Osisechakl er a Odingel, Ongeru el Buil 2019

Mo Oba Chubechub el Reng e Oldingel

A Oldingel a mesebechakl. Ng sebeched el mesebechakl er a rebebil sel dolasem el mo medengei a teletael el tir a ngara chelsel e dochotii el kmo ngarngii er a rengud el mo ngosuterir.

A Demad er a Babeluades a soal a bo deuai Ngii, meng tiaikid a uchul e a ringel el bo dechebangel er tial klengar a sebechel mo klubeled alsekum e kede ultuil er Ngii e melemolem el ngara rolel. Eng di, ng meringel a dolemolem el ngara rolel sel sekum e kid omelchesiu el uaia di el kid el tang el chelebangel aikal ringel.

Ng di diak el di el kid el tang el ngara tial omerael. A Osobel a kmal ungil medengei, leng mlo chelbangel a rokui el tekoi me Ngii a sebechel medengei el uase ng mekerang a lolngeseu er kid ra ringel ma ongarm (mesa Alma 7:11–12; Doctrine and Covenants 122:8). Ngii a mengerchir kid el mo oltirakl er Ngii e dirrek el mo ochotii chubechub er kid. A bek el chedal a Ikelesia a mla soiseb er a telbiil el mo “lmangel lobenterir a re ngara klengit el reng; e mengelaod er a rengara klengit el reng” (Mosiah 18:9). Ng diak el iior ra ringel el dengarngii, le kid a mla mosisechakl er a chedaol llechukl el mo “melikou er a rebebil, e [melisiich] er a remechitechetong” me a “omerollem bol melemalt, me lak bol uchul e mtouchakl” (Hebru 12:12–13; dirrek el mesa Isaiah 35:3–4; Doctrine and Covenants 81:5–6).

Me sel dorkedeii chimal a tang, me bo lultuil er kid, e dorael lobengterir, e kede ngosuterir el ngara rael el bedul Osobel el diak di domult er tir el merekong—el ngii a tara moktek er a odingel—kede dirrek el omekungil er tir (mesa Doctrine and Covenants 112:13).

Ngera a Chubechub?

A chubechub a sel dodengelii a ngara rengul, me a uldesuel, me a teletael el chad a ngara cheslel er sel ngii osengel a chad ng diak el osenged.¹

A chubechub a klou a ultutelel er a chelsel odngeled el mo er a rebebil e toketekii a moktek er a odngeled el odam me a odos. Ngosisebid er a chelsel a teletael el rebebil a ngara chelsel.

Kede mo Oureacher Oicherel a Tara Chad

Ngarngii a cheldecheduch el kirel a tal sekemerur el Uriul-klebesei el Santo el chad el blechoel dengchokl ruriul er a chelsel a ikelesia. A tara chedal a elders quorum er a le mad, e a bisop a milsa tial telungalek a klengeltengat er a priesthood el mengelaod er a rechedal tial telungalek. A rengarra Relief Society a ulab a kall. A resecheli me a retonari a uleldingel er tial telungalek e millekoi el kmo, “Mouchais a lengarngii a sebechemam el ngosukemiu er ngii.”

Eng di ngika el sekemerur el chad er a be loldingel er tial telungalek er a mocha iieta sils, eng millengod er a chesimer me ngika el melakl dil a mlei er a tuangel, eng dula el kmo, “Ak me mengedmokl er a blimiu.” Chelsel a tela el sikang, e a oecherir a rechad er tial telungalek a mla mengatech e mekedmokl el kirel a kemeldiil. A bocha el Sandei e a telungalek er ngika el mla mad el chad a dilengchokl ruriul lobengkel ngkal sekemerur el chad.

Ngkaikid a chad el mle sebechel kudmeklii a usbechellel tial telungalek. Tir me a ngii a di diul mlukngeltengat er a ungil chubechub lodngelel ngkal chad.

Ak Mekerang e mo Chubechub?

A rebebil a kuk di ngeltengat loba sengk er a chubechub. Eng di tirkel kuk diak, e ngarngii a ungil chais. Aikal merekong el okedei me a derngel rak, e te betook el chad er a omesuub a mla mesuub el kirel a tekoi el chubechub. Ng uaisei el betook er tir a kakerous a uldesuir el kirel tial tekoi, eng di oumesingd er tir a kongei el kmo a tekoi el chubechub a sebeched el suubii el tekoi.²

Ng sebeched el meluluuch el kirel a sengk er a chubechub. Sel mo uchul e kid a kmal mo medengelii tial tekoi, eng dirrek el ungil a bo demui el medengelii a urerel a chubechub. Aikakid el tekoi a lousbech a rebetok el ngii a teletelel a chubechub.³ Aikang a sebechel diak desal melchesiu eng duubech, eng di sel bo dodengelii a teletelel eng meskid a techall el mo mengedechuul er kid el mo ungil er ngii.

1.Mo Medengei

A chubechub a kired el mo telkib el medengelii a teletael el chad a ngar a chelsel. Sel bo dungil medengelii a teletael el chad a ngara chelsel, eng beot a bo dodengei a lomelchesiu me a ngesou el sebeched lodars.

Sel dungil lorrenges, e doker a ker, e dechadecheduch lobengterir a rebebil a meklou a belkul el uchul e kid a mo medengei a teletael el tir a ngara cheslel. Mluut el mesuub el kirel aikal osisechakl er sel babier er a Osisechakl er a Odingel:

• “Eim el Tekoi el Ungil Lorrenges el Chad a Meruul,” Liahona, June 2018, 6.

