Ekkewe Nongonongen Iamwiri, December 2018

Apworausa Pwe Ka Kirekirech

Mei wor chommong napanap minne sia tongeni pwarata pwe sia kirekirech, akaewin non fansoun Krisimas. Sia tongeni apasa, tekstini, makkei, ngeni, ineti, ioteki, umuni, konu, amwochu, urumwot won, fotuki, are nimeti. Sotuni chok.

Ach pwarata ach tong ngeni aramas ina popunapan ach iamwir. Presetenin Fin Anisi Unus Jean B. Bingham a apasa: “Ennetin iamwir mi fis ngeni emon me emon ren tong pwe ina ewe popunap. … Fiti ewe popunapen tong, amwarar epwe fis, me sipwe kuna napanap minne sia tongeni panato pwich me fefinach kewe mi ‘poutuno’ ngeni ewe turufengenin ewe kapas allimen Jises Kraist.”¹

Ach pwarata ach kirekirech ngeni aramas mi eu kinikin mi auchea non ach apochokuna ach chiechifengen. Nge aramas mi sokono ra weweiti ewe pworaus non sokofesenin napanap. Ifa usun sipwe tongeni afataochu ach tong ngeni ekkoch non ekkewe napanap minne repwe weweiti me etiwa? Iei mei wor ekkei fitu napanapen apworausa ach kirekirech, fiti pwan ekkoch ekkiek ren om kopwe poputani om ekkiek.

Apasa

Fan ekkoch ese wor siwinin ach sipwe chok apasata mefiach usun emon. Ewer mwo pwe mi tufich pwe epwe fen wewen pwe kopwe ereni emon pwe ka tongeiir, mi pwan kapachenong om erenir pwata ka ingeitir are ereniir pwe ka afanniir. Ei sokkun kapasen umoumoch mi apochokuna chiechi. (Nengeni Ephesus 4:29.)

• Kutta ew otun pwe kopwe afata ifan aukukun om ingeiti ew mettoch i mi nipwakoch non.

• Churi, kokori, ika tinano email, tekst, ika taropwe me ereni ewe aramas pwe ka ekkieki usur.

Churi

Om aea fansoun pwe kopwe fos ngeni me ausening ngeni emon mi ew napanap mi manaman minne ka tongeni afata ifan aukukun om aucheaniir. Ikamwo kopwe churir non imwer, non fan, are ekkis, mei wor chommong aramas mi namwot ngenir pwe epwe wor emon ir mi tongeni fos ngeni. (Nengeni Mosaia 4:26; D&C 20:47.)

• Anongonong won met mi namwot ngeniir, akota ew fansoun oupwe chufengen. Aucheani om fansoun ren pwe kopwe wesen ausening ngeni me weweiti nonnomun.

• Ikkeweia mi weires ne churi non imwan fan itan mi touau, oreni, are pwan ekkoch osukosuk, mi och oupwe ekkieki ika mi tufich oupwe chufengen mwirin Fan.

Aninnis ren ew Popun

Kopwe tumunuoch pwe kopwe esinna met mi namwot ngeni ewe emon are ewe famini. Om anisiir non napanap mi murinno mi afata om kirekirech ngeniir. Mi achufengeni ekkewe murinnon nifangen fansoun me foffor mi umoumoch. “Fofforun aninnis mi kukun mi tongeni manaman ngeni ekkoch,” Sister Bingham a apasa.²

• Fori ekkewe sokkun aninnis mi apochokuna aramas are ar famini, usun tumunu nour kewe pwe sam me in repwe tongeni feino ngeni ewe tempel.

• Kuta ekkewe napanap minne ka tongeni apanna osan manauer nupwen ir mi weires, usun nimeti asamwacho, afetena ewe konak, are aninnis ren otot non nenier.

Fori Mettoch Fengen

Mei wor aramas rese sani chiechifengen ren kapas anonnon fengen. Ngeni ekkoch, chiechifengen mi fiseta ren ar kuta mettoch ir mi sanifengen me fori ekkena mettoch fengen. Ewe Samon a pesei ngenikich pwe sipwe nom ren me apochokuna pwich me fefinach (nengeni D&C 20:53).

• Fetan rer, akota ew pwinin urumwot, are akota fansoun oupwe taisofengen.

• Aninnis fengen non ew angangen sopw ika Fan.

Fang ew Nifang

Fan ekkoch fansoun are tufichin chufengen mi chok kukkun. Non sokkopaten oreni, nifang mi fis pwe esisinan kirekirech me umoumoch. Fan ekkoch, ew nifang mi kukkun mi tongeni awewe om tipengeni apochokuna ami chiechifengen. (Nengeni Proverbs 21:14.)

• Nifang ngenir mongo ir mi kan sani.

