Mesaj Premye Prezidans, Novanm 2018
Patisipasyon Sè yo nan Rasanbleman Izrayèl la
Prezidan Russell M. Nelson
M ap adrese yon siplikasyon pwofetik a noumenm, fi yo nan Legliz la, pou nou modle lavni nan ede rasanble Izrayèl dispèse a.
Se yon gran plezi pou m la a avèk nou, chè sè presye m yo. Petèt yon eksperyans m te fè resamman pral ba nou yon apèsi sou sa m santi pou nou ak kapasite divin nou posede yo.
Yon jou pandan m ta p pale avèk yon kongregasyon nan Amerik Disid, m te vin ekstrèmeman eksite pou sijè m tap pale a, epi nan yon moman kle, m te di: “Antanke yon manman 10 pitit, m ka di nou ke …” Epi apresa m te kontinye bay mesaj mwen an.
Mwen pat reyalize ke m te site mo manman an. Moun ki t ap tradui pou mwen an, ki te asime ke sete yon erè, te chanje mo manman an pou papa, konsa, kongregasyon an pat janm konnen ke m te fè referans ak tèt mwen kòm manman. Men, madanm mwen Wendy te tande l, epi l te anchante de erè m nan.
Nan moman sa a, dezi pwofon nan kè m pou fè yon diferans nan mond lan—jan sèl yon manman ka fè—te bouyi andedan kè mwen. Atravè ane yo, chak fwa yon moun te mande m poukisa m te chwazi vin yon doktè, repons mwen te toujou menm nan: “Paske m pa t ka chwazi pou m te yon manman.”
Tanpri note ke chak fwa m itilize mo manman an, m p ap pale sèlman konsènan fi ki fè pitit yo oubyen fi ki adopte timoun yo nan lavi sa a. M ap pale konsènan tout pitit fi adilt Paran Selès nou yo. Chak fi se yon manman akoz merit nati divin etènèl li.
Donk, aswè a, antanke papa 10 pitit—nèf pitit fi ak yon pitit gason—epi antanke Prezidan Legliz la, mwen priye pou nou ka santi santiman pwofon m genyen pou nou—apwopo kiyès nou ye ak tout bon bagay nou ka fè. Pèsonn pa ka fè sa yon fi jis ka fè. Pèsonn pa ka imite enfliyans yon manman.
Mesye yo kapab kominike lanmou Pè Selès la ak Sovè a pou lòt moun epi yo souvan fè sa. Men, fi yo gen yon don espesyal pou sa—yon dotasyon diven. Nou gen kapasite pou nou santi sa yon moun bezwen—ak lè l bezwen li. Nou ka lonje lamen, rekonfòte, anseye, ak fòtifye yon moun nan moman li plis gen bezwen an.
Fi yo wè bagay yo diferaman de gason yo, epi oh, nou vrèman bezwen pwendvi nou! Nati nou pouse nou pou n panse ak lòt moun dabò, pou n konsidere efè chak aksyon nou ap fè sou lòt moun.
Jan Prezidan Eyring te fè remak la, sete Manman gloriye nou Èv —avèk vizyon alontèm li te genyen sou plan Pè Selès la—ki te deklanche sa nou rele “Chit la.” Chwa saj chaje kouraj li a ak desizyon Adan pou te sipòte l la te fè plan bonè Bondye a avanse. Yo te rann posib pou nou chak vini sou tè a, resevwa yon kò, epi pwouve ke nou t ap chwazi pran pozisyon pou Jezikri kounyea, menmjan nou te fè nan lavi premòtèl la.
Chè sè m yo, nou gen don ak talan espirityèl espesyal. Aswè a mwen egzòte nou, avèk tout espwa kè mwen, pou nou priye pou n ka konprann don espirityèl nou yo—pou nou kiltive yo, itilize yo, ak devlope yo, plis pase jan nou te janm fè anvan. N ap chanje mond lan si nou fè sa.
Antanke fi, nou enspire lòt moun epi tabli yon modèl diy pou moun suiv. Kite m ba nou yon ti apèsi sou kontèks de nan gwo anons enpòtan ki te fèt nan dènye konferans nou an. Noumenm, chè sè m yo, nou sete kle pou yo chak.
