Mga Prinsipyo sa Ministering, Enero 2019

Ang Katuyuan Nga Magabag-o sang Aton Ministering

Samtang madamo ang mga katuyuan sang ministering, ang aton mga paghimakas dapat giyahan sang kaluyag sa pagbulig sa iban nga maangkon ang mas malig-on nga indibidwal nga pagkahaylo kag mangin mas pareho sa Manluluwas.

Kon ginahigugma naton ang iban pareho sa ginahimo sang Manluluwas, luyag naton nga buligan sila pareho sa ginhimo Niya. Bilang ang Maayong Manugpahalab, Sia ang labing daku nga ehemplo sang makahulugan nga ministering.

Sa aton pagsunod sang Iya ehemplo sa ministering, importante nga dumdumon nga ang Iya mga paghimakas sa pagpalangga, pag-alsa, pag-alagad, kag pagbugay may mas mataas nga katuyuan sangsa pagsabat lamang sang gilayon nga mga panginahanglan. Sigurado nga nakahibalo Sia sang ila adlaw-adlaw nga mga panginahanglan kag may kaawa sa ila ginaagyan nga pag-antus. Gani, nagpang-ayo Sia, nagpakaon, nagpatawad, kag nagpanudlo. Pero luyag Niya nga maghimo sing masobra sangsa magtatap lang sang mga kauhaw sa sini nga adlaw (tan-awa sa Juan 4:13–14). Luyag Niya nga ang mga yara sa Iya palibot magsunod sa Iya (tan-awa sa Lucas 18:22; Juan 21:22), makakilala sa Iya (tan-awa sa Juan10:14; Doctrine and Covenants 132:22–24), kag makalab-ot sang ila diosnon nga ikasarang (tan-awa sa Mateo 5:48). Matuod man ina sa karon nga panahon (tan-awa sa Doctrine and Covenants 67:13).

May indi maisip nga mga pamaagi nga makabulig kita sa pagbugay sa iban, pero kon ang pinakakatuyuan sang aton ministering amo ang pagbulig sa iban nga makilala ang Manluluwas kag mangin mas pareho sa Iya, magapangabudlay kita padulong sa adlaw nga indi na naton kinahanglan nga tudloan ang aton kaingod nga kilalahon ang Ginuo bangud tanan kita makakilala sa Iya (tan-awa sa Jeremias 31:34).

Ang Sentro sang Igtalupangod sang Manluluwas Nagalampas sa Gilayon nga mga Panginahanglan

May pila ka mga tawo nga nagpangabudlay sing tuman sa pagdala sang ila abyan kay Jesus agud ayuhon sang iya pagkaparalitiko. Sa katapusan gin-ayo sang Manluluwas ang tawo, pero mas interesado Sia sa pagpatawad sang iya mga sala (tan-awa sa Lucas 5:18–26).
Sang ang mga tawo nagdala sa Manluluwas sang babayi nga nadakpan sa pagpanglahi, ang pagpaiway Niya nga magkondenar nagluwas sang iya sini kabuhi sa pisikal. Pero luyag Niya nga luwason man sia sing espirituhanon, nga ginhambalan sia “lakat, kag kutub karon dili ka na magpakasala” (tan-awa sa Juan 8:2–11).
Si Maria kag Marta nagpahibalo kay Jesus kag nagpangabay sa Iya nga magkari kag ayuhon ang Iya abyan nga si Lazaro. Si Jesus nga nagpang-ayo na sang iban sa madamo nga tinion, nag-atrasar sang iya pag-abot tubtob nga napatay si Lazaro. Si Jesus nakahibalo kon ano ang luyag sang pamilya, pero sa pagbangon kay Lazaro halin sa minatay, ginpabakod Niya ang ila mga panaksihon sang Iya pagkadiosnon (tan-awa sa Juan 11:21–27).

Ano ang iban pa nga mga ehemplo nga madugang mo sa sining listahan?

Ano ang Aton Mahimo?

Kon ang aton katuyuan amo ang magbulig sa iban nga mangin mas pareho sa Manluluwas, maliwat sini kon paano kita mag-minister. Ari ang pila ka mga pamaagi nga ining paghangop makagiya sa aton mga paghimakas nga mag-minister.

Ideya 1: Iangot ang Pag-alagad sa Manluluwas

Ang tanan naton nga mga paghimakas sa paghimo sang maayo may kapuslanan, pero sarang kita magpangita sang mga oportunidad nga mas mapaayo ang aton pag-alagad paagi sa pag-angot sini sa Manluluwas. Halimbawa, kon may nagamasakit sa pamilya nga inyo gina-minister, makabulig ang paghatag sang pagkaon, pero ang simple mo nga pagpakita sang pagpalangga mapadako sang imo panaksihon sang pagpalangga sa ila sang Manluluwas. Ang imo pagbulig sa ulobrahon sa ugsaran maapresyar, pero ayhan, mangin mas makahulugan ini kon updan sang pagtanyag sang priesthood blessing.

Si Elder Neil L. Andersen sang Korum sang Dose ka mga Apostoles nagpanudlo: “Ang tawo nga may maayo nga kabubut-on makabulig sa iban sa pagkaayo sang goma, pagdala sang roommate sa doktor, pagpanyaga upod sa isa nga nagakasubo, ukon pagyuhum kag pagtamyaw agud mapasanag ang adlaw.

