Olsem Sevya: Stap Gro long Fofala Impoten Eria
Yumi no save abaot wei we Jisas Kraes i bin groap, be Luk 2:52 i givim yumi wan bigfala aedia long hemia.
Ol foto blong woman we i glis long rop i kam long Getty Images
“So, mi sapos blong … ?wanem?”
Mi bin lisin. Rili, mi bin lisin. Tija i bin jekem gud ol rop blong mi, i soem stret long mi olsem wanem blong lego rop, i lukluk stret insaed long ae blong mi, mo talem: “!Bae mi NO lego yu yu foldaon!”
Be long stret taem ia, mi stanap ia: mi seksek mo mi swet; mi lukluk ova long solda blong mi i go daon mo daon … i go daon olgeta, nao mi save se mi mas mekem fas step.
Mi mas aot long klif ia.
Maet yu no bin stap insaed long sus blong mi, we yu stap rere blong jiam aot long wan klif, mo stap hop se yu rere inaf blong glis long rop ia i go daon sef. Be, long saed blong spirit, bae yu bin stap ia finis. Yu save, taem yu bin stadi ol skripja yuwan, mo yu bin harem ol tija oli testifae abaot ol tru doktrin mo prinsipol. Yu filim Spirit i stap invaetem yu blong mekem samting long ol wei we bae i helpem yu blong kam moa olsem Sevya. Yu glad tumas blong tekem step ia, mo soem Lod we yu yu komitim yuwan long gospel blong Hem.
Afta yu tingting: “?Hao nao bae mi mekem hemia?”
Mo wanem we yu luk klia mo we yu luk se yu save mekem sam minit i pas, naoia i go lus. Yu stap ia. Yu stanap long en blong wan klif long saed blong spirit, yu no save stret sapos yu gat ol raet tul, o sapos yu rere blong tekem aksen long trutok ia we yu bin kasem.
Blong kam olsem Jisas Kraes: ?Olsem wanem nao yu stap mekem hemia?
Stat long Stat
Sevya i statem laef blong Hem long wol ia long sem wei we yu mo mi i bin mekem: olsem wan smol bebi Mo wetem taem, olsem yumi, Jisas i stat blong groap (luk long Doktrin mo Ol Kavenan 93:11–17). Hem i mas lan blong wokbaot, toktok, wok mo wok wetem ol narafala man. Hem i mas lan olsem wanem blong kuk, rid mo mekem gud long ol nara pipol.
Wanem we i stap, i we, hao Lod i bin groap i stap long Luk 2:52: “Jisas i stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem.”
Sapos yumi wantem kam olsem Sevya, yumi save folem eksampol blong Hem.
!So bae yumi lukluk long paten ia mo luk, blong yumiwan, olsem wanem we hem i posibol blong kam olsem Jisas Kraes!
“Hem i bin groap moa long waes.”
God i krietem maen blong yumi blong hem i gat bigfala paoa blong jenis i kam gud, i wokemaot ol samting, mo i yusum save. Ol samting we i rili hapen, ol namba, ol skil, fasin blong wokem samting—hamas infomesen we yumi save tekem i kam long maen, !i no gat limit blong hem!
Be olsem Sevya, yumi mas lukaotem blong groap moa long waes, be i no jes blong tekem plante infomesen nomo. Waes fasin, hem i blong save yusum, long stret wei, infomesen we i stap, andastanem ol joes blong yumi, mo mekem ol gudfala desisen.
“Stret fasin blong yusum infomesen, hem i wanem i mekemap waes,” Elda James E. Talmage (1862–1933) blong Kworom blong Olgeta Twelef Aposol i tijim.1 Hem i eksplenem tu olsem wanem Sevya i kasem waes blong hem: “Hem i karem mo hipimap save tru long stadi, mo i kasem waes tru long prea, tingting, mo hadwok.”2 Alma i tijim boe blong hem, Hileman: “O, tingbaot, boe blong mi, mo lanem waes tingting long yangfala laef blong yu; yes, lanem long yangfala laef blong yu blong obei long ol komanmen blong God” (Alma 37:35; oli ademap italik). Tingting long hemia: !Fet, stadi mo fasin blong stap obei, oli leftemap paoa blong yumi blong kasem save, mo kam antap long waes tingting!
“Hem i bin groap moa long bodi.”
Nifae i bin wan bigfala man mo i strong. Hem i bin olsem we ol skripja oli talem: “i bigfala” (1 Nifae 2:16). Mi no gat bigfala bodi. Bodi blong Nifae, God i mekem olsem blong i mekem ol defren aktiviti we i no semmak long bodi blong mi, from se Lod i gat defren wok blong Nifae i wokem. Nifae i mas bildim wan sip, i mas faenem kaekae blong famli blong hem, mo i mas helpem olgeta blong travel tru long wael ples.
