Ipakaammom a Maseknanka

Adu dagiti wagas a pakaipakitaantayo a maseknantayo, nangnangruna iti panawen ti Paskua. Maisaotayo, maitekstayo, maisurattayo, maitedtayo, maibinglaytayo, maikararagantayo, mailutotayo, maikantatayo, maarakuptayo, maimulatayo, madalusantayo. Gagangay a padasentayo.

Ti panangipakita iti panagayat kadagiti dadduma ket ti kapatgan a paset ti panagserbi wenno ministering. Kinuna ni Jean B. Bingham, Sapasap a Presidente ti Relief Society: “Ti pudno a panagserbi wenno ministering ket maipatungpal a saggaysa nga addaan iti ayat kas motibasion. …. Addaan iti ayat a kas motibasion, mapasamakto dagiti milagro, ken masarakantayo dagiti wagas a pangpasubliantayo kadagiti ‘napukaw’ a kakabsattayo a babbai ken lallaki iti naan-anay a pannakiraman iti panangawat iti ebanghelio ni Jesucristo.”¹

Iti panangipakaammo kadagiti dadduma a maseknantayo ket napateg unay nga elemento iti panangpadur-as kadagiti bukod a relasion wenno pagnanaigan. Ngem magun-od dagiti agduduma a tattao ti mensahe iti agduduma a wagas. Isu a kasano a siuumno a mayebkastayo ti ayattayo para iti dadduma kadagiti wagas a maawatan ken pagyamanandanto? Dagitoy ti sumagmamano a wagas a pangipakaammuantayo a maseknantayo, a buyogan ti sumagmamano a kapanunotan a mangirugi iti bukodyo a pampanunoten.

Isaoyo.

No dadduma awan ti nasaysayat pay ngem iti panangisao no ania ti riknam maipapan iti maysa a tao. Idinto a mabalin a kayat a sawen daytoy ti panangibaga iti maysa a tao nga ay-ayatenyo ida, kasta met nga iramanna ti panangibinglay no ania ti dayawem maipapan kadakuada wenno panangted iti napudno a pammadayaw. Mangtulong daytoy a kita ti pananganamong a mangpapigsa kadagiti relasion wenno pagnanaigan. (Kitaen iti Taga Efeso 4:29.)

Mangsapul iti gundaway a mangipakaammo iti indibidual no kasano ti kadakkel ti panagdayawmo iti maysa kadagiti pagpigsaanna.
Sumarungkar, tumawag, ag-email, agteks, wenno mangted iti kard nga ibagbagam iti indibidual a pampanotem ida.

Sumarungkar

Ti kaadda iti panawenyo a kasarita wenno dumngeg iti maysa a tao ket maysa a nabileg a wagas a pangipakitaanyo no kasano ti kadakkel ti panangipategyo kenkuana. Sarungkaranyo man iti pagtaengan, iti simbaan, wenno iti sadino man, adu dagiti tao nga agkasapulan iti maysa a tao a mabalin a pakisaritaanda. (Kitaen iti Mosiah 4:26; DkK 20:47.)

Segun kadagiti kasapulan ti indibidual, mangiskediul iti isasarungkar. Maaddaan iti panawen a talaga a dumngeg ken maawatan dagiti kasasaadna.
Iti lugar a mabalin a narigat ti sumarungkar kadagiti pagtaengan gapu iti distansia, pagtuladan iti kultura, ken dadduma pay a kasasaad, ibilang ti panangilatang iti oras a pannakikadua kadakuada kalpasan dagiti miting iti Simbaan.

Agserbi nga Addaan iti Panggep

Agbalinka a maseknan kadagiti kasapulan ti indibidual wenno pamilia. Ti panangted iti napateg a serbisio ket mangipakita a maseknankayo. Daytoy ti mamagkadua kadagiti napateg a sagut ti oras ken napanunotan a panagkagumaan. “Mabalin nga adda nabileg nga impluensiana iti dadduma dagiti simple nga aramid ti panagserbi,” kinuna ni Sister Bingham.²

Mangidiaya iti serbisio a mangpapigsa kadagiti indibidual wenno dagiti pamiliada, a kas iti panangaywan kadagiti ubbing tapno makapan dagiti nagannak iti templo.
Agsapul kadagiti wagas a pakapalag-anan dagiti imet no agbalin a narigat ti biag, kas iti panangdalus kadagiti tawa, panangipagna iti aso iti ruar, wenno panangtulong iti arubayan.

Agtitinnulong nga Agaramid kadagiti Banag

Adda dagiti indibidual ti saan a makikonekta babaen ti nabayag a panagsasarita. Para iti sumagmamano a tao, maaramid dagiti koneksion babaen ti panangsapul kadagiti gagangay a panagessem ken panangbubos iti panawen nga agtitinnulong a panagaramid kadagita a bambanag. Inallukoynatayo ti Apo a “makipulapol ken mangpapigsa” (DkK 20:53) kadagiti kakabsattayo.