• “Mesaod el kirel aikel Usbechellir,” Liahona, Sept. 2018, 6.

• “Ousbech a Ngesou er a Rebebil—alsekum e te Usbechall,” Liahona,Oct. 2018, 6.

Sel dosiik el mo ungil medengei, eng kired el mo ungil medengei a teletael el tir a ngara chelsel e diak di dultuil er a uldesued er a kuk teletael er a rebebil. Leng sebechel, morngii a cheleuid le uchul a rraureng er a rechad.

2.Omtab

Sel blakereng er kid el mo mengelim er a rechelmongel e mengelaod er a rousbech ongelaod, eng sebeched el meluluuch me a Chedaol Reng a mo ngosukid el mo medengei a lomelchesiu a chad me a ngesou el sebeched lodars.⁴

Sel bododengelii a teletael el chad a ngara chelsel, e a dersta er kid— a di lengii el duubech me a lak— a sebechel mo omtab aikel bo domdasou me a domelchesiu omko kede ngara osisiu el teletael. Sel bododengei a lomdasou me a lomelchesiu, lobengkel a ulekrael er a Chedaol Reng, a sebechel mekrolid el mo ngosuterir.

Sel bo dungil medengelii a teletael el chad a ngara chelsel e domtab aikel lomelchesiu, eng klou a belkul el diak dorritel er tir (mesa Matthew 7:1). Sel desal merritel el kmo ng milkera chad e soiseb er tial teletael a sebechel rullid el mo beot a rengud er a ringel el chad a ngara chelsel.

3.Molngeseu

A teleteled a dolngeseu a klou a belkul le tiaikid ochotii a chubechub er kid. Ng betook a rolel a cheldecheduch me a klemedengei lokiu a tekoi el tuobed er a ngor malechub eng di omeruul. Ng klou a belkul bododengei el kmo a moktek er kid a diak el sal kired el mo mesemechokl a chetituokel. A moktek er kid a blechoel mesebechakl e melisiich me lodengei el kmo ng diak el dil tir el tang. Ng sebechem el di dmu el kmo, “Ngungil me ke mla chouchais” malechub e “Mousubes eng dilubech el uaisei. Ng locha kmal meringel er kau.”

Ngii di el teletael a nger kid a kirel ngara rengud. Ea di lungil besul, e becherei mel ues a chelitechetum me a sebekreng er kau mel sebechel dirrek el smisichii a deleuill.

Ongit el mo Meruul

Sel momtab a teletael el rechad el moldingel er tir a ngara cheslel, e mrellau el uaia mngara chelsel e ngera sel obetik er ngii el klou a belkul omko ke ngara chelsel. Moluluuch el mo medengei el kmo ngera te omelchesiu e motirakl. A nger kau a locha beot, eng di ng klou a belkul.

© 2019 by Intellectual Reserve, Inc. All rights reserved. Milluches er a USA. Kengei er a English: 6/18. Kengei ra Oidel: 6/18. Oidel a Ministering Principles, February 2019. Palauan. 15763 881

Uleklatk

1. Mesa W. Ickes, Empathic Accuracy (1997); me a M. L. Hoffman, Empathy and Moral Development: Implications for Caring and Justice (2000).

2. Mesa, okesiu er a, Emily Teding van Berkhout me a John M. Malouff, “The Efficacy of Empathy Training: A Meta-Analysis of Randomized Controlled Trials,” Journal of Counseling Psychology (2016), 63(1), 32–41.

3. Mesa, okesiu er a, Brené Brown, I Thought It Was Just Me (But It Isn’t) (2008); Theresa Wiseman, “A Concept Analysis of Empathy,” Journal of Advanced Nursing (1996), 23, 1162–67; me a Ed Neukrug and others, “Creative and Novel Approaches to Empathy: a Neo-Rogerian Perspective,” Journal of Mental Health Counseling, 35(1) (Jan. 2013), 29–42.

4. Mesa Henry B. Eyring, “The Comforter,” Liahona, May 2015, 17–21.

A Jesus Kristo a Uleldingel loba Chubechub

A Osobel er a boldum er a re Nephites, e Ngii a ulsisechakl er tir el mo el muut er sera a bo lodengelii, a teletael el tir a mlara chelsel, el kmo te dimlak bolodengei a rokui el tekoi el Ngii a ulisechakl er tir. Eng di Ngii a dirrek el mle medengei el kmo ng dimlak el sorir a lorael.

Ngii a ngildechii a teletael el mlo diak lolisechakl er tir e bai ulechais el kirel ebangkelio el kmo ngmo ngosuterir er a ikel lousbech a bedengir e mle olengit er tir mel ngiteterir tirkel smecher, me a rechelemus, me a remikou, me a retelemall. E Ngii a mle omekungil er tir. E Ngii a milluluuch el kirir e ngilsuterir a rengelekir, el chiloit a temel lobengterir e mle omekngeltengat er tir.

Ngera kede subii er a okesiul Osobel el kirel a chubechub er sera loldingel er a re Nephites?

“Osisechakl er a Odingel” a ngosukid el mo medengei e omekerreu er a ta me a tang—ng diak el klumech el domerk er ngii sel bo doldingel. Sel dorael mo ungil medengelterir tirkel dosiou er tir, e a Chedaol Reng a mo mekrolid el mo medengei el kmo ngera el klumech a lousbech lobengkel a ungil ulekereuid me a chubechub er kid.