Ol bodi blong yumi, oli gat wanem we yumi nidim blong save laef mo glad long wol ia. From bigfala plan blong God, wan niubon bebi i groap long bodi blong hem wetem taem. Yumi no nidim blong developem sam moa pat blong bodi taem yumi stap kam bigwan—ol pat ia, oli bin krietem olgeta finis olsem pat blong bodi blong yumi. !I no nid blong joenem wan samting moa! Be, blong yumi save wok blong God mo blong olgeta raon long yumi, yumi mas holemtaet wan gud helt blong bodi blong yumi.
Bodi blong yumi, oli makem stret olsem ol tempol, o haos, blong spirit blong yumi (luk long 1 Korin 3:16–17; 6:19–20). Presiden Russell M. Nelson i tijim: “Bodi blong yu, nomata wanem presen i kam wetem, i wan naes bigfala kriesen blong God. Hem i wan tabenakol we oli mekem wetem mit mo bun—i wan tempol blong spirit blong yu.”3
Bodi blong yumi i save gotru long ol strong jalenj long laef, ol disabiliti, mo soa, from se yumi stap gat wan eksperiens long laef ia, be Papa blong yumi long Heven i makem bodi blong yumi i stret blong gat sakses blong mekem ol samting we yumi gat blong mekem long laef.
“Hem i bin gro we i kam antap mekem se God i laekem Hem”
Elda Jeffrey R. Holland blong Kworom blong Olgeta Twelef Aposol i tijim se, “fasfala bigfala trutok blong ful taem we i no save finis i we God i lavem yumi wetem evri hat, strong tingting, maen mo paoa blong Hem.”4
God i lavem yu. Iven taem yu stap gat wan nogud dei, Hem i stap lavem yu—wetem evri paoa, wiknes, mo hop blong yu. So ?olsem wanem nao bae yu yu “gro i kam antap mekem se God i laekem [yu]”? !Yu soem se, yu tu, yu lavem Hem bakegen!
Jisas i bin talem wan taem long ol disaepol blong Hem se: “Sapos yufala i lavem mi, bambae yufala i save obei long ol tok blong mi” (Jon 14:15). Fasin blong yu blong stap obei, i soem lav ia we yu gat long God. Fasin blong yu, blong wantem stap obei long ol smol, evri dei aktiviti, i save mekem yu rere blong ansa long ol invitesen blong Hem we bae oli kam long fiuja, mo mekem ol bigfala moa samting oli hapen.
“Hem i bin gro we i kam antap mekem se ol man oli laekem Hem”
!Yu sapraes! Blong gat fulap man i stap folem yu long sosol media i no minim se “ol man oli laekem [yu].”
Jisas i bin soem wan defren wei blong lidim tingting blong ol man—mo huia Hem i bin letem blong i lidim tingting blong Hem. “Nao from we God i stap wetem hem, hem i stap go olbaot long evri ples, i stap mekem ol gudfala wok,” (Ol Wok 10:38).
Presiden Henri B. Aering, Seken Kaonsela long Fas Presidensi i bin talem long wan taem: “Mi save tingbaot yet, olsem we hem i tedei, mi tingbaot ol fren we oli tajem laef blong mi blong gud, longtaem finis i pas. Naoia, oli go finis, be memori blong lav, eksampol, fet mo testemoni blong olgeta i stap leftemap mi yet.”5
!Yu save gat moa paoa blong lidim tingting blong man taem yu kam wan fren blong hem we i stap tajem laef blong hem long gud saed! Blong Ol Yut Oli Kam Strong i stap tijim yu olsem wanem blong: “Soem tru intres long ol narawan; smael mo letem olgeta oli save se yu stap kea long olgeta. Tritim evriwan wetem fasin we i kaen mo respek, mo holemtaet yu blong jajem man mo tokbaot olgeta we oli stap raonabaot long yu … Traehad bigwan blong stap olsem wan fren long olgeta we oli stap semsem, o oli stap olgetawan, oli gat spesel nid, o oli no filim se oli pat blong grup.”6
Tingbaot ol defren man mo woman we yu laekem tru mo stap respektem olgeta—olgeta we yu stap laekem bitim narawan. ?Wanem fasin nao oli developem we i stap mekem yu tingbaot Jisas Kraes? !From se nomata we ol fren blong yu oli gud, be bes Fren blong yu, hem i Jisas Kraes, !mo eksampol blong Hem i eksampol ia nao we yumi wantem folem!
Insaed long Laet blong Hem, i kam long Greg K. Olsen
Evri Samting i Joen Tugeta
“Jisas i stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem” (Luk 2:52). Taem yu stap folem eksampol blong Sevya blong stap groap, bambae yu faenem se evri samting oli wok tugeta i stret nomo, mo bae yu kam moa olsem Hem. !Maen blong yu, wetem bodi mo spirit blong yu bae oli wok tugeta blong gud blong yu, mo bae yu save blesem laef blong plante narawan, mo “wok blong God wetem ful hat, ful paoa blong tingting, ful maen mo ful paoa blong yu”! (Doktrin mo Ol Kavenan 4:2).