Na iVakavuvuli ni Veiqaravi, Maji 2019

Na Sala me Wasei Kina Vakarawarawa na iVakadinadina

Na veiqaravi na vakadinata. Na gauna ni veiqaravi e rawa ni vakalevutaka na noda madigi me wase ivakadinadina ena sala e lesi kei na kena e vagauna.

Ni da sa papitaiso, eda sa veiyalayalatitaka meda “vakadinadinataka na Kalou e na veigauna kecega, kei na veivanua kecega dou sa tiko kina” (Mosaia 18:9). Noda wasea noda ivakadinadina e tiki ni tu ka ivakadinadina ka sala mana me sureti kina na Yalo Tabu me tara na yalona e dua ka veisautaka nona bula.

“Na ivakadinadina—na ivakadinadina dina, e vakasucuma mai na Yalo ka vakadeitaka na Yalo Tabu—e veisautaka na bula,” e kaya o Peresitedi M. Russell Ballard, peresitedi vakatawa ni kuoramu ni iApositolo Le Tinikarua.¹

Ia na wasei ni noda ivakadinadina e rawa ni veivakarerei se logaloga ca vei ira eso kei keda talega. Oqori e rawa ni baleta ni da nanuma ni wasei ni noda ivakadinadina e dua na ka eda na cakava ena soqoni ni lolo kei na ivakadinadina se ena gauna eda vakavulica kina e dua na lesoni. Ena veigauna kilai vakaoqori eda na vakayagataka na vosa kei na malanivosa e sega ni matau ena ivakarau ni veivosaki e veisiga.

Noda wasea na ivakadinadina e rawa ni yaco me veivakalougatataki tudei ena noda bula kei na nodra bula eso tale ni da sa kila na kena rawarawa me da wasea na veika eda vakabauta ena ivakarau ni veivosaki e veisiga. Oqo eso na vakasama mo rawa ni tekivu kina:

Me Rawarawa Toka Ga

E sega ni gadrevi me tekivu e dua na ivakadinadina ena sega ni gadrevi me tekivu ena malanivosa, “Au via wasea noqu ivakadinadina,” ka sa sega ni gadrevi me tini ena, “ena yaca i Jisu Karisito, emeni.” Na ivakadinadina e dua na ivakamacala ni veika eda vakabauta ka kila ni dina. O koya noda veitalanoa kei na dua noda itokani e gaunisala baleta e dua na leqa e sotava tiko ka da kaya kina, “Au kila ni Kalou e dau sauma na masu,” e rawa ni mana sara me vaka ga e dua na ivakadinadina e wasei mai na itutu ni vunau e valenilotu. Na mana oqori e sega ni vu mai na veivosa ukutaki; e vu mai na Yalo Tabu ni vakadeitaka na dina (raica na Vunau kei na Veiyalayalati 100:7– 8).

Sotava na Taladrodro ni iVakarau ni Veivosaki e Veisiga

Kevaka eda tu vakarau me da wasea, e tu wavoliti keda na madigi me vakacurumi na ivakadinadina ki na ivakarau ni veivosaki e veisiga. Me kena ivakaraitaki:

Ni dua e taroga se a vakaivei nomu muanimacawa. O na sauma yani “O totoka”. “Au gadreva sara ga na Lotu.”
E vakaraitaka e dua nona kauwai ni kila na veika dredre a yaco ena nomu bula: “Au sa lomani iko saraga.” O na sauma mai: “Vinaka vakalevu nomu kauwai. Au kila ni na vukei au na Kalou. Sa vukei au oti mada o Koya e liu.”
E dua beka ena kaya: “Au nuitaka ni na rawa ni veisau totolo mai na draki ca oqo,” se “Sa berabera sara ga na basi,” se “Raica mada na veituitui ni motoka qo.” Sa rawa mo sauma: “Au kila ni rawa ni veivuke na Kalou me donu na ka kecega.”

Wasea na Veika o sa Sotava Oti

Eda dau veivosakitaka kei ira eso baleta na veika dredre eda sotava. Ni dua e tukuna vei iko na veika e sotava tiko, e rawa ni o wasea e dua na gauna a vukei iko kina na Kalou ena nomu vakatovolei ka vakadinadinataka ni o kila ni rawa Vua me vukei koya talega. E kaya na Turaga ni o Koya e dau vakaukauwataki keda ena noda vakatovolei me rawa kina ni “da kena ivakadinadina, ka lako yani mo dou kila ni koi Au na Turaga na Kalou, au sa dau sikovi ira na noqu tamata ena nodra vakararawataki” (Mosaia 24:14). Eda na tucake ka vakadinadinataki Koya ni da vakadinadinataka na Nona vukei keda ena noda vakatovolei.