Premyèman, sèvis pastoral. Egzanp siprèm pou sèvis pastoral se egzanp Sovè nou an, Jezikri. Jeneralman, fi yo toujou pi pre egzanp sa a pase gason yo, epi sa te toujou konsa. Lè n ap sèvi vrèman, nou suiv enpresyon nou resevwa pou ede yon lòt moun plis fè eksperyans lanmou Sovè a. Tandans pou sèvi a tou natirèl lakay fi vètye yo. Mwen konnen fi ki priye chak jou pou mande: “Kiyès ou ta renmen m ede jodia?”
Anvan anons Avril 2018 la konsènan fason pi elve ak pi sakre pou nou pran swen lòt moun nan, tandans kèk nan gason nou yo sete tcheke ke yo te “konplete” tach vizit ofwaye yo epi pase nan pwochen tach la.
Men noumenm sè yo, lè nou te santi yon sè nou te gen tach pou vizite te bezwen èd, nou te reponn imedyatman epi nou te kontinye pandan tout mwa a. Konsa, sete fason nou te fè vizit ofwaye nou yo ki te enspire n chanjman sa a pou sèvis pastoral la.
Dezyèmman, nan dènye konferans jeneral la, nou te reyòganize kowòm Prètriz Melkisedèk yo. Lè nou t ap priye pou nou te konn kijan pou n te ede gason yo nan legliz la vin pi efikas nan responsablite yo, nou te atantivman egzamine egzanp Sosyete Sekou.
Nan Sosyete Sekou, fi nan tout laj ak tout etap nan lavi a reyini ansanm. Chak deseni nan lavi a mache avèk difikilte pa l, epoutan nou toujou la, semèn aprè semèn, tout ansanm, ap pwogrese ak anseye levanjil la ansanm, ap fè yon diferans reyèl nan mond lan.
Kounyea, dapre egzanp nou, detantè Prètriz Melkisedèk yo se manm kowòm ansyen yo. Mesye sa yo gen laj soti 18 rive 98 (petèt plis), avèk menm eksperyans tout osi varye nan prètriz la ak nan Legliz la. Kounyea, frè sa yo kapab kreye lyen fratènèl pi solid, aprann ansanm, epi beni lòt pi efikasman.
Nou sonje ke, nan mwa Jen k sot pase a, Sè Nelson avèk mwen te pale avèk jèn yo nan Legliz la. Nou te envite yo pou yo te anwole nan yon batayon jèn pou Senyè a pou ede rasanble Izrayèl nan toulède bò vwal la. Rasanbleman sa a se “pi gran defi, pi gran kòz, ak pi gran travay sou tè a jodia”!1
Se yon kòz ki dezespereman bezwen fi yo, paske fi yo modle lavni. Donk aswè a, m ap lanse yon apèl pwofesik bay noumenm , fi yo nan Legliz la, pou nou modle lavni nan ede ransable Izrayèl dispèse a.
Kikote nou ka kòmanse?
Kite m lanse kat envitasyon:
Premyèman, mwen envite nou nou patisipe nan yon 10-jou jèn lwen medya sosyal ak tout lòt medya ki ka pote panse negatif ak enpi nan lespri nou. Priye pou n ka konnen ki enfliyans pou nou retire pandan jèn nou an. Resilta 10 jou jèn sa yo ka yon sipriz pou nou. Kisa nou remake apre nou fin pran yon brek lwen enfliyans mond lan ki t ap blese lespri nou yo? Èske gen yon chanjman nan kote nou vle itilize tan nou ak enèji nou kounyea ? Èske youn nan priyorite nou yo chanje—menmsi se jis tou piti? Mwen egzòte nou pou nou ekri chak enpresyon nou resevwa epi suiv yo.
Dezyèmman, mwen envite nou pou nou li Liv Mòmon an ant jodia rive nan fen ane a. Menmsi sa ka parèt prèske enposib avèk tout sa n ap eseye jere nan lavi nou yo, si nou aksepte envitasyon sa a avèk yon kè byen detèmine, Senyè ap ede nou jwenn yon fason pou nou akonpli l. Epi, si nou etidye nan lapriyè, mwen pwomèt ke syèl yo ap louvri pou nou. Senyè a ap beni nou avèk plis enspirasyon ak revelasyon.
Pandan n ap li, m ta ankouraje nou pou nou make chak vèsè ki pale de Sovè a oubyen ki fè referans avèk li. Apresa, se pou nou pale libreman de Kris la, rejwi nan Kris la, epi preche sou Kris la avèk fanmi nou ak zanmi nou.2 Noumenm avèk yo ap vin pi pre Sovè a atravè pwosesis sa a. Epi ap gen chanjma, mirak menm, k ap kòmanse rive.
