose ka Apostoles nagtudlo, “Ang katumanan sang iya palanan-awon … mahimo nga mabase sa kon ano kaayo ginatudloan ang mga ministering brother kag sister kag nagapasakop sa interbyu sa ministering.”²

Lima ka bulig para sa mga ministering brother kag sister:

Magkadto sa interbyu nga nagapangayo sang laygay. Magmangin handa sa pagtuon.
Magmangin handa nga hambalan ang mga panginahanglan nga kinahanglan mabuligan ka sa pagsabat.
Tutuki ang indibidwal nga mga ikasarang kag abilidad, indi lang mga panginahanglan.
Sugilanoni ang mga resulta nga mangin tanda nga nangin madinalag-on ang imo pag-alagad.
Tawgi ang panguluhan agud magsugilanon sa tunga-tunga sang kada tatlo-ka-bulan nga interbyu kon kinahanglan.

Lima ka bulig para sa mga lider:

Indi kinahanglan maglawig ang mga interbyu, pero magtalana sang nagakaigo nga tiyempo agud makahambalanay sa isa ka lugar kon sa diin mangin makahulugan ang pag-istoryahanay.
Kuhaa ang oportunidad agud alagaran ang ministering brother ukon sister.
Indi magpamangkot sang mga pamangkot nga nagahatag sang impresyon nga ginaisip mo lang ang mga pagbisita ukon gina-tsekan ang isa ka kontak (“Nahimo mo bala ang imo ministering?”). Magpamangkot sang mga pamangkot nga nagapabakod sang ginatinguhaan nga mga pangginawi (“Ano nga pagpabatyag ang imo nabaton samtang ginapangamuyoan mo ang pamilya? Ano ang natabo sang imo gin-aktuhan ang ina nga mga pagpabatyag?”).
Sinsero nga magpamati kag pat-ini ang mga importante.
Makigsugilanon sing magkaupod. Ang mga magkaupod sa ministering may kinamatarong nga magbaton sang rebelasyon para sa natoka sa ila nga alagaran.

Mga Pamangkutanon kag mga Sabat parte sa mga Interbyu sa Ministering

Ano ang interbyu sa ministering?

Isa ini ka diskusyon sa tunga sang mga ministering brother kag sang miyembro sang panguluhan sang elders quorum ukon sa tunga sang mga ministering sister kag sang miyembro sang panguluhan sang Relief Society sa isa ka lugar nga nagatugot sa ila nga magpangayo kag magbaton sang inspirasyon gikan sa Balaan nga Espiritu. Bilang resulta, ang mga ministering brother kag sister sarang mapadasig sa pagbantay, pagpalangga, pagtudlo, kag pagpaumpaw sa pamaagi sang Manluluwas.

Kinahanglan bala nga hiwaton ining mga interbyu kada tatlo ka bulan sing personal?

Sa masami ginahiwat ini sing personal, pero mahimo man ini hiwaton paagi sa tawag ukon online kon indi posible ang personal nga pagkilit-anay. Sa masami, ang magkaupod nagapasakop sa interbyu kon nagakabagay.

Ano ang katuyuan sang interbyu sa ministering?

Ang mga interbyu sa ministering mga oportunidad para sa mga kauturan sa ministering sa pagrebyu sang mga sitwasyon sa karon, maghimo sang mga plano para sa palaabuton, kag magbaton sang kinahanglanon nga bulig agud mabuligan ang mga indibidwal ukon pamilya nga ila ginaalagaran. Isa ini ka tsansa agud hambalan kon ano nga palasandigan ang matigana sang korum kag Relief Society.

Paano ko atubangon ang personal ukon sensitibo nga mga isyu?

Ang mga ministering brother kag sister magapaambit sang personal nga impormasyon sa pangulo lamang sang elders quorum ukon Relief Society—ukon direkta sa bishop. Ang personal ukon sensitibo nga impormasyon indi dapat ipaambit sa una-nga-Domingo nga mga miting sang konseho.

Una-nga-Domingo nga mga Miting sang Konseho

Dugang pa sa mga interbyu sa ministering, ang una-nga-Domingo nga mga miting sang konseho isa pa ka paagi agud ilakip ang iban sa ministering. Sa mga miting sang Relief Society kag elders quorum, ang inspirasyon mahimo nga mag-abot sa mga nagtalambong paagi sa Espiritu kag gikan sa iban sa grupo.

Ang katuyuan sang miting sang konseho amo ang:

“Makigsugilanon parte sa lokal nga mga responsibilidad, oportunidad, kag mga hangkat;
“Magtuon halin sa panghunahuna kag mga eksperiyensya sang kada isa; kag
“Magplano sang mga paagi agud aktuhan ang mga pagpabatyag nga nabaton halin sa Espiritu.”³

Ang mga miting sang konseho indi lamang mga paghinambalanay: ang mga miting nagatulod sa aton nga mag-akto bilang mga indibidwal ukon bilang grupo suno sa pagpadasig sang Espiritu. Ang mga miyembro mahimo nga makabatyag sang kaluyag nga tumanon ang buluhaton sang Ginuo bilang resulta sining mga miting.

Pangagda sa Pag-akto

“Ang amon pangamuyo sa karon,” siling ni Elder Jeffrey R. Holland sang Korum sang Dose ka Apostoles, “amo nga ang tagsa ka lalaki kag babayi—kag ang aton mas hamtong nga young men kag young women—mag [mangin] mas komitido sa sinsero nga pagtatap sang kada isa, nga ginapadasig lamang sang puro nga gugma ni Cristo nga himuon ini.”⁴

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Pagtugot sa Ingles: 6/17. Petsa sang pagtugot sa paglubad: 6/17. Paglubad sang Ministering Principles, October 2018. Hiligaynon. 15053 861