Paano Ipaambit ang Panaksihon sing Mas Natural

Ang ministering pagpanaksihon. Ang ligwa nga ginatugot sa ministering makapadugang sang aton mga oportunidad nga magpaambit sang panaksihon sa pormal kag di-pormal nga mga pamaagi.

Nagpromisa kita nga “magtindog bilang mga saksi sang Dios sa tanan nga tinion kag sa tanan nga mga butang, kag sa tanan nga mga duog” (Mosias 18:9). Ang pagpaambit sang aton mga panaksihon kabahin sang pagtindog bilang mga saksi kag isa ka gamhanan nga pamaagi sa pag-agda sang Balaan nga Espiritu nga tandogon ang tagipusuon sang iban kag bag-ohon ang ila kabuhi.

“Ang panaksihon—tunay nga panaksihon, nga bunga sang Espiritu kag ginpalig-on sang Balaan nga Espiritu—nagabag-o sang mga kabuhi,” siling ni President M. Russel Ballard, Akting nga Pangulo sang Korum sang Dose ka mga Apostoles.¹

Pero ang pagpaambit sang aton panaksihon mahimo nga makakululba ukon masaw-a para sa pila sa aton. Ayhan tungod ina nga nagapanumdum kita nga ang pagpaambit sang aton panaksihon isa ka butang nga ginahimo lang naton sa miting sa fast and testimony ukon sa pagtudlo sang leksyon. Sa masami nagagamit kita sing pila ka mga tinaga kag mga pulong sa sinang pormal nga mga sitwasyon nga dawsa indi bagay sa ordinaryo nga pag-istoryahanay.

Ang pagpaambit sang aton mga panaksihon mahimo nga mangin mas kinaandan nga bugay sa aton mga kabuhi kag sa mga kabuhi sang iban kon maintiendihan naton kon ano kasimple ang magpaambit sang aton ginapatihan sa adlaw-adlaw nga mga sitwasyon. Yari ang pila ka mga ideya agud buligan kamo sa pagsugod.

Himoa ini nga Simple lang

Ang panaksihon indi kinahanglan nga magsugod gid sa pulong nga “Luyag ko magpaambit sang akon panaksihon,” kag indi man ini kinahanglan magtapos sa, “Sa ngalan ni Jesucristo, amen.” Ang panaksihon pagpabutyag sang aton ginapatihan kag nahibaloan nga matuod. Gani, ang magbisita sa inyo kaingod parte sa iya problema kag maghambal, “nakahibalo ako nga ang Dios nagasabat sang mga pangamuyo,” mahimo nga mangin pareho kaepektibo sa bisan ano nga panaksihon nga ginapaambit sa pulpito sang simbahan. Ang gahum wala nagahalin sa manami/mabulakbulakon nga panghambal; nagahalin ini sa Balaan nga Espiritu nga nagakumpirma sang kamatuoran (tan-awa sa Doctrine and Covenants 100:7–8).

Mag-upod sa Lakat sang Natural nga Pag-istoryahanay

Kon luyag naton magpaambit, may mga oportunidad sa palibot naton agod isal-ot ang panaksihon sa aton adlaw-adlaw nga mga pag-istoryahanay. Halimbawa:

May nagapamangkot sa imo kon kamusta ang talipuspusan sang imo semana. “Manami gid,” ang sabat mo. “Kinahanglan ko lang gid makasimba.”
May nagpabutyag sa imo sang simpatiya pagkahibalo niya parte sa hangkat sa imo kabuhi: “Ginakasubo ko gid.” Masabat ka: “Salamat sa imo pagkabalaka. Nakahibalo ako nga buligan ako sang Dios. Nabuligan na Niya ako sang una.”
May nagahambal: “Tani, mag-ayo na dayon ining malain nga tiempo,” ukon “Atrasado gid ‘ya ang bus,” ukon “Ano na ini ang trapiko man.” Mahimo ka magsabat: “Segurado ako nga buligan sang Dios nga masolbar ini tanan.”

Magpaambit sang Inyo mga Eksperiyensia

Masami naton ginaistoryahan ang parte sa aton mga hangkat. Kon may magsugid sa imo parte sa ila ginaagyan, mahimo ka magpaambit sang isa ka tinion sang ang Dios nagbulig sa imo sa imo mga pagtilaw kag magpanaksihon nga nakahibalo ka nga makabulig man Sia sa ila. Ang Ginuo nagsiling nga ginapabakod Niya kita sa aton mga pagtilaw agud “nga mahimo kamo nga magtindog bilang mga saksi para sa akon pagkatapos sini, kag nga mahimo ninyo nga mahibal-an sing pat-od nga ako, ang Ginuong Dios, nagaduaw sa akon katawhan sa ila mga kapipit-an.” (Mosias 24:14). Sarang kita magtindog bilang Iya mga saksi kon magpanaksihon kita kon paano Niya kita ginbuligan sa aton mga pagtilaw.

Mangin Handa

Para sa pila sa aton, ang hinali nga pagpaambit sang panaksihon makakululba. May mga pamaagi nga makaplano kita ngadaan kag “maghanda gihapon sa pag-apin sang paglaum nga yara sa [aton]sa bisan kay sin-o nga magpamangkot sa [aton]” (1 Pedro 3:15).

