Padahngkan en Papah, Senweri 2019

Kahrepeo Me Pahn Wekidala Atail Doadoahk en Papah

Mie kahrepe tohto en papah, ahpw atail wiewia kan anahne en sang ineng mehlel en sewese mehteikan ren weliakapwala mehlel oh duwehla Sounkomouro.

Ni ahnsou me kitail kin poakohng meteikan duwehte Sounkomouro poakohng irail, kitail men sewese irail duwehte me E ketin wiahier. Pwehki ih me Silepen Sihpw Mwahuo, Ih me wie karasaras me keieu unsek duwen papah.

Ni atail pahn alahsang Ih nan atail doadoahk en papah, e kesempwal ong kitail en tamataman me Sapwellime doadoahk en poakohng, pwok, papah, oh kupwuramwahu wiawi ong ni kahrepe ile sang apwalih anahn en ahnsouwohte. Udahn ni mehlel E ketin mwahngier arail anahn akan en rahn koaros oh kin kupwurohiraila nan arail lokolok kan. Iei me E ketin kamwahuwihiraila, kamwenge irail, mahkohng irail oh ketin padahkih irailier. Apw E ketin kupwurki wia me laudsang likin apwalialahte anahn en ahnsouwohte (tehk nan Sohn 4:13-14). E ketin kupwurki irail en idawehn Ih (tehk Luk 18:22; Sohn 21:22 esehla Ih (tehk Sohn10:14; Doctrine and Covenants 132:22–24), oh pwe irail en kak uhdahn wewehkihla uhdahn ihs irail (tehk Madui 5:48). Soahngohte pil pwung rahnwet (tehk Doctrine and Covenants 67:13).

Mie soangen mwekid tohtohie me kitail kak kapahiakihda mehteikan, apw imwilahn dahme kitail koadoakoadoahke en atail padahk en papah iei kitail en kak sewese mehteikan en kak esehla Sounkomouro oh irail en kak en wie duwduwehla Ih, kitail pahn nantiong doadoahk lao ahnsou me kitail sohla pahn anahne padahkih mehn mpetail kan en esehla Kauno pwehki kitail koaros esehier Ih. (Seremaia 31:34).

Dahme Sounkomouro kin kesempwaliki laudsang Anahnepen Sawas en Ahnsouwohte

• Aramas tohto wia uwen arail kak pwehn wahla kempoakeparail kan rehn Sises pwe en kamwahwiala arail soumwahu en mwoator. Ahpw Sounkomouro kamwahuwiala ohlo, apw E ketin inengieng mahkehng dipe kan (tehk Luk 5:18-26).

• Ni ahnsou me re kahredohng liho rehn Sounkomouro pwe e dierekda nan eh kamwahl, liho pitala pwehki e sohte pakadeikda Reh. Apw E kupwurki kapitala liho ni pali ngehn, mahsaniong, “ kohwei, oh sang met kohla ke dehr pwurehng wiahda dihp” (tehk Sohn 8:2–11).

• Mery oh Marda ekerelahng Sises pekpeki en ketla oh kamwahuwiala kempoakepah, Lasarus. Sises, me kamwkamwahuwila mehteikan pak tohto, apw kapwandehla Eh pahn lella lao mwurin Lasarus mehla. Sises ketin mwahngih dahme peneinei wet mwahuki, apw ni Eh kamourada Lasarus sang mehla, E kakehlakada arail kadehde kan duwen ihs Ih (tehk Sohn 11:21–27

Ia ekei karasaras me ke kak kapatahieng?

Dah me Kitail Kak Wia?

Ma ih kahrepe en kitail en sewese mehteikan en duwehla Sounkomouro, e pahn wekidala mwomwen atail pahn papah. Iet ekei wiepe kan duwen ire kesempwal wet eh kak en kaweidih atail doadoahk kan en papah.

Iren Madamadau 1: Kadokepene Sounkomouro oh doadoahk en papah

Atail doadoahk kan koaros en wia me mwahu inenen kaselel, apw kitail kak kilangada wasahkan me pahn kalaudehla atail papah ni ehukieng Sounkomouro. Karasape, ma peneinei me ke kin papah soumwahuda, wiahda kenerail mwonge pahn pil sawas, apw kisin mehngot mengei en limpoak kak nehne sang ni ahmw kadehde en limpoak en Sounkomouro. Ahmw sewese irail doadoahk en likin ihmw re pahn inenen kalahnganki, apw mwein me pahn inenen sawas sang ma ke kieng irail kapahi en prihsdud.

Elder Neil L. Andersen en Woahnpoaron Ehk Riemen padahngki: “Aramas me ahniki mohngiong mwahu men kak sewese aramas emen en welian nah daiahn sdohsa, idanla ienge tohn skuhl rehn tohkte, iangih mwongehn souwas rehn aramas emen me insensuwed, de sirei oh inda kaselelieng aramas en kansenemwahuwih aramas.

“Apw me kin ideidawehn keiou en kosened pahn pein kapatpatieng mwekid kesempwal kan en papah.”¹

Iren Madamadau 2: Dokdokehte ahl en Inou

Ni en Presiden Russell M. Nelson tepin kapahrek ni eh wiahla Preseden en Mwomwohdiso, E mahsanih, “Tengetengediong nan ahl en inouo.” Wiahda oh kolokol inou kan “pahn ritingada wenihmw en kapahi en pali ngehn koaros me mie.²

Nin duwen Souleng en Imwin Rahn Akan, kitail pepdaisier, kasarawier, oh alehdier kisakis en Ngehn Sarawi. Ohl warohng kan kin alehda prihsduhd. Kitail kin patohla nan tehnpas sarawi ong pein atail endowment oh pwehn katengtengieng atail peneinei kan kohkohlahte. Tiahk sarawi en komourala pwukat oh ar inou kan me kesempwal ong kitail pwehn duwehla Ih pwe kitail en kak patopato Reh.

