Koasondih kan en Pwukoahn Papah, Mahs 2019

Mwoamwen Ehukipene Kadehde Ni Sansal

Papah pil wia kasalepen kadehde. Pwukoahn papah kak kalaudehla atail ansou en ehukiheng mehtei kan atail kadehde ni soangen mwoahmwkei.

Kitail inoukidahr en”wia sounkadehde en Koht ansou koaros oh nan mehkoaros, oh wasakoaros” (Mosiah 18:9). Ehukipene atail kadehde wia kisehn atail kadehde oh wia ire kehlail ehu ni eh kin lukehdo Ngehn Sarawi pwehn sair oh wekidala en aramas mour.

President M. Russell Ballard, Weliepen President en Pwihn en Wahnparon Ehk riemeno nda “Kadehde—kadehde mehlel, me pwilsang Ngehno oh alahldi sang Ngehn Sarawi kin wekidala mour kan.“¹

Ahpw ehukipene atail kadehde kin kak kasalowehda de soansuwed ong ekei kitail. Met pwehki kitail kin medewe me ehukipene atail kadehde kin wiawihte nan mihting en kaisihsol oh kadehde de ansou me kitail kin wia kasukuhl. Nan soangen irair pwuko kitail kin kalapw doadoahngki koasoi me kitail sohte kin kalapw wia rahn koaros.

Ehukipene atail kadehde kak wiahla kapai ehu nan atail mour kan oh mour en mehtei kan ni atail kin wehwehkihla uwen mengei en ehukipene dahme kitail kamehlele rahn koaros. Let akan ekei iren sawas kan me kumwail kak tepkihda.

Wia Me Mengei

Kadehde sohte anahne en tepkihda ire wet, “I men wia ahi kadehde,” oh e sohte anahne imwsengkihla, “Ni mwaren Sises Krais, amen.” Kadehde wia ehu kehkehlik en dahme kitail kamehlele oh ese me e pwung. Eri pwehn pwarek mehn mpamwail me ahniki kahpwal oh nda, “I ese me Koht kin sapeng kapakap kan,” kak wia kadehde kehlail ehu duwehte kadehde me kin wiawi nan ihmw sarawi. Manaman en kadehde sohte kohsang ni koasoi kaselel; e pwilsang Ngehn Sarawi me kin kasalehda me mehlelo (tehk Doctrine and Covenants 100:7–8).

Peianewei Perekwehn Koaskoasoipene Ni Sansal

Ma kitail kin men ehukiheng mehtei kan, e pahn kin mie atail ansou mwahu en wia atail kadehde nan atail koasoakoasoai kan nan ehu ehu rahn. Ni karasaras:

• Aramas emen idek ia iren ahmw wihkend o. Ke sapengki me “E inenen mwahu.” “Sarawi me I keieu nanahne.”

• Aramas emen ahpw kasalehda ah kadek mwurin ah esehda duwen kahpwal akan me ke ahniki nan ahmw mour oh inda: “I pahtoula.” Ke sapeng: “Kalahngan en omwi kupwurmwahu. I ese me Koht pahn ketin apwalihe. E ketin doareiehlahr mahso.”

• Mie me inda: “I men tehno mesenlenge en wekidek,” de “Buso udahn pwand,” de “Tehk mahs diren sidohsa kan.” Kumwail kak sapeng: “I kamehlele me Koht pahn sawas pwe soahng koaros en mwahu.”

Ehukihda dahme ke esehla sang ni dahme ke lelehng

Kitail kin kalapw koasoiaieng mehtei kan atail kahpwal kan. Ma aramas emen ndaiong kumwail ah kahpwal kan, kumwail pil kasalehda en Koht ah ketin sewesei kumwailda oh kadehde me kumwail ese me E kak sewese irail. Kauno mahsani me E kin kakehlakai kitail nan atail kahpwal akan pwe “kumwail en kak kesihnenda oh kadehdeh kin ie sang met kohla , oh pwe kumwail en wehwehkiniehla ni mehlel me Ngehi, Kauno Koht, me kin ketin apwalih nei aramas akan nan arail kahpwal akan” (Mosiah 24:14). Kitial kak wia Sapwellime soun kadehde kei ni atail kin kadehde duwen Ah ketin sewesei kitail nan atail kahpwal akan.

Kin Kaunopada

Ehukihda kadehde ni ansou karuwaru kin kahrehda kahpwal ong ekei kitail. Mie elen atail kak koasonehdi oh “onopada sapeng aramas koaros me peidek (rehtail) kahrepen (atail) ahneki koapwoaroapwoar” (1 Peter 3:15).

Keieu, kin kaunopada kak wehwehki kilkilang mwoamwen atail momour. Kitail kin lukehieng Ngehn Sarawi ong nan atail mour oh kakehlailih atail kadehde kan en ehu ehu rahn akan ni mour me pwung? Kitail kin mweidohng Ngehno ansou mwahu en mahsendong kitail oh ketkihong kitail mahsen kan me kitail anahne nan kapakap oh onop en pwuhk sarawi? Ihme Kauno kaweidki Hyrum Smith, “Ieremen rapahki ken kalohngki ahi mahsen, ahpw keieu rapahki mahs ken kak alehda ahi mahsen, eri lewemwen ahpw pahn lapwada (tehk Doctrine and Covenants 11:21).

