Mga Prinsipyo sa Ministering, Disyembre 2018

Ipahibalo nga Nagaulikid Ka

Madamo kaayo sang mga pamaagi nga mapakita naton nga nagaulikid kita, ilabi na gid sa tion sang Paskwa. Mahimo naton ini mapabutyag paagi sa paghambal, pagtext, pagsulat, paghatag, pagpaambit, pagpangamuyo, pagluto, pagkanta, paghakos, pagtukar, pagtanom, ukon pagpaninlo. Basta tilawi lang ini.

Ang pagpakita sang pagpalangga sa iban amo ang pinakaimportante nga bahin sang ministering. Ang Pangkabilogan nga Pangulo sang Relief Society nga si Jean B. Bingham nagsiling: “Ang matuod-tuod nga ministering ginahimo sing tinag-isaisa nga ang pagpalangga amo ang motibo. … Upod ang pagpalangga bilang rason, ang mga milagro mahanabo, kag makasalapo kita sang mga paagi nga madala ang aton ‘nadula’ nga mga utod sa lubos-nga-nagalakip nga pag-inakop sang ebanghelyo ni Jesucristo.”¹

Ang pagpahibalo sa iban nga nagaulikid kita importante kaayo nga bahin sang pagpauswag sang personal nga mga relasyon. Apang ang mensahe ginabaton sing nagkalainlain nga mga tawo sa nagkalainlain nga mga paagi. Gani, paano naton mapabutyag sing nagakaigo ang aton pagpalangga para sa iban sa mga pamaagi nga ila mahangpan kag maapresyar? Ari ang pila ka mga pamaagi nga mapahibalo naton nga nagaulikid kita, upod sing pila ka mga ideya agud masugdan ang imo kaugalingon nga pagpanumdum.

Ihambal ini

Kon kis-a wala sing makabaylo sa paghambal sang imo ginabatyag parte sa isa ka tawo. Samtang nagakahulugan ini sang paghambal sa ila nga palangga mo sila, nagalakip man ini sang pagpaambit sang kon ano ang imo nanamian sa ila ukon paghatag sing sinsero nga pagdayaw. Ini nga sahi sang pagsakdag nagabulig pabakod sang mga relasyon. (Tan-awa sa Mga Taga-Efeso 4:29.)

Magpangita sang oportunidad nga mapabutyag sa tawo kon daw ano ang imo pagdayaw sa isa sang iya maayo nga mga kinaiya.
Magbisita, magtawag sa telepono, ukon magpadala sang email, text, ukon kard nga nagapahibalo sa tawo nga ginapanumdum mo sila.

Makigkita

Ang paghinguyang sang tiempo agud makigsugilanon kag mamati sa isa ka tawo isa ka gamhanan nga paagi sa pagpakita kon ano sia kaimportante sa imo. Kon bala sa balay, sa simbahan, ukon bisan diin ka man magbisita, madamo nga mga tawo ang nagakinahanglan sang ila masugilanon. (Tan-awa sa Mosias 4:26; D&C 20:47.)

Suno sa mga panginahanglan sang indibidwal, mag-iskedyul sang pagbisita. Hatagi sang tion sa pagpamati sing maayo kag paghangop sang iya sitwasyon.
Kon mabudlay ang magbisita sa mga balay bangud sang kalayuon, kultural nga mga kustombre, ukon iban pa nga mga sirkumstansya, binagbinaga ang pagpangita sang tiempo nga makaupdanay pagkatapos sang mga miting sa Simbahan.

Mag-alagad nga may Katuyuan

Magmangin sensitibo sa mga panginahanglan sang indibidwal ukon pamilya. Ang paghatag sang makahulugan nga pag-alagad nagapabutyag nga nagaulikid ka. Ginatingob sini ang malahalon nga mga regalo sang panahon kag madinumdumon nga pagtinguha. “Ang simple nga mga buhat sang pag-alagad mahimo makaapekto sing daku sa iban,” siling ni Sister Bingham.²

Magtanyag sang pag-alagad nga nagapabakod sa mga indibidwal ukon sa ila mga pamilya, pareho abi sang pagbantay sa kabataan agud nga ang mga ginikanan makakadto sa templo.
Magpangita sang mga paagi nga mapamag-an ang mga palas-anon kon ang pangabuhi daw tuman kabudlay, pareho abi sang pagpaninlo sang mga bintana, pagpalagaw-lagaw sang ido, ukon pagbulig sa ugsaran.

Maghikot sang mga Butang sing Ulupod

May mga tawo nga indi makapakig-angot paagi sa madalum nga mga pagpakigsugilanon. Sa pila ka mga tawo, ang pagpakig-angot ginahimo paagi sa pagpangita sing magkapareho nga mga huyog kag paghinguyang sang tion sa paghimo sinang mga butang sing ulupod. Ang Ginuo nagapaisog nga kita “mag-upod kag magpabakod” (D&C 20:53) sa aton mga utod.

