Ukpebnkpɔ Unwam, Akpa Ɔfiɔŋ ke isua 2019

Ndikop Oyoho Idaresit kabanga Unwam

Ndinwam ke ima adada idaresit osok andino ye andibo.

Ke ubakini nnyin ndiyom inemesit ke uwem emi ekeme nditie nte ndinam nkpo ke ukwak-usinge idem. Nnyin ke ifefehe edi ikopke mme nnyin imesim ebiet ndomokiet. Eke ubak owo, ekikere ndinwam owo ebiet nte ndidian utom efen nno mmo.

Edi Ete ke Heaven oyom nnyin idara ndien ama odoho nnyin ke “mme owo edu uwem, man mmo enyene idara” (2 Nephi 2:25). Ndien Andinyanga ekekpeb ete ke ndinwam mbon efen edi akpan ubak nkpo ke nte nnyin ididade idara isin ke uwem nnyin ye ke uwem mbon efen.

Nso Idi Idara?

Efiok idara nte “akwa ekikere idaresit ye inemesit.”¹ Mme prophet ukpere edem ini enam anwanga ebiet emi idara otode edi ye nte ekutde enye. President Russell M. Nelson odoho ete ke, “Idara emi nnyin ikopde enyene esisit nkpo ndinam ye ndaha uwem nnyin ye ofuri nkpo ndinam ye nting-enyin eke uwem nnyin.” “… Idara edi oto ye ke ntak [Jesus Christ]. Enye edi ntongo ofuri idara.”²

Unwam Ada Idara Edi

Ini emi Lehi akadiade mfri eke eto uwem, ukpong esie ama oyoho “ye akwa idara” (1 Nephi 8:12). Akpa udong esie ekedi ndibuana mfri emi ye mbon emi enye amade.

Unyime nnyin ke ndisin unwam nno mbon efen ekeme ndida oruk idara emi nsok nnyin ye mmo. Andinyanga ekekpeb mbet Esie ete ke mfri eke nnyin iwutde kini emi nnyin iyiride ye Enye eyenwam ndida oyoho idara osok nnyin (se ke John 15:1–11). Ndinam utom Esie ke ndinwam nnyung nyom ndida mbon efen nsok Enye ekeme ndidi ifiok-ukpeb eke idaresit (se ke Luke 15:7; Alma 29:9; Doctrine ye Covenants 18:16; 50:22). Nnyin imekeme ndifok idara emi kpa kini afanikong ye ndutuho (se ke 2 Corinthians 7:4; Colossians 1:11).

Andinyanga ama owut nnyin eti uwutnkpo ete kiet ke akwa ntongo ata idaresit ke uwem isong emi odu ke ndinam utom unwam. Ini emi nnyin inwamde ndito-eka iren ye iban nnyin nte Andinyanga akanamde, ke edisana ima ye ima ke esit nnyin, nnyin imekeme ndinyene idara emi okponde akan esisit inemesit.

Sister Jean B. Bingham, General President eke Relief Society ekekpeb ete ke, “Nte nnyin inode [unwam] ke ofuri esit, ke nnyin … iyesik ikpere ndikabare ndi mbon Zion iyenyung ikop akwa idara ye mbon emi nnyin ikanwamde ke usung owo-mbet.³

Didie Ke Nnyin Idinam Oyoho Idaresit Odu ke Unwam?

Odu ediwak usung ke ndida akwa idara nsin ke unwam nnyin. Se mme esisit ekikere ifang mi:

1. Efiok ntak emi mbufo enode unwam. Odu ediwak ntak ke ndinwam. Ke akpatre, ukeme nnyin akpasanga ukem ye eke Abasi “man ada uwem unana-mkpa ye nsinsi uwem osok owo” (Moses 1:39). Nte nnyin inyimede ikoot President Russell M. Nelson ke ndinwam mbon efen ke usung ediomi, nnyin imekeme ndibo idaresit ke ndibuana nam utom Abasi.⁴ (Ndifiok awak kabanga ntak eke unwam, se ke “Ukpebnkpo Unwam: Ntak Ekekpuhode Unwam Nnyin,” ke January 2018 Liahona.)

2. Enam edisin unwam edi abanga owo ndien okudi nte ubiong-utom. President Thomas S. Monson esiwak nditi nnyin ete: “Ekuyak ediyo mfina owo okpon akan owo emi ekpemade.”⁵ Ndisin unwam edi abanga ndima owo, idige kabanga nkpo emi ekpenamde. Nte nnyin ikoride ke ndima nte Andinyanga akanamde, nnyin iyewak ndikut idaresit emi otode ndinam nkpo nno mbon efen.

3. Enam ndisin unwam edi mmem-mmem. President M. Russell Ballard, Acting President eke Eboho mme Apostle Duopeba, eting ono nnyin ete ke: “Enam ikpo nkpo eto ke mkpri ye ndimem nkpo. … Mkpri ye ndimem edinam mfonido ye utom unwam nnyin eyewak ekesim uyoho uwem ye ima ono Ete ke Heaven, nsuk-ibuot nno utom Jesus Christ, ye ekikere emem ye idara ke ini ekededi emi nnyin iyomde ndinwam owo efen.” .”⁶

4. Esio ekaha ke utom edinwam. Idige ubiong-utom mbufo ke ndinam ebo erinyanga-ukpong. Oro edi utom owo oro ye Abasi. Ubiong-utom nnyin edi ndima mmo nnyung nnwam mmo ewongore etiene Christ, emi edide Andinyanga.

