Padahk en Doadoahk en Papah, Pepweri 2019

Kakairada Limpoak pwehn Papah

Doadoahk en papah iei en sewesehda mehteikan. Kitail kak sewesehda mehteikan ni atail pahn song en wehwehki soangen irair dah me re mih loale oh kasalehda me kitail men utung irail.

Pwehki Samatail Nanleng ketin kupwurki kitail en duwehla Ih, kapwalkan me kitail kin lelehng nan mour wet pahn kak wia mehn kaskuhl ma kitail pahn likih Ih oh idawehnte sapwellime ahl. Ahpw, e kakete apwal en idawehn sapwellimen Koht ahl ma komw pehm me komw wia lokolongki ahmw kahpwal kan ni sohte sawasepomw.

Ahpw eh koasoandier me kitail sohte pahn kelehpw alu nan ahl wet. Sounkomouro mwahngi mehkoaros me kitail pahn lehlehg, E lella wasa koaros pwe en kak ese duwen ah pahn seweseikitail nan atail kahpwal oh luwet akan (tehk Alma 7:11–12; Doctrine and Covenants 122:8). E ketin kupwurki kitail en idawehn sapwellime karasaras oh kasalehda limpoak rasehng Ih. Towe kan koaros en Mwomwohdiso inoukidahr duwen arail pahn “iang mauk rehn irail akan me mauk; eh, oh kaloalamwahui irail akan me anahne en kolaoloahmwahu” (Mosiah 18:9). Mendahte atail kahpwal kan, pwuhk sarawi kan padahkiheng kitail en insenohki mehteikan oh “kakehlakahda pehmw kan me daulahr oh pwukie kan me luwetalahr” oh en “kainenehla ahl me komw keid loale, oh deh sohpeisang me luwet oh anahne sawas” (Ipru 12:12–13; oh pil tehk Aiseia 35:3–4; Doctrine and Covenants 81:5–6).

Ni atail kin sewesehda mehteikan, utung irail, oh keid limwahrail, oh kitail sewese irail en mihmihte ni ahl pwungo lao Sounkomwouro kak kaweliakapwihrailla—me wia ehu kahrepe kesempwal ong doadoahk en papah—oh pil kahmwahui irailla (tehk Doctrine and Covenants 112:13).

Dahkot Limpoak mehlel?

Limpoak mehlel wehwehki komw pahn nantiheng wehwehki en mehteikan arail pepehm, lamalam, oh soangen irair dah me re mih loale. ¹

Limpoak oh wehweh mehlel wet me inenen kesempwal ong atail doadoahk en papah mehteikan oh pwehn kapwaiada atail pwukoa en wia ohl oh lih soun papah kei. Met kin kiheng kitail atail kak wehwehki en emen aramas ah mour.

Pwehn Wehwehki en Emen Aramas ah Mour

Mie soaipen ohl nennen emen me iang mwomwohdiso wet kin kalapw mwohd kelehpw ni mwurio nan ansou en sarawi. Ni emen tohn pwihn en Elder kan ah sipalla, Pisopo kiheng ah peneinei kapai en prihstud pwehn kaloalahmwahui irail. Tohn pwihn en Lih akan walahng peneineio mwenge. Kempoakepahrail kan oh mehn mparail kan kohla pwarek imwarailo nda, “Ke nek kesehkin kit ma mie mehkot se kak sawaski.”

Ahpw ansou me ohl nenneno pwarek peneineio rahno, e letelet oh ni en lih lihodio ah sapengo ohl menet nda, “I kohdo pwehn kahmwekele ahmwail suht kan.” Mwurin awa kei, en peneineio arail suhtko koaros mwekelekelda oh lingan pwen kolahng ni mehlahu. Mwurin mwo kohdo Rahn sarawi koaros peneineio kin mwohd limwahn ohl nenneno nan mwurio.

Ohl menet ahniki ansou mwahu en kapwaiada ehu anahn me saikinte alahldi. Peneineio oh pil ohl menet kapaida pwehki ah papahki ni limpoak oh wehwe mehlel.

Ia duwen ahi kak alehdi limpoak mehlel?

Ele ekei paikidahr kisakis en poakehng oh wehwehki anahn en mehteikan. Ahpw ong irail akan me apwalki, mie rongahmwahu ehu. Erein sounpar 30, mie semen roprop tohto me iang onopki duwen limpoak oh wehwe mehlel wet. Arail wehwepen limpoak en wehwe mehlel kin wekpeseng ahpw pali laud kin kamehlele me e wia mehkot me aramas kak esehla oh kekeirda sang ie. ²

Kitail kak kapakapki limpoak wet. Pwehn mwahula, e pil kesempwal en wehwehki mwomwen limpoak wet. Iren kaweid pwukat wia kiseh kesempwal en limpoak kei. ³ Soahng pwukat kakete wiawi ni ahmw sohte pil tehk, ahpw ni ahmw pohneseirail re pahn kasalehda dahme ke kak kahmwahuiala.

1.Wehwe

Limpoak anahne wehwehpen en aramaso ah mour. Ni omw pahn kalaudehla ahmw wehwehpen arail mour, e pahn mengei en wehwehki arail pepehm kan oh dahme komw kak wia pwehn sawas.

Ahmw pahn rongorong, kalelapak, oh kiheng ahmw iren sawas pahn seweseiuk en wehwehki irair en mour ma re mih loale. Komw kak esehla duwen mepwukat sang ni omw pahn tehkada Iren sawas ong doadoahk en papah teikan.

• “Soahng Limau me Soun Rongorong Mwahu kan kin Wia” Liahona, Suhn 2018, 6.