“Pero kinaandan para sa sumulunod sang una nga kasuguan nga dugangan ining importante nga mga buhat sang pag-alagad.”¹

Ideya 2: Magtutok sa Dalan sang Kasugtanan

Sa iya pagpamulong-pulong sa mga miyembro sa una nga kahigayonan bilang Pangulo sang Simbahan, si Pangulong Russell M. Nelson nagsiling: “Magpabilin sa dalan sang kasugtanan.” Ang paghimo kag pagtuman sang mga kasugtanan “magabukas sang puwertahan sa tagsa ka espirituhanon nga bugay kag pribelihiyo nga sarang maangkon.”²

Bilang mga Santos sa Ulihing mga Adlaw, ginbunyagan kita, ginkumpirmahan, kag nagbaton sang regalo sang Balaan nga Espiritu. Ang takos nga mga miyembro nga lalaki nagabaton sang priesthood. Nagakadto kita sa templo para sa aton endowment kag agud mahugpong sa aton mga pamilya sa wala’y katubtuban. Ining nagaluwas nga mga ordinansa kag ang kaupod sini nga mga kasugtanan importante gid para mangin pareho kita sa Iya agud makaupod naton Sia.

Sarang naton tungdan ang importante nga papel nga magbulig sa iban sa paglakat sa sinang banas kon ginabuligan naton sila sa pagtuman sang ila mga kasugtanan kag sa paghanda sa paghimo sang palaabuton nga mga kasugtanan.³ Paano ninyo mabuligan ang mga indibidwal ukon mga pamilya nga inyo ginaalagaran sa pagbaton sang madason nga ordinansa nga ila kinahanglanon? Ayhan nagakahulugan ini sa pagbulig sa isa ka amay nga maghanda sa pagbunyag sang iya bata nga babayi, nga ginapaathag ang mga bugay sang madason nga kasugtanan nga pagahimuon, ukon pagpaambit sang mga paagi sa pag-angkon sang mas makahulugan nga eksperiyensya sa pagbag-o sang aton mga kasugtanan kon mag-ambit sang sakramento.

Ideya 3: Mag-agda kag Magpaisog

Kon nagakaigo, makighinun-anon sa inyo mga ginatatap parte sa ila pagkahaylo kag mga paghimakas nga mangin mas Cristohanon. Pahibal-a sila sang mga kabakod nga inyo nakita kag ginadayaw sa ila. Hibaloa kon diin sa pamatyag nila sarang pa sila mag-uswag kag hambali kon paano kamo makabulig. (Para sa dugang nga ihibalo parte sa paghinun-anon sa inyo mga gina-minister, tan-awa sa “Counsel about Their Needs,” Liahona, Sept. 2018, 6–9.)

Indi magkahadlok sa pag-agda sa ila nga sundon ang Manluluwas kag tugotan Sia nga magbulig sa ila sa paglab-ot sang ila diosnon nga ikasarang. Ining pangagda sarang magbag-o sang kabuhi, kon ginaupdan sang pagpakita sang inyo pagsalig sa ila kag inyo pagtuo sa Iya.

Anum ka mga Paagi nga Makabulig Kita sa Iban sa Pag-uswag padulong kay Cristo.

Nagasunod ang mga panulin sa pagbulig sa iban sa ila paghimo sang mga kaayohan sa kabuhi kag pag-uswag sa dalan sang kasugtanan. (Tan-awa sa Preach My Gospel, kapitulo 11 para sa dugang nga mga ideya.)

Magpaambit. Mangin tunay kag maisog sa pagpaambit kon paano ang Manluluwas nagbulig sa imo sa imo pagtinguha nga magpalapit sa Iya paagi sa pagpangabuhi sang mga prinsipyo sang ebanghelyo bisan pa may mga upang.
Magpromisa sang mga bugay. Ang mga tawo nagakinahanglan sang rason sa pagbag-o nga mas makakumbinsi sangsa mga rason sa indi pagbag-o. Ang pagpaathag sang mga bugay nga nagaupod sa pagbuhat makahatag sing gamhanan nga motibo (tan-awa sa Doctrine and Covenants 130:20–21).
Magpangagda. Ang pagpangabuhi sang prinsipyo sang ebanghelyo nagadala sang panaksihon nga matuod ini (tan-awa sa Juan 7:17) kag nagatuytoy sa mas madalom nga pagkahaylo.⁴ Halos tanan nga mga pagsugilanonay mahimo maglakip sang simple nga pangagda sa paghimo sang isa ka butang nga makabulig sa ila nga mag-uswag.
Magplano sing ulolupod. Ano ang kinahanglan matabo para mangin madinalag-on sila sa pagtuman sang ila mga tug-an nga magbag-o? Paano kamo makabulig? May kalawigon bala sang tiyempo nga kinahanglanon?
Magsuporta. Kon makabulig, magpahamtang sang sistema sang suporta halin sa mga tawo nga makabulig sa indibidwal nga magpabilin nga inspirado kag magmadinalag-on. Kita tanan nagakinahanglan sang manugpaisog.
Magfollow-up. Regular nga paambit ang pag-uswag. Magpadayon nga nakatutok sa plano pero pasanyuga pa gid ini kon kinahanglanon. Mangin pasensyoso, pursigido, kag nagapaisog. Ang pagbag-o sarang madugayan.

Pangagda sa Pag-akto

Hunahunaa ang mga pamaagi sang imo paghimakas sa pag-minister—alangay daku kag gamay—sarang makabulig sa iban nga mapalig-on ang ila pagkahaylo kag mangin mas pareho sa Manluluwas.

© 2019 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18 Petsa sang pagtugot sa paglubad: 6/18. Paglubad sang Ministering Principles, January 2019. Hiligaynon. 15762 861