Una, ang pagmangin handa nagakahulugan sang pag-usisa kon paano kita nagapangabuhi. Ginaagda bala naton ang Balaan nga Espiritu sa aton mga kabuhi kag ginapabakod ang aton kaugalingon nga mga panaksihon sa tagsa ka adlaw paagi sa matarong nga pagpangabuhi? Ginahatagan bala naton ang Espiritu sang mga oportunidad nga maghambal sa aton kag maghatag sa aton sang mga pulong nga kinahanglanon naton paagi sa pangamuyo kag pagtuon sang balaan nga mga kasulatan? Pareho sang laygay sang Ginuo kay Hyrum Smith, “Indi pagtinguhai nga ipahayag ang akon pulong, kundi tinguhai una nga maangkon ang akon pulong, kag nian malugakan ang inyo mga dila” (Doctrine and Covenants 11:21).

Ikaduha, ang pagmangin handa nagakahulugan sang pagplano kag pagpanumdum sang mga oportunidad nga mahimo ninyo maangkon sina nga adlaw ukon sina nga semana nga mapaambit ang inyo panaksihon. Makahanda kamo para sa sinang mga oportunidad paagi sa pagpanumdum parte sa kon paano ang mga ini makahatag sa inyo sang kahigayunan nga ipaambit ang inyo ginapatihan.

Magpadayon nga Nakasentro sa Manluluwas kag sa Iya Doktrina

Si President Ballard nagpanudlo, “Bisan pa nga makaangkon kita sang mga panaksihon sa madamo nga mga butang bilang mga miyembro sang Simbahan, may mga panguna/tig-una nga mga kamatuoran nga kinahanglan naton nga pirme itudlo sa tagsa-tagsa kag ipaambit.” Bilang halimbawa, ginlista niya: “Ang Dios amo ang aton Amay kag si Jesus amo ang Cristo. Ang plano sang kaluwasan nasentro sa Pagbayad-sala sang Manluluwas. Ginpanumbalik ni Joseph Smith ang kabug-osan sang wala’y katapusan nga ebanghelyo ni Jesucristo, kag ang Libro ni Mormon ebidensya nga ang aton panaksihon matuod.” Sa aton pagpabutyag sinang hugot-sa-tagipusuon nga mga kamatuoran, ginaagda naton ang Espiritu nga magsaksi nga ang aton ginpanghambal matuod. Si President Ballard nagdagmit nga “ang Espiritu indi mapunggan kon ang putli nga panaksihon parte kay Cristo ginapaambit.”²

Ang ehemplo sang Manluluwas

Kapoy sa pagpanglakaton patabok sa Samaria, ang Manluluwas nagpundo sa pagpahuway sa isa ka bubon kag nakasumalang sang isa ka babayi didto. Nagsugod Sia sa pagsugilanon parte sa pagsag-ob sang tubig halin sa bubon. Ang paggamit sining pang-adlaw-adlaw nga buluhaton nga ginahimo sang babayi naghatag kay Jesus sang oportunidad nga magpanaksihon parte sa buhi nga tubig kag kabuhi nga wala’y katapusan nga sarang maagum sinang mga nagapati sa Iya (tan-awa sa Juan 4:13–15, 25–26).

Ang Simple nga Panaksihon Makabag-o sang mga Kabuhi

Si President Russell M. Nelson nagsugid parte sa isa ka nars nga nagpamangkot kay sadto-anay Dr. Nelson pagkatapos sang isa ka mabudlay nga operasyon. “Ngaa indi ka pareho sa iban nga mga doktor nga nagapang-opera?” Ang pila ka mga doktor nga nagapang-opera nga iya nakilala mainiton kag nagapamuyayaw samtang nagahimo sing mabudlay nga mga operasyon.

Si Dr. Nelson mahimo kuntani magsabat sa bisan ano nga mga pamaagi. Pero nagsabat lang sia, “Tungod nakahibalo ako nga ang Libro ni Mormon matuod.”

Ang iya sabat nagpaisog sa nars kag sa iya bana nga tun-an ang Libro ni Mormon. Sang ulihi ginbunyagan ni President Nelson ang nars. Pila ka dekada ang nagligad, samtang nagapanguna sa isa ka stake conference sa Tennessee, Estados Unidos bilang isa ka bag-ong ordin nga Apostoles, si President Nelson nakaagum sing wala ginapaabot nga higayon nga magkit-anay sila liwat sang amo nga nars. Nagpanugid sia nga ang iya pagkahaylo, nga resulta sang simple nga panaksihon ni President Nelson kag sang impluwensya sang Libro Mormon, nagbulig sa pagkahaylo sang 80 pa gid ka mga tawo.³

Pangagda sa Pag-akto

Indi mahadlok nga magpaambit sang inyo panaksihon. Makabugay ini sa inyo mga gina-minister. Paano ninyo gamiton ining mga ideya ukon ang inyo kaugalingon nga mga ideya agud ipaambit ang inyo panaksihon sini nga adlaw?

© 2019 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, March 2019. Hiligaynon. 15764 861