Keriau, kin kaunopada kak wehwehki kilkilengla mwowe oh medmedewe ansou mwahu kan me kumwail kak ahneki nan rahno de wihko pwehn ehukieng mehtei kan amwail kadehde. Kumwail kak kasik ansou mwahu pwukat ni amwail kin medewe mwoamwen amwail pahn ahneki ehu ansou en ehukipene dahme kumwail kamehlele.

Poadidiong Sounkomouro oh Sapwellime Padahk

President Ballard padahngki, “Tetehn kitail kak kadehde soahng tohto ni atail wia tohn Mwomwodisoht, mie ire mehlel kei me kitail anahne kasukuhlki oh ehukihong mehtei kan.” Ni karasepe, e kairekehdi: “Koht iei Samatail oh Sises iei Krais. Pilahn en komour poahsoandahsang pohn en Tomw en Sounkomouro . Joseph Smith kapwurehdo ni unsek rongamwahu poatopoto en Sises Krais, oh Pwuken Mormon me kasalehda mehlel oh pwung en atail kadehde.” Ni atail kin kadehde mepwukat ni mehlel, kitail kin luke Ngehno en kadehde me atail koasoi kan me mehlel. President Ballard kehkehlingki me “Ngehno sohte kin kak nenenla ma kadehde mehlel en Krais kin wiawi.”²

Sapwellimen Sounkomouro Karasaras

Ngirekihla sang seiseilok nan Sameria, Sounkomouro eri uhdi pwehn koamoal ni pwarer ehu oh tuongidi lih emen mwo. E ketin tapiada mahsenpene ehu me pid idip pihl sang nan pwarero. Ni eh doadoahngki dahme liho kin wiewia rahn koaros, Sises eri kadehde duwen pilen mour me sohte kin madada ong koaros me kamehlele Ih (tehk John 4:13–15, 25–26).

Kadehde Mengei Ehu Kak Wekidala Mour akan

President Russell M. Nelson ahpw koasoiahda ners men me idek rehn Dr. Nelson peidek ehu mwurin ehu koadoahk en pwal apwal ehu me e apwaliala. “Dahme ke sohte duwehtehki ekei sounpwal kan?” Ekei soun pwal kan me liho ese kin kak mwadangen lingeringerda oh loakaia suwed ni ansou me irail kin wia koadoahk en pwal akan.

Dr. Nelson kakete sapeng ni soangen mwoahmwkei. Ahpw e sapeng oh nda, “Pwehki I ese me Pwuken Mormon mehlel.”

Ah pasapengo ahpw kahrehiong liho oh ah pwoudo tepda onopki Pwuken Mormon. Mwuri President Nelson ahpw pepdaisiala nerso. Mwurin sounpar eisek samwa, ni eh kaukaweid ehu kapokon en sdeik nan Tennessee, USA, ni eh apwtehn wiahla Wahnparon, President Nelson perenkihda ah pwurehng tuhong nerso ni soh kasikpe. Liho nda me ah weliakapwo, pwehki sang ni en ohlo kadehde mengei oh manaman en Pwuken Mormon, pil eledahr weliakapwalahn aramas 80.³

Luhkong Doadoahk

Dehr masak en wia amwail kadehde. E kak kapaiada irail kan me kumwail kin papah. Ia mwoamwen amwail pahn doadoahngki ire pwukat de pil pein amwail pwe kumwail en wiahki amwail kadehde rahn wet?

© 2019 sang Intellectual Reserve, Inc. All rights reserved. Ntingda nan USA. Mweimwei ni lokaiahn wai: 6/18. Mweimwei en kawewehdi: 6/18. Kawehwepen Ministering Principles, March 2019. Pohnpeian. 15764 885

Ire kan

1. M. Russell Ballard, “Kadehdeh Mehlel,” Liahona, Nohpempe 2004, 40.

2. M. Russell Ballard, “Kadehdeh Mehlel,” 41.

3. En Jason Swensen, “Kaunopada en Kaweweh Duwen Amwail Kadehde ni Amwail pahn Doadoahngki Pwuhk en Mormon, Preseden Nelson mahsanih,” nan Church News en f LDS.org, Feb. 6, 2018, news.lds.org.

“Koasondih kan en Pwukoahn Papah” ire pwukat wia mehn sawas ong kitail en sukuhlki duwen apwalih emenemen—kaidehn en wia ireh kei me kitail en ehukipene ni ansoun tuhpene. Ni atail esehlahr irail kan me kitail kin papah, Ngehn Sarawi pahn kamarainih kin kitail mehnia padahk me irail anahne me pahn patehng atail epwel oh limpoak ohng irail.

Ehukieng mehteikan duwen dahme kumwail kin lelehngehr kan

Kadaredohng kiht duwen amwail papahier mehtei kan de duwen amwail iangehr ale sawas wet. Kohla nan liahona.lds.org oh padik “Submit an Article or Feedback.”