Osischeklel Omesiou, December 2018

Mouchais el kmo Komekerreu

Ng betok a teletael dochotii el kmo kede omekerreu, oumesingd sel temel a Kurismas. Ng sebeched el dulii, okiu a text, luchesii, odersii, ochotii, meluluuch el kirel, rullii el kall, oiteklii, mechulii, ousekool, dolemii, malechub e ke de kudmeklii. Ka di bo mesemii.

A olchotel a beltikelreng el mo er a rebebil a kmal ngii a techel a odingel. A Relief Society General President el Jean B. Bingham a dilu el kmo: “A meral odingel a mekedmokl el ta er a tal taem lobengkel a beltikelreng me a blakereng. …Ngokiu a beltikereng, ea ongasireng el tekoi a dubech, e kid a mo metik a teletael el mo sebeched el ngoiteterir tirkel ‘cheridang’ el odos me a odam er kid el muut el mo mesisiich er a ebangkelio er a Jesus Kristo.¹

Sel bo lodengei a rebebil el kmo ke de omekerreu er tir a kmal klou a lekedmeklii er a chelsel a deleuill er kid. Eng di a rekakerous el chad a nguu a klumech er a kakerous el teletael. Me kede mekerang e ochotii a beltkil a rengud el mo er a rebebil el mo sebechir el mo medengelii e mereng a saul el kirel? Aikakid a bebil er a teletael dochotii el kmo ke de omkerreu, lobengkel a bebil er a uldasou el mo ngosukau er a uldesuem.

Mdelii

Bebil er a taem eng diak a mtechir sel mouchais a momelchesiu er ngii el kirel a chad. Ng uaisei el belkul a kmo ng betik a rengum er tir, eng di ng dirrek lobengkel aikel teletael el kau a chemat er tir el kirel malechub e ngungil tekoi el mdelii el kirir. Tiaikid el teletael a smisichii a deleuill. (Mesa Efesus 4:29.)

• Mosiik a techall el subedii a chad el kmo ke chemat aikel tekoi le mesisiich er ngii.

• Bo modngelii, momekedong, malechub em email, text, malechub a card lochotii er a chad el kmo ke melbedebek er tir.

Oldingel

Sel mechoit a temem el mengedecheduch e orrenges er a chad a kot el mesisiich el teletael lolchotel a kmo ng klou a ultutelel el me er kau. A bo moldingel er a blai, ikelesia, malechub a ngii di el ker, e ng kmal betok a rechad lousbech el mengedecheduch er a kmo ng techa el chad. (Mesa Mosiah 4:26; D&C 20:47.)

• Ngultuil er a teletael er a dersta el chad, em tibir a temel odingel. Mechoit a temem el meral lorrenges el mo medengei a teletael le ngara chelsel.

• Alsekum eng meringel a bo moldingel er a chad er a blai leng cherroid a uchul, teletael er a siukang, malechub eng kuk di bebil er a teletael, e ng sebechiu el kaseues er a uriul er a temel a Ikelesia.

Mesiou loba Moktek

Molatk aikel lousbech a dersta el chad me a telungalek. Sel modars a meral teletael er a omesiou e ngochotii el kmo komekerreu. Ng uldekial a klebokel el sengk me a blakelreng er a uldasou. “A beot lolchotel omesiou a sebechel klou a relii er a rebebil,” ng millekoi a Sister Bingham.²

• Mocholt a ngesou el mo melisiich er a dersta el chad me a telungalek, el uaia omes er a rengalek meng sebechel a chedam me a chedil el mo er a templo.

• Mosiik a teletael el mo mengebekakl a berraod sel sal mo meringel a klengar, el ngmatech a mado, orrael er a bilis, malechub eng omengedmeklel a mekesekesel a blai.

Mdak el Meruul a kmo Ngerang

Ngar ngii a rechad el kuk diak sal smau er a dmolech el cheldecheduch. A rebebil er a rechad, a kuk mekdebechii a deluill er tir losiik aikel lesemeriar ngii el tekoi e dmak el meruul aikaikid el tekoi. A Rubak a mengelechel er kid el mo “dmak e melisiich” (D&C 20:53) er a rodam me a rodos er kid.

• Mdak el mererorael, mtibir a tal kesus er a omilil, malechub em tibir a taem e bo mdak el exercise.

• Mdak el ngara omesiou er a buai malechub a Ikelesia.

Modersii a kmo ngera el Beresent

Bebil er a taem ea techall el mo dmak a meringel. Bebil er a beluu, e a douberesent eng olchotel a kmo ke de omkerreu. A dil derstang, eng di ungil le sel beresent a ochotii el kmo ke semeriar el smisichii a deleuill er kemiu. (Mesa Proverbs 21:14.)

• Bom ongor tir.

