Ang Tinubdan sa Awtoridad sa Pagkapari [Priesthood]
Detalye gikan sa Kristo Nag-orden sa Napulog Duha ka mga Apostoles, ni Harry Anderson
Ang pagkapari mao ang gahum ug awtoridad sa Dios, nga Iyang gihatag kanato aron matabangan sa pagpadayon sa Iyang buhat sa kaluwasan (tan-awa sa Handbook 2: Administering the Church [2010], pahina 8). Ang Ginoo mihatag sa Iyang pagkapari [priesthood] ngadto sa pinili nga mga sulugoon sukad sa panahon ni Adan. Tungod kay ang pagkapari gihatag ngadto sa takus nga mga lalaki pinaagi sa pagpandong sa mga kamot ug usa ka rekord nga gihuptan alang niadtong mga ordinasyon, ang mga tighupot sa pagkapari karon makasubay sa ilang linya sa awtoridad sa pagkapari balik ngadto ni Joseph Smith, kinsa nakadawat sa Melchizedek nga Pagkapari gikan sa mga Apostoles ni Jesukristo.
1. Pedro, Santiago ug Juan
Atol sa Iyang mortal nga pangalagad, si Jesukristo mihatag sa Iyang awtoridad sa pagkapari ngadto sa Iyang mga Apostoles, lakip nila ni Pedro, Santiago, ug Juan (tan-awa sa Mateo 10).
2. Joseph Smith ug Oliver Cowdery
Niadtong Mayo 15, 1829, si Juan Bautista mipakita ngadto ni Joseph Smith ug Oliver Cowdery ug mipahiuli sa Aaronic nga Pagkapari [Aaronic Priesthood]. Paglabay sa pipila ka semana, ang karaang mga Apostoles nga sila si Pedro, Santiago, ug Juan mihatag nila ni Joseph Smith ug Oliver Cowdery sa Melchizedek nga Pagkapari [Melchizedek Priesthood] (tan-awa sa Doktrina ug mga Pakigsaad 27:12; 128:20; Teachings of the Prophet Joseph Smith, sel. Joseph Fielding Smith [1976], 81, 101).
Detalye gikan sa Pag-orden ni Oliver Cowdery ni Joseph Smith, ni Walter Rane
3. Mga Apostoles ug mga Lider sa Ulahing mga Adlaw
Si Propeta Joseph Smith mihatag sa pagkapari ngadto sa ubang takus nga mga lalaki, kinsa ubos sa direksyon sa Propeta, mihatag niini ngadto sa ubang takus nga mga lalaki, ug uban pa, hangtud sa moderno nga panahon.
Mga yawe sa pagkapari [priesthood]
Ang mga yawe sa pagkapari mao ang awtoridad sa Dios nga gihatag ngadto sa mga lider sa pagkapari sa paggiya sa paggamit sa Iyang pagkapari [priesthood] dinhi sa yuta, lakip kon sa unsa nga paagi ang pagkapari gipasa gikan sa usa ka tighupot sa pagkapari ngadto sa lain. Pananglitan, ang bishop lamang, kinsa naghupot sa mga yawe sa pagkapari sa iyang ward, ang makatugot sa usa ka tawo o batan-ong lalaki sa iyang ward sa pagdawat sa Aaronic nga Pagkapari [Aaronic Priesthood]. Niadtong Abril 1836 si Propeta Joseph Smith nakadawat og importante nga mga yawe sa pagkapari gikan nila ni Moises, Elias, ug Elijah didto sa Templo sa Kirtland (tan-awa sa Doktrina ug mga Pakigsaad 110).