Lutiyacn Ip Yohk ke Karihngihnyuck, Mahs 2019

Fuhkah in Akacsruhi Luhlahlfongi La ke Ohiyac Fihsrwacsr

Karihngihn pa fackwack luhlahlfongi an. Ohiyac puhkantwen in karihngihn kuh in ahkyohkye pacl in akacsruhi luhlahlfongi la ke pacl oacna sie.

Kuht wuhlweacng in “tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa” (Mosiah 18:9). Kuht akacsruhi luhlahlfongi lasr pa ipin in tu ke sie mwe loh ac wi pac in ohiyac kuh in suli Nguhn Muhtahl in kahlyac insiyacn mwet se ac eklac moul laltahl.

“Luhlahlfongi—luhlahlfongi pwacye, isuslac sin Nguhn ac ahkkweyeyucklac sin Nguhn Muhtahl—eklac moul uh,” fahklah Prestuhn M. Russell Ballard, Aholyacn Prestuhn ke U luhn Mwet Sap Singucul Luo.¹

Tuhsruhktuh in akacsruhi luhlahlfongi lasr oasr puhla toasr kuh tiac puhla fihsrwacsr nuh sin kuhtuh sesr. Sahp kuht puhla ohinge mweyen kuht nuhnkuh in akacsruhi luhlahlfongi lasr oacna ke kuht oruh ke toeni luhn lalo ac fahkwack luhlahlfongi lasr kuh ke kuht luti sie lesin. Ke pacl alu inge kuht orekmakihn kahs siena liki kahs lasr ke oacna sie pacl.

Akacsruhi luhlahlfongi lasr kuh in us mwe insewowo yohk likina met ke moul lasr ac moulin mwet sahyac ke kuht kahlwem ohiyac fihsrwacsr in akacsruhi ma kuh luhlahlfongi ke kuhtwena acn kuht oasr kac. Oasr kuhtuh nuhnak inge in kahsruh kom in muhtwacwack.

Oruh in Fihsrwacsr

Sie fahkwack luhlahlfongi tiac enenuh muhtwacwack ke kahs, “Nga luhngse in fahkwack luhlahlfongi luhk,” ac tiac enenuh ahksahfye ke, “Ke inen Jisus Kraist, amen.” Sie fahkwack luhlahlfongi pa fahk se ke ma kuht luhlahlfongi ac etuh pwacye. Na som muhtwacta yurin mwet tuhlan lomtacl ke inkacnek soko an ke elyah se oasr yohrohl ac fahk, “Nga etuh God El topuk pruhe lasr,” kuh in fahkwack kuh liki kuhtwena fahkwack ke pulpit luhn Alu uh. Kuh tiac tuhkuh ke kahs wolacna; tuh tuhkuh sin Nguhn Muhtahl ke El ahkkweye ma pwacye (liye Doctrine and Covenants 100:7–8).

Sramsram Oacna Sie nuh ke Muhtwacta An

Fin oasr kena lasr in akacsruhi, oasr pacl mwesahs puhs infulwac kuht in sang luhlahlfongi lasr nuh ke sramsram oacna sie lwen nuh kwewa. In mwe srihkasrak:

Oasr mwet se suc siyuck sum ke wik se lom. “Ma na wo,” kom topuk. “Alu uh pa ma nga enenuh an.”
Oasr mwet se suc ahkkahlwemye mwe ahsor tukun el lohng me ma upac ke moul lom: “Sislah koluk.” Kom topuk: “Kuloh ke fahk lom. Nga etuh lah God El ac kahsruh yuc nuh kac. El oruh tari met ah.”
Oasr mwet se suc fahk: “Nga finsrak ohiyacn pacl upac uh sa in eklac,” kuh “Bus soko pahtlac,” kuh “Liye ma okahrkahr inge.” Sahp kom ac topuk fahk: “Nga luhlahlfongi God El ac fah kahsruh ma nuh kwewa in wolac.”

Akacsruhi Mukwikwi Lomtacl

Inkaiyacn pacl kuht asramsrami tari ke mwe upac lasr. Ke pacl mwet se sramsram yurum ke ma eltahl ohsun nuh kac, sahp kom ac akacsruhi pacl se ke God El kahsruh kom nuh ke mwe upac lom ac fahkwack lah kom etuh El kuh kahsrweltahl pac. Leum El fahk lah El ahkfokokoye kuht ke ma upac lasr ”tuh kowos in tu oacna mwet loh Keik fahlac, ac tuh kowos in etuh na pwacye lah Nga, Leum God, muhtwacta nuh yurun mwet Luhk ke kweok lalos” (Mosiah 24:14). Kuht kuh in tu ke mwet loh Lal ke kuht fahkwack fuhkah El kahsruh kuht ke pacl upac lasr.

Oruh in Ahkolah

Nuh sin kuhtuh sesr, in akacsruhi luhlahlfongi lasr ke pacl sa kuh puhla upac sesr. Oasr ohiyac kuht kuh in plwacni met liki ac ”Akola pacl nukewa in topuk kutena mwet su siyuk ke finsrak se su oan in kowos,” (1 Peter 3:15).