Vakavakarau

Eso vei keda, noda wasea noda ivakadinadina ena dua na gauna vakasauri e rawa ni veivakarerei. E tu na sala eda rawa ni tuvaka ka “vakarau tiko [me da] tukuna vua na tamata yadua sa tarogi [keda] na vu ni rarama sa tu ena [lomada]” (1 Pita 3:15).

Taumada, na tuvakarau e rawa ni kena ibalebale me da dikeva na ivakarau ni noda bula. Eda sa sureta tiko li na Yalo Tabu ki na noda bula ka vaqaqacotaka na noda ivakadinadina ena veisiga yadua ena noda bula dodonu? Eda sa solia tiko li vua na Yalo na madigi me vosa vei keda ka solia vei keda na vosa eda gadreva mai na noda masu ka vulica na ivolanikalou? Me vaka e vakasalataki Airame Simici kina na Turaga “Mo kakua mada ni vunautaka na noqu vosa, ia mo vulica taumada mo kila, ena qai sereki na wa ni yamemu” (Vunau kei na Veiyalayalati 11:21).

iKarua, na tuvakarau e rawa ni kena ibalebale na raikiliu ka vakasamataka na madigi eso e rawa ni yaco ena siga se macawa oya mo wasea na nomu ivakadinadina. E rawa ni o vakarautaki iko ki na veimadigi oqori ena nomu vakasamataka na kena soli e dua na gauna mo wasea na veika o vakabauta.

Vakanamata Vua na iVakabula kei na Nona iVunau

E vakavuvulitaka o Peresitedi Ballard, “E dina ni rawa ni da vakadinadinataka e vuqa na ka ni da lewena na Lotu, e tu na veidina taumada eda gadreva me da dau veivakavulici kina vakataki keda ka wasea.” Me kena ivakaraitaki, e vola o koya: “na Kalou sai koya na Tamada kei Jisu na Karisito. Na yavu ni veivakabulai e yavutaki ena nona Veisorovaki na iVakabula. A vakalesuya mai o Josefa Simici na taucoko ni kosipeli tawayalani i Jisu Karisito, ka sa kena ivakadinadina vei keda na iVola i Momani.” Ni da tukuna na dina eso mai vuniyaloda oya, eda sa sureta na Yalo me vakadinadinataka na kena dina. E vakabibitaka o Peresitedi Ballard ni “na sega ni rawa ni tarovi na Yalo ni wasei na ivakadinadina savasava i Karisito.”²

Nona iVakaraitaki na iVakabula

Ni oca sara tu ga mai ena dua na ilakolako kosovi Samaria, a cegu vakalailai na iVakabula ena dua na ikeli-wai ka sotava kina e dua na marama. Sa tekivuna e dua na veivosaki me baleta na taki wai mai na tobu. Ni vakayagataka na cakacaka e dau vakaitavitaki koya kina e veisiga a rawa kina vei Jisu na madigi me vakadinadinataka na wai ni bula kei na bula tawamudu vei ira era vakabauti Koya (raica na Joni 4:13–15, 25–26).

Rawa ni Veisautaka na Bula na Dina Rawarawa Eso

A talanoataka o Peresitedi Russell M. Nelson e dua na nasi ka a tarogi Vuniwai Nelson ena gauna oya ni oti e dua na veisele dredre. “Na cava na vuna o sega ni vakataki ira kina eso tale na vuniwai ni veisele?” Eso na vuniwai ni veisele e kila era dau cudrucudru totolo ka dau vosavosa ca ena gauna ni veiqaravi dredre vakaoya.

A rawa ni sauma o Vuniwai Nelson ena vuqa na sala. A sauma ka vaka, “Baleta niu kila ni dina na iVola i Momani.”

Na nona isau ni taro a vakauqeti nasi kei na watina me rau vulica na iVola i Momani. E muri a qai papitaisotaka na nasi o Peresitedi Nelson. Ena vica vata na yabaki e muri, ni vakatulewa tiko ena dua na koniferedi ni iteki mai Tennessee, e Amerika, ni se qai tabaki vou me iApositolo, a marautaka o Peresitedi Nelson e dua na sota sega ni namaki kei na nasi vata ga. A nanuma lesu ni nona saumaki mai, ka a yaco ena ivakadinadina rawarawa nei Peresitedi Nelson baleta na iVola i Momani, a vakavuna nodra saumaki mai e 80 tale na tamata.³

Veisureti meda Cakava

Kakua ni rerevaka mo wasea nomu ivakadinadina. E rawa ni vakalougatataki ira o qarava. Mo vakayagataka vakacava na veivakasama oqo se na nomu mo wasea na nomu ivakadinadina nikua?

© 2019 mai na Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, March 2019. Fijian. 15764 858