Ang mga Kausaban Makatabang sa Pagbalanse sa Instruksyon sa Ebanghelyo diha sa Panimalay ug sa Simbahan

Isip kabahin sa nagpadayon nga mga paningkamot sa pagtabang sa mga Santos sa Ulahing mga Adlaw nga “makakat-on sa doktrina, molig-on sa pagtuo, ug mopasiugda og mas mahinungdanong personal nga pagsimba”, si Presidente Russell M. Nelson mipahibalo og mga kausaban aron sa pagtabang sa pagbalanse ug pagkonektar sa talagsaon ug mahinungdanong mga paagi nga ang mga miyembro mosimba ug magkat-on ug mosunod sa ebanghelyo sa Manluluwas diha sa simbahan ug sa panimalay.

Ang mga lider sa Simbahan mipahibalo og mga kausaban sa iskedyul sa miting sa Dominggo, sugod sa Enero 2019, kalabut sa pagpagawas og bag-ong kurikulum nga nakasentro sa panimalay, gisuportahan sa Simbahan. Kini nga mga kausaban ug uban pa gibase sa pipila ka nag-una nga mga inisyatibo nga gipasiugdahan sa Simbahan sa bag-o lang nga mga katuigan, gituyo sa pagtabang sa mga miyembro nga mas hingpit nga itutok ang ilang kinabuhi sa Langitnong Amahan ug ni Jesukristo ug mapalawuman ang pagtuo diha Kanila. Kini nga mga inisyatibo naglakip sa pagtutok diha sa mas makahuluganong pagtuon sa ebanghelyo sa panimalay, sa pagtahud sa Ginoo pinaagi sa pagbalaan sa adlaw nga Igpapahulay, ug sa pag-amuma sa usag usa sama sa buhaton sa Manluluwas ug sumala sa paggiya sa Espiritu.

Gituyo sa pag-andam sa katawhan sa Ginoo alang sa Iyang pagbalik, kini nga mga kausaban gitumong sa pagpalig-on sa indibidwal nga pagkakabig, mipasabut si Elder Quentin L. Cook sa Korum sa Napulog Duha ka mga Apostoles, samtang iyang gilatid ang mga kausaban atol sa sesyon sa Sabado sa buntag sa kinatibuk-ang komperensya.

“Nasayud kita sa espiritwal nga epekto ug sa lig-on ug malungtarong pagkakabig nga makab-ot diha sa kahimtang sa panimalay … ,” miingon siya. “Ang atong katuyoan mao ang pagbalanse sa mga kasinatian diha sa Simbahan ug sa panimalay sa paagi nga makapalambo gayud sa pagtuo ug espiritwalidad ug makapalig-on sa pagkakabig ngadto sa Langitnong Amahan ug kang Ginoong Jesukristo.”

Mga Kausaban diha sa Panimalay

Ang mga lider sa Simbahan nagdapit og mas dakong pagtutok diha sa dugang nga pag-apil sa personal ug tibuok pamilya nga rehiliyusong buluhaton sa panimalay, apil ang pagtuon sa ebanghelyo diha sa panimalay sa Dominggo ug sa tibuok semana ug mga kausaban sa home evening.

Isip dapit sa pagtudlo ug pagbansay, ang panimalay maoy usa ka mahinungdanong sentro sa pagkat-on ug pagsunod sa ebanghelyo. Ang indibidwal ug tibuok pamilya nga pagtuon sa ebanghelyo diha sa panimalay sa Dominggo ug sa tibuok semana makahatag og mga oportunidad sa pagkakaplag og espirituhanong kalig-on sa matag adlaw ug nagtugot og mas dakong kapailin-ilinan alang sa personal nga pagtuon ug pagpadayag. Ang pagsalig lamang sa limitado nga panahon sa simbahan alang sa pagtudlo sa ebanghelyo makamugna og pagkadili balanse nga dili makakab-ot og lig-on ug malungtarong pagkakabig nga gikinahanglan.

“Matag usa kanato responsable alang sa atong indibidwal nga espiritwal nga paglambo,” miingon si Presidente Nelson. “Ug ang mga kasulatan mipasabut nga ang mga ginikanan ang adunay nag-unang responsibilidad sa pagtudlo sa doktrina ngadto sa ilang mga anak.”

Ang mga kausaban naglakip sa pagpaila og bag-ong kapanguhaan sa pagtuon sa ebanghelyo alang sa mga indibidwal ug mga pamilya diha sa panimalay. Ang mga indibidwal ug mga pamilya mahimong mogamit sa bag-ong Dali, Sunod Kanako—Alang sa mga Indibidwal ug mga Pamilya, kon gusto nila, aron mogiya sa ilang kasinatian sa pagtuon sa ebanghelyo gawas sa simbahan. Ang bag-ong kapanguhaan motabang sa kauban nga mga kapanguhaan alang sa mga magtutudlo sa Sunday School ug Primary nga mapahiangay ang mga leksyon sa Dominggo ngadto sa pagtuon sa kasulatan sa panimalay ug sa mga sugyot alang sa home evening.