Ma se met, in ahkolah kuh in kalmac kuh liye fuhkah kuht moul. Yac kuht suli Nguhn Muhtahl ke moul lasr ac ahkfokokoye luhlahlfongi lasr kais sie lwen ke moulkihn mukwikwi suwohs? Yac kuht orek pacl in lwelah Nguhn in sramsram nuh sesr ac use kahs kuht enenuh nuh ke pruhe ac lutlut ma suhmuhslah? Oacna Leum El lotwacl Hyrum Smith, “Tiac suk in fahkwack kahs luhk, tuhsruhk suk in eis kahs luhk, na loum kuh in fihsrwacsrsrwacsrlah” (liye Doctrine and Covenants 11:21).

Ahkluo, in ahkolah kuh in oyacpacna kalmac in ngwetma nuh met ac motko ke pacl wo sahp kom ac liyac ke lwen se inge kuh wik se inge in akacsruhi luhlahlfongi lom. Kom kuh in ahkolah ke pacl wo ingen ke kom nuhnkuh ke fuhkah eltahl kuh in use pacl in akacsruhi ma kom luhlahlfongi an.

Muhta Infulwacn Mwet Lahngo ac Mwe Luti Lal

Prestuhn Ballard el luti, “Finne oasr luhlahlfongi ke ma puhkantwen sesr ke mempucr luhn Alu, oasr ma pwacye fihsrwacsr kuht enenuh in akacsruhi ac luti pacl nuh kwewa nuh sin sie sin sie.” Ke sie srihkasrak, el sang: “God El pa Pahpah tuhmasr ac Jisus pa Kraist. Infulwacn plwacn in molwelah pa Iwaclah Lal Mwet Lahngo. Joseph Smith el fohlohkihnyuckyak ma nohfohn ke wosasuc ma pahtpaht luhn Jisus Kraist, ac Puk luhn Mormon pa mwe loh lah fahkwack lasr pwacye.” Ke kuht ahkkahlwemye ma sacohk pwacye, kuht suli Nguhn in ahklohye ma kuht fahk uh pwacye. Prestuhn Ballard el ahkyohkye fahk lah “Nguhn tiac kuh in wacngihnlac ke fahkwack pwacye luhn Kraist akacsruhiyuck.”²

Srihkasrak luhn Mwet Lahngo

Ullac ke fuhfahsryucsr ahluhkwelah acn Samaria, Mwet Lahngo El tui in monglac sisken utkof ac ohsun nuh sin sie muhtwacn we. El muhtwacwack sramsramkihn ma in eis kof ke utkof an. In orekmakihn ma muhtwacn se ingen oruh lwen nuh kwewa sang pacl wo nuh sin Jisus in fahkwack ke kof moul ac moul ma pahtpaht oasr nuh sin elos suc Luhlahlfongwel (liye John 4:13–15, 25–26).

Sie Fahkwack Luhlahlfongi Fihsrwacsr Kuh In Eklac Moul

Prestuhn Russell M. Nelson el fahk nuh sin sie nurse suc siyuck sel ke pacl sacn-Dr. Nelson kihsensiyuck se tukun surgical procedure upac se. “Efuh kom tiac oacna mwet surgeon sahyac?” Kuhtuh mwet surgeon el etuh fihsrwacsr in mongsa ac fahk kahs koluk ke eltahl orekma nuh ke procedure upac.

Dr. Nelson el kuh in topuk ke ohiyac puhkantwen uh. Tuhsruhktuh el sang top fihsrwacsr, “Ke srihpen nga etuh Puk luhn Mormon pwacye.”

Top lal mokle nurse se ingen ac mukul tuhmwacl in luti Puk luhn Mormon. Tukun kuhtuh pacl Prestuhn Nelson el pacptaislac nurse sacn. Yac puhspuhs tohkoh, ke el oasr in kol sie toeni luhn stek fin acn Tennessee, USA, ke el tuhfahna pahngonyuck nuh ke Mwet Sap se, Prestuhn Nelson el engankihn in liye nurse oacna sie sacn. El akacsruhi eklac lal, ma sikyak ke fahkwack luhlahlfongi fihsrwacsr ac moklweyuck ke Puk luhn Mormon, ma kahsruh kol mwet 80 in eklac luhlahlfongi laltahl pac.³

Suli in Oruh

Tiac oruh in sahngweng in akacsruhi luhlahlfongi lom. Luhlahlfongi lom kuh in ahkinsewowoye mwet suc kom karihngihn nuh kac. Fuhkah kom ac orekmakihn nuhnak inge kuh ma lom in akacsruhi luhlahlfongi lom mihsenge?

© 2019 by Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/18. Ahkkweyeyucklac ke lweng: 6/18. Lweng ke Ministering Principles, March 2019. Kosraean. 15764 868