Metheo ea Bosebeletsi, Pherekhong 2019

Morero O Tla Fetola Bosebeletsi Ba Rona

Matla a rona bosebeletsing a tlameha ho tataisoa ke takatso ea ho thusa ba bang ho fihlela ts’okoloho e tebileng bongoeng ‘me ba ts’oane haholoanyane joalo ka Mopholosi.

Ha re rata ba bang joalo ka ha Mopholosi a ba rata, re batla ho ba thusa joalo ka ha a ne a etsa. Joalo ka molisa ea molemo, ke Eena mohlala oa bohlokoahali oa bosebeletsi.

Ha re bapisa bosebeletsi ba rona joalo ka ho ts’oana le Eena, ho bohlokoa ho hopola hore matla a hae a ho rata, ho phahamisa, ho sebeletsa, le ho hlohonolofatsa a ne a na le sepheo se holimo ho feta ho arabela tlhoko ea hanghang. Bonneteng O ne a tseba ka litlhoko tsa bona tsa letsatsi le letsatsi ‘me O ne a na le kutloelo bohloko ho mats’oenyeho a bona ka nako eo. Ka baka leo u ile a folisa, a ts’oarela, ‘me a ruta. Empa O ne a batla ho feta ho hlokomela lenyora la kajeno (bona Johanne 4:13 – 14) O ne a batla hore ba mo potapotileng ba mo latele (bona Luka 18:22; Johanne 21:22, ba mo tsebe (bona Johanne 10:4; Lithuto tsa tumelo le Lilekane 132:22 – 24), ‘me ba fihlele bo- molimo ba bona boo e ka bang bona (bona Mattheu 5:48). Se ts’oanang ke ‘nete le kajeno (bona Lithuto tsa tumelo le Lilekane 67:13).

Ho na le litsela tse sa baloeng tseo re ka thusang hore ba bang ba hlohonolofale, empa ha sehlohlolo sa morero oa rona oa bosebeletsi e le ho thusa ba bang ho fihlela ho tseba Mopholosi ‘me ba ts’oane haholoanyane joalo ka Eena, retla be re sebeletsa ho isa letsatsing leo ka lona re ke keng ra hloka ho ruta ba habo rona ho tseba Morena hobane re tla mo tseba kaofela (bona Jeremia 31:34).

Talimo ea Mopholosi e ne e le ka pele ho litlhoko tsa hang hang

Batho ba ‘maloa ba ile ba fihlela methati e meholo ho tlisa motsoalle oa bona ho Jesu ho tla folisoa komello ea litho. Qetellong Mopholosi O ile a folisa monna eo, empa thaasello ea hae e ne e le haholoanyane ho mo ts’oarela libe tsa hae (bona Luka 5:18 – 26).
Ha batho ba ne ba tlisa mosali ea ts’oeroeng ka bohlola ho Mopholosi, ho ts’oara kahlolo ha Hae ho ile ha pholosa bophelo ba mosali eo nameng. Empa O ne a batla ho mo pholosa le moeeng hape, a mo joetsa hore “tsamaea u se hlole u etsa sebe hape” (bona Johanne 8:2 – 11).
Maria le Maretha ba ile ba romela molaetsa ho Jesu ba mo kopa ho tla folisa motsoalle oa hae, Lazaru. Jesu, ea ileng a folisa ba bang ka makhetlo a sa baloeng, O ile a lieha ho tla ho fihlela Lazaru e se e le mofu. Jesu o ne tseba seo lelapa le se batlang, empa ka ho tsosa Lazaru bafung, O ile a matlaftsa bopaki ba bona ka bo-Molimo ba Hae (bona John 11:21-27).

Ke mehlala e feng eo u ka e eketsang lethathamong le?

Keng seo re ka se etsang?

Haeba morero oa rona ke ho thusa ba bang ho ts’oana haholoanyane joalo ka Mopholosi, ho tla fetola kamoo re sebeletsang ka teng. Tsena ke tse ling tsa litsela tseo kutloisiso ena e ka tataisang matla a rona a ho sebeletsa.

Mohopolo oa 1: Kopanya bosebeletsi le Mopholosi

Matla oohle a rona a ho etsa botle a bohlokoa, empa re ka batla menyetla ea ho chorisa bosebeletsi ba rona ka ho bo kopanya le Mopholosi. Mohlala, haeba lelapa leo o le sebeletsang le kula, se jeoang se ka ba molemo, empa ponts’o ea hau e bonolo ea lerato e ka menahanyoa ke bopaki ba hau ba lerato la Mopholosi ho bona. Thuso ea hau ka mosebetsi oa serapa e ka thabeloa, empa mohlomong e ka etsoa hore e be le moelelo o moholoanayne ke mpho ea hlohonolofatso ea boprista.

Moholo Neil L. Anderson oa Mokhatlo oa Baapostola ba Leshome le Metso e ‘Meli o rutile hore: motho a nang le pelo e ntle a ka thusa e mong ho lokisa lebili la koloi, ho isa mohaisane ngakeng, ho ja lijo tsa mots’eare le e mong ea hlonameng, kapa ho bonya le ho re lumela ho natefisa letsatsi.