Mapan agpagnapagna, agplano iti ay-ayam iti rabii, wenno mangituding iti oras nga aggigiddan nga agwatwat.
Sangkamaysa nga agserbi iti maysa a proyekto iti komunidad wenno Simbaan.

Mangted iti maysa a Sagut

No dadduma limitado wenno bassit ti oras wenno gundaway a makipulapol. Iti adu a kultura, ti panangted kadagiti sagut ket maysa a tanda ti panangipateg ken panagrikna. Uray iti sagpaminsan, ti simple a sagut ket mangipakaammo iti essemmo a mangbangon iti nasaysayaat a relasion. Kitaen iti Dagiti Proverbio 21:14.)

Ikkan ida iti paborito a makan.
Mangibinglay iti adaw, nasantuan a kasuratan, wenno sabali pay a mensahe a mariknayo a mangted pagimbagan kadakuada.

Maysa nga Aramid ti Ayat

Bayat ti pannakaam-ammoyo kadagiti pagserbianyo ken panagkalikagumyo a maaddaan iti inspirasion, masursuroyonto kangrunaanna no kasano a maipakaammoyo ti ayat ken pannakaseknanyo kadakuada a saggaysa.

Insarita ni Kimberly Seyboldt ti Oregon, USA, ti estoria ti panagkalikagumna a maaddaan iti inspirasion ken pannagted kadagiti sagut a mangipakita iti ayat:

“No makitak a mangdalupo kaniak ti biag, tumakderak ket agaramidak iti tinapay a zucchini, gagangay a walo a piraso a tinapay. Ti espesial nga ingredientko ket ti naulimek a kararag nga iruknoyko bayat ti panaglutok tapno ammuen no asino ti agkasapulan kadagiti piraso ti tinapay. Kabaelak a naam-ammo a nasaysayaat dagiti kaarrubak iti aglawlawko kas iti panangyawis iti nabara a zucchini a tinapay iti pagtaengan ken iti biagda.

Maysa a nabara nga aldaw ti kalgaw, nagmanehoak para iti maysa a pamilia nga aglaklako kadagiti blackberry iti igid ti kalsada. Diak kinasapulan ti ad-adu pay a blackberry, ngem ti ubing, a nakuttong a lalaki iti puesto ket aggagar a makakita kaniak, a nangipagarup a siak ti sumaruno a gumatang. Gimmatangak iti sumagmamano a blackberry, ngem adda pay sagutko para kenkuana. Inikkak ti ubing a lalaki iti dua a tinapay. Tinaliawna ti amana para iti yaanamong, sa kinunana, ‘Kitaem, Tatang, adda kanentayon ita nga aldaw.’ Napnuanak iti panagyaman iti daytoy a gundaway a mangipakita iti ayat iti maysa a simple a wagas.”

Impakaasi ni Elder Jeffrey R. Holland ti Korum dagiti Sangapulo-ket-dua nga Apostol, “a tunggal lalaki ken babai—ken dagiti in-inauna nga agtutubo a lallaki ken agtutubo a babbai—ket [agbalindanto] … nga ad-adda a managkumit iti naimpusuan a panangaywan iti tunggal maysa, a pinaregta laeng ti natarnaw nga ayat ni Cristo a mangaramid iti kasta. … Makapagtrabahotayo koma a sangkamaysa iti Apo ti kaubasan, a mangmangted iti Dios ken iti Amatayo amin iti managtulong nga imatayo iti daytoy dakkel nga aramid iti panangsungbat kadagiti kararag, panangliwliwa, panangpamaga iti lua, ken pamangpapigsa iti nakapuy a tumeng.”³

Maseknan ni Jesucristo

Kalpasan a pinagungar ni Jesucristo ni Lazaro manipud iti ipapatay, “nagsangit ni Jesus.

“Kalpasanna kinuna dagiti Judio, Kitaenyo no kasano ti panangdunggona kenkuana!” (Juan 11:35–36).

“Adda asik kadakayo,” kinuna ni Cristo kadagiti Nephite. Kalpasanna inawaganna dagiti masakit ken agtutuok, dagiti lugpida ken bulsekda, ket “inagasanna ida” (kitaen iti 3 Nephi 17:7–9).

Impakita ti Mangisalakan ti pagwadan para kadatayo bayat ti panangaywanna kadagiti dadduma. Insurona kadatayo:

“Ayatem ti Apo a Diosmo iti amin a pusom, ken iti amin a kararuam, ken iti amin nga isipmo.

“Daytoy ti umuna ken dakkel a bilin.

“Ket ti maikadua isu umasping kenkuana, Ayatem ti padam a tao a kas iti bagim” (Mateo 22:37–39).

Asino ti agkasapulan iti panangaywanyo? Kasano a maipakitayo kadakuada a maseknankayo?

© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, December 2018. Ilokano. 15056 864