Panangala iti Tulong a Pangtulong kadagiti Dadduma

Kasano ti panangiramantayo kadagiti dadduma no kasapulantayo ti tulong kadagiti panagkagumaantayo nga agminister? Makiraman kadagiti interbyu iti ministering ken kadagiti miting iti council iti umuna a Domingo.

Idi inaramid ti multiple sclerosis ni Kathy tapno saan a makapagna ket agkasapulan iti wheelchair, natakuatanna a kasapulanna ti tulong iti tunggal rabii no umakar iti wheelchairna a mapan iti pagiddaanna. Agkasapulan iti inaldaw a tulong ti dua a tao a mangbagkat kenkuana. Isu a naggiinnuman ti elders quorum maipapan iti kasasaadna ket inkeddengda ti agaramid iti iskediul a makatulong kenkuana iti tunggal rabii.¹

Iti pannakaammotayo kadagiti kasapulan ken pagpigsaan dagiti pagserbiantayo, mabalin a maammuantayo a kasapulantayo ti tulong a makatulong a mangipaay kadagiti kasapulanda. Dagiti interbyu iti ministering ken dagiti miting iti council iti umuna a Domingo ket dua a gundaway a mapaglilinnawagan no kasano a ti maitutop a panangiraman kadagiti dadduma.

Dagiti Interbyu iti ministering

Dagiti interbyu iti tunggal tallo a bulan iti nagbaetan dagiti ministering sisters ken ti panguluen ti Relief Society wenno dagiti ministering brothers ken ti panguluen ti elders quorum ket ti kakaisuna a pormal a report nga aramidentayo maipanggep kadagiti tao a pagserbiantayo. Ti interbyu ket maysa a gundaway iti uray maminsan laeng iti tunggal tallo a bulan a(1) makiuman maipapan kadagiti pagpigsaan, kasapulan, ken karit dagiti naidutok a pamilia ken indibidual; (2) maikeddeng no ania dagiti kasapulan a mabalin a pakatulongan ti korum, Relief Society, wenno ward council; ken (3) masursuruan manipud kadagiti lider ken maparegta kadagiti panagkagumaan iti ministering.

Ti presidente ti elders quorum ken ti presidente ti Relief Society ti direkta a mangipakaammo kadagiti napapateg a kasapulan iti bishop ket umawatdanto iti balakad ken pangiturong manipud kenkuana.

Masarakanyo ti ad-adu pay nga impormasion maipapan kadagiti interbyu iti ministering iti ministering.lds.org.

Panangaramid a Napapateg dagiti Interbyu iti Ministering

Iti panangsuporta iti palawag ni Presidente Russell M. Nelson a ti programa iti ministering ket agbalinto a pangikeddeng a paktora a mangapekto iti masakbayan ti Simbaan, insuro ni Elder Gary E. Stevenson ti Korum dagiti Sangapulo-ket-dua nga Apostol, “Ti pannakaipatungpal ti panniriganna … ket mabalin a maibatay iti no kasano ti nalaing a pannakaisuro ken pannakiraman dagiti ministering brothers ken sisters iti interbyu iti ministering.”²

Lima a tip para kadagiti ministering brothers ken sisters:

Mapanka iti interbyu nga agkiddaw iti balakad. Agsaganaka a masursuruan.
Agsaganaka a mangilawlawag kadagiti kasapulan a mabalin a maidawat kenka a mangiraman iti dadduma pay a tao.
Agpokuska kadagiti pagpigsaan ken kabaelan ti indibidual, saan laeng a dagiti kasapulan.
Makiuman maipapan kadagiti pagbanagan a kayatna a sawen a nagballigika iti ministeringmo.
Kontakem ti panguluen tapno makiuman maipapan kadagiti interbyu iti tunggal tallo a bulan no kasapulan.