Kitail kak ahniki pwukoa kesempwal pwehn sewese meteikan nan ahlo ni atail pahn sewese irail en kapwaiada arail inou kan oh onopadahng wiahda inou kan nan ahnsou kohkohdo.³ Ia duwen atail kak sewese emenemen de peneinei kan me kumwail kin papah en alehda tiahk sarawi kan me re anahnehte? Met kak wewehki sewese pahpa men en kaunopadahng pepdaisih pein nah serepein, kawehwehieng kapahi kan en wiahda inou kan me e pahn alehdi mwuri, de ehukieng duwen wiepe kei me pahn sewese ni ahnsou me kitail kin wiahda inou sapahl ahnsoun tungoale kamadipw sarawi.

Iren Madamadau 3. Luhk oh Koangoange

Ahnsou me konehng, panawih irail akan me ke kin apwalih duwen arail wiliakapwala oh ar nannatieng en duwehla Krais. Kehsekieng irail arail kehlail kan me ke kilangada rehrail oh kapinga irail. Diarada wasa kan me re pehm re kak keirda ie oh kosoiapene dahme ke kak sawaski. (Mehn kapatapat duwen peneupene nanpwungen kowe oh irail me ke kin papah, tehk “Panawih duwen Arail Anahn kan,” Liahona, Sept. 2018, 6–9.)

Dehr masak en lukei irail en idawehn Sounkomouro oh mweidehng Kauno en sewese irail en koahiekla rehn Koht. Luhk wet kak kawiliakapwada mour, ni ahnsou me ke kapatahiong kasalepen ahmw koapworopworkin irail oh ahmw pwoson Ih.

Soang Weneu me Kitail Kak Sewese Mehteikan Wenowohngete Krais

Mehn sawas kei pwehn utungada meteikan kamwahuiala arail mour oh wenlahte mwowe nan ahl en inouo irekdi pah. (Tehk Kalohki ehi Rongamwahu,Irelaud 11, ong ekei iren madamadau.)

1. Ehukihda Me Ke Esehla Kin mehlel oh eimah ni ahnsoun ehuki duwen Sounkomouro eh ketin seweseiukehr ni ahmw nantiong en kerenlahng Ih sang ni momourki padahngkan en rongamwahu mehndahte mehn kerempwah kan.

2. Inou kapahi kan. Aramas anahne mehkot me pahn kahrehiong irail en weliakapwala sang ni sohte kahrepe en weliakapwala. Kawehwehda kapahi kan iangahkiong wiewia kak kihda kamwekid kehlail (tehk Doctrine and Covenants 130:20-21).

3. Luhk. Momourki padahngkan en rongamwahu kin karehiong en mie ahmw kadehde me pwung (tehk Sohn 7:17) oh kin kalaudehla weliakapw mehlel.⁴ Kereniong nan mwekid koaros ma kin mie luhk en wia mehkot e kin kak sewese irail en pweida.

4. Koasoanepene. Dahme anahne wiawi ong irail pwe en kak pweida nan arail koasoandi en weliakapwala? Ia mwomwen ahmw kak sawas? Mie ahnsou me ke koasoanehdi en kapwaiada?

5. Utung. Ma e konehng, koasoanehdi amwail pwihn en utuht pwehn sewese emenemen en wie pwapwahtiet te oh pweida. Kitail koaros kin anahne mehn kaping.

6. Kin tetehk ia ire. Epweniki ehukihda dahme pweida. Ke en dokdokehte koasoandio ahpw kawekiala ma mie anahnepe. Ke en kanengamah, poadidi, oh ke en kakehlaka. Wekidala kak pwand en wiawi.

Luhk en Wiewia

Medmedewe ahmw doadoahk en papah kan—mehnda ma lapala de tikitik—kak sewese mehteikan en

© 2019 sang Intellectual Reserve, Inc. All rights reserved. Ntinda nan USA. Mweimwei ni lokaiahn wai:6/16. Mweimwei en kawewehdi:6/16. Kawehwe en Ministering Principles, January 2019. Pohnpeian. 15762 885

Ire kan

1. Neil L. Andersen, “A Holier Approach to Ministering” (Brigham Young University devotional, Apr. 10, 2018), 3, speeches.byu.edu.

2. Russell M. Nelson, “Ni Atail Wiahki Teieu Wenla Mwowe,” Liahona, Apr. 2018, 7.

3. Tehk Henry B. Eyring, “Sapwellimen Kauno serepein en inou kan,”Liahona, May 014, 125–28.

4. Kilang David A. Bednar, “Weliakapwala ong Kauno,” Liahona, Nov. 2012, 106–109.

Kahrepen kisin lepin padahngkan en “Padahk kan en Papah” pwe en sewesei kitail en esehla mwomwen apwalih mehteikan—apw kaidehn mehn kosoiahte lepin padahko nan ahnsoun pwarek kan. Ni atail pahn ahnla irail akan me kitail kin papah, Ngehn Sarawi pahn kasairehkieng kitail en wehwehki soangen kaweid dah me irail pahn anahne me pahn kapatahiong atail kin nsenohkin irail oh poakehkin irail.