• Erenir kapasen mirit, wokisin pukefel, are pwan ew pworaus ka mefi epwe apochokuner.

Ew Angangen Tong

Nupwen ka poputa ne sinei ekkewe minne ka iamwiri me ekkewe minne ka kuta sinei me nang fan itan, kopwe kaeoechu ifa usun kopwe pwari om tong me umoumoch ngenir pwisin.

Kimberly Seyboldt seni Oregon, USA, mi apasa pworausan an kuta sinei me nang me fang nifang pwe epwe pwari an tong:

“Nupwen ua kuna pwe ua osukosuk non manauei, ua uta me fori pinewan zucchini, napengeni ua fori wanu foun pinewa. Masowan ewe pinewa mi monomon ina ew iotek ua apasa nupwen ua umuni ekkewe pinewa pwe upwe sinei ion chok ekkewe pinewa epwe namwot ngeni. Ua feioch ne ekkis sinei chon ai puraku ren ewe pinewan zucchini mi pwich mi fis pwe ai tufichin tonong non imwer me manauer.

“Ew ranin summer mi pwichikar, ua parkini wai we unukun ew famini mi ameme porun foun blackberry nepekin ewe aan. Ese namwot upwe moni blackberry, nge ewe at mi kukkun me kichuchu ren ewe nenien ameme mi pwapwa ne kunaei, a ekieki pwe ngang upwe moni och. Ua moni ekkoch blackberry, nge mei wor ai nifang ngeni. Ua ngeni ewe at ruefou foun pinewa. A kunnu ngeni semanewe ren etiwan, me a apasa, ‘Nengeni, Papa, iei a wor anach ikenai.’ Ua kan uruta ren kinisou ren ei tufichin pwari tong non ei napanap mi kukkun.”

Elter Jeffrey R. Holland seni ewe Mwichen ekkewe Engon me Ruemon Aposel a apasa, “pwe meinisin mwan me fefin—me nouch kewe onuon me fopun ra mukono—repwe [ne anapano] memefin netip ami oupwe mochen eteneki fengenikemi, mwasangasang ren ewe nimenimochun tong an Kraist. … Amwo kich sipwe angangfengen ren ewe Samonun ewe atake, awora ngeni ewe Kot me ewe Sam fan itach kich menisin ew paun aninnis ren wisan mi wakkate an epwe penueni iotek, awora aurur, apwasa surun mas, me apochokunan pwasuken peche.”³

Jises Kraist mi Kirekirech

Mwirin an Jises Kraist a amanaua Lazarus seni mano, “Jises a kechiw.

“Iwe ekkewe [re Jus] ra era, ‘Oupwe nengeni ukukun an tongei atewe!’” (John 11:35–36).

“Mi wor ai kirekiroch womi,” Kraist a ereni ekkewe re Nifai. Mwirin I a tingor pwe repwe panato ekkewe mi semwen me weires, ekkewe mi pechema me chuun, me “a echikarereta” chommong(nengeni 3 Nifai 17:7–9).

Ewe Chon Amanau a awora ngenikich ewe nenian appiru ren An kirekirech ngeni aramas. A aitikich:

“Kopwe tongei ewe Samon om Kot ren unusen nenukom, ren unusen ngunum o ren unusen om ekiek.

“Iei ewe aewin annuk a fokkun napanap o auchea.

“Ewe aruan annuk mi fokkun auchea usun ewe aewin, Kopwe tongei monun unukum ussun ka pwisin tongek.” (Matthew 22:37–39).

Ion chok mi namwot kopwe kirekirech ngeni? Ifa usun kopwe pwarata om kirekirech ngeniir?

© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon chiakun: 6/17. Chiakun Ministering Principles, December 2018. Chuukese. 15056 901

Esinesin

1. Jean B. Bingham, “Iamwiri usun ewe Chon Amanau a Fori,” Liahona, May 2018, 106.

2. Jean B. Bingham, “Iamwiri usun ewe Chon Amanau a Fori,” 104.

3. Jeffrey R. Holland, “Kopwe Nonnom Rer me Apochokunereta,” Liahona, May 2018, 103.

Ach ausening ngeni ekkoch epwe anisikich ne kutta napanap minne sipwe pwari ach kirekirech ngeniir. Nengeni ewe taropweian Nongonongen Iamwiri “Nimu Mettoch Ekkewei mi Auseningoch mi Fori” non ewe Liahona seni June 2018.

“Ekkewe Nongonongen Iamwiri” ekkoch popun ar repwe anisikich ne kaeo ach sipwe etenekifengenikich—nge esap ren ach sipwe aporousa ussun ew porous nupwen ach churir. Nupwen sipwe sinei ekkewe sia angang ngenir, ewe Ngun mi Fel epwe pesei kich ach sipwe sinei met porous mi auchea ngenir epwe pachengeni ach tumun me umoumoch.