• “Koasoaipene arail anahn akan ,” Liahona, Septempe 2018, 6.

• “Aliale Sawas pwehn Sewese Mehteikan,“ Liahona,Oaktohpe, 2018, 6.

Ni omw pahn soang en wehwehki en mehteikan arail anhan kan, komw anahne wehwehkihla irair me re mih loale ni pisetik kaidehn lemleme me komw pein ese sang ni irair akan me komw kilangehr rehn ekei. Ma komw wia met, mwein ele komw pahn sohte wehwehki mwahu oh re pahn lemleme me komw wie kadkadeikirail.

2.Medewe laudki

Ni omw kin nantiheng kapwaiada omwi inou en mauk rehn irail akan me mamauk oh koloalamwahuih irail akan me anahne en kaloalamwahu, komw kak kapakapki Ngehn Sarawi en sewesei komwi en wehwehki en emen aramas ah pepehmkan oh ia mwomwen ahmw pahn kak sawas. ⁴

Ni omw pahn wehwehki irair en mour ma re mih loale, komw kak—ma e mengeiehnguhk de soh—nantiheng medewehda ia pahn ahmw iren madamadau oh pepehm ma komw mih nan soahngen irairo. Ahmw pahn wehwehki madamadau oh pehpem pwukat, iangahki kaweid en Ngehn Sarawi, pahn sewesei komwi en panawih irail.

Ni atail pahn wehwehkihla en mehteikan arail mour oh medewe ia mwomwen arail pepehm, e kesempwal kitail en dehr kadeik irail ni sapwung (tehk Madiu 7:1). Kadeikpen ia mwomwen emen ah lelehng irair apwal ieu kakete karehieng ahmw pahn tikitingki lokolok me e ahniki.

3.Sapengala

Mwomwen atail pasapeng kin kesempwal pwe iei mwomwen atail kasalehda atail ngoangki. Mie soangsoangen wiepen kasalehda atail ngoangki, ni koasoai oh pil mwekid. E kesempwal en tamataman me kaidehn kitail en kahmwahuialahte kahpwalo. Kitail en kin utungada oh kakehlakahda sang ni atail pahn kehsehkin irail me irail sohte kelehpw nan lokolok wet. Mwein met kak rasehng ahmw pahn inda, “I kapingki ahmw indahngiehn” de “Udahn paokpoakeiukada. Kahpwal iou met.”

Pasapeng koaros udahn pahn konehng sang nan mohngiong unsek. Ansou me e konehng, wehkada ahmw kaluwet oh soh itar kan ohng mehteikan en kilang pwehn kakarairada ehupenehn nan pwungamwail.

Luhk en Kapwaiada

Ni ahmw pahn song wehwehki mour en irail akan me ke pwukoahki, kiheng pein kowe nan dahme re mih loale oh medewe soangen sawas dah me ke pahn anahne. Kapakap pwe ken kak wehwehki arail anahn akan oh pil kapwaiada. Ahmw sawas pahn mwein tikitik, ahpw e pahn kesempwal.

© 2019 by Intellectual Reserve, Inc. All rights reserved. Ntingda nan USA. Mweimwei ni lokaiahn wai:6/18. Mweimwei en kawewehdi:6/18. Translation of Ministering Principles, February 2019. Pohnpeian. 15763 885

Ireh kan

1. Tehk W. Ickes, Empathic Accuracy (1997); and M. L. Hoffman, Empathy and Moral Development: Implications for Caring and Justice (2000).

2. Tehk, ni karasepe, Emily Teding van Berkhout and John M. Malouff, “The Efficacy of Empathy Training: A Meta-Analysis of Randomized Controlled Trials,” Journal of Counseling Psychology (2016), 63(1), 32–41.

3. Tehk, ni karasepe, Brené Brown, I Thought It Was Just Me (But It Isn’t) (2008); Theresa Wiseman, “A Concept Analysis of Empathy,” Journal of Advanced Nursing (1996), 23, 1162–67; and Ed Neukrug and others, “Creative and Novel Approaches to Empathy: a Neo-Rogerian Perspective,” Journal of Mental Health Counseling, 35(1) (Jan. 2013), 29–42.

4. Tehk Henry B. Eyring, “The Comforter,” Liahona, May 2015, 17–21.

Sises Krais kin Pahpa ni Limpoak

Ni en Sounkomouro ah ketla rehn mehn Nephi kan, E ketin padahkehng irail lao E mwahngi, pwehki arail luwet, irail sohte kak wehwehki soahng kan koaros me E pahn padahkiheng irail. Ahpw E pil ketin mwangih me irail sohte mwahuki ah pahn ketla sangehr rehrail.

Eri E uhd wekidala sapwellime padahk sang kaweidpen rongamwahuo ohng ni sawaspen arail anahn akan—ni eh lukeirail en walahng reh me soumwahu, nehtok, maskun, de weirek. E ketin kamwahuih iraila. Mwuri E ahpw kapakapkin irail oh kapaiada neirail serihkan, E tuhwengdi emen emen wad emen pwehn kapai irailda.

Dahme kitail kak esehsang ni karasaras en Sounkomouro, sapwellime limpoak ni eh tuhwengdi mehn Nephi kan?

“Iren Kaweid ong Doadoahk en Pahpa” kak seweseikitail pwen wehwehkihda mwahu atail pwukoah en papah emen emen— kaidehn kihdahte padahk ansou me komw pwarek noumw aramas akan. Ni atail pahn wehwehkihla mour en irail akan me kitail pwukoahki, Ngehn Sarawi pahn kawehwehieng kitail soangen padahk da me re konehng alehda patehng atail sawas oh limpoak.