Mag-upod sa paglakat-lakat, magplano sang isa ka gab-i sang paghinampang, ukon magpahamtang sing regular nga tion sa pag-ehersisyo nga magkaupod.
Mag-alagad sing upod sa isa ka proyekto sa komunidad ukon sa Simbahan.

Maghatag sang Regalo

Kon kis-a, ang panahon kag mga oportunidad sa pagpakig-angot limitado. Sa madamo nga mga kultura, ang paghatag sang regalo patimaan sang pag-ulikid kag pag-unong. Bisan panalagsa lang, ang simple nga regalo sarang makapabutyag sang imo interes sa pagpasad sing mas maayo nga relasyon. Tan-awa sa Mga Hulubaton 21:14)

Dalhi sila sang paborito nga pagkaon.
Magpaambit sang isa ka dinalan, pulong sa balaan nga kasulatan, ukon mensahe nga sa pamatyag mo makabulig sa ila.

Isa ka Pangabudlay sang Pagpalangga

Kon makilala ninyo sing mas maayo inang inyo mga gina-minister kag kon para kay sin-o kamo nagapangayo sang inspirasyon, matun-an ninyo sing mas pat-od kon paano ninyo mapabutyag ang inyo pagpalangga kag pag-ulikid sa ila sing tinag-isaisa.

Si Kimberly Seyboldt sang Oregon, USA, nagasugid sang istorya parte sa pagpangayo sang inspirasyon kag paghatag sang mga regalo agud magpakita sang pagpalangga.

“Kon nasubuan ako sa pangabuhi, nagabangon ako kag nagahimo sang zucchini (pipino) nga tinapay, sa masami mga walo ka bareta. Ang espesyal nga ingrediente amo ang mahipos nga pangamuyo nga akon ginahalad samtang nagaluto agud mahibaloan kon sin-o ang nagakinahanglan sinang mga bareta sang tinapay. Nakilala ko sing mas maayo ang akon mga kaingod paagi sa mainit-init pa nga mga zucchini nga tinapay nga amo ang akon nangin imbitasyon sa ila mga puluy-an kag mga kabuhi.

“Isa ka magin-ot nga adlaw sang tig-ilinit, nagpundo ako malapit sa isa ka pamilya nga nagabaligya sang kinabo nga blackberries sa higad sang dalan. Indi ko kinahanglan ang dugang pa nga blackberries, pero ang bataon, maniwang nga bata nga lalaki nga yara sa kiosko nakunyag nga makita ako, nga nagadumdum nga ako ang madason niya nga kustomer. Nagbakal ako sang pila ka blackberries, pero may regalo man ako para sa iya. Ginhatagan ko ang bata sing duha ka bareta sang tinapay. Nagbalikid sia sa iya amay para sa pahanugot, kag nagsiling, ‘Tan-awa, Tay, may makaon na kita sini nga adlaw.’ Napuno ako sang kapasalamatan para sining oportunidad nga magpakita sang pagpalangga sa simple nga paagi.”

Si Elder Jeffrey R. Holland sang Korum sang Dose ka Apostoles nagpangabay “nga ang tagsa ka lalaki kag babayi—kag ang aton mas hamtong nga mga young men kag young women—mag [mangin] mas komitido sa sinsero nga pagtatap sa isa kag isa, nga ginapadasig lamang sang puro nga gugma ni Cristo sa paghimo sini. Kabay nga magpangabudlay kita upod sa Ginuo sang ulubasan, nga nagahatag sa Dios kag Amay naton tanan sang mabinuligon nga kamot sa Iya makahalawhaw nga buluhaton sang pagsabat sa mga pangamuyo, paghatag sang kaumpawan, pagpahid s ang mga luha, kag pagpabakod sang maluya nga mga tuhod.”³

Si Jesucristo Nagaulikid

Pagkatapos nga ginbangon ni Jesucristo si Lazarus halin sa mga minatay, “si Jesus naghibi.

“Gani ang mga Judio nagsiling, Tan-awa daw ano ang paghigugma niya sa iya!” (Juan 11:35-36).

“Naluoy ako sa inyo,” siling ni Cristo sa mga Nefinhon. Dayon ginpatawag Niya ang ila mga masakiton kag nagaantos, ang ila mga lupog kag mga bulag, kag “ginpaayo niya sila” (tan-awa sa 3 Nefi 17:7-9).

Si Cristo nagpahamtang sang ehemplo para sa aton sa Iya pag-ulikid sa iban. Gintudloan Niya kita:

“Higugmaa ang Ginuo nga imo Dios sang bug-os mong tagipusuon, kag sa bug-os mong kalag, kag sa bug-os mong hunahuna.

“Ini amo ang dako kag nahaunang sugo.

“Kag ang ikaduha kaangay sini, Higugmaa ang imo isigkatawo subong sa imo kaugalingon” (Mateo 22:37–39).

Sin-o ang nagakinahanglan sang imo pag-ulikid? Paano mo mapakita sa ila nga nagaulikid ka?

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang Ministering Principles, December 2018. Hiligaynon. 15056 861