“Empa molateli oa molao oa pele o moholo ka tlholeho feela o tla eketsa liketso tsena tsa bohlokoa tsa bosebeletsi.”¹

Mohopolo oa 2: Kopanya bosebeletsi le Mopholosi

Ha a bua le litho tsa kereke lekhetlo la pele e le Moetapele oa kereke, Moetapele Russel M. Nelson o itse: “Tsitlallelang tseleng ea selekane.” Ho etsa le ho boloka lilekane “ho tla bula mamati oohle a litlhohonolofatso tsa se-moea tse teng.”²

Re le bahalaleli ba mehla ea kajeno, rea kolobetsoa, re tiisoe, ‘me re amohele mpho ea Moea o Halalelang. Litho tsa kereke tsa batho ba batona ba lokelang ba amohela bo-prista. Re ea tempeleng bakeng sa likano tsa rona le ho tiisoa hammoho re le malapa ka ho sa feleng. Lits’ebeletso tsena tse pholosang le lilekane tsa teng li bohlokoa bakeng sa rona ho fihlela ho ts’oana le Eena hore re tle re be le Eena.

Re ka bapala karolo ea bohlokoa ho thusa ba bang leetong leno ha re ntse re ba thusa ho boloka lilekane tsa bona le ho itokisetsa ho etsa lilekane tsa ka moso.³ U ka thusa joang motho ka bo mong kapa malapa ao o a sebeletsang ho fumana ts’ebeletso e latelang eo ba e hlokang? Hona ho ka bolela ho thusa ntate ho itokisetsa ho kolobetsa morali oa hae, o hlalosa litlhohonolofatso tsa selekane se latelang se tlamehang ho etsoa, kapa ho arolelana litsela tsa ho fihlela moelelo oa bohlokoa ha re nchafatsa lilekane tsa rona ka ho fumana selallo.

Mohopolo oa 3: Mema ‘me o khothatse

Ha maemo a lumela, eletsana le bau u ba hlokomelang ka ts’okoloho ea bona le boiteko ba ho ts’oana haholoanyane le Kreste. Etsa hore ba tsebe makhabane ao o a bonang le ho a thabela ka hare ho bona. Fumana hore na ke hokae moo ba ka ntlafatsang ‘me le bue kamoo u ka thusang ka teng. (Ho fumana haholoanyane ka ho eletsana le bao o ba sebeletsang, bona “Eletsanang ka litlhoko tsa bona,” Liahona, Loetse 2018, 6 – 9.)

Se ke oa ts’aba ho ba memela ho latela Mopholosi le ho Mo lumella ho ba thusa hore ba fihlele bo- molimo ba bona boo e ka bang bona. Memo ena e ka fetola maphelo, ha e tsamaea le ponts’o ea ts’epo ea hau ho bona le tumelo ea hau ho Eena.

Litsela tse ts’eletseng tseo re ka thusang ba bang ho tsoela pele ho ea ho Kreste.

Tse latelang ke likeletso bakeng sa ho ts’ehetsa ba bang ha ba etsa liphetoho tsa tsoelopele bophelong le ho tsoela pele tseleng ea selekane. (bona Ruta Evangeli Eaka, Khaolo ea 11, bakeng sa mehopolo e meng.

Abelana Ts’epahala ‘me u be sebete hau arolelana kamoo Mopholosi a o thusitseng ha u ntse u leka ho atamela ho Eena ka ho phela metheo ea evangeli le hara liphepetso.
Ts’episa litlhohonolofatso Batho ba hloka mabaka a ho fetoha a susumetsang ho feta mabaka a ho se fetohe. Ho hlalosa litlhohonolofatso tse tsamaeang le ketso e ka fanang ka ts’usumetso e matla (bona Melao ea thuto le Lilekane 130:20 – 21).
Mema Ho phela motheo oa evangeli ho tlisa bopaki ba hore ke ‘nete (bona Johanne 7:17) ‘me ho khannela ts’okolohong e tebileng.⁴ Kopakopano e ngoe le engoe e ka kenyeletsa memo e bonolo ea ho etsa ntho engoe e tla ba thusa ho tsoelapele.
Rerang ‘Moho Ke eng se tlamehang ho etsahala bakeng sa hore ba atlehe ho boloka boikemisetso ba bona ba ho fetoha. U ka thusa joang? Na ho na le nako e balletsoeng e keneletseng?
Ts’ehetsa Haele taba e thusang, haha khokahano ea ts’ehetso ea batho ba ka thusang motho ka bo mong ho lula a na le cheseho ‘me a atlehe. Kaofela re hloka ea ka re rorisang.
Ts’alo morao Arolelana tsoelopele khafetsa Lula o tsepame holima moralo, feela o ntlafatse ha ho hlokahla E ba le mamello, tjantlello, le ho khothatsa. Phetoho e ka nka nako.

Memo ea ho nka khato

Ela hloko litsela tseo likhato tsa hau tsa bosebeletsi – tse kholo le tse nyane – li ka thusang ba bang ho tebisa ts’okoloho ea bona ‘me ba ts’oane haholoanyane joalo ka Mopholosi.

© 2019 ka Intellectual Reserve, Inc. All rights reserved E hatisitswe USA. Tumello ea Sekhooa: 6/18. Tumello ea Phetolelo: 6/18. Phetolelo ea Ministering Principles, January 2019. South Sotho. 15762 739