• Mochotii a ungil tekoi, bades, malechub a kmo ngera el klumech el mo ngosuterir.

Urerel a Beltikereng

Me sel bo mungil medengelterir tirkel moldingel er tir e mosiik a klungiaol kirir, e kau a mo meduch lochotii a beltikereng me a ulekerreu el mo er tir.

A Kimberly Seyboldt er a Oregon, USA, ouchais er a cheldecheduch el kirel a ulekrael me a ouberesent lolchotel a beltikereng:

“Sel bok betik el kmal meringel a klengar ngak, e ak meruul a zucchini el blauang, el locha kleai a iidisel. Sel kot el kusbech er ngii a nglunguuch sel kuruul aikal blauang el kmo ng techa kmal ousbech a blauang. Ak mla mo ungil medengelii a tonari er ngak el ikal mekekeald el blauang a uchul e ak soisbes er a rekeblirir el mo oldingel.

“A tara klebesei, ak milsa tal telungalek loterau a blackberries er a tkul a rael mak mlo kmerd e merael mong. Ng dimlak kusbech a blakberries, ng di ngkal ngeasek, e mesengaked el buik el dilchor a kmal mlo ungil a rengul mesekak, lomdasou el uase ak me omechar a blakberries. Ak milchar a bebil ra blackberries, eng di ak dirrek el milsang a omiange er ngak. Ak milsang ngkal buik a teblo el blauang. Ngulbult lomes er a demal, e dilu el kmo, ‘Ka momes, e Chedam, ng mla morngii a keled er chelechal sils.’ A kmal mlo mui er a omereng el saul er tial techall lochotii a beltikereng er a chelsel a beot el teletael.”

A Elder Jeffrey R. Holland er a Chelechad er a Teruich me a terung el Apostol a ulengit el kmo “a rokui el sechal me a redil— me a remeklou el rengeasek el sechal me a rengeasek el redil—a sebecherir [el] … mo meral ngar ngii ra rengrir el mo omtebechel er a ta me a tang, el blak a rengrir lokiu sel meral klikiid el beltkil a rengul a Kristo el mo meruul aikang.” … Bo doureor el kaukledem lobengkel a Rubak, el ngoseuir a Dios el Demad el rokui el Chimal el mo nger er a nglunguchir, e dodars ongelaod, e dosuld a chiuosech er a mad, e dolisiich er a roberedang.”³

A Jesus Kristo a Omekerreu

Uriul er a Jesus Kristo a lokisii a Lazarus er a kodall e a, “Jesus a lilangel.

“Me a re Jews a millekoi el kmo, Ng meral mle betik a rengul er ngii!” (Johanes 11:35–36).

“Ng klou a chubechub er ngak el kiriu,” ng millekoi a Kristo el mo er a re Nephites. E Ngii a ulemekedong er a rsmecher me a rengara ringel, a rechelmus me a remikou, e “ngii a ulemekungil er tir” (mesa 3 Nephi 17:7–9).

A Osobel a ulechotii okesiu el mei er kid er sera lomekerreu er a rebebil. Ngii a ulsischeklid el kmo:

“Ng kirel betik a rengum er a Rubak el Dios loba rengum el rokir, klengar er kau el rokir, me a uldesuem el rokir.

“Tiaikid a kot el ngarbab el llach e kot el klou a belkul.

“E a ongerung el klou a belkul a di uai ngii, Bo el betik a rengum er a ngar bita er kau el ua le betik a rengum er kau.” (Mateus 22:37–39).

Ng techa ousbech a ulekerreu? Mekera mochotii er tir el kmo komekerreu?

© 2018 lokiu a Intellectual Reserve, Inc. Urrekodel a rokui el klisiich.Milluches er a USA. Kengei er a English: 6/17. Kengei er a oidel: 6/17. Oidel a Ministering Principles, December 2018. Palauan. 15056 881

Uleklatk

1. Jean B. Bingham, “Ministering as the Savior Does,” Liahona, May 2018, 106.

2. Jean B. Bingham, “Ministering as the Savior Does,” 104.

3. A Jeffrey R. Holland, “Be With and Strengthen Them,” Liahona, May 2018, 103.

Sel dorrenges er a rebebil eng ngosukid el mo metik a teletael lochotii el mo er a rebebil el kmo ke de omekerreu. Mesa Ministering Principles “Five Things Good Listeners Do” er sel June 2018 el babier er a Liahona.

A “Osischeklel a Omesiou” a kirel mo olngeseu er kid el mo meduch el mo omekerreu er a ta me a tang— ng diak el klumech el douchais el kirel. Sel dorael el mo medengelterir tirka el dosiou er tir, ea Chedaol Reng a mo odbechid el mo medengei aikel klumech lousbech el mo obengkel a ulekkereuid me a klechubechub er kid.