Ekubin Idaresit ke ndinam Utom-unwam Esio

Ubakini mme owo iyomke ndibup mbo unwam emi mmo eyomde, ntre nnyin ndino unwam ekeme ndidi nkokure nkpo emi mmo eyomde. Edi ndiyayat esit ke idem nnyin nam nkpo nno owo, ifonke nko. Ndibup mbo unyime mbemiso ono unwam edi eti ekikere.

Elder Dieter F. Uchtdorf eke Eboho mme Apostle Duopeba eketing abanga eka-ndito kiet emi mikedoho-ndo oro udongo ikang-enyong ekesimde enye—ndien edikem ndito esie eduo udongo oro nko. Ufok emi ekesisanade kpukpru ini ama akabade esebede onyung edehe. Ndedehe usan ye ofong awak oyoho ufok.

Ke ndo-ndo oro emi enye ekekerede ke usung unwam okure, ndito-eka iban Relief Society ema-ekong ke enyin-usung esie. Mmo iketingke ete, “Nam nnyin idiongo mme nnyin imekeme ndinwam.” Kini mmo ekutde nte nkpo etiede, mmo ema etongo ndinwam inikiet.

“Mmo ema enam ufok oro asana, eda unwana ye nsana-idem esin ke ufok oro, enyung ekot ufan mmo ete ada udia emi mmo enehede eyom edi. Ke akpatre ini emi mmo ekurede utom enyung ekom unyongo, mmo enam ekpri eka-ndito oro atua eyet—mmong eyet eke ekom ye ima.”⁷

Andino ye andibo mbiba ema ekop inemesit.

Enyene Idaresit ke Uwem Mbufo

Nte idara, emem, ye uyuho emi nnyin ikemede ndinyene awakde ke uwem nnyin, ntre ke nnyin idikeme ndibuana oro awak ye mbon efen ke nte nnyin inode unwam. Idaresit oto Edisana Spirit edi (se ke Galatians 5:22 and Doctrine ye Covenants 11:13). Oro edi nkpo emi nnyin ikemeke ndibong akam mbenge (se ke Doctrine ye Covenants 136:29) nnyung mbo nsin ke uwem nnyin. Se mme esisit ekikere mi ke ndinyene idaresit ke uwem nnyin:

1. Bat Mme Edidiong Mbufo Nte mbufo edungore uwem mbufo, ewet mme nkpo edidiong emi Abasi akanamde ono mbufo.⁸ Ese nti-nkpo emi akananare mbufo okuk.⁹ Enehede ese nkpo emi ekpekemede ndinam mbufo etre ndikop idaresit ndien ewet mme usung man enam-ofon ye ndinehede mfiok mmo. Kini Easter eke isua emi, eda ini man enyene akamba ebuana ye Andinyanga (se ke Doctrine ye Covenants 101:36).

2. Ekpeb nditi nkpo. Mbufo emekeme ndisop nnyene idaresit kini ekerede-nkpo sung-sung.¹⁰ Enehede ekpang-utong ke nkpo emi edinode mbufo idaresit. (se ke 1 Chronicles 16:15). Ndikpong nkpo media ke usukini ekeme ndinwam nnyin ikpeb editi nkpo.¹¹

3. Etre ndidomo idem mbufo ye mbon efen. Esitng ete ke ndidomo idem ye owo efen esitre idaresit. Paul ono ikpan ete mbon emi “edade idem edomo ye mmo, ye mmo esese idaha idem mmo eda edomo idem; mmo inyeneke eti ibuot” (2 Corinthians 10:12).

4. Eyom eriyarare eke idem mbufo. Andinyanga ekpeb ete: Edieke mbufo ebupde, mbufo eyebo eriyarare ke eriyarare, ifiok ke ifiok, man mbufo ekpediongo ndidibe ye nkpo-emem,—emi adade idara edi, emi adade uwem nsinsi edi” (Doctrine YE Covenants 42:61).

Ikoot man Anam-nkpo

Didie ke mbufo ekpenam idaresit emi mbufo ekutde ke uwem mbufo otode ke ndino unwam okpon?

© 2019 by Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/18. Enyimme Ndikabare: 6/18. Edikabare eke Ministering Principles, April 2019. Efik. 15765 553

Mkpri nwed

1. “Idara,” en.oxforddictionaries.com

2. Russell M. Nelson, “Idaresit ye Ndisongo-ndu Uwem ke Spirit,” Liahona, Nov. 2016, 82.

3. Jean B. Bingham, “Ndinwam ke usung nte Andinyanga Akanwamde,” Liahona, May 2018, 106.

4. Russell M. Nelson, “Nte Nnyin Ikade Iso Ɔtɔkiet,” Liahona, Apr. 2018, 7.

5. Thomas S. Monson, “Ndikut Idara ke Usung-isang,” Liahona, Nov. 2008, 86.

6. M. Russell Ballard, “Ndikut Idara otode Utom-unwam eke Ima,” Liahona, May 2011, 49.

7. Se ke Dieter F. Uchtdorf, “Ndidu-uwem Idara Oyoho Iko Abasi,” Liahona, Nov. 2014, 120–123.

8. Se ke Henry B. Eyring, “Mbok Eti, Eti,” Liahona, Nov. 2007, 67.

9. See Jean B. Bingham, “That Your Joy Might Be Full,” Liahona, Nov. 2017, 87.

10. Se ke Jean B. Bingham, “Man Idaresit Mbufo Okpoyoho,” Liahona, Nov. 2010, 22.

11. Se ke Gary E. Stevenson, “Spiritual Eclipse,” Liahona, Nov. 2017, 46.

Ekeme ndida mme ukpebnkpo ekedude ke etop emi esin ebuana nnyin kpukpru usen edi enam man anwam mme ono-unwam ndito-eka irenowo ye iban ke ukeme mmo man odiong owo kiet-kiet ye ufokemana emi enode mmo nte ubiong-utom.