Maten an, te gen yon anons ki te fèt konsènan nouvo orè pou jou Dimanch yo ak yon nouvo pwogram ki santre sou fwaye a, ki sipòte pa Legliz la. Noumenm, chè sè m yo, nou se kle siksè nouvo efò balanse ak kowòdone sa a pou anseye levanjil la. Tanpri anseye moun nou renmen yo sa n ap aprann nan ekriti yo. Anseye yo kijan pou yo vire vè Sovè a pou yo ka jwenn pouvwa li pou geri ak netwaye yo lè yo peche. Epi anseye yo kijan pou yo atire pouvwa li pou fòtifye a chak jou nan lavi yo.
Twazyèmman, pran abitid pou n al nan tanp regilyèman. Sa ka mande yon tikras plis sakrifis nan lavi nou. Si nou ale nan tanp pi regilyèman, sa ap pèmèt Senyè a anseye nou kijan pou nou atire pouvwa prètriz li a ke yo te dote nou nan tanp li a. Pou moun ki p ap viv pre yon tanp yo, m ap envite nou pou ke, nan lapriyè, nou etidye tout bagay konsènan tanp nan ekriti yo ak nan pawòl pwofèt vivan yo. Chèche pou nou konnen plis, pou nou konprann plis, pou nou santi plis konsènan tanp yo pase janmè anvan.
Nan devosyon mondyal pou jèn yo mwa Jen k sot pase a, m te pale de yon jenòm ki te gen lavi l chanje lè paran l te ranplase telefòn “smartphone“ li a pa yon telefòn regilye. Manman jenòm sa a se yon fi lafwa plen kouraj. Li te wè pitit gason l lan t ap pran wout ki te ka anpeche l sèvi yon misyon. Li te pote siplikasyon li nan tanp lan pou l te ka konn kijan pou l te pi byen ede pitit gason l lan. Apresa li te suiv chak enpresyon l te resevwa.
Li te di: “M te santi Lespri a pouse m pou m te tcheke telefòn pitit gason m nan dè moman byen espesifik pou m te ka jwenn dè bagay espesifik. M pa konn anyen nan fason pou itilize “smartphone“ sa yo men, Lespri a te gide m atravè tout medya sosal ke m pa menm itilize! Mwen konnen Lespri a ede paran k ap chèche gidans pou pwoteje pitit yo. [Okòmansman] pitit gason m te fache anpil kont mwen. … Men apre twa jou sèlman, li te remèsye m! Li te ka santi diferans la.“
Konpòtman ak atitid pitit gason l lan te chanje radikalman. Li te vin bay plis èd nan fwaye a, li te souri plis, epi l te vin pi atantif nan legliz la. Li te kontan sèvi nan sal batèm nan tanp lan pandan yon ti tan pandan l t ap prepare l pou misyon li.
Katriyèm envitasyon m nan, pou noumenm ki gen laj la, se patisipe totalman nan Sosyete Sekou. Mwen egzòte nou pou nou etidye deklarasyon aktyèl sou objektif Sosyete Sekou a. Li enspiran. Li ka gide nou nan devlope pwòp deklarasyon pa nou pou pwòp lavi pa nou. Mwen sipliye nou tou pou nou savoure verite nan deklarasyon Sosyete Sekou ki te pibliye sa gen preske 20 tan an. 3 Gen yon kopi ankadre deklarasyon sa a ki sou mi biwo Premyè Prezidans lan. Mwen ranpli lajwa chak fwa mwen li l. Li dekri kiyès nou ye ak kimoun Senyè a vle nou ye nan moman presi sa a pandan n ap fè pati pa nou an pou rasanble Izrayèl dispèse a.
Chè sè mwen, nou bezwen ou! Nou “bezwen fòs ou, konvèsyon ou, konviksyon ou, kapasite ou pou dirije, sajès ou, ak vwa ou.“ 4 Nou tou senpleman pa ka rasanble Izrayèl san oumenm.
Mwen renmen nou epi remèsye nou epi kounyea m beni nou avèk kapasite pou nou kite mond lan dèyè pandan na p ede nan travay enpòtan ak ijan sa a. Ansanm nou ka fè tout sa Pè Selès nou an bezwen nou fè pou prepare mond lan pou Dezyèm Vini Pitit Gason l lan.
Jezi se Kris la. Sa a se Legliz pa li. Konsènan sa mwen temwaye nan non Jezikri, amèn.