Agig dugang sa pag-awhag sa pagtuon sa ebanghelyo, ang mga lider sa Simbahan mibag-o sa ilang pagdapit sa tanan nga moapil sa adlaw nga Igpapahulay—ug sa tibuok semana—sa mga konseho sa pamilya, home evening, buhat sa templo ug family history, pagpangalagad, personal nga pagsimba, ug malipayong panahon sa pamilya.

Ang mga materyal nga gipadala ngadto sa mga miyembro ug mga lider nagpasabut nga ang mga lider sa Simbahan nag-awhag sa mga miyembro sa pagpahigayon og home evening ug pagtuon sa ebanghelyo sa adlaw nga Igpapahulay—o sa ubang mga panahon sumala sa pagpili sa mga indibidwal ug sa mga pamilya. Ang gabii sa kalihokan sa pamilya mahimong mapahigayon sa Lunes o sa laing higayon. Alang niini nga rason, ang mga lider kinahanglang magpadayon sa pagpabilin sa mga gabii sa Lunes nga walay mga miting ug mga kalihokan sa Simbahan. Hinoon, ang panahon nga igahin sa pagtuon sa ebanghelyo sa panimalay ug mga kalihokan alang sa mga pamilya ug mga indibidwal mahimong maiskedyul sumala sa tagsa-tagsa ka mga kahimtang.

Ang pagsimba sa Dios diha sa simbahan, pag-apil sa sagradong mga ordinansa didto, ug ang pagpundok aron sa pagtudlo sa usag usa ug sa paglig-on ug pagserbisyo sa usag usa mahinungdanon nga mga elemento sa pagpalig-on sa pagtuo ug personal nga pagkakabig. Ang pagpaminos sa panahon nga igahin diha sa simbahan mahimong dili maayo gawas kon ang mga indibidwal ug mga pamilya tuyo nga mopalig-on sa ilang mga panimalay.

Si Presidente Nelson mitudlo: “Isip mga Santos sa Ulahing mga Adlaw, naandan na nato nga maghunahuna sa “simba” isip usa ka butang nga mahitabo sa atong mga meetinghouse, nga gisuportahan sa unsa ang gipangbuhat sa panimalay. Kinahanglan kita og kausaban niini nga sundanan. Panahon na alang sa nakasentro sa panimalay nga Simbahan, gisuportahan sa unsa ang gipangbuhat sulod sa atong branch, ward, ug stake nga mga gambalay [building].”

Mga Kausaban diha sa Simbahan

Ang mga kausaban sa kasinatian diha sa Simbahan gituyo aron sa pagsuporta sa dugang nga pagkat-on ug pagsunod sa ebanghelyo diha sa panimalay. Kini nga mga kausaban naglakip sa pag-usab sa sinemana nga iskedyul sa Dominggo nga maglakip sa:

• 60 minutos nga miting sa sakrament,

• 10 minutos nga panahon sa pagbalhin [transition],

• Ug 50 minutos nga panahon sa klase, sumala sa gilatid sa sampol nga iskedyul sa ubos:

Iskedyul sa Dominggo sugod sa Enero 2019
60 minutos	Sakrament miting
10 minutos	Pagbalhin ngadto sa mga klase
50 minutos	Mga klase sa mga hamtong; mga klase alang sa kabatan-onan; Primary

Ang 50 minutos nga panahon sa klase maglakip sa sinemana nga Primary alang sa mga bata ug magpuli-puli matag semana alang sa kabatan-onan ug mga hamtong sama sa mosunod:

• Una ug ikatulong Dominggo: Sunday School.

• Ikaduha ug ikaupat nga Dominggo: mga korum sa priesthood, Relief Society, ug Young Women.

• Ikalimang Dominggo: mga miting sa kabatan-onan ug mga hamtong ubos sa direksyon sa bishop.

Kon igo ang gidak-on sa Primary aron mabulag ngadto sa junior ug senior Primary, ang mga lider kinahanglang mobali sa mosunod nga iskedyul alang sa katunga sa mga bata ug ipahiangay ang oras kon gikinahanglan.