Lima a tip para kadagiti lider:

Saan a nasken nga atiddog dagiti interbyu, ngem mangiskediul iti umdas a panawen a sumarungkar iti maysa a lugar a mangpalugod iti napateg a panagsarita.
Alaen ti gundaway nga agminister iti ministering brother wenno sister.
Saanka nga agdamag kadagiti saludsod a mangted iti impresion a bilbilangem laeng dagiti nabisita wenno mangtse-tsek iti maysa a kontak (“Naaramidmo kadi ti ministeringmo?”). Agdamag kadagiti saludsod a mangpatibker kadagiti tinarigagayan a galad (“Ania a parikna [promting] ti nariknam idi inkararagam ti pamilia? Ania ti napasamak idi nagtignayka kadagita a parikna [prompting]?”).
Sipupudno a dumngeg ken agsuratka.
Agginnumakayo. Maikari iti paltiing dagiti agkompanion iti ministering para kadagiti nakaidutokanda a pagserbian.

Dagiti Saludsod ken Sungbat maipapan kadagiti Interbyu iti Ministering

Ania ti interbyu iti ministering?

Maysa daytoy a panaglilinnawag iti nagbaetan dagiti ministering brothers ken maysa a miembro ti panguluen ti elders quorum wenno nagbaetan dagiti ministering sisters ken maysa a miembro ti panguluen ti Relief Society iti maysa a lugar a mangpalugod kadakuada nga agdawat ken umawat iti inspirasion manipud iti Espiritu Santo. Kas resulta, mabalin a maparegta dagiti ministering brothers ken sisters a mangkitkita, mangipateg, mangisuro, ken mangliwliwa iti wagas ti Mangisalakan.

Nasken kadi a personal dagitoy nga interbyu iti tunggal tallo a bulan?

Gagangay a maiturong dagitoy a personal, ngem mabalin a maangay dagitoy babaen iti telepono wenno iti online no saan a praktikal ti pannakipagkita iti sangun-sango. Gagangay, a makiraman dagiti agkompanion iti interbyu no maitutop.

Ania ti panggep ti maysa nga interbyu iti ministering?

Dagiti interbyu iti ministering ket maysa a gundaway para kadagiti ministering brothers ken sisters tapno mangamiris kadagiti agdama a kasasaad, agplano iti masakbayan, ket mangala iti kasapulan a tulong kadagiti indibidual wenno pamilia a pagserbianda. Daytoy ti maysa a gundaway a pagsaritaan maipapan no ania dagiti resources a maipaay ti korum ken Relief Society.

Kasano ti panangtratok kadagiti kumpidensial wenno sensitibo nga isyu?

Ibinglay dagiti ministering brothers ken sisters ti kumpidesial nga impormasion laeng iti presidente ti elders quorum wenno Relief Society—wenno direkta iti bishop. Nasken a saan nga ibinglay dagiti kumpidensial wenno sensitibo nga impormasion kadagiti miting iti council iti umuna a Domingo.

Dagiti Miting iti Council iti Umuna a Domingo

Mainayon kadagiti interbyu iti ministering, dagiti miting iti council iti umuna a Domingo ket sabali pay a wagas a pangiraman kadagiti dadduma iti ministering. Kadagiti miting iti Relief Society ken elders quorum, mabalin nga umay ti inspirasion kadagiti dumar-ay babaen iti Espiritu ken manipud kadagiti dadduma iti grupo.

Ti panggep ti miting iti council ket tapno:

Aggiinnuman a sangkamaysa maipapan kadagiti lokal a pangrebbengan, gundaway, ken karit;
“Masursuruan manipud kadagiti nauneg a pannakaammo ken padas ti tunggal maysa; ken
“Agplano kadagiti wagas a pakapagtignayan kadagiti impresion a naawat manipud iti Espiritu.”³

Ad-adda pay ngem iti paglilinnawagan dagiti miting iti council: iturongdatayo dagiti miting nga agtignay kas indibidual wenno kas grupo no paregtaen ti Espiritu. Marikna dagiti miembro ti tarigagay a mangipatungpal iti aramid ti Apo kas bunga dagitoy a miting.

Awis nga Agtignay

“Ti kararagtayo ita,” kinuna ni Elder Jeffrey R. Holland ti Korum dagiti Sangapulo-ket-dua nga Apostol, “ket tunggal lalaki ken babai—ken dagiti in-inauna nga agtutubo a lallaki ken agtutubo a babbai—ket ad-addanto a managkumitda iti naimpusuan a panangaywan iti tunggal maysa, a pinaregta laeng ti natarnaw nga ayat ni Cristo a mangaramid iti kasta.”⁴

© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, October 2018. Ilokano. 15053 864