Iskedyul sa Primary sugod sa Enero 2019
25 minutos	Pag-ampo, kasulatan o artikulo sa hugot nga pagtuo, pakigpulong (5 minutos). Panahon sa pagpanganta: Musika nga nagsuporta sa mga kasulatan nga gitun-an sa klase (20 minutos)
5 ka minutos	Pagbalhin ngadto sa mga klase
20 minutos	Mga klase: leksyon gikan sa Dali, Sunod Kanako—Alang sa Primary

Mga Kausaban sa Kurikulum

Kini nga kausaban sa iskedyul sa mga miting motabang sa labing bag-o nga nadugang sa Dali, Sunod Kanako nga kurikulum. Sugod sa Enero, kining nakasentro sa panimalay, gisuportahan sa Simbahan nga kurikulum mohiusa sa unsay nakat-unan sa mga hamtong, kabatan-onan, ug mga bata diha sa mga klase sa Sunday School ug Primary, nga makapasayon sa mga pamilya nga magdungan sa pagtuon diha sa panimalay panahon sa semana.

Ang mga instruksyon, mga outline sa leksyon, ug mga kapanguhaan makita diha sa:

• Dali, Sunod Kanako—Alang sa Elders Quorum ug Relief Society (makita diha sa Nobyembre 2018 nga Ensign ug Liahona)

• Dali, Sunod Kanako—Alang sa mga Korum sa Aaronic Priesthood

• Dali, Sunod Kanako—Alang sa Young Women

• Dali, Sunod Kanako—Alang sa Sunday School

• Dali, Sunod Kanako—Alang sa Primary

Bisitaha ang comefollowme.lds.org alang sa dugang nga impormasyon.

Ang ubang importanting mga kausaban naglakip sa mosunod:

• Ang mga miting sa teacher council ipahigayon matag tulo ka bulan [quarterly] imbes nga binulan.

• Ang mga iskedyul sa leksyon sa elders quorum ug Relief Society dili na maglakip og usa ka miting sa konseho sa unang Dominggo o usa ka espesyal nga hilisgutan sa ikaupat nga Dominggo. Ang mga leksyon motutok sa bag-o nga mga mensahe sa kinatibuk-ang komperensya.

• Ang panahon sa pagpanganta mopuli sa panahon sa pagpakigbahin. Ang Outline alang sa Panahon sa Pagpakigbahin hunungon.

• Ang kurso nga Mga Baruganan sa Ebanghelyo hunongon. Ang tanang mga miyembro ug interesado nga mga higala dapiton sa pagtambong sa ilang tagsa-tagsa ka klase sa Sunday School sa hamtong o kabatan-onan.

• Ang opsyonal nga mga kurso—sama niadtong alang sa paglig-on sa kaminyoon ug pamilya, pagpangandam alang sa templo, pagpangandam sa misyonaryo, ug family history—dili ipahigayon sa panahon sa klase sa Dominggo. Kini nga mga kurso mahimong itudlo sa ubang panahon alang sa mga indibidwal, mga pamilya, o mga grupo base sa lokal nga mga panginahanglan ug sumala sa pagbuot sa bishop.

Mga Katuyoan Niini nga mga Kausaban

Ang mga lider sa Simbahan nagtinguha nga makamugna og bag-ong balanse ug mas dakong koneksyon tali sa talagsaong mga kalig-on sa mga kasinatian sa panimalay ug sa Simbahan nga adunay gihunahuna nga piho nga mga katuyoan.

“Dunay mas labaw pa niining kausaban kay sa pagpamubo lang sa iskedyul sa meetinghouse sa Dominggo … ,” miingon si Elder Cook. “Ang mga katuyoan ug mga panalangin nga may kalabutan niining kausaban ug uban pang bag-ong mga kausaban naglakip sa mosunod:

• “Paglig-on sa pagkakabig ngadto sa Langitnong Amahan ug kang Ginoong Jesukristo ug paglig-on sa pagtuo diha Kanila.

• “Paglig-on sa mga indibidwal ug mga pamilya pinaagi sa nakasentro sa panimalay, gisuportahan sa Simbahan nga kurikulum nga makatampo sa malipayong pagsunod sa ebanghelyo.

• “Pagtahud sa adlaw nga Igpapahulay, uban ang pagpunting sa ordinansa sa sakrament.

• “Pagtabang sa tanang anak sa Langitnong Amahan sa duha ka bahin sa tabil pinaagi sa misyonaryo nga buhat ug pagdawat sa mga ordinansa ug mga pakigsaad ug mga panalangin sa templo.”

Alang sa pagpahibalo niini nga mga kausaban, tan-awa ang Russell M. Nelson, “Pasiuna nga Pakigpulong,” sa pahina 6 niini nga magasin; Quentin L. Cook, “Lig-on ug Malungtarong Pagkakabig ngadto sa Langitnong Amahan ug kang Ginoong Jesukristo,” sa pahina 8. Alang sa dugang nga impormasyon kabahin niini nga mga kausaban, bisitaha ang sabbath.lds.org aron makita ang sulat gikan sa Unang Kapangulohan, mga tubag sa mga kanunayng ipangutana, ug dugang nga mga kapanguhaan nga makatabang sa mga indibidwal ug mga pamilya sa pagtahud sa